MUALNUAM VANGKHUA PALLUN TA KA CHIH LEH...?

By ~ Sang Quptong

December ni 3rd. hi'n ka thei a, nitaklam ann nezou dak 6:00 vel ging di kuan hong hih in laisim di'n ka Room ah ka lutta hi. Ka lung aleng mahmah mai a, laisim thei di vual ka hi kei. Ka khua uh 'Mualnuam' ngai a munuam ka na hi maimah hi. Miimbang pianna vangkhua ahih banah, khanletna ahihman in ngaihlouh theih leng ahi kei hi.

Electric lah vaklou ahi a, vot lah vot mahmah mai, meiphu awi di lah kineilou ahih chiang in, ka 'Study Table' ah keikia ka liing keuhkeuh maimah hi. Huchi ka om laitak in, ka phone hong ging a, ka et leh, Mualnuam lam a om ka nu-le-pate ana hi a, ken leng ka Pick-up ngal hi. Ka pa'n,''I khua uah December ni 5 apan ni 9tan tournament om dek ahia, huai hun ah Guite Kual a khua tuamtuam leng kichial ahi, hong paithei zual lechin zaw..?'' hon chi hi. Ken leng, 'Buaihuaisim mahleh paithei di ka hihdan ka pa kiah ka gen hi.Pianna vangkhua kum bangzah hiam muhlouh nung a tua muhnawn di chu phurhuai himai, ka om didan le ka thei kei zozen a, ka kilek tuahtuah maimah hi. Ihmu di chi'n ka lum alah ki-ihmu thei mahmah lou. Mualnuam khua omdan leh lawm leh vual toh khosak khwmlai khawng ngaihtuah kawm in lupna tung ah zan sawtpi ka hun ka zangta hi. Huchi'n ihmut theih khak leh chi in Lengtong Paunou in aphuah,Thawnkham in asak..''Pianna vangkhua mubang hon ngai ing ee..'' chi la siamtak a a awih ngiahngiah khawng ka ngai nilouh ta hi.

Huchia om-om ka ki sak leh, JOSEPH TRAVELS sung ka na tung mawk hi. Kouleng dk.7 chet a Lamka apan kipankhia in, Lampi hoih mahmah ahihman in,Tuima Vangkhua/Tuima City ah ann ka ne ua, huai in dak 12 a ging pan hi. Ann nezou kipankhe nawn in dak 1 lak in Mualnuam Vangkhua ka tung pah uhi.

Mualnuam kong luttouh dek tak un Gari gin hong lamdang guih a, ka dakkhiat leh Lamtou sim khat om ana hi a, huai ah awl-awl in a kize kaitou ngiatngiat sam hi. Huchih hunsung a ka veilampang ka et leh ''WELCOME TO MUALNUAM, ZYA MUALNUAM UNIT'' chih signboard a lianpi a kitak dengdong ka mupah a ka chimul bang hong thou dek sungsung hi. Saulou ka taitou nawn ua, ka veilampang mah a ka dak touh leh..Grace English Jr.High School ka mu pah velvol hi. Hiaimun ka neu apan ka laizilna inn ahi chih ka haih kei, himahleh, Sawng 3 tak bang a sang a Building a kibawl ahihman in lamdang ka sa mahmah hi.

Gari tailah khawl tuanlou ahihman in khosung chu kong lut petmahta uhi. Field lui (a kiphuthak lou pen) lam ka et suk leh Field di dan ka mu nawnkei. Sing liansim pipi a pou hing dipdip mai ua, a saklam nawl ah lian deuh in, ''G.HAUKHANLIAN MEMORIAL PARK'' chih kigelh ka galmuh suk a, akigelh lianzaw ahi peuhmah di, kisim thei hial hiven. 

Kotpi Veng kheng phei in VeNgpi ah Bus Stand ana om a, huai ah ka khawl uhi. Vengpi le ana maimai tuan kei. Lamsak lam ah Bazar Buk sautak ana kikham phei a, huai ah, nupi hon mehzuak in atu dim phei uhi. Naupang lah tam (skul khwlta ahihman un), himahleh trop tak a om ka mu kei hi.

Ka malam ka etphei leh, EBC biakinn ka galmuhphei velvol nawn a, 1999 lai a zaw hichi dia ka gintak louh hi a ka chi vungvung sam hi. Ka gari tuanna un Sinzawl tan pha di chih ahih ziak in ka tai phei nawn ua, EBC biakinn khang ka tung ua, ka malam ka et leh lampi hoihdeuh khat ana paisuk a, huai pen in Field Thak (Hanmual sak a field) pen sunsuk ahihdan ka thei hi. Huai phet leng ahikei lai, hiai Road Min ding in, ''G.TUALKHOHAU ROAD'' a kichi a, a lampi a supiching khop mai..! 

Field Thak ka mu suk ban dia o chi a ka etsuk leh neng chik ka mu a, himahle hhuaisang a muhnop zawk di ka khang zek ah ana om hi. Banghiam i chih leh, ka khang zek ah '' KAIKHOMANG MEMORIAL STATUE'' chih ana kigelh a, hausa pu Phamsa Kaikhomang lem ana ding velvual hi.

Kou leng khawl hetlou a tai ka hihman un ka inn kong uh ka tun tak un, 'kari' (gari) ka khaam a ka kumkheta hi. Lampi lah hoih, Lampi omte lah chu, Min ngaihpipi kiminvuah ana hi uhi. Mualnuam khua a supiching khopmai. Kei leng kihahsiang zou in, Hausate innlam ah khodak kawm in ka va vaksuk hi. Hausate inn ah Hausa Pu.Mangmuanlal Guite ana om a, thil tuamtuam genkhawm in sawt simtak ka kihou uhi. Ka kihou zoh tak un saklam ka et leh, Office hoihtak khat ka mu nawn hi. A pamlam ah ka mit ka vakphei sak nawn a, PCI biakinn sak ka et leh, School om nawnlou hi'n ka thei a, himahleh ''KHUPCHING LEH NGAMBAWM PARK'' chih kigelh ka simthei mialmial hi. Hausa pu'n ka kiang ah, a khang ah PCI school omna mun pen Lenna in a bohtheih dia kibawl ahi a, ''LEENNUAM AIRPORT'' KICHI a ZYA te etkolna nuai a om ahi hon chi hi.

Huchia ka ki hou laitak un ka phone hong ging a (Netwrk khosung a om vek mawk ahi ), ka khanglou guih hi. Ka phone a 'Alarm' ka set ana hi a, Zinglam dk.4:30 a ging chet hi. Kei le lupna apan thoukhia in, ''MUALNUAM VANGKHUA PALLUN TA KA CHIH LEH......''chi a aban le sunzom nawn tuanlou in, kintak in ka kihahsiang a, kholam a pai di'n Station lam ka manoh ta hi. 

Writer's note : N.B: Hiai a tung a min kizangte a mawk a kizang ahi kei a, Mualnuam khua  hong pallut di kal ngaklah huai i sak nang uh leh, kho hausa hon na sihsan sate theih gige na di a amin uh hong kizang ahi.

---Kakipak---