TUUN LEH ZUA TE' HON ITNA...!!

By ~ Sang Quptong

KHOVEL a Mihing tengteng, Nu-le-Pa neilou a om leh zaw, thil maktak ahi ding hi.Tu a Nupi-Papi, Pitek-Putek i chih te khawng bang leng Nu-le-Pa nei ahi uhi. Nu-le-Pa omlou a Khovel vak mutheilou himhim i hi uh chih hiai in hon musak hi. Huaiziak in, Nu leh Pa (Tuun leh Zua) te'n hon itna uh suikhawm dia kisa i hi peuhmah uhi.

Zi leh Ta nei ka hi zenzen kei a, himahleh Nu-le-Pa hoihtak kepna nuai a khangkhia ka hihman in,Tuun leh Zuate hon itna gen dia kisa i hi. Zi leh ta neisate'n gen le uh a siam mahmah ding un a gintakhuai, a ziak ahihleh, amau sisan a piang ngoih-ngoih a iit bang ua, amau leng, a Tuun-le-zuate un iit ahi uh chih a theih di ziak un. Bangteng hileh, i theih dandan in siam leh siamlouh genlou in i kikumsuk himhim ding uh.

Eden huan lam ah va kik vengveng zual le, Pathian in Adam a bawl a, huaikhit nung in, Adam nakguh apan Evi abawl chih, mitsiin sa ale i theih uh ahi. I gennop pen bel, Adam leh Evi te Nupa ahita mai ua, a Tate uh: Kaina leh Abel a di'n a Tuun-le-Zua uh ahi mai uhi.Tuun leh Zua a poimohna i theihciang taak uh a gintak huai hi.

Tuun leh Zua te apoimohna uh i theih kawmkawm un hon itna te uh i hamhaih kha pahpah sek uhi. Nu leh Pa ka nei chiteng in ngaihtuah thak zual le, I nu leh pate'n Tuisik a i om apan hon na kuahtou (paai) in, haksatna chikim ana paltou uhi. Nu in a ta, asung a om pe'n amah a ding in, 'Thaltang' bangmai himahleh a malam ah, kha 9 sung hon na kuahtou ngiitnget hi.

Na nu'n kha 9 Sung, a malam a hon na puak sung in, haksatna leh lungkhamna bangzah ana tuak dia? Na pa'n bangzahta in a tha ana seng dia? Ngaihtuah tham mahmah hilou hiam? Kha 9 zoh in, haksatak mai in hon na hingkhia a, Na tu'n leh Zua kipahna na hi ngal hi. Himahleh, Kipahna ahih kawmkawm in banghiam na chih zek chiang in lunghimohna in na nu leh pa zelsuak pah hi. Nang hon itluat ziak uh ahi chih na thei hia? Tu'n ta leh nau neinailou na hi maithei, himahleh Nu-le-pate hon it didan zaw lungsim neichiang in hisap(imagine) theih hi. Na ngaihtuah ngei himhim hia?

Na kah chiang a lunghimoh pah a, na daih vengveng chia lah lunghimoh zel te Na nu leh pate ahi uhi. Nitak bangzah nang ziak in a zanhak di ua? A diak a Zoudawn lam a tengte 'focus' deuh le i chi hi. Zoudawn lam i chihchiang in Lou nasep a kivak ahi tangpi hi. Zoudawn a piang ka hih mahbang in, Kum 7 ka hih apan ka nu leh pa nasepna ka huh thei hi. Lou nasep a nuam chih na di a vang mahmah mai..! Ni hong sa alah, 'Khuaiva' in hon vel huthut mai. Vuah hong zu a lah thoukang hi'n *kanglou hitaleh a kidaihlah mahmahzel uh. A NOPNA DI HIMHIM A OMKEI. Sun hun a Nu-le-pate'n haksatak a nasem himah le uh a tate uh a itziak un ana zanhak mun mahmah uhi.

Zoudawn lam genzual lai le, Lou halkhit ahih chiang in louhal a kangtumlou teng tomkhiat ngai ahihman in, 'Mangtom' kichi a, sing vom bimbem khwng kitomkhawm hi. Mangtom khawmte, loulai mah a sekhawm tiltel, Ni sa zomahi , mangtomte i hal behlai bang zaw..!! Huai kia ahikei, buuk kichi Mangtom hun in a kinei naikei a, Loulai munkhat peuh ah  'Suun-ann' kine hi. Mehtui om manglou khawng in a kine liak-liak a, i ki-ettuah chiang bang in, i maikhawng a vom bimbem hi. Dang lah taak pahpah, tui lah tawm mahmah, ei dangtak di Nu leh Pate'n a khual ziak ua, ei tui hon dawnsak ua, 'Kei dang zaw taak kei' hon chih mahmah uh ahi, ka khonung ngaihtuah chia ka khasiat. Nu leh Pate aw, Lou nasem in na omden kei di ua, Dangtak a hon koih denlou di ka hi aw...!! Lou nasem kawm a hiaitan nawn na tut uh ka kipak lua, chihchih dia hoih samai ka hi.

Zoudawn lam i hahgen sim a, Lamka zaang a Zomi omte leng tun leh zua te'n hon itlou hituanlou ahi uh. A neih val uh hi hetlou in School leh College hon kaisak ua, en School leh College bang di'n i va zang a le? Hun-awl zatna di maimai a zangkha i hi diam? Sisan-Naisan luang zung-zung a guhtui kang zen a Nu leh Pate'n Siam hon na sinsak vanglak ua leh Vakiangbu bangmai in i siamsinna bawl nimnem kei le maw..!! Ka nu leh ka pa bangchik chiah lungnuam tak in ka i hmusak thei dia? Chih ngaihtuah ding ahi (kei tel in).

Nu leh Pate i chihchiang in, eisang a kum 30-40 khawng a upa zaw ngen ahi nawn uhi. Huchi ahihleh, ei sang in thil ana theizaw tham ding uh chihna ahimai hi. Ei stage teng ana tawnsuak ta ahi uh chih mangngilh kei leng deihhuai sawnsawn hi. 'Paite Khonung pil' chih bang leng om ahihman in, a hunlai in Pil sawm ni aw?

Thil banghiam i duh leh deih i ngen a, hon hihsak kei ua leh nuak a kitom khum mawklouh di ahi. I nu leh pa'n hon itlua uh ahi a, i duh leh deihte hon hihsak nuamlua uh ahi. Himahleh, khosakna leh bangkim et masak a hoih di. Pawng nuak mawk in i nu leh pa lunggimsak deuhdeuh dia, khakham vei a sihloh thei uh ahi chih tate'n i phawk uh deihhuai hi.

I ngeksen apan a hon na zanhahpih i nu leh pate' en i letnung in ihmut limtak in i ihmusak na uh hia? Ta leh nau neite'n na ta leh naute uh na it bang ua, na nu leh pa'n hon it uh ahi chih na thei na uh maw? Na nu leh pa neih leh lamte nekangtu na hi kha hia? Na nu leh pa bangzahvei kamsia in na hou khata a? Hiai dotnate ana kidawng in aw?

Note: ''TUUN LEH ZUA TE HON  ITNA  GELTHAK CHIAT  NI  MAW?''