By ~ Nasri Jona Tawmbing TxNâ
EMILY HINKHUA I
Writer's note: [ Phalna la masa lou in, koi group, koi blog, koi magazine mah a laksawn phal ahikei]
BUNG 1
:::::::::::::
THUMAPI :
Mihing te'n mihingte hinkhua mah i sui ngei dia aw ,,,, ! chih khong ka ngaihtuah a, mihampha pipi i om lai in, amah Emily vangtahdan a ana vangtah kha le hiai khovel ah mi tampi a ki -om din ka gingta hi. Hiaithu agen
lai leh, ka gelh lai in leng ka ngaihtuahna apai sau in, vangpha ka hih dan ka kithei a, amah Emily ka ngaihtuah ching in hehpihna'n ka dim hi. A hinkhua a thil tungte leh athil hihte le amah ut ziak hilou in, a mangbat, beidot tawp khawk atun nung a hiaibang a gamtang kha ahi chih ka thei a, amah dinmun ah kei leng om hileng, ama hih sang a nasa in ka hinkhua ka zang ngei di'n ka kigingta.
________________________
Computer dawhkan maa ah tu in, games ka kimawl a, ka mit a kham sim ziak in, ihmut mai ka sawm hi. Ihmu dia ka kisak lai in, "ka online louhna le sawt lawta", chi'n, online di'n ka kisa khonung phing hi. Himahleh ka ihmut hong suak lua ahihman in, ka notification teng ka et zoh in, lup mai ka sawm thak hi. Huchia Log-out dia ka kisak laitak in, massage khat hong lang san velvol mawk hi. "Lamdang na mok e, kuan hon inbox a tam aw,,,,"! Chia kingaihtuah kawm in, ka massage open ka sawm hi. Net hatlouh ziak in ka open pah thei kei a, minute 5 vel ka ngak nung in ka hon sim thei pan hi.
F ~ "Hallow **** damzel maw? Buai thei lua maw? Tulai, na tangthu gelh sim di om nawnlou in chin chimhuai thei lua. (khaih kei thugelh maimai, a sangsiat theih theih maizen toh, ana simsak zel hi di-ei ve chi'n, ka nui tret tret hi).
M ~ Pathian ompihna tang in ka damzel, nang la,,,, damzel maw? Tangthu gelh di le kithei zoulou hi veh aw, mite bang a siam lah kihilou a, hun mahmah le kineilou hi veh aw. Ka thugelhte, a sangsiat theih theih toh, nawn hem phatna ah ka kipak lua.
F ~ Eh ! Sangsia chimawk kei ve, kei chu na thugelhte ka simnop zong ngen ahi, paukam kulmut tak zat sawm tuan het ken aw, tua na gelh dan a, paukam tual-leng khong zang a thugelh mah sim nuam ka sa.
M ~ Ahi maw, paukam kulmut zang ut leng le siamlou ihih chia, i siam dandan a gelh zel mai ngai ahi. Nang le na hon gelh zel kei dia, midangte gelh simsim lou in hahahaha
F ~ Gelh chu utlua ing a, hilehle paukam kisiam lou lua in chin, post ngamlou, den chiah mite nuihzabuk khong i suak di chih lauhuai ka sa a, gelhsa chu ka nei aka.
M ~ Eh! Zum nang bangmah omlou pi, siamlouh dan dan a hih di hang a, mite phazou kei mah leng kal nih khat bek a chu maa kisawn mai di eivoi, hon post pah ou, ka sim ut gopta.
F ~ Ka post ngam mahmah kei, nang ana post sak mai ve, huaichiah a thu le edit ngai tamsim maithei.
M ~ Nang post lechin hoih zaw lou di hia ! A hih kei leh na Password leh na E-mail hon hilh le chin, nang Account ah ka na post mai kei dia.
F ~ Ka password zaw kon hilh hial dah mai di (hon hilh le chin le, bangchi mah a na Account khoih hetlou di kei ve, huchi bang lungsim nei dia hon ngai na hi di maw ?!) nang post dan in ana bawl maive maw !
M ~ Ole, poikei nang chih dandan ahimai, ahih ziak in ka edit dandan a na lung kim ngai di ahi aw. hahaha
F ~ hahaha Zuau na hel kei phot leh heh lou e, ka thugelh chu kon khak di.
M ~ Eh,,,,,,,,,paukam mahmah in kihou thei leng ut huai ka sa, na omna hon hilh le chin, ka hun remchang masa penpen ah, kon pawt zaw mai diam?
F ~ Poilou, nang hun na neih theih di nak leh. (A veng uh a hon hilh a, a phone No. a hon pia a, ka hoh theih hun a phone mai di'n a hon gen hi)
Ka Pa'n, ka sep di tuamtuam gen in, office kai di'n hon kuansan nung in, tutphah tung a tu in ka kingaihtuah neuhneuh a.,,,,, Tuni Emily te inn va kizongsuah henla, amah hon ngetna bang in atanchin tamlou va kidong leh, chi'n, zing ann nekham, ka Pa'n sep di hon hilhte semlou in, inn apat in ka kikhalh khia hi. Phone apat in ka kan zel a, a veng uh agen-na ka tung in, ka phone thak nawn hi. A hon hilh dan a pai zel in, step sausim tak ka zuih nung in, Numei khat, lian lampang, ngoulua lah hilou, vom lua a gen di lah hilou ka galmuh a, akiang ah "hiai lak vel ah Emily kichi, amah kia a teng na theikha hia"? Chi'n ka dong a, nui seisai kawm in, "**** na hi maw? Na mi zawn kei ka hi, hong lut ou" chi'n a inn uah ka kizuilut uhi.
Innsung ka lut phet in, lamdang ka sak mahmah ka mu ngal hi. Inn neuchik himahleh innsung van kirepfel dan khong ka mu a, zuntha dia bath room ka lut nawn leh bathroom leng a felfai mahmah mai a, ka lungsim in "hiai nu mi kizen mahmah khat eive chi'n ka ngaihtuah neuh neuh a, ka potkhia, bangbang hiam gen a ka kihou nung un. "Nong potna a gamla si a, singpi kon lum di o" chi'n singpi a hon aw-m a, a gam tatdan ka et chiang in mifel leh kizen mahmah khat ahi chih ka thei hi. Vuah hong zu a, ka thugente uh kiza gina thelou ahihman in kinaih tak in ka tu ua, akisil zouphet chu a hi ngei dia, gim a namtui in, a sam kot niangniang, tang silsel zomah te'n, ka mihing hinna ahon langsak phial hi'n ka thei mai hi. Kinaichik a tu kawm in aman a tanchin a hon gen panta hi;
September 19 (khovel a Ni teng teng lak a, kei a dia Ni danglam leh Ni mulkimhuai ni pen).19** in khovel haksatna leh lungkhamna zang ding in, Aizawl Civil Damdawi inn ah, khovel vak ka hon mu hi. Khovel hiai bang a kei a dia lungziin huai di saleng zaw hiai khovel ah ka piang hetkei di, ahih ziakin huai hunlai in sia-le-pha bangmah ka theih louh ziak in, khovel in kei a dia kipahna hong tun theih lamen in, ka nu'n duat tak in, a gilsung ah ana paai lian hi. Ahihziak in sia-le-pha ka theih nung in ka nu-le-pa itna himhim ka mukha kei hi. Phet lou in, pi-le-pu, sungkhat laina it-tu di himhim mulou in, ka khovel ka zang tou beuh beuh hi.
Kum thum (3) mi lel ka hih in ka nu-le-pa ana kikhen ua, ka nu'n Pasal dang nei in, mundang ah a om khia a, ka pa'n leng sawtlou nung in zi dang nei in, ana inn tuan khia hi. Tagah ka hihman in, ka Pa sungte'n leng hon hih duhdah mahmah ua, Naupang kum 5 lel himah leng piching nnasep bang bang hon semsak ua, Kum 8 ka hih tanpha in school leng kailou in, inn ah nasem in ka om mai zel hi. School kai thei vual ka hih bang in ka lungsim a nna in, ka vualte ka eng thei mahmah mai a, ka nasep dite ka sepkhit chiang in, ka potkhia a, ka lawmte school kai na lam ah ka vahoh zel a, school kiang gamnuai ah, ka lawmte laisim ging leh a kimawl khong uh en in ka tumai zel hi.
Huchia ka omdante, ka sungte'n a hon theihkhia ua, school hon kaisak nak sang in, ka gentheih na behlap tumai ana hi zaw mah lai hi. Genthei kisa lua ka hihman in, ka Pa U numei (ka Ni chih di ahi di chu) pasal neitate inn lam a om di'n kei thu in ka paikhia a, amau school khong hon kaisak ua, ahihziak in, ahaksat dan bel a kikiamtuan kei hi. Niteng in "mahni inn a le om peihlou, na thadah ziak, hiai nana hih di, hiai le.........."chih ka zak gige te khong ka ngaihtuah chiang in, huai hunlai a kei bang vual di naupang ka muh chiang in lainatna in ka pumdim zouhial lai hi.
Kei a di'n Pathian min loh le kisuanlah huai mah leh, Pathian kepna leh vualzawlna tang in, Kum 14 ka hih in Class 7 ka Pass a, Kum 14 sung vengveng nam-mang in ka om hi. Paite ka hih lam himhim ka kithei kei a, huai phet lou in, Paite pau malkhat leng ka thei kei a, ka lawmte toh, pau dang zangte nuihsan a, musit tak a ka om chang un leng, a uang pen in ka na pang gige zaw mah hi. Ka kimohsa kei, aziak bel, Paite ka hih lam kua mah hon hilhtu di a om kei a, Paite pau zat nang himhim omlou ahih ziak ahi.
Class 7 ka pass kum in, mikhual ka nei ua, huaite ahihleh kua dang hilou in, ka Nu Unau (ka Pu) te, kei hong mudia hong hoh ahi ua, ken leng amau ka muhtung in ngaina theipah kei mah leng, Ni 3 tan a om nung un chu ka ngaina in, a kiang ngen uah ka om hi. Ka Pu in, "kou omna lam ah na hong hoh ut leh hon thuaithei di ka hi uh, na Ni te'n hon phalkei mah le uh, nang "ka ut" chi le chin hon phallou ngamlou di uh ahi" a hon chi a, kei leng ka ut lamtak ahih ziak in, ka Ni te'n hon phal lou sim mah le uh, ka Pute kholam Lamka zuan in ka paikhia uhi.
Ka school kai nang khong hon buaipih sak ua, " calss 8 di himah le chin zirlai bu a kibatlouh toh" chi'n class 6 ah hon lutsak thak ua, a tunglam in, lelsim mah leng laisim nang hun tampi nei ka hihman in, vual phalou lua in ka om kei a, Kum 20 ka hih in +2 ka zou a, Pathian hehpihna tang in, BA zou in, hiailam ah ka hong kik hi. "Ka tanchin gen di atam mahmah a, na ning ahihleh non hilh mai di aw" chi'n kei lam en in hong nui seihsaih hi. Ken bel, "Ning zenzen lou e, na gen peih tantan ngaikhe peih ka hi. Huaithu ngai dia hong hoh kei voi" chi'n ka dawng hi.
Ka Pu te khua Lamka ka tung ua, a hon duat un, tangnel tak in omthei mah leng apau uh bangmah theilou ka hihman in, ka tangnel di bang in le ka tangnel thei zok kei a, kei le ka theitawp a kizir in, kumkhat ka om nung in, ka ut dandan in, ka zangtheita hi. Ka inn kiang uah, sungkuan khat, a pa uh, Politician, hausa mahmah a teng ua, amau toh leng inkuan khat bangmai in ka om ua, ahihziak in, ka khosakna uh a kikhiak luat ziak in, amau innlam ah ka tangnel thei hetkei hi. Ahihziak in a Tapa uh bel a ut-le-dah in kou inn ah hong khosa zel hi.
Lungsim ah naupang kisa mah leng, ka innvengte tapa pa'n nungak chei a hong chei sek ahihman in, alou theilou in, lengla tutpih chihkhong ka hih a ngai a, amah le Saptuam, Tuailai pawl khong a kizang, Gospel mahmah (alat dan in) ahihman in, ka pu te'n le hon hal lawmlawm lou un ka thei hi.
Ka hunluite ka ngaihtuah kik chiang in, tua ka omdan pen nuam ka sa a, kei leng ka hlim thei mahmah mai hi, ka pu te ahih leh gentheitak, nektom zong a khosa mai ahi ua himahleh, Aizawl a a ka sungte, khaloh tampi pi la te sang in ka kithutuak zaw ua, inkuan kipak tak leng ka hi zaw ua, ka gentheihna un, a hon kipumkhat sak hi'n ka thei hial hi.
"Piching ki hi ta a, sungte chawmsa a om om hoih kei" chi'n nasepa, sum tamlou khong laklut theih khak leh chi'n, sep di zong in ka buai thei mahmah mai hi. Huchih lai in, nikhat vangphat huai tak mai in, Dawr ngak di ka mu a, kei leng phur tak in innlam ah ka paikik a, ka sungte ka hilh ngal hi. Amau leng "sep di mu na hih leh, a thupi hi'n thupi lou himahleh, ginom tak in na sem di" a hon chi ua, a zingchiang in kei leng Dawr ngak a kiloh di'n ka sempan ngal hi.
Ka lohsuah sunsun, ka sungte ka pevek zel a, innkuan poimoh tuamtuam lei nang in ka zang ua, neukhah in ka khosak na uh leng adan omdeuh hi'n ka thei a, ka kipak a, nuam leng ka sa mahmah hi. Nikhat Dawr van hong tung ziak in, Dawr ka khak khit nung in, innsung lam ah, hih di tuamtuam te hih in, ka buai mahmah mai hi. Ka hih di bangbang hih khin a ka potkhiak leh, khua leng ana mial mahmah ta a, Ka Dawr ngakna leh ka inn uh kigamla lua ahihman in, "khe in pai leng tunghak law mahmah di ka hi,,,,", chih ka kithei a, ka Dawr ngak na kiang a Dawr ngak thou in a Scooty a hon khelsak hi. Kei leng kipak tak in innlam zuan in ka taipah ngal a, saulou khah ka tai nung in, ka maa ah, pasal khat akhe bai laihlaih apai ka mu a, a kiang ka tu'n in, ka khol a, a painang lam ka dot leh, kei painang toh kibang ahihman in, chi'n ka inn tan uh hong tuang tei di'n ka chial hi. Himahleh amah pen ka theih ngei mi ahihlouh ziak in, ka ngaihpen apha vak kei hi.
Inn ka tungnang a sawt tai le ngai nawnlou, khe in pai leng le, minutes 10 in chu inn ka tung man himhim di, chihkhong a gamla ka tun in, kei lam manawh in, car khat hatsim tak in a hong tai a, kei bel lampi a siat luat ziak in ka taihat thei tuan kei a, ka kiang nai a hong tu'n in, hong hat tai lua, lampi lah sia ahihman in, kei taina (side) lam ah wrongside in hong tai a, ken leng lampi nawl thei bangpen ah ka na awn hi. Himahleh lampi selua ahihman in, kei lam ah neukhah a hon cut phei leh, a nunglam in, ka scooty a hon hetpuk hi. Olchik a kipuk himah le-ung, ka khe a hon delhkhak ziak in ka thou thei kei a, ka nung a tuang, khebai pa ahihleh bangmah liamna le neilou ahi dia, a thou a, bangmah genlou in a hon paikhiak san hi. Lamdang ka sa a, "ken khebai chia, ka hehpih ziak a, a thawn a pua ing a, Vangsiatna ka tuah a le hon ngaihsak lou" chi'n ka heh mahmah mai hi. A hon delhna pen nalua hikei mahleh, thohtouh ka sawm chiang in ka thou zou kei a, panpihtu khat lel om lele olsam tak a thou tou thei mai di hing a.
Khebai pa'n hon paisan pen thutuam hi leh, car a hon hetpai tu'n leng a hon ngaihsak hetkei lai hi. Ka kipuk uh a hon mu a, "parking nang omlou ziak a taisuak a, denchiah hong buaipih na'n teh" chi'n ken leng ka na ngak mai hi. Ahihziak in, minutes 5 khong ka ngak nung in leng a mel muh di himhim a omkei a, "bang nachi a, a na hia ? Chia kamsiam bek in hon gen leh a kilawm lai a, wrong side atai hizomah lai, kamkhat lel a le ngaihdam le hon ngen lou" chi'n ka heh mahmah zel hi.
Keimah a ding thei vual ka hih louh man in leilak ah ka lum top a, "kuahiam khat hong pai na ve" chi'n lamen tak in ka ngak top hi. Mi hong pau ging neuhneuh ka za a, kintak in, ka en phei a, kikhom tawp innlam zuan ana hi ua, "hiai te zaw hon panpih di'n ka ngenta ngei ngei di", chi'n lamen tak in, ka na en hi. Gamla lou chik hong tu'n tak un, mikhat in agal apat in ahon mu a, kei hong panpih dia hong taiphei a sawm leh, alak ua khat, upa lam sim mel pu khat in, "huai zukham, omhoih utlou khong, panpih khemkhem ngaikei" achih ka za a, ka et thak leh, kei panpih sawm a, hong tai pen le ka munawn kei a, lampi dang ah a hon pial khiak san uhi.
Ka khe a hon delh khakna pen na lua hikei mah leh, ka kipuk nung, leilak a ka lupna sawt lawta ahihman in, votsa in ka taksa ahong ling hial a, panpihtu di ka zong chiang in lah kuamah muh di himhim a om kei ua, beidong tak a ka omlai in, puan-ak angkilh le kilh lou, nin anin zawmah, pasal khat kei lam zuan a hong pai ka mua a, ka kiang hong tun in, ka mai zul chit ah hong en a, a gim a pat in zukham ahi chih ka thei pah hi. Aman panpih ngai ka hi chih thei in, ka scooty ahong phong a, kei leng olsam tak in ka thou khe thei hi. Kipak lua ka hih man in, ka sum neih sunsun cheng 100 ka phorh khia a, piak ka sawm leh a la ut het kei a, ka piak teitei lele alak ut tuanlouh ziak in, ka pelui ut kei a, "ahihleh na inn tan uh kong kha di" ka chih lele a ut tuan louh ziak in, a Phone Number ka ngen a, ka lak khit nung in, innlam zuan in ka taikhia a, zukham pentak in hong panpih kha, chih ka ngaihtuah chiang in lamdang ka sa a, ka ngaituah den hi.
Ka lungsim in, " hon panpih tupa kiang ah, kipahthu gen nang in, bang-hiam ka hihsak ngai ahi" chi'n ka ngaihtuah a. "Himahleh, thil ka hihsak phut hileh, huai zan a cheng 100 ka piak le hon laksak di hi a, huaisang in hun remchang ah, restaurant ah nektheih ka treat zaw mai di" chi'n thupuukna ka bawl zaw ta hi. Ka Dawr ngakna abuai theilua ka hih man in, hun remchang ka nei thei kei a, ka Dawr ngak louh ni, ka man ni te lah Band ni hi zel, Band ni a lah restaurant te le kihong boksi lou ua, Khakhat lam mahmah liamta ahihman in, ahon mangngilh man di chih ka lau gu mahmah mai hi.
Nikhat, ka dawr ngakna neitute'n innkuan vai ah banghiam hih di aneih ziak un, kei leng Dawr hong lou a, om tawldam di'n a hon hilh ua, ken leng hun remchang sa in, huai Tangval pa ka phone pah ngal a, kimuh nang hilh in, an nekham kimu di'n, thupukna ka bawlta uhi. Kei ka tung masa zaw a, sawtlou ka ngak nung in, a hong tung a, ka ngaihdan mai mai in chu, "nalh lua hikei mahleh, neukhah bek a hong frest deuh di'n ka na gingta hi. Himahleh ka accident zan a a van ak tengmah aa in, ka kiang ah hong tu a, huihnung zong in leng a gim hong nam hamham zel hi.
Nektheih a duhzong khong dong in, a gente ka order a, bang bang hiam gen in ka houlum u hi. Ken leng huai zan a a hon panpih ziak in ka siam bang bang in kipahthu ka gen-a, Dawr apat a ka paikhiak, aman a hon panpih maa a ka thil muh leh theihte khong ka gen a, aman le lamdang sakmel tak in hon en hi. "Nang hon panpihlou hilechin, kei, keimah alah thou theilou ka hih chia, kipak lua ka hi, sep di poimoh khong na neih khak leh", chi'n mahni innlam chiat ah ka kikhen nawn uhi.
Ka accident ziak in bangmah khonung a gen di natna ka nei kei a, ka Dawr ngakna leng hoihtak in ka sunzom thei zel hi, himahleh ka period (numei te khabi) hong hih dek chiang in ka khua khong hong sik a, lupna ngak a damlou hial hikei mah leng ka ngaih aphat louh ziak in, nikhat ka Pu lak ah Doctor ki check up sak ka ut thu ka gen hi. Ka Pu'n le, "zingchiang sunma in va ki ensak inla, sun-nung in Dawr na hong mai di" chi'n, ka ngetna theisiam tak in hon pomsak a, kei leng ka kipak mahmah hi.
Zingkar ann nekham baihtak in damdawi inlam zuan in ka kuan khia a, Receiption room ka naih pah a, card lasuah in ka ki entry ngal hi. Ka maa ah mi 3 chouh a om ua, kei leng sun-nung lam Dawr ngakman a tungkik dia ka kigintak ziak in ka lungsim a nuam mahmah hi. Sawt kuam tak ka ngak nung un leng Doctor a hong tung thei kei a, ka lungsim a kinoh sim ziak in Doctor hong tung hun di mi vadot ka sawm hi. Meltheih ka neih louh ziak in, ka tawpkik thak hi. Himahleh Dak 11 lam gingta, "tutan hong kuanlou ahihleh ka maa a mi 3 om zawmah lai, ka nasepna ka Pu chih hun in kuan theikei leng hoihlou di" chi'n ka kiang a Nupi khat kiang ah, Doctor hong tung hun di ka dong hi. "Nidang bang hileh zaw a hong tung hunta hi a; ki-ensak atam sim ua, hong zekai hi'n teh" chi'n hon dawng hi. A dawnna theisiamlou ka hih man in, "ki ensak di te lah hiai ah i omvek ua, koi a, kuate a ki-ensak na chih te "? Ka chih leh, "Tulai Doctor hiai a semte'n innlam ah Dawr khong bawl in, hahpan mahmah ve uh aw, a hitak in gen leng, a office louh hun-ol kar a, sum muh nang chia a hong uh zaw hi'n teh, hilehle customer a tam chiang ua, huailam mah ngai pomoh zaw zel uhi. En le sum kinei leh huailam mah kinaih di hia ! Sum i neihlouh ziak a, hong kuan di leh kuan louh di theiloupi a ana kingak mai mah ahi" chi'n hon dawng nawn a, bangdang genlou in kei le ka Dawr hong man louh khak lau in, ka Dawr lam ah ka paisuak ngal hi.
BUNG 2 NA
:::::::::::::::::
Pathian ompihna in, ka hoih tou zel a, ka kisoiselna te le damdawi bangmah hihlouh in hong hoih tou zel hi. Ka Dawr ngakna a buaitheilua ka hih man in, nitak ann nekhin ka lum a, zing ann nekham ka nna ah ka diang ngal zel a, lawm leh vual polh nang hun himhim ka neithei kei hi. Himahleh ka nasep ah ka lunglut ziak in ka kipak in nuam ka sathei mahmah thou hi. September Ni 18, nitak ka lupdek in sms ka dong a, ka et leh, ka innkiangte tangval pa'n. "Zingchiang na Birthday kon loppih di, sumseng ngai tengteng ken ka tum vek di", chi'n sms hon khak mawk hi. Ka lungsim kipak mah leh, lamdang ka sa a, ka nna kholsan ngai di ahih le chu hitheilou di hi a, lah ka pian nung Kum hiaizah paita a, khatvei mah le ka Birthday lawm kha nailou, chi'n sawt simtak ka kingaituah nung in, "a kipah huailua, huai na gen vuak le, kei ka dawr ngakna a kuan ngai teitei di, khol ngenmun lua ka hih chia, kei adia kisuanlah huai ahi", chi a ka reply leh, "ahih di kul-le-poimoh omte ken ka na hihvek mai dia, nitak chiang in i lawm mai ke", chi in hon thawn/khak nawn hi."Kei Birthday lawm di maimai kiphal na lawm lawm e, ka Pian ni ka gen-na a sawt taktak maizen toh, ana theilai dan ahi maw"! Bang teng hileh "zingkal in genkhom thak ni maw. Mangpha hoihtak aw"! "Nang le Mangpha hoih lua Bye !!
Zingkal in ka inn ua hong pawt a, nidang a le hong pawt gige ahih ziak in ahi di mah in ka koih hi. Himahleh ka gintak louh tak in, "Emily Birtday, lawmte toh lop sawm ing ua, na phalna lou un lah bangmah aman gen ngamlou ahih chiah, ken hon ngetsak kei ve", chi'n ka Pu te kiang ah hon gen mawk hi. "Tulai khovel zaw, pilvang tak a zatkan omlou eive, thil houchik a minsiat theih, i mualphounate'n lah damsung daih thei zaw mah, ahih ziak in nang na tel theih di le zaw phallouh hial zaw omkei", chi'n ka Pu'n a dawng hi.
Ann ka nek lai un, ka Pu'n "na vahoh di ua, sawtpi nong om kei di uh, ahihziak in sunlam na nna zaw kholsan kei le chi'n", a hon chi a, ken leng, ka khol louh di thu leh, zansawt omlou di chi'n ka dawng hi. Ahitak in chu Umuan ziak in, Saptuam ah Tuailai pawl bang kholkhol ah ka tangnel phah a, amah ziak in lawm leh vual lak ah leng tangnel tak in ka omthei hi. Huaiziak in a guuk tak in zahtak huai ka sa a, amah lah mi hausa tapa, lawm leh vual lak a le mite tung et, saptuam lam chi leng lah, kizang mahmah, tuailai pawl khong ah OB a telpha chiang ahih toh, muang in ka muang petmah hi.
Nitak lam hong hi a, "Umuan, innlam hong phalou in, Birthday lop nang na chihna mun ah kong pai ngal mai di, koilak a"? Chi a ka text leh, aman a Motor a hong thuai thei di chi'n, dawr ah ana ngak di'n hon hilh hi. Hichi tel a kei a dia a kipiak zoh mok lamdang ka sa tawpthei kei a, ka ngaihtuahna apaisau mahmah mai hi. Amah ziak in, leh ka Pu te inkuan ziak in ka hunlui, haksatna tampi ka tuahte ka mangngilh a, amaute ziak in, ka neulai a genthei tak a hon koihtute lak a phuba lak utna lungsim ka neih teng leng a beizou hial hi. Horn hong ging a, inkong a ka vadak-khiak leh Umuan a pa car sung a tu ka mu a, ka mitkha in, a kiang a tu dan khong in ka kimu hi. Ka liangkou ah hong beng thepthep kawm in, "Emily bang ngaihtuah e, lungkim louhna nei maw? Hon chi a, ka halh guih a, ka etleh amit leh ka mit chiangtak in hong kituak kha a, mundang en in, "hong tungbaih na chia Umuan, ka dawr kon khak di aw", chi'n ka dingkhia hi.
Inntung lam kaltouhna leilawn ka lak-khiak na lam ah, ka khut bang ka hih naa zawmah hi. Kongkhak keikia a kai niam zoulou ka hih man in, Umuan in hong kaih pih a, Tala a kalh in, a chahbi le Umuan ka kemsak hial hi. Motor sung ah lut in, bang bang hiam gen in ka tai zel ua, inn lianlou khah, atuam sim a om kawng ah ahon kholpih hi. Huai inn ahih leh Umuan in ka birthday lopnang chia Hotel room khat ana booking na ahia, asung ah ka lut ua, room sung lam ka zuan ngal ua, kei gintak dan in, lawmte mi tampi ana omta di ua, bang bang hiam hih a ana buai vingveng di-uh ka sak lai in, kuamah midang himhim muh di a om kei ua, "bang chi dan a hon lop-pih sawm ai dia aw,,,,,,,,"! chi'n ka na buai gu mah mah hi.
"Umuan lawmte kuamah lah omlou ua, hong tel om di hia omlou di, eigel kia a zaw.................." ka chih leh Umuan in "hong tel om mah ke, lungkham keive, hong tung phialta un teh", chi'n in konglam ah hon pawtkhiak san hi. Keikia in room ah ka om a, table tung a cake nalh deuhmai a ki design khong, a kiang kimvel teng a candle (bati) kitungte khong leh, pak nalh taktak te ka muh in, ka lungsim hon khoih mahmah mai hi. "Kei tagah, nu leh pa chi a gen di le neilou, genthei zawmah, kei Birthday lop nang chi a bangdia hiai bang tengteng buaipih a sum tampi seng ahi dia aw, na Birthday lop nang chi'n sweet tangkhat lel hon pe lele kei a dia manphalua hia", chia ka ngaihtuah lai in, Umuan hong lut nawn hi.
"Nang a Birthday neitu pen, bangchi e, lungkim chikei na chia, hehna nei maw", ahon chi a, "Ih, nei zenzen lou..........." chi a ka dak-khiak leh ana nui seisai hi. "Emi, lawmte ka Phone leh manlou di chi pawl toh, dak 9 lam a man pan di chipawl toh, bang i chi dia le, na Pu'n lah paihaklou dia hon chi zawmah a", Umuan, nang ngaih dandan", light hong mit a, room sung mial-lua ahihman in, Umuan ka bohphei a, aman le hon na pawm in, khomial nuai ah, ka muk ah hon tawp hi. "Ka hihkhelh ahi , Umuan, hiaite hih louh di ahi, lingt hong mit leh ka lau lua a", chia paikhiak ka sawm leh hon lenkip lua ahihman in ka paikhe thei kei a, ka muk ah khatvei hon tawp nawn hi. "Zu gim hong nam na chia U muan, zu dawn maw"? light leng hon vak nawn kuau hi.
"Zu chu dawnlou, khua a lum lua a, beer ka va hih cheuh a" chi' hon dawng hi. Duh maw "? hon chi a. "Ih , duhlou, nang le dawn nawn het ken aw, Umuan, hoihlou ahi; Saptuam khong bang a kizang zawmah chin a" ka chih leh, "Saptuam a kizat ziak a a poina omlou pi. Mu hihlouh le hilou a, tuzan khong chu, hih cheuh lele poilou hilou maw, nang le tamlou hih ve", chi'n a bag a beer bottle hon lakhia hi. Kei a dia a kipiakzawhna leh a kiphalnate ka ngaihtuah a, a lungkim louh di ka lauh ziak in, nou khat ka dawn a, aman bel bottle 2 lam dawn bei hi. A beer dawn kawm in, "lawmte le hong hoh lou di-uh hita'n teh. A na patsan mai ni maw"! Chi'n candle hon hal a, beer khong dawn in, amah le hong pau ut panta hi. Kei bangmah dawnlou a ka ompen, nuam salou in, inkong ah Pepsi bottle khat a kihongsa in hon tawilut a, ka dawn di'n hon pia hi. Zu hel ahihlam theilou in ken leng a kimkhat mahmah ka dawn a, candle mutmit din hon sawl a, ka mutmit khit vek nung in, cake hon cut a HAPPY BIRTHDAY TO YOU chih laa sa kawm in ka kam ah hon guang lut hi.
Aman beer a dawn a, ken Pepsi ka dawn a, bang bang hiam gen a ka omlai un, ka lung hong am mawk hi. Bangkim ka thei a, himahleh bangmah hihthei ka nei kei, ka khanlawh in, lupna khat ah ka na lumkhawm ua, zinglam Dak 1 ana pelta ahihman in, innlam zuan in kong pai ua, ka tung a Ka Umuan thil hih ka thei a, himahleh bangmah gen ngamlou ka hih man in, a theilou dandan in ka om maimah hi.
Kha 3 khong hong kivei tak in, Naupai ka hih lam iim vual louh a hong langkhe di ahihman in, ken leng lin kawm pipi'n ka Umuan kiang ah ka hilh hi. "Poilou pi, i kiteng dia himai" chih paukam za dia ka kilamet mahmah lai in, ka lametna leh a hon dawnna, lei leh van kigamlat bang in a kigamla hi. A khen chiang in "kei ka hi kei, midang hi'n teh" a chi a, a khen chiang in, "damdawi zang in hih ke mai aw" a hon chi hi. Ka lungkham mahmah mai a, kei tagah, Nu leh Pa le neilou, hon hehpih ziak ua ka Pu te kiang a om mai hi'ng a, ka tung a thiltung theihsiam haksa ka sa petmah hi.
Ka Umuan in kiteng mai ni hon chi leh bel lungkham nang bangmah a omkei dia, kipak tak in nupa ka hi ding ua, himahleh ka Umuan in lah, hon neih himhim a sawm kei a, "Saptuam a ahihnate khong gen in, nikhat ka kiang ah nau suke ding in nget petmah in hong ngen hi. "Pathian in nupa hihmaa a thil hih louh dia a deih pen hihkha ing a, huai ka hihkhelh le khok salou a, tualthat tu hih zokmah lai di" chih khong ka ngaithuah chiang in thil hithei hilou chih ka thei a, ka tuhgah hangsan tak a aat ngam ding in ka lungsim ka bolfel a, ka Umuan kiang ah, "na ut leh hon kitenpih inla, na ut leh hon kitengpih ken la, huai chu nang thu ahi. Ahih ziak in, thilkhat, nau suk-kiak chih pen hihlou himhim di ka hih man in, vuaikhat mah le suke di'n hong ngen nawn ken la, hon nei ngamlou na hih leh, ken zawlta ka pom dia, nang le zawlgai hi veve thou na hi" ka chih leh, "Emi hehpih tak in ka dinmun hon theihsiam pih inla, naungek na hihke nuamlou ahih lele, kei zaw hon gentel hetken aw, ahih kei leh na naupai hong kilat khiak ma'n mundang ah hon paikhiak san mai le chin chih kon ngen" a hon chi hi. Ken le "Aw le ahoih e, kei hon ngetna bangmah na hon pomsak louh lai a, nang ngetna kei hon pomsak dia deih nei ve maw, na angmasial dan lawmlawm, thil hithei lou ahi. Ka mualphou bang in nang le na mualphou thou di ahi. Hiai lei ah, mihingte lak ah iimthei mah lechin Pathian kiang a immthei tuanlou di na hi" chi'n ka dong hi. Aman le lungtangpha honsa ahi dia, paulou in hon paikhiak san hi.
Ka sungte hilhkei leng a hon theihkhiat hun uh om thou thou di ahihman in, ka Pi Man kiang ah, ka tung a thiltungte, ka Umuan in hon kitengpih a utlouh dante leh, nau suke dia ahon sawl dante, a vek in ka hilh a, aman bel ahon theisiam mahmah mai a, "nungak hi chi'n ua, khatvel tatkhelh ziak a thil omthei mah hi. Nau suk-kiak khong ngai zenzen lou, ahih ziak in, hiailam mite khosakdan nang le na thei di'n kon gingta. Pasal neilou a nau pom chih khong kuaman mi muhlou uh ahia, huaiziak in nang le thil bangkim nathuak ngai di ahi. Bangteng hileh na Pu le i hilh ngai di ahi. A ziak bel tu'n hilhkei mawk leng denchiah ahon theihsuah hun om thou dia, nang a dia haksa zaw di ahi. Nitak lupna ah ka na hilh di" chi'n hon dawng hi.
Ka Pi paukam in a hon khamuan mahmai a, ahihziak in ka Pu'n thei leh bang a hon chih dia aw, chih ngaihtuah in ka lungsim a buai mahmah mai hi. Lungsim buaitak a lupna tung a ka kingaituah lai in, ka Pu'n hon sam a, a room uah ka vapai ngal hi. "Nang mihing nu zaktalou maw, (a hon taina te paukam hoihlou ngen a hon tai ahihman in, a genkhiak leng nuam ka sa kei hial hi) a ut tawk a hon tai khit in, innsung apat in hon hawlkhia a, ka Pi'n khouh chih petmah in khou mah leh, talou ahihman in, kei leng thumang tak in, ka potkhia a, "koilam manawh di, kua vabel di ka hia, genthei tak a ana khanglian ing a, tua ka gentheihna te'n hon paisanta, nuamsa a omdek pan a ka kingaih lai in, ka gentheihna kipan dekphet ana hidan eive" chi'n khase tak in ka kap maimah hi.
BUNG 3 NA
:::::::::::::::::
Kap kawm a innkong lam a paikhiak ka sawm leh, ka pi leh a tanu Momoi in ka potkhiak di phallou in hon dang uhi. Momoi ahihleh kei sang in Kum 1 lel a naupang a hia, unau dan a le ki-en lou in, khanvual polh in ka kipawl zel ua, a sia apha kihilh in ka hlim thei mahmah mai uhi. "U Kim (Momoi hon sapdan) koimah ah na potkhe thei kei, ka Pa kiang ah khatvei bek ngaihdam ngen le chin, hon ngaidam di eive, na paikhiak di leh ken le kon zui di" chi'n hong kap hi. Ka Pu ngaihdan hong hi nawnlou chu ahi dia, room apat hong pawtkhia in, "nou tegel le hawlkhiak ut umaw,,,,,,,,! kintak in innsung ah hong lutsan ua,,,,,,,," ch'n hong hang phunphun hi. Ka Pi'n bel a pasal zahtak siam mahmah ahih ziak in, innsung lam ah alut kawm in, "Emi, mangpha, damtak in", chi'n mangpha hon khak a, Momoi ahih leh innsung a lut dia ka sawl nung in leng a lut nuam het kei hi. A tawp in ka Pu in aban ah kai in hon kai lut a, kei leng manoh nang lam theilou in inkong ah ka pawtkhia hi.
"December phalbi khovot nuai ah, mi varandah khong a giah di chih ka ngaihtuah chiang in, nidang in genthei ka na kisa sek na a, hiai ka'n-a gentheih huai khovel ah om tuan dia hia,,,,,,,,,? Kuamah mohsak di ka nei kei. Ka hihkhelh ahia, ka gilsung a naungek om, sawtlou chik nung a mihing hong suak mai di ngaihtuah in, amah adia haksa chiteng ka thuak ngai ahi,,,,,,,,,,". Chi'n ka lungsim ka khauhsak a, a zankhat nang in, phalbi khovot nuai ah mi Varandah ah ka giak hi.
Umuan tanchin ka theih ut ziak in, Momoi kiang ah Phone in ka dong zel a. Amah ziak a haksatna chiteng thuak a, inn-le-lou, innten nang neilou a ka omlai in, Ka Umuan ahihleh, a omdan kilamdan na himhim anei kei a, a nu-le-pa'n leng bangmah in a ngai kei ua, "zawlgaitu" ahi chih mite'n thei mah le-uh, aman "ka hi kei" achih chiang in, a nu-le-pa'n leng amah gen mah gingta in, Saptuamte natan in, gawtna bangmah pelou in, a hihna bang bang sem sunzom sak uh chih khong ka theih chiang in ka lungsim hong naa in, "kei leng ka nu ka pa mite nu leh pa te bang a hausa a, neizou hile-uh zaw, hiai bang tel dinmun a dinglou di hi'ng a, apoikei, ka maa a thil ka tuah di om bangbang ka tuah ngai ahi" chi'n ka kihanthawn zel hi.
Ka Umuan kiteng ut kei mah leh a nu-le-pa te'n ka sung a naungek tagah mai di chih a ngaihtuah chiang un, hithei salou uh ahi dia, Momoi kiang ah, "na Ukim ana houpih inla, a Umuan toh kite'nsak dan ngaihtuah ka sawm uh,,,," chi'n Momoi ana hilh ua, Momoi in leng kei kiang ah hon hilh sawn pah hi. Kei leng kipak tak in ka om hi. "Bangthu bang vai hon hawm di ua aw,,,,,,,? " chi'n akhen chiang in lam-en tak in ka om a, a khenchiang in lah ka bei adong thei mahmah mai hi. Nu leh Pa nei hi'n innsung pa-ngai tak a khangkhia hileng zaw, ka mel leh puam ah zaw ahon sit uh ka gingta bik kei hi.
Hapta khat vengveng scooty a ka accident lai a hong buaipih tu Ukhual innluah ah ka om hi. Sum nei hi leng zaw Lamka potkhiaksan a, koilam hiam a zinmang vengveng ka ut hi. Ka dawr ngaknate lak a ka loh lakkhitlouh lak di om chih ka theisuah a, kintak in a innlam uh zuan in ka pai ngal hi. Himahleh ka pute'n ka lawh tengteng lakhin vek uh ahi chih ka theih in ka heh mahmah mai a, himahleh hihtheih dang bangmah neilou ka hih ziak in, lungkimloupi in ka kiik hi. Lampi a ka pai lai in ka Umuan toh ka kituak kha ua, ka Umuan in, "Eh ! Emi, koilam pha dek, koi a om e,,,,,,,,,? Chi'n hon dong a, ken leng ka omna pen gen leng hon hehpih sang a hon simmoh zaw di chih ka theih man in, ka omna genlou in ka hohna kia ka hilh hi, chih leh ka Umuan in hon hehpih ziak hia, gamdang a ka om a deihziak chih ka thei kei, sum sang nga hon pia hi. Sanglou theilou ka hihman in zakta kawm pi'n ka sang hi.
Khawlak a mipi kivei mutmut te kawmkal a ka pai lai in, ka cellphone hong ging a, Momoi ahi. Thu kipah-huai lam gen dia gingta tak a ka pick-up leh, Ka nu leh pa hinkhua apat Mou dia hon sit uh chih thu Momoi in hon hilh hi. A tapa uh sawn ka pai nung a le ka nu-le-pa khang a na suisui lai uh ahi chih ka thei a, pilvang zou uh ka sa mahmah hi. A dik, zi-le-pasal kinei di pen ni 2/1 lel adi hilou, damsung adi ahih chiah hon khah/suang tute kisui leng thil poimoh mahmah hi'n ken le ka thei hi. Himahleh, ka tung a thil tung di bangbang tungkhin ahihman in, ka nu leh pa, ka pi leh pu te hinkhua va suisui lou in, hon kitengsak lel le uh, kou gel adia le hoih zaw di hia. Bang teng hileh, hiaitan ka thuakta a, hangsantak a thuak mualsuah teitei dia hatna ka neih a ngai chih chiangtak in ka thei thak hi.
Ukhual innluahna a om kawm in sum tamlou khong ka lohkhe zelsam a, sum khol a koilam hiam a zin mang ka lung gel hi. Ukhual ahihleh khamtheih ahih nak luat ziak a a nu-le-pa'n insung apat a hawlkhiak uh ahia, himahleh kei tung ah bel a hoih mahmah mai a, sang-gam taktak dan in hon en thei mawk hi. Nikhat Ukhual in, "Emi nou bangbeh e,,,,,,? Chi'n hon dong mawk hi. Ken le lamdang ka sa a, ka behmin uh ka thei kha ngei kei himhim chin ka dawng hi. Himahleh ka ngaihtuah thakthak leh ka pa u in amin tawp a agelh zel pen hi din gintakna ka nei a, ka gen leh Ukhual in leng, ka omna veng ua ka behte tamdan hon hilh hi. Ken bel bangmah a phattuam nang himhim ka thei khe zoukei.
Nikhat inn a ka om leh, papi khat hong lut a, ka kihoulim nung un, Emily ka hih leh hihlouh hon dong hi. Ken leng "ka hi, bangziak e,,,,,"? Chia ka dotkik leh Ukhual in ka tanchin ana hilh a, behkhat ka hih dan uh khong vagen ahi ngei dia, hon hehpih luat ziak a kei mu a, panpih dia hong hoh ahihdan hon-gen hi. A inn lam ua kisuan di'n hon zawn a, himahleh Ukhual ka haksat mangbat ni a hon panpihtu omsun, taisan nuamlou ka hih man in suanlam ka bawl hi. Ka ngaihtuah a, sisan laigui zoppih le hilou behkhat chih ziak a tanau dan a hon bawltheih pen lamdang ka sa a, ka ngaihtuah den hi.
Ukhual lak a kha 3 vengveng ka om nung in Aizawl lam a paisuk ka ut dan Ukhual lak a ka gen leh Ukhual in le lem hon sakpih hi. Himahleh sum omlou in bang chin ka zin thei dia,,,,,,,? Ka lungsim a buai petmah a, lamet di dang nei tuanlou ka hihman in zanlam a ka behpa hong pawtte kiang ah, ka haksat dan gen in sum ka vangen hi. Amau le hon hehpih lua uh ahihman in "Imphal to Aizawl Air tricket ka na laksak di ua, adang le na poimoh leh na poimoh dandan ka hon pe di,,,,,,", chin hon dawng hi. Flight tricket kei ka kilak mai di chi a ka gen leh, "ahihleh thildang a na poimoh na a om khak leh......." chin Cheng 10000 hon a pia uhi.
Ka kingaihtuah a, fligt lou in, sumo in pai leng sum save zaw di chin sumo ticket ka la ngal hi. Ukhual in "Pai di na hih leh", chi'n kikhakna di'n bawngsa ana lei a, ann nekham awl a kisa in, Zingchiang zing dak 7 a pawt din ka lum hi. Zingkal in Ukhual in hon phawng a, "dak 6 pelta eive, dak 6:30 a na tungman ngeingei ngai, na late kha di", hong chi hi. Ken bel dak 7 a pawt di bang dak 7 khong in kikuankhe pan leh le, kilapman nalou di a maw, dak 8 ma'n hon pawtpih thahah kei un teh,,,,,", ka chih leh, Ukhual in a punctual dan uh khong hon gen hi. Punctual tak in dak 7 chet in Lamka nusia in, sumo kum tamtak a na service ta hileh kilawm tak a, mel upa simtak a tuang in ka pawtkhia ua, ka kiang ah Papi khat Kum 40 vel a upa khat, sum hauh ziak a saptuam Upa pangthei chiang melpu a tu-a, afel mahmah mai a, lampi ah ka kihoulim zel uhi. Singngat a sipaih te check gate ka pel ua, ka kiang a tupa'n, "Guite kual kilut-ta" chin hon hilh hi.A sakmin "Guite kual" a chih chih uh ka za mun, ahihziak in a mun ah khatvei le ka mu naikei a, ka mit ngei a mu di ka hih ziak in ka kipak petmah hi.
Ka tai zel ua, A nungpen line ah Tangvalnou, lup hun theihlou bang a zingthoh hun theilou hileh kilawm a, mit bing chi'kche-k tu te ahihleh, apau kholkei ua, Driver pa kiang a nungak amah sepsuah sa zang a van a lei hileh kilawm tak, nalh deuh mai a kithuam/chei a tu tei bok a, a kicheinate ka et-et chiang in, Paris khopi konglai a vakte kichei nang hileh kilawm khop in nalh ka sa hi. Ka vek un mi 8 ka tuang uhi. A lunglen huai ngei mai, khatvei ka muhna mai himahleh a gam a teng ka ut tha a suak mahmah mai hi. Lamka zaang a mihausate neihteng eng a, mi nuai a ku'n a kilohtawm sang in, hiai lam ah kiteng hen la, mahni ut dandan in nna kisem leh, nuam kisa zaw di chih khong ka ngaihtuah hi. A khen chiang in ka ngaihtuahna ka kinialsak a, ana om himawk leng, kipaipohna lampite lah kuva hailou in muam thoh lele amah a zanvek thei di khop a sia, khuate en le lah, luahloh vangkhua mah bang a lui gepguap, chih khong ka ngaihtuah lai in, ka kiang a tupa hong paukhia a, "bang e , na ngaihtuah"? A hon chi a, kei le thakhat in ka halh a, ka ngaihtuahna tengteng ka genkhiak leh, aman hiai dan in hon dawng hi. "Ka neu apat hiai khua (Guite kual sung a khua khat) ah ka teng uhi, hiai kual sung a di'n kholian pente lak a khat ahi. Ahih hang in a neizou masasa in Lamka lam ah hon pemsan zel chiang un, chi'n haksa sakawm pipi in nikum masa in ka na pem tei uhi".
"Bangziak a pemkhia khia uh ahi dia aw,,,,"? Thei ut a ka kingaihtuah lai in, ka ngaihtuahna thei hileh kilawm in, "A ziak bel, kumpi dang vaihawmna nuai a om a kihihziak in, hiailam a tengte Govt. in hon phokpha kei a, Lamka chiang bel a dan omdeuh ahihman in, Lamka lam mah kinaih zel mai ahi. Denchiang in hun hong pai zel dia, hiailam a teng di omlou in Lamka zang ah i kisekhawm nouhnouh di-ua, hiailam a teng di le ki-om nawnkei di chih lauhuai sa mahmah ka hi. Ei mahmah le ki-om peihlou ahih chiang in, midang om dia sawlluih theih lah hilou, Huchi'n awl awl in Namdangte hong teng di ua, kum bangzah hiam nung in namdang khut ah a om maimah di chih lauhuai sa mahmah ka hi", a chi a, a gente ka ngaihtuah chiah dik ka sa thei mahmah mai, kua moh ahia ? Eite lak a le MLA/Minister khong le kinei thou hilou maw ? chi a dot ka sawm laitak in, ka maa a nungaknou in, "an nelou di maw"? A hon chi a, kei le ka gil kialsimta ahihman in, kintak in ka kumkhia a, hotel ah ka lut hi.
BUNG 4 NA
::::::::::::::::
THUMAPI :- ("Vai nanung vuahsia in lap", chih hisek mahleh, vuahsia in hon lap hial louh ka lamen,,,,,,,,,Min[name] tuamtuam hon gkizang zel di ahihman in, nang min toh kibangkha hong tel khak zenzen leh kipak in na nui di hia, dah in na kap di chih kon-gen theikei, a ziakbel na min a telkhak leh nang na hikei chihna ahi.) Mihing telak ah, Pathian in a zat ut deuh mi omtuam ahi hial dia aw,,,,! Chih khong ka ngaihtuahna ah hong piang mok hi. Himahleh Pathian in a mizat ut te, a zatdan kibanglou in, a tuamtuam in zang thei hi. Amah Emily ngei in le, hiaithu genkhe dia Pathian in mengmuh theihna hon pia ahi hia, ahih kei leh zawlnei khat a hon bawl chih amah leh amah le a kithei kei hi.
---------------------------------------------------------
An nekham sawtlou ka khol nung un, kong kipankhe nawn ua, ann ka nekna uah driver pa'n zu hon dawn ahi ngei dia, apau ut in, a motor khalh bang ahat sim vutvut mai hi. Lampi lah sia, driver pa'n lah hek hat ngal, a guk in ka lau petmah a, ahihziak in bangmah ka gen hial kei hi. Ka tai zel ua, a vangkim a driver pa'n zu dawn zel ahihman in, ka tuangpihte'n le laugu sim uh ahi ngei dia, ka kiang a tupa'n, driver pa kiang ah, "Nakham lua, hiai ah khawl phot ni. Na kham a veng deuh chiah i tai nawn mai di-uh", a chih lele driver pa ut bilbel lou ahihman in a hon taipih zel a, a khen in motor apat tawmkhiak a sawm ua, a khen in driver pa khoih sawm hileh kilawm in a melh ua, abuai a ka buai vengvung lai un; "KA UTKEI" chi a kikou ging ka thilza'k nanung pen ahi.
Vak ka galmuh a, vak in ahon naih zel a, ka kiang a hong tu'n in, vak lak ah mikhat melhoih leh siangthou mahmah mai khat in ana en gige hi. Kei lam hong naih zel in ka baan ah hong len a, nidang a ka muh ngei nailouh na mun ah ahon pi hi, Ka ngaihtuahna thei hileh kilawm tak in, "chikmah a namuh ngeilouh leh na theih ngeilouh thil hon musak a, hon theisak di ka hi", ahon chi a, ka baan ah hon kai hi. Gamlak, sing leh mau ngen a dim, inn himhim omlou, phetlou a mihing mel himhim muh di omlouhna ah ahon pi-a, koi gam ahi dia aw ! Chi a ka ngaihtuah lai in, "ZOGAM ahi, Zomite luah dia ka chiam gam hi", chi hi-awmtak in a hon en hi. (Hiai ka kithuah sung un, kuamah ka paukhe kei ua, ka ngaihtuahte aman a theivek a, aman leng genkhe tuanlou in ka lungsim ah hon theisak dan in a hong lang khezel hi).
Leng ka hi uh hia pai ka hi uh chih bel ka thei kei a, leng hipen in ka kithei hi. Ka leng zel ua, tang tung lam khong ah ka kal ua, phaizang zaapi mun ka tung ua, a khopi mahmah a, paakhuan a paak chi tuamtuam te bangmai in ka mu hi. A paak kilawm taktak te kal a Inn thupi taktak te leh mihing kize mutmut ka mu a, lamdang sa tak a ka et lai in, aman, "Hiai khopi en mahdih, ka nam/chi te'lte khopi ahi. Ahihziak in ka thu bangmah a ngailou in thang-huaina chiteng in a dimta uh. Ken ka mite kibang vek a ka et lai in, amaute lak ah, genthei leh hausa a kikhentuam mahmah mai ua, mi hausa leh thil hihtheite vaihomna a suakta. Hiai a inn thupi mahmah te khong en mah dih, amaute sepgim ziak a sum-le-pai lawhsuah a kilam sang in, migenthei taktak te neih sunsun laksak a kilam a tam zawtham ahi,,,,,,,,,, "ka lungsim ah hong lang a, 'Ziin hong li'ng henla, nekgu'k ziak a inn kilam teng puk mawk leh inn puklou a vang mah di,,,,,,,,,,", chi'n ka na ngaihtuah man get hi.
Biakinn lian leh thupi taktak bangzah hiam ka mu a, a inn a thupipi maizen toh, a sung a kikhom di mi atawm mahmah mai ua, bang chitel ahia,,,,? chi a ka ngaihtuah lai in, 'kei bangkim hihthei amaute Pathian ka hi chih bel athei uh, ahihziak in, phat di ka hih dan leh biak di ka hihdan bel a mangngilhta ua, en mah dih kikhawm sunsun te le a biakna uh a keu mahmah mai. Kei biak sang in khovel nopbawlna lam a uangbawl zaw uh' chi'n mundang a hon musak a, nungak tangval zu-le-sa ne a dawn a om ka mu nawn hi. Aman "ka gam sung ah hiaibang khelhna a om ding chih ka gingpha ngeikei, ahihziak in amaute lak ah ka melmapa diabol in naktak in nna asem hi. A khosak dante uh en mah dih ka melmapa deihlam ngen ahi,,,,,,," chi'n, zukham a vuaktang phialphial a laam, kikawi, leh thang-huai taktak a gamtangte omdan ahon musak nawn hi. (ka omdan teng leng hiai apat a ana kilang vekthei ahihdan ka thei khia hi).
Hon lengpih zel a, zanmial bangmai a mialna mun ka tung uhi. 'Mialna mahmah e' chi a ka ngaihtuah lai in aman, 'ka mi-le-sate tenna en mah dih, nidang in ka lungtuak zong in vai a hawm ua, amau leh amau le'ng a ki-it siam mahmah mai ua, kei leng kipak lua ka hihman in, vualzawlna chiteng in ka na vukh hi. Ahihziak in ka vualzawlna theisiam lou in, amaute thil hihtheihna ziak asa ua, zahtakna himhim a hon nei kei ua, kimuhsuahna hun ka bawlsak ahi. Hiai hunhoih ka piak sung a kimusuah lou uh ahihleh, a hoih louhna uh a tawpsan ua kei lam ahon naihtheih nang un, a tung uah vaidang ka hawm lai di.
Kum 100 val paita in, hiai lai ah ka sikhate tungtawn in ka thu theihsak in a omta, ahih hang in, mitampite'n ana sang lai un hiai mun a tengte'n zu-le-sa ne a, dawi leh kau biakna ana topsan nuam zok lou uh hi. Ka sikhate le thangpai mahmah uh ahih chiah, a thugente uh ana pawm theih nang un, vauna ka pesak hi. Huai ka vauna tangtungsak ka hi' chi'n ahon gen nawn hi. Lamdang ka sa a, "kei hihtheih hileh zaw hiai bang a ka mi leh sate a om uh zaw phallou di hi'ng a,,,," chi'n ka kingaihtuah hi.
Malam nawt komzel in ka leng ua, sotlou nungin lui liansim mahmah khat kamu nawn ua, ahih hangin aluiguam te asia in kawl-lak ngen mah abang hi. Aman '"hiai luiguam en mahdih, ka melmapa'n aki neitu bol mahmah ta, kamite tunga athangpaih chiang in, agotnang in azanga, mitampi te hi'nna ana laksak ta, ahih ziak in sotlou nung in ka lakik nawn dia, hiai kima awm, ka mite hamphatpih di khop in ka vualzawl lai di" achi hi. Sot en ngamlou kahih man in aman le hon theisiam in ahon le'npih zel hi.
Luidung apat khosaklam manoh in ahon lengpih zela, tang sang taktak tunga inn kilam sesouh te ka mu a, nopmel kasa mahmah mai hi. Huchih lai in aman, 'nop zaw nuam mahmah, ahih ziak in hiai laia kamite'n kei ahon zumpih ua, atung uah kathang apai ahi. Khovel ah Nam hiaizah kabola, Pau leh ham hiaizah kana omsak hi. Ka thilbol leh hihte, khat lel zong hih khelh kanei kei, ahih ahang in, amau te kiangah anam di-ua kapiak azahpih ua, apau leh ham, tawndan te amangilh ta uh, amau te'n ahihna te uh zumpih loh ua, ahihna bangbanga lang khe ngam hi le uh tu hun in nuamsa takin ka bolthei, a hihna azahpih ziak un kei ahon zahpih na uh hi'n kangai hi". Chi'n hongen muat muat hi.
Kenbel bang mi, bangnam gen ahia chih huai hunlai in bangmah ka theisiam hetkei hi. Huai tak in aman, 'Zosuan kichi te te'n-na leh khosakdan hon musak nuam kahi' ahon chi hi. Ka namtel te ahi uh. Tangtawn gawtmuna apai di-uh ka phal louh man in, gamlapi apan in amute honkhe dingin mi kasawla, amau te'nle thumang takin ka sikha te thu mang in, dawi leh kau, singbul suangbul biakna topsan in, kei kiangah ahong kipelut uh. Hun bangtan hiam ka lungtuak zawnga khosa a, aki vaipuak lai un, khovel changkan-na zang in setan in akhema, huai ah mi tampi ana khempuk hi. Ahih hangin amaute honkhe dingin ginom taka ka gamnasem tamlou a omlai uh, amaute ziak in ki ngaihtuah na hun kapia ahi' achi hi'.
Mal-lam manawh in ahon lengkik pih a, mualtung leh guam kense mahmah lak a kilam, khopi thupi mahmah khat ahon ensak nawn hi. Thupi salua a ka et vengveng lai in, aman, "hiai khopi en mah dih, 100% Kristian kichite khopi ahi. Ahihhang in kum tampi paita ahihman in, ka thu sang in khovel thilte a ngai thupi zawta ua, ka thu a nelhsiah ua, thil thak a kipahpih ua, ka thu a theihna un, kum 100 bang val thamta ahihziak in, lui sa in, thilthak, pawlthak hong om peuh a bawh ua, hiai inn ding metmutte sang in Pawl a tamzaw phial hi.
"Ka vualzawlnate chapou/kisaktheihna'n a zang ua, ka namtel chi tuamtuam te'n,amau nam/chi te tawndan chiat humbit dia ka deih lai in, hiaigam vaihawm tute'n amau lalna gam chi'n amau Namte pau leh ham, tawndan zuiloute amusit ua, a nelhsiah ua, tu'n amaute tung ah ka thang apai mahmah ta". mailam ka sawn zel ua, nungak tangval, ut-le-dah a omte, nupi - papi, amau nupi/pasal telak hilou, midangte zi/pasal te lak a thang-huai tak a gamtangte ka mu nawn hi. Aman, "Mei leh kaat a ka gawt, Sodom leh Gomorra khelhna le hiaite sang in a thupi zaw tuan kei, ahihhang in, Sodom leh Gomorra ah bel kei a dia mi ginom 5 bek muleng ka hoi ngei di, ka muhlouh ziak a gawt ka hi. Hiai ah leng kei a dia mimuanhuai leh ginom tamlou a omlai uh, amaute hon ngetna ka ngaihkhiak sak ziak in, ka thangpaihna langsak nailou maimai ka hi. Tua bangzel a khelhna a tawpsan louh ua, nam tuamtuam te tawndan a nelhsiah zel ua leh bel, amaute tung ah ka khut ka lik lai di', chin hon gen nawn hi.
"Hiai gam ka hon etsak a te'ngte tengteng namkhat a ka bawl ahi uh. Ahihziak in amaute a tenna uh a tuam ziak un, unau ahihlam uh a kithei kei ua, a kihaza ua, a kidou ua, namtuam chituam a kichi ua, ka thu dung zui a namkhat chikhat a hong kibawl hun chiang un, nam tawm leh nam neuchik himahle uh, khovel a nam tuamtuam te sang in a hong thupi zaw lai ding uh hi". Huaite banah hiai suahlam gam phaizang tengteng leng a telvek ding, a chi a,
(huchih lai in, ka ngaihtuahna ah, namkhat, chikhat a bawl vek di ahihleh, a gendan, pau leh ham khat zangsak di ahi dia aw?.......... Chi'n ka ngaihtuah a). ahihhang in tu'n vapai inla, hun remchang dang ah ka hon ensak nawn di" chi'n a hon paisan hi.
Emily................Emily............... Chia hon sap ging ka za a, awl a kihei in, ka mit ka hak khia a, ka thilmuh a fiahlouh ziak in, koisan a om ka hia chih ka thei kei, gimlua ka hihman in ka mitsi kik a, ahihziak in ka kiang a omte pau ging ka za thei ta. Ka naupan lai a ka zakzak sek ahi chih ka theisiam ngal a, kuate hi u hiam chihbel ka thei zou nai tuankei. Ka khut lakhia a thakhat a thoh khiak ka sawm leh, ka khut ah ling (phim) ana kivuah a, nuimei puanak ngou silh khat in, thoulou di'n a hon hilh a, kei le ka lumsuk nawn ngal hi. A tawp in ka mit ka hak fiah theita a, ka kiang a thil omte ka mutheita, nungaknou minih puanak ngou silh ka kiang ah atu ua, huaite kiang ah tangval naupang mel mahmah khat in lamdang sak meltak in hon na en hi. Ka veilam lupna ah ka motor tuangpih Numei khat leng ana lum a, amah bel a harh mahmah hi'n ka thei. Ka tuanpih midangte muh kilam-en a ka dak kualkual hang in, midang kuamah muh ka nei kei.
Nurse te'n ahon paikhiak san ua, tangvalnou pen ka kiang ah hongtu phei a, ka maitang tak a hon en in, "Emily na hi maw"? Chi'n a hon dong a, ken le ka hih thu ka gen ngal hi. Amah kua ahia chia ka dot leh aman, "awl in kon hilh di, lungkham ken la, dampahta di na hi, na dam siangma na kiang a om di ka hi. Hangsan tak in thuak hamham in aw", a hon chi hi. Nurse te'n damdawi ahon kap ua, kei le bangmah phoklou in ka ihmu suk nawn hi.
Khua ka phok in nitaklam dak 5 ana pelta a, kei le amaa sang in ka harh zawta a, ka ut-ut gen in, kei mah in le ka thou ngapta hi. Nurse te ahong pai ua, ka omdan ka dot leh Ni 3 leh zan 3 omta ka hihdan ahon gen ua, huai sung bangmah phoklou a om ka hih dante, ka damsuah a gintak louh dante uh ahon hilh vek ua, kemtu leh enkoltu kuamah ka neihlouh ziak a ahon hehpih dan tengteng nurse khat in ahon hilh a, amah leng kei ahon hehpih ziak in, abiang ah a mittui hong luang hial hi. A gen ut teng a gen khit in ahon paikhiak san hi. Enkoltu, kemtu neilou a hon chih pen ka ngaihtuah chiang in ka lungsim a naa in, ka khase mahmah mai hi. Ka lupna tung ah mittui ka nulnul mai hi. Tangval nou in ka mittui nullai hon muh tak in, ka tal ah hon zut kawm in, "Emily kemtu, enkoltu neilou kisa in lungkham hetken, nang enkol leh kem dia kimansa ka hi. Kei zu-le-sa ne mi ka hi a, himahleh zankhat mumang lamdang tak ka nei mok hi. Ka mang in, putek khat ka na mu a, putek pa'n, hiai damdawi inn ah mikhat kemtu neilou a om a", chi'n huai kemtu dia hon deih ahihdan hon gen hi. Ahihhang in ken mumang maimai chi'n ka ngai thupi lawmlawm kei hi. Zan nih na in leng ka mumang ah huaidan mah in ka na munawn a, ka gingta tuankei, a zanthumna in ka mang in, kawl kense lak ah ka na om a, zandang a ka mimuh sekpen a hong pai a, 'kawn sawlna a na kuan kei leh, na tung ah gotna thupi tak ka hon tungsak ding', chi'n, huai kemtu neilou a om, natna thuakdan bangkim ahon hilh vek a, ahon paikhiak san nawn hi.
Ka khanglou a, sana ka etleh zinglam dak 3:30 ana gingta hi. Ihmut sawm mah leng ka inmu thei nawn kei a, putekpa thugen ka lungsim ah hong lut thakthak hi. Kingaituah a ka om lai in, ka room kong ahong kihong a, ka nu'n singpi nou tawi in, thou di'n hong sawl hi. Ka nu lak ah ka mang ka gen leh ka nu'n leng a theisiam kei mahmah mai a, atawp in, ka nu'n, "bangteng hileh huai damdawi inn ah vahoh inla, huaibang mi a om leh omlouh va en himhim le chin", ahon chi a, kei le kihahsiang in hiailam manawh in ka hong diang ngal hi. Na min lah theilou ka hih chiah na natdan gen in ka hon gamzon a, atawp in nurse khat in huchi bang mi, Emily kichi om ahihdan ahon hilh a, ka mumang a hon theihsak bang in nurse nu'n leng kemtu neilou na hihdan tengteng a hon hilh vek hi".
Doctor khat a hong pai a, "damdawi inn a tawt sim ziak in, na pawtkhe theita, ahihziak in damsiang vengvong zaw na hi naikei. Innlam ah ki-enkol theita na hi, awl-awl in na hong hoih tou mai di" chi'n ahon gen hi. Ahihhang in hiai damdawi inn apat in potkhe dek leng koilam ka zuan dia, kua ka bel dia,,,,,,,,,,? Ka lungsim a buai petmah, doctor pa thugen James in a zak tak in, ( kei enkol dia hong kuan pen khah James ahi) "Emily lungkham ken aw, kou inn lam ah ka hon thuai dia, ka inn uah na hong om phot di. Ka nu leh ka pa te'n le ahon theisiam law mahmah di uh" chi'n ka lungsim theisiam hi awmtak in ahon genkhia hi. Nurse khat ahong pai a, "Nangmah ah soisel nang lawmlawm a om nawn kei, ahihziak in, na sung a Naungek pen na kitahna lam ah na suk khak sim ziak in, na ki dopdeuh a ngai dia, a tam theilam lum inla, nna naseplouh, nang a dia hoihpen ahi" ahong chi a, kou leng damdawi inn nusia in James te innlam zuan in ka paikhia uhi.
Inn sung ka lut ua, nupi khat a kum upatna liahkhuh thei di khop a kichei peih hileh kicheisiam, mel siangthou tak leh fel mel mahmah khat ana om a, James in a nu ahihdan leh, a thu uh bangmah dong masa lou a inn a kei a hon thuailut dante gen in, James leh a nu hong kihou ua, anu'n kei leng hehpih mel tak in hon en a, room awng khat ah hon thuailut in, hon lumsak hi. Khathum sung veng veng James te inn lam a ka om nung in, innluah di ka mu-a, amaute'n hon phalbawl kei sim mah le uh le, ka kisuanglah ziak in inn luahthou thou di ka hihdan ka gen hi. Amau le rem ahon sakpihta ua. Inndang ka luah nung in leng James nu leh pate'n ahon awlmoh mahmah ua, avangkim in ka inn luahna ahong phazel ua. Ka lung a nuamtuam mahmah hi. James in ahihleh niteng hunteng in ahong vehzou gige hi. Phet lou in itna thu khong a hong genzel a, himahleh kei ka kisit luat ziak in, thutak in ka dawng ngei himhim kei hi. James in leng kei ziak a akhamtheih hihte a tawpsan dan khong, damdawi inn a hon muh tung a alungsim ka khoih dan te leh nupi dia ahon deih thute imm nei hetlou in ahon gengen sek hi. Sawnpai ka hih dante, tagah maimai, nu leh pa, inn leh lou neilou ka hih ziak a hon hehpih a hon nem maimai ahih ka gin ziak in ken le ka tanchin bangkim ka hilh vek hi. Himahleh James in huaite ziak maimai a kei hon iitna a kiam tuanlouh dante hon gen zel zawmah hi. Kei leng kisoisel nang ka taksa ah ka nei nawn kei hi.
Keiziak a akhamtheih hihte tawpsan thei ahihdan khong ahon gen chiang in kei le ka kipak a, ka ngaihtuahna ah, ka UKhual bang ka lungsim ah hong lang dundun mai hi. UKhual leng amah James bang a khamtheih hai mahmah khat hi a, tua James thilgente khong le Ukhual lungsim a le omkha maithei, a lungsim ah huaibang om hen la, ka bil a ka zak di'n khatveibek hong gen thak leh ka ut ngeimai.......Ukhual in ka tanchin a thei dia aw, ken lah bangmah amah tanchin theilou ing a, ka tung a ahoihdan ka ngaihtuah chiang in batnei hi'n ka kingai hial hi. Himahleh kei tagah inn leh lou neilou, phet lou a nektawm di nangawn neilou in ahih dan tuan ka theikei. James kiang ah ka Ukhual hon panpihdan bangkim ka hilh leh aman phone a huopih himhim ding in ahon sawl a, ken phone neilou ka hih chiah, ama phone ahon pia a, ka Ukhual ka phone leh ahon ngaihdante, ka paikhiak ni a pat a alunglen ziak a ann a nektheihlouh thu khong ahon gen hi. Ken bel tuahsia ka tuah thu kamkhat in leng ka hilh nuamkei, a ziakbel ahon ngaihtuah luat di ka lauhziak ahi. Ka kihou lai un ka kiang ah James in lamdang sa tak in ahon en a, ka kihou zoh un, James in "Bang pau a nazat uh, kei hon gensia maw , hon phat,,,,,,"? Chi'n nui hiuhiau kawm in ahon en a, ken le, nafeldan leh na hon ngaihsak nate ziak a ka kipahdan gen ka hi, ka chih leh, ka kiang ah hong tu nai in, ka sam a hong zuut a, nunglam a hon kuai vandak in, ka muk ah ahon tawp mok hi. Lamdang ka sa a, ka buai vek hi'n ka kithei hial hi.
BUNG 5 NA
::::::::::::::::
James hiaidan di himawk lou ahi. Sawn ka pai ziak a ut leh dah a khoihtheih di na hon sak in chu na ngaihtuah khial lawtel di. Ka mangbat lai a na hon panpih ziak in ka kipak a, ka kipahna langsak thei a, ka tung a na hoihna hon thukthei hileng ka langsak dia, aleh sangtampi'n ka hon thuk ngei di. Ahihziak in ka dinmun na thei a, neih leh lam bangmah ka neikei, ka taksa ka numei na a hon din ding in ngaihtuah het ken aw. Ka vangtah ziak liauliau a hiaibang dinmun a ding ka hi............ Chi a ka gen leh amah le kisik melpu kawm tak in a hon en a, "Emily,,,,, huaidan in ngaihtuah hetken aw, na mel ka muh chiah kisum haksa ka sa lua ahi. Tuban nang remsakna lou in khatvei mah ka hon hichi bawlnawn hetkei di, rem nasak leh i kiteng dia, na sung a naungek napai lel pen le, kei ta bangbang in ka pawmthei dia, nang le nahihna bangbang in ka hon pawmthei vek", ahon chi hi. Ken bel tu dinmun a hithei mai ka hihlouh dan in ka dawng a, "hon it hon ngai a, hon deih taktak na hihleh, hun sawtlou ana ngak lai in", ka chi hi. A pai dek in "Emily, na mel mulou alah om zoulou ing a, mel i kimuh louh sung a tanchin i kithuzak zel nang in", chi'n mobile phone luisim khat ahon pia hi. "Ngailou ka la kei di,,,,,", chimah leng dawhkan ah nusia in a hon pawtsan hi. Huai ah ama number leng anuse ngal hi.
Pathian min lou ding in ka kisuanglah a, chinglou ka ki sa a, Pathian min lam ding in ka kizahpih hi. Himahleh ka hinkhua hun zatdante ka ngaihtuah chiang in, mikhial penpente lak a khat himahleng Pathian min ka lam lou thei kei. Hun leh nite hong pai zel a. Pathian kepna tang in Tapa deihhuai takmai ka nei hi. Amel ka et chiang in kipahna'n ka dim hi'n ka kithei a, himahleh lehlam ka ngaihtuah chiang in ka tapa in a pa, ka Umuan suun law mahmah ahihziak in amel ka muh chiang bang in ka hehtha khong hong suak maimah zel hi. Himahleh ka suul apat a naungek piang huatna a ka dim pen kei mah siamlohna hi'n ka kithei a, ka hihthei khamkham in Pathian kiang ah ngaihdam ngen in, naungek ka iit theih theih nang in ka ngen zel hi. Pathian in ka ngetna chinglou himahleh ahon ngaihkhiak sak a, hun sawtlou nung in ken leng awl-awl ni ka tapa ngaihna leh iitna ka nei thei hi. Naungek damtheilou tak hileh a etkol nang sum leh pai ka buaibuai maizen di toh, vangphatna ka tung ah ahong tung sawnsawn hi'n ka thei. A ziak bel ka tapa in hitang khosik leh damlouh chite a neingei kholkei vanglak a, kei a di'n le zangkhai huai mahmah hi.
Ka tapa ka chawm nang banghiam bek sep ngai ahihman in, zingkal baih taktak in ka thou a, singtang lam a meh hong tungte ka sum neih sunsunate zang in ka lasawn zel a, ka veng uah ka innzuak zel hi. Ka sepgimnate mite'n hon muh chiang-un ahon hehpih thei mahmah ua, meh di nei gegu mahle uh, ka mehzuakte phatuamngai tak in ahon na leisak zel uhi. Huchih lai in "Nungak ngak mehzuak a kivei, amel ahoih hoih maizen toh, pammaih na e,,,,,", chi a musit tak a ka nunglam a hon gen le hunkhop ka tuak hi. Meh di zuak a ka potkhiak chiang in ka tapa amah in lupna tung ah ka nuse zel a, sawtpi taisan theilou ka hihman in, a kin thei lam in inn lam ah ka ki'k zel hi.Meh zuak a kha nih phial mahmah ka kivei nung in, ka veng ua Private school khat ah mi tang a sem ding in ahon
zawn zenzen ua, kei le mehzuak a kiveivei sang in chi'n huai school ah ka vasem
tei a. Nau pawkawm in school ka kai zel hi. A sik a ka sepnapa a hong tung a, kei
leng semthei nawnlou di dinmun a ka om tak in, ka lung a kham a, meh zuak a kivei louhngal hih di dang theilou ka hih chiah chi'n mehzuak mah ka sunzom nawn hi. Ka pute tanu Momoi toh bel a vangkim in ka kithuzak theizel uhi.
Nikhat ka sepnalui schoola principal pa hong hoh a, a school ua semtu kidaih louh ziak a semtu lakbelh a sawm thu uh ahon hilh a, kei le kingen tei ding in ahon hilh hi. Ken le mehzuak a kivei sang in chi'n, thumang tak in ka ngen tei ringot hi. Vangphat huai tak in alakte lak uah ka telkha a, ka lunglutna lamtak ahihziak in nuam ka sa petmah hi. Ka lawh bel atam kei, himahleh kou nuta khosak nang khop aphathei thou hi. Kum hong kivei zel a, Ka tapa Eric leng school kaithei di dinmun a hong omta ahihman in ken leng huai school ah ka kaisak ngal hi. Eric pen a khen chiang in kei ahon muh chiang in nuak din ahong kisa sek a, huai chihlou chu haksatna bangmah tuaklou in, ka sem theizel hi.
Semtou zel ding a ahon nget ziak un ken leng phatuamngai takin ka vasem sunzawm nawn hi. Nikhat Lamka a ka pute tanu, Momoi phone call ka dong a, Moimoi in ka Umuan sihthu hon hilh mawk hi. "Kei hon ittu le hilou, hehpihna nengkhachik le neilou, chia ka na mangngilh taak, ka Umuan si chih thu ka zak in ka om a nuam thekei a, hamhaih tak in ka om dedu hi. Huchia bangmah hih na chang theilou a ka ding lai in, ka principal pa un a hong mukha a, "Emi bangchi e, damlohna neimaw,,,,,,,"? Chi'n a hong dong hi. "Dam mah ing e, ahihziak in Lamka lam a ka sungte sihthu ka thei a, lamdang ka sak luat ziak in hih di pen le theilou a om maimah ka hi", ka chih leh aman le, bangchi dan a kisungkha zenzen e,,,,,na kuate a......? Chih khong hon dot nung in, ken leng thil bangkim ka hilh vek a, Eric pa ahihdan tengteng leng ka gen vek hi. Aman le hon theisiam in, "kalnawn in khawl ni 20 na ladia na vagal kei dia,,,," ahon chi a, kei leng huaidan a khawl hon piak theih leh ka kipah didan leh, a gal a vakuan ngei ka sawmdan ka hilh ngal hi.
School kaitawp ticket la ding in ka kuankhe ngal a, ken bel sum neilou hileng le by road a paipen ngam nawn mahmah lou ka hih ziak in, lenna ticket ka vala ngal hi. A karnawn in Eric toh Lamka lam zuan in ka hong lengkheta ua. Momoi le hilhlou in Ukhual ka phone a, ama inn luah a kingak ka sawm dan leh ka tapa toh zin ka hih dan teng ka gen hi. Ka aw a zak in Ukhual leng a kipak in ahon muh ut tak thu khong ahon gen tei sam a, damtak a kimu pahta di i hi,,,,, chi'n ka phone ka koih hi.
Lamka ka tung ua, tleirawl lai hun tengteng zatbeina ahih sam ziak in nuam ka sa mahmah mai hi. Himahleh ka lungsim khat ah, ka meltheihte ka muh khak ding ka lau mahmah mai. A ziak bel, ahon muhsit didante khong uh, ka ngaihtuah a, aguk thei bangpen in ka gamtang hi. Ukhual in thil omdan bangkim a hon hilh a lamdang sakna'n ka dim hi. "Emi, bangteng hileh tawldam un la'n, ken bazar ah meh di ka valei zual dia, ka hong paipah di", chi'n a hon pawtsan a, kou ka tapa Eric toh inn ah ka na om uhi. Ukhual innsung ka et velvel chiang in, ama a ka muhdan toh kilamdanna himhim ka mukei a, ka lungsim in, 'Ukhual in ahinkhua lui topsan thei nailou hi di eive' chi'n ka ngaihtuah hi.
Eric ka sil zawh in, kei leng kisil di'n Bathroom ah ka lut ngal hi. Ka kisil lai in Eric in ngaihtak in hon sam a, midang hong pawt om ahihlam a hon hilh hi. Kei leng kintak a kisil in, ka pawtkhia a, tutna tung ah Momoi in Eric pawmkom in ana tu letlat hi. Momoi in ahon muhphet in bangmah le gentheilou in, kun dedu a, amel apat in gen ut tampi anei chih chiangtak in ka thei hi. A kiang ah ka paiphei a, 'Moi',, chi a ka sap leh mittui pak nilnel kawm in hong dakkhia a, "Ukim, huaipam ah Ukhual toh ka kimukha ua, na hong zin thu ahon hilh a, kei leng innlam a pailou in hiailam ah ka hong diang ngal hi. Hehpih tak in na tung a ka pa thilhihte ngaidam in aw, mangngilh in la'n kou innlam ah na nih un hong paisuk ua" chi'n hong kapkhia hi. Eric in lamdang sa in Eric leng hong kapkhe phemmphom hi. Huchia sivui dikuan bangmai a ka kah vengvung lai un, Ukhual hong lut a, himahleh Ukhual in thil omdan teng theisiam ahi ngei dia, bangmah thu hon dong tuanlou in, Room sung ah hon lutsan hi.
Moimoi in Ukhual kiang ah amau innlam a kisuan di'n nget chih petmah in ngen mahleh Ukhual in phallou bilbel ahihman in Moimoi leng lungkimlou tak in a innlam uah a kiik nawn hi. Momoi paikhit in Ukhual in hichi'n hon gen hi,,,,,,, "Eric pa sihna ziak ahihleh nathei naikei maithei. Kei ahihleh a theichiangtu pente lak a khat, mit ngei a mutu ka hi. A bultung apat in gen leng sau mahmah di ahihman in, tomkim in kon-gen mai di, na uMuan pa khah tua MLA Election omkhin pen ah a ki candidate tei hi. Huchia chikmah a ki candidate ngeilou himahleh, saptuam leh vengsung khong a mite theih, mihoih chi a atheih uh ahihziak in, a khingpih di lamte'n leng aguk tak in kihta petmah uhi.
Khatvei zu dawn khin innlam zuan a ka pai leh na Umuan nungak hel ding hong kuan toh ka kituak kha ua, bangmah genlou in ka enzui hi. Atawp in, Lulun te inn ah alut lai ka mu hi. Lamdang ka sa mahmah mai hi. A ziak bel, Lulun Pa leng huai MLA ki candidate, Na Umuan pa toh kikhing kha di ahihziak ahi. Himahleh amah bel huailam lungsim nei a pawt ahih ka gingta hetkei, aziak chu, Lulun toh a kizuihna uh leng kum khat lam phata ahihman in, Lulun hel dia kuan ahih ka gingta zaw. Kei le bang lungsim nei ka hi diam ah, bangthu a gen himhim uhiam, chih ka theih ut man in zu nam philphel kawm in, Lulun te inn ah ka dianglut mok hi. Sawtlou ka tu a, ka tut sung in leng Lulun Pa'n na Umuan kiang ah, paukam hoihlou pi pi'n vau den hi. Ken leng nuam salou ka hihman in ka paisan nawn hi.
Zingkal hong hi a, na Umuan migilou khut thuak a sisa a muh ahih thu ka thei a, ka lungsim ah, zan nitak a Lulun pa toh kiselbuai sim un, Lulun pa'n mi thatsak hi ding in ka gingta tinten hi. Na Umuan sungte'n Police ah FIR thehlut zel mah le-uh, lehlamte'n sum tam pipi a, ana tham zel uh ahihman in case sui gina nuamlou in, tuni tan in hiai thu ah kuamah mat leng nei nailou uhi", chi'n uKhual in hon gen hi.
Nitak an nekham hoh ka sawm leh Ukhual in zan a diankhiak rem a saklouh man in, ka naupai lai a ka lupna, nengkhah ale kilamdanna omnailou, puanphah tanpha le kikhek lou, phet lou a, anit bang bang a nin zaw mah tung ah ka tapa Eric toh kong lum uhi. Zingkhua hong vak a, gimsim ka hihman in haksa sakawm pipi in, nek bawl ding in ka thou a, sawtlou nung in Ukhual leng hong thou in, nui sisei kawm in, "nang om ziak a thou hak ka hi aw", chi'n bathroom ah hon lutsan hi. Nek ding ka bawlkhit in, Eric ka phong a, ann ka ne ua, ann nekham Umuan gal ding in ka kuankhia uhi.
Taksa lian in, tapa bang nei hialta mahleng, sigal nikhua ah, omdan di ka buai a, gen di bangmah theilou ka hihman in Ukhual ka lut masa sak hi. A sihna sawt simta mahleh, a sungte'n kei ahon muh tak un kah chih petmah in hong kah khum mawk ua, kei le numei nehnou chih mahtak in, kisuum zoulou in, mou dia hon deihlou ka Umuan Nu toh kikawi in kong kap khawm halhal uhi. Sawt kuam tak ka om nung un, a boruak neuchik hong zangkhaita ahihman in, thudang gen in ka kihoulim uhi. Eric in apa sun law mahmah ahihziak in, lamdang a sa ua, Umuan mel mu a kingai in, a pom khong hong kituh zawzen uhi. Nitaklam ann ne di'n hon khou mah le uh, Ukhual in lem salou ahihman in nitaklam in ka pai kik ua, Lamka a kar khat cham di ka hihman in, nidang chia hoh nawn di chi'n ka paita uhi.
Eric pen a lawmpolh di, meltheih huai veng a omlou ahihman in thawmhau kisa tak a a om ka muh chiang in ka hehpih thei mahmah hi. Himahleh Ukhual in ngaina lua hih ziak in amah toh kimol in lawm bang in kipawlthei veve uhi. Aziak bel Eric a pautheih tung apat in Paite pau ngen in ka hou a, amah leng siam vek kei mah leh i gen teng theisiam vek ahihman in a buaihuai lawmlawm kei hi. A nithum ni zingkal ka thoh in Momoi tutna tung a tu ka mu a, zing kalkal a mu ka hihman in lamdang ka sa a, ka lau manphial hi. Moimoi in ann ne dia hong sap sawm ana hia, ken leng "Ukhual thuthu,,,,", chi'n ka dawng hi,,,,, Ukhual hong thou a, Momoi in ann ne dia hong sam ahihlam ka hilh a, Ukhual in leng "Ann ne dia hong sam uh ahihleh a hoih voi, ei ann save himai", chi'n nui nenalh kawm in hon dawng hi. Ka kisak zoh in Momoi te innlam ah ann ne di'n ka kizui khe nawn uhi.
BUNG 6 NA
::::::::-:::::::
WARNING:- ["Hiai bung 6 na apat, aban lamteng hih, naupang kum 15 nuailam adia sim phallouh bilbel ahi." chimok leng lah, sim thouthou di chih ka hon thei a, na sim teitei ahihleh mawh ka paw kei hi.....xD
amah gen dandan, behlap hetlouh a ka gelh ahia, mi khenkhat adi'n sim nuamlou tak khat ahi kha maithei, i kitheisiam di uh.]
--------------------------------------------------------
Ann kanek kham un, Umuan nu'n ka pute inn a ann ne ka hihlam uh thei ahi ngei dia, hong hoh a, a inn ua pawt ding in hong zawn hi. Ut law kholkei mah leng hong hahzot lua ahihman in ka vapawt uhi. Umuan pa'n Eric amuh phet in pompah ngal a, a kipah theih nang in kimawlpih den hi. Sawt simtak ka tut nung un, Umuan pa'n Eric nektheih lei di'n a zawn khia a, Eric le phurlua ahihman in kei kiang ah le gen sese lou in apu toh innkong lam ah kizui pawt ngal uhi. Ni hong sun a, Eric leh apu pawt lah hong pai thei lou uh, a tawp in ka beidong sim mahmah mai a, ka lungsim ah, thil hoihlou tampi hong lang a, ka tapa taimangpih ai maimah dia aw, taimang pih leh ka tapa tellou in bangchi'n ka hing zou dia? Keimah leh keimah dotna ka kidong den hi. Hong pai thei mahmah lou uh ahihman in, Umuan nu kiang a ka gen leh, lungkham nang bangmah omlou chi teng in hon dawng hi.
Umuan nu phone hong ging a, Emily in Eric ana paisan mai heh, gamdang ah ka zinpih dek chi'n Umuan pa'n hon gen hi. Huaithu ka zak tak in om didan ka thei kei a, ka lungsim tengteng hong buai vek hi. Ka tapa ahihleh ngaithuah huai ka sa kei, naupang fel leh tangnel pahpah thei, pau bang pau ut zawmah ahih chiah, a omna teng ah a tangnel theipah dia, nuam satak in a omthei pah dia, kei anu le hon mangngilh pah di chih ka thei. Himahleh kei a nu bangchi'n ka tapa tellou in ka damzou dia,????? Kap kawm in innkong ah ka pawtkhia a, Umuan nu'n kamkhat lel in leng hong nem tel lou hi. Ka tapa tellou a pai sawmlou tinten ka hihman in, innsung ah ka lut thak a, "ka tapa neihsun, ka kinepna pen, hiai bang maimai in na hon laksak thei mawk kei di uh,,,,, ahong pai maa uh hiai ah ka ngak di,,,,,,,,,,", chi'n tutna tung ah ka tu top hi. Umuan nu'n room apat in hong pawtkhia a, ka ngakngak hang a bangmah a phattuam louh didan khong hon gen a, "na Umuan ta ahia, a tung ah bangteng ka hih uh siang ahi,,,,,,na ut leh police ah report inla, na ut dandan in panla in,,,,,,", chi'n musit tak in hong pau khum zawmah lai hi. Ka thangpailua ahihman in kisum zoulou in ka kapkhia a, khua kai lawta ahihman in leh ka om om hang a bangmah phatuam lou di chih ka theih man in, nidang chiang a hoh nawn di'n ka paisan hi.
Inn ka tung phet in ka omdan apat in Ukhual in ana theisiam ahi ngei dia, Eric ana kan pah ngal hi. Bangmah gen theilou, khase lua ka hihman in, Ukhual in hong kawi a, kaplou ding in hon nem hi. Kap kawm a thil omdan ka gen thei hamham hi. Kisil harh di'n bathroom ah ka lut a, ka kisilkhin, underpant teng dia ka kisak leh mangngilh kha ka hihlam ka kithei a, kinulna puan toh kia pawtkhe ngamlou ka hihman in, Ukhual kiang ha, ka bag sung a underpant hon laksak di'n kisuanglah kawmpi'n ka sawl hi. "Emi,,,,,,na underpant sisan kai tam na mahmah eeee, bang chidan a,,,,,,,,,,,", ka theikhe guih a, ka period lai ahihziak in, ka zin maa zan ua ka underpant teng khah sopman nawnlou, Lamka a sawp dia ka puak, sawp mangngilh ka hih dan ka thei thak a, inkong a ka phou pen hon laksak hi. Huai ni'n ann le nelou in ka lum suk a, Ukhual in ne hia nelou, chih le ka thei kei, ka gim luat ziak in. Zing ka thoh un, Ukhual in bangmah genlou in kintak a pawtkhia hi. Nileng in keikia in ka om a, kap ding in ka mittui a pawt di le a om nawn kei a, ka aw teng leng a heu vekta hi. Nitak khomui kuan in Ukhual hong tung a, beidot huai ahihdan leh Police a FIR thehlut ngal ahihdan hon hilh hi. Neukhah in ka lung a muang deuh hi. Himahleh Umuan sihna thu a case le sui gina nuamlou in, kei mi genthei buaina a sui uh ka gingta thei kei hi.
Ka tapa muhkik Lametna toh niteng inn ah ka om a, ka lametnate tangtu'n ni om ngeilou hi. Aizawl lam a ka pai hun di kuan in, phone call ka dawng a, ka lak leh Umuan pa ana hia, Eric ngaituah lou di leh lungmuang tak a om ding in hon gen zawmah lai hi. Ken leng Eric aw khatvei bek zanuam ka hihman in hong kihou sak a, damtak a kimukik pah ding chi'n, ka kimangpha uhi.
Ka paikik hunta ahihman in, Ukhual in, "zing chiang a paikik di na hih leh meh di khong lei in ka va bazar di", chi'n hon pawtsan hi. Ukhual bazar hoh nitaklam annhuan hun kuan in, zukham sa in inn hong tung hi. Ka lungsim a gim mahmah mai a, lungsim nuam a ka om theih nang in zu dawn khong ka ut hial hi. Himahleh Ukhual in ka zu dawn di hon phal ka gingtat louh ziak in bangmah ka gen utkei hi. Ukhual in nek a bawl a, kei zing chiang a paikik di ka hihman in ka van kisa in ka buai mahmah hi, mahni buai buai a ka om nung un, ann nek bang hong hunta ahihman in ann ne di'n kong kisa uhi.
Ann ka nek dek un Ukhual in, "Emi,,,, na lungkham luat di hilou ahi, Eric leng hong dam dia, chik ni chiang hiam a na kiang a hong ki'k nawn di ahi. Na kimuh pah uh ka lamen, bangteng hileh hiai dawn tei himhim inla, i kimangpha khak nang in", chi'n vodka (magic) buk khat hon lakhia hi. Ken leng bangmah ngaihtuah sese lou in ka dawn zialzial hi. Tholkhat ka dawn gai ua, khamlua ka hihman un, ann ne di himhim omlou in, Ukhual toh tutphat sau khat ah ka tu ua, bangbang hiam gen in ka kihoulim uhi. Ukhual in "Emi,,, kon ngai mah di e, paikik nawn dah maive", chi kawm in, ka liangkou ah hon kawi phei hi. Ken leng "Ukhual, ken le kon ngai mah di,,,ka sanggam taktak bang a kon et na hi", chikawm in a khut ka lakkhiak sak a, "nang kiang om thei hileng om utlua ka hi, ahihziak in hiai lam a ka om kei a dia hoihlou ahi", chi'n ka dawng hi.
Ukhual in, "bangmah gengen ngai kei", chi'n hon pawm a, room sung ah hon lutpih a, alupna tung ah hon sial hi. Ken leng Ukhual thil hih di bangkim ka thei vek, himahleh dang ka sawm kei, ka lung a kham a, bangmah poisak himhim ka neikei, ka puanak hon phelh sak a, ka van tengteng hon phelh khit in, amah leng vuaktang in ka tung ah hong lumsuk hi. Ka zukham uh areh/veng deuh chiang in ka dawn belh zel ua, bangmah zumna himhim ka nei thei nawn kei, zan khovak in, lupna khat ah ka lum ua, zingkhua hong vak in gim kisa kawm pipi in zin ding in ka kisa a, ann leng nelou in, airport lam zuan di'n ka pawtkhia a, ka pawtkhiak ma in, Ukhual in, "a topna pen ding in", chi'n lupna tung ah hon pawmphei in, nitak a ka om bang un hon ompih nawn a. Airport lam zuan in ka paikhiak san hi.
Lampi a ka pailai un James in hon phone a, "tuni a hong tung di na hih leh Lengpui (Lengpi) ah ka na dawn di", hon chi a, airpot ka tung nung sawtlou in lenna leng hong tung ngal a, hih di poimoh bangkim ka hih khit un, Lengpi lam manawh in, Imphal ka nuseta uhi. Lengpi ka tung ua, van ngak a ka ding lai in ka liangkou ah hong kibeng a, ka et leh James ana ding hi a, kinai chik a ding ka hihman un, ka kihoupih na lam ua, zannitak a ka zudawn gim ana za a, lamdang satak in hon dong a, ken leng ka vathiltuah teng gen in, ka lungkham luat ziak a dawn ka hih dan ka gen hi. Ka van hong suak a, innkong lam a kinawr pawt in, James car ah ka lut uhi.
Ka lu nalua ahihman in, ka pau ut tha leng a suak kei a, James ngaihphalou in, ahon dong hi. Ken leng, zannitak a zu ka dawnna ka lu nna ahih dan ka gen leh, "tamlou dawnbelh le chi'n dam mai in teh" chi'n hon dawng a, ken leng "poilou" chih teng in ka dawng hi. Ka tai zel ua, RV ka tu'n un, lamgei ah hong ding a, "ana om zual in aw" chi'n hon pawt khiaksan a, ken bel zuntha a pawtkhia hinteh chi'n bangmah ka ngaihsak vak kei hi. Sawt simtak a om nung in, polythene bag in zu umkhat hon khai hi. Bangmah genlou in ka taizel ua, innlam a hon taipihlou in, lampi dang ah hon taipih a, ken leng zu hon dawnpih sawm ahi chih ka theih man in, bangmah ka gen nuam kei hi.
Ka taina lam uh, mi muh di atam kei ua, lam gei ah motor park loungal motor dang muh di a omkei a, ka mimuh omsunte ulah, apair ngenta, lamnawl ah akhawl a, "hiai ah dawn zual ni" chi'n munkhat a tu in ka dawn uhi. Ka dawn khit un, pai di'n kong kisa ua, motor sung ah ka lut ua, start mailou in James in, khoih hon sawm nawn hi. Poisak ka neikei ka chih sa mah bang in, a hon khoih dandan in ka om a, a deihkhop amuh nung in innlam zuan in hon paipih nawn hi.
Hun hong pai zel a, Kei leng ka sepna pen kum beita ahihman in, kum nawn lam in le sep ka sawm lai thou hi. Himahleh James in leng kiteng dia hon zawn munlua ahih chiah a sungte lemsak leh lemsak louh uh theiloupi'n ka kigu uhi. Ka gintak sang in anu leh pa afel un, ka tung ah ahoih mahmah mai ua, amau ahihleh nupa a sumdawng in a zin deuh reng ua, inn a a om sang un, a omlouh uh a tam zaw hi. Huaiziak mah in kei leng innngaktu di'n kizen a hon sa uh ahi ngei dia, zin hong tung chiang bang un, thil, van chi tuamtuam a hon puak ua, ahon duat ua, ta bang taktak in ahon en uh, hipen in ka thei hial hi. A nu leh pa'n hon duat mah le uh, James in a khamtheih hih tawpsan theilou in, zu ringot hihlou in khamtheih dang amuh remchang teng ane in a dawn theih zel pen in ka lung a hon khamsak mahmah hi.
A kum a sim kong kite'n nung un, Nau ka hon pai a, himahleh ka taksa a tawldam ziak hia, chihbel ka thei kei. Kisawisel nang ka nei lawmlawm kei, ka nu leh pa'n leng tu te mel muhkal a ngaklah thu ngen uh agen ua, damtak in kinei mengmeng leh chih ka ut mahmah mai hi. Ka nu leh pate'n hon ngaihsak mah le uh, ka pasal pen in ahihleh kei sang in a khamtheih hih a ngai poimoh zaw hi'n ka thei a, lupna tung khong ah leng vuaitam ka kina un ka kisuheh deuhreng uhi. Ka kinak thawm uh ka nu leh pa te'n azak chiang un, ka room uah kintak in a hong lut ua, James naktak in ahong taihuan zel ua, kei ahihleh kamkhat in leng hon tai ngeilou uhi.
Ka nu te phailam a van laa dia azin ni, nitaklam in ka gil hong na a, James kiang ah, nauvei hunta ahihman in, nauneih ka kigintak thu ka gen leh nau nei di hial zaw James inle hon ngaihthah sak ngamlou ahi dia, kintak in Damdawi inn lam hon hohpih a, a nitak dak 6 lakvel in tanu ka nei hi . Damtak a naunei ka hihziak in ka kipak mahmah a, James leng bangmah gen kei mah leh amel ah a kipak ahi chih haih vuallouh in ka thei hi. Kipak tak in ka tanu mel ka en a, alian in amel leng hoih ka sa mahmah hi. Huchia melhoih sa, kipak tak a ka et-et lai in, thilkhat ka lungsim ah hong lang a, kei mah ka kingaihbel ziak hia,,,,, chih bel ka thei kei. Ka tanu mel in, Ukhual mel toh kibatna khat nei hi'n ka thei a, ka lungsim a anuam theikei. Himahleh ken bel ka thilhih bangkim James kiang a genkhiak sawmlou ka hihman in, bangmah ka mel ah danglam sakna ka langsak nuamkei a, ka kisel teitei hi.
Ka nute zin hong tung ua, naungek mel ahon muh chiang un kipahna'n adim uh hipen in ka thei, himahleh ka nu paukam tuni tan a ka mangngilh theihlouh leh, kei mah ka kisiamtan theihlouhna khat a om hi, "A pa mel sang in a nu mel sun zaw eive maw", chi'n ka nu'n hon gen a, a lungsim ah muanmohna nei kawm a agen ahi hia, ahih kei leh amah muh dan diktak a gen,,,,,,,? 'Kei mah ka na kizephok ziak le ahi maithei' chi'n ka kine'm zel hi. Ka pa'n ahihleh "kar khat le pai nailou a, amel sut di le theibaih na chia, hong lian hiaihiai dia, sisan kizopna nei chu hong kisutna uh le hong om zel kei dia, mel leh puam a kisut louh ale, a gamtatdan khawng i entou zel dia,,,,,,, a himhim thu in, a pa a sut sang in a nu sun zaw leh ken chu deih zawtham ka hi. Numei mei khong zu khong hon kham le-uh, a pi leh pu adia le zumhuai law di hilou maw,,,,,,,! Chi'n ka nu enkawm in nui phaphalh hi.
James omdan ka nu leh pa'n diksalou in, "tangval hinawnlou chin a, ta bang neita na hih chia, na tangval lai leh na ta neih maa na omdan a om thei hi nawnlou na hi. Na tawpsan tak di ahi. Paching tak in na om dia, na nu leh pa'n nna ka sep zohlouh nung ua hon chawmtu di na hih mai ban ah, na zi leh na ta chawm dia mohpuakna nang khut a kinga hita di ahi,,,,," chi'n vuaitam thuhilh sek mah le-uh James in ngai poimoh lou in, amaa sang a uang zaw hileh kilawm khop in khamsa in inn hong pai gige hi. "kal khat hun ka hon pe dia, huai sung a na tawpsan louh a ka thu na zuih utlouh ahihleh na zi nata tawh hiai inn sung ah na teng nawn kei di ua, noumau in na kitoudelh uh a ngai di, na zi leh na tanu khongaih huai samah leng, nang na omdan in zir mahmah lou ahih chiah, amau le athuak uh ngai hi'n ka thei", chi'n ka pa'n James tai muatmuat hi. Ken leng ka theihbang tawk in, thuhilh mah leng a ngol veita ahihziak in aman leng tawpsan thei tuanlou hi. Ka pa, a thugen kikhelsak ut ngeilou, lungtang khauh tak ahihziak in, a thugensa mah bang in a inn sung apat in kou nupa leh ka tanu bangmah theilou a inn sung apat in hon holkhia a, himahleh ka pa'n ka inn luah di-uh, huai kalkhat James hun apiak sung in ana zong sak a, mi inn nuai kawtong ah, inn lianlou khat ahon luahsak hi.
Inn ka tuan ua, kalkhat sungvel zaw ka nu leh pa'n hon ngaihtuah ziak ua, sum tamlou toh hon intuan na uh zang in ka khosa nepnep ua, haksalou chik in ka khosa thei uh hi. Himahleh hun hong pai zel in, James niteng a mi nasem a kilawh a kuansek, antang leh mehman dia a sumlawh khiak hon pezel pe'n a omdan hong kikheng in, nasem tawp khamsa a hong tung hon ching nawn hi. A lohkhiak kimkhat khong inn hon tu'n zel a, zan a hong hi a, a zuduh in ahon phak chiang in buai in ka buia thei mai uhi. A leinang sum lah omlou, sum om mahleh a lei di zu a kizuakna lah kitheilou, a khen ching bang in James nu leh pate kiang khong ah ka vatai thepthup zel a, ka tai sunsun chiah zaw hoihtak in ana hou ua, sum leng ana pezel sam uhi. Himahleh a deihlouhsa ahon holkhiak uh kihi a, mangbat zek chiang a vataitai pen ka ngaihdan hilou ahih chiah, kei mah a ahithei tantan a kitoudelh ka sawm hi.
Sun chiang in nasem ding chi leng ka tanu ngek lawlai, taisai theih hilou, semlou in om leng lah ngawl di hizel, akhen chiang bang in ka pasal khen a mundang a taimangsan vengveng khong ka ut hial hi. Huchi bang lungsim ka put chiang in ka tanu pa neilou a khanglian di pen ka ngaingam kei zel hi. Ahitak in ka tanu leng James ta hilou in, Ukhual ta hin ka thei hi. A ziak bel amel leh puam khong ka et-et chiang in Ukhual toh kilamdanna anei kei uh hi'n ka thei hial hi. Bang teng hileh nikhat (dakkal 24) le kihal lou a thiltung ahihziak in, ken leng bangmah ka gen thei tuankei.
BUNG 7 NA
:::::::-:::-:::::
James in lah nna sempeih nawnlou, keilah naudawn ngai, a lungkham huai telmai,,,,,, inveng louvengte hoih ziak in ngawllou in ka hing hamham uhi. Meh leh buh kia a khosa thei hile ung bel phave'n, silh leh te'n di hong ngai lai, huai kia hilou, James in a zu dawn di hon demand zawmah zel bangchu, kei a dia damman omlou hipen in ka thei hial hi. Ka kingaituah nasat luatziak leng ahi maithei, ka taksa ahat kei a, kum naupangchik himah leng, ka mel a upa in ka langtek hial hi'n ka kithei hi. Ka tapa Eric ngaihtuah nang hun natan leng neilou hial in ka lungbuai hi.
James in zu dawn di aneih louh chiang in, a zawng ding in hon sawl ringot zel a, kei leng pasalte hon sawlna chi'n thumang tak in, ka theih na na ka vazongsak zel hi. Sum a om in zaw lei di zaw om zel a, himahleh sum a leinang kinei gige zoulou ahihziak in lohsam a kik hun khong ka nei a, a khen chiang in ka tunghak deuh chiang bang in ana ihmutsan chih khong in a om a, ken leng phong tuanlou in, ahon ngetnawn hun a di'n ka koih hoih sakzel hi. Zankhat sumlah nei nawnlou, a zu dawn dia ka koihte lah beivekta ahihman in ka lungkham mahmah mai a,,,,, James lah zuduh a ling a ling zungzung ta, ka tanu lah nawi duh a kapkap zawmah, Nitak dak 11 lam tan in leng ahon sawl den hi. A tawp in ken leng "muh leh muh, muhkei leh ahi hi hisuk heh" chih lungsim neikawm in zu zong ding in ka kuankhe top hi. Veng nuai lam manawha sausimtak ka pai nung in, papi khat smart simtak a kichei ka tuak kha a, ken bel a smart luat ziak in houpih leng ka sawm kei hi, Huchia paipel sawm a ka mitsik a ka mel h laitak in, numei kizuak a hon ngai ahi ngei dia, aman ahon houpih masa hi. Ken leng ka vanaihphei a, zu gim ana nam huamhuam hi. Zum thei ka hi nawn kei, ka tanu nawitui duh a kap a lupna tung a lum, ka pasal zu duh a ling den ngaihtuah in, zum leh zah le khual lou in, ka vak naziak ka gen pah hi. "A hoih e, na deihchu kon pe di, ahih hang, kei deih le na hon piaksam ngai in teh" chi'n hon dawng a, ken leng,'bang e na deih'? Chi a ka dot leh, "Na theisiam mai di chu,,,,,", chi'n nui kawm in, ka biang hon meksak hi. Bangmah genlou a ka ding lai un, taxi khat hong tai a, aman ana kham a, ka nih un ka lut ua, gamla simtak a hon taipih nung un, zu pack 3 di awmvel hon pia a, pai dia ka kisak leh ka ban ah hon le'n in, "ka thil deih na hon hihsak nai kei", chi'n lamnawl ah hon kai phei a, hon luppih hi.
Bang ka gen dia bang ka hih dia,,,,,? Ka pasal ka hehpih man a hiai bang a gamtang ka hih ziak in kisiamtan louhna ka nei lawmlawm kei, Ka paidek in sum tamlou a hon pe zawmah lai a, "na poimoh hun in hon hilh zel le chi'n kimansa gige ka hi", a hon chi a, a phone No. khong hon pia hi. Inn ka tung a ka pasal ana kipah dan khong ka muh in, lehlam tak ah phaze khong ka sa maimah hi. Huai nung zansawt nung chiang in vakkhiak ka ching a, ka Pasal zu dawn di ka leisak ban ah, antang man di, van man di neng neng khong ka neithei hi. Ka ut mawng ahih ka hi zenzen kei, Semthei hi leng, sun nileng a kho-ul kai a nasep in, ka pasal leh ka tanu chawm zou di khop in ka chidam hi'n ka kithei. Himahleh ka tanu naungek, nileng taisan theih hinailou, nileng nasem lou a lawh muh nang lah omlou ahih chia, zan/nitak hun a gamtang mai ka hi a, ahon dem ut te'n hon dem mah le uh, kei bang a dinmun haksa in ding tei hile uh, a hon dem un ahon mohsa bik di un ka gingta kei.
James lah zu dawn nak deuhdeuh, ka piak utlouh chiang a lah kei hon vaw dia kisa zel ahihman in, ka pelou ngam kei, a zudawn nasat ziak in, a sin teng abeita. Sawt hon dampih nawnlou di chih ka thei, A vangkim in, doctor ka ki -ensak zel ua, doctor te'n leng zu ngawl in omzia nei nawnlou ahih thu gen uh ahihman in, ken leng ka neih bang bang ka pezel hi. Doctor te gen bang geih in, khakhat lel paipan chih in James in hon mualliamsan a. Meithai ka suak nawn hi. Ka na tuahsa ahihziak in bangmah in ka ngai lawmlawm kei, ahihziak in, zu ngawlvei maimai ka pasal hon dampih lai toh teh in, ka lung a leng a, mite lak a om leng kisunglah huai ka sa hial hi.
Hun hong pai zel a, ka tanu leng buaipih luat ngailou in, amah kitoudelh thei dinmun in hong omtou a, kei ahihleh ka thilhih topsan mai theilou ka hihman in, pasal tuamtuam kop in, ka tanu laizil leng buaipih manlou in, ka pawtsan zel hi. Ka tanu in leng ngeina dan a ngaisuk thei ahi ngei dia, ka pawt di chiang in leng bangmah gen ngeilou hi. Inn ka pai chiang a, amah kia a lupna tung a ana ihmu biimbe'm khong ka muh chiang in lainatna in ka dim a, himahleh amah makhua di ka ngaihtuah ziak a hiaibang dinmun a ding ka hi chih ka theih chiang in, ka tanu in thil omzia thei mah leh a hon mohsak lawmlawm ka gingta theikei hi.
Theihlouh kal in pawl 12 hon pass a, kei leng tanu nungak nei ka hih lam thei kheguih hileng kilawm khop in, ka halhkhe guih a,,,,,,[A thugen lakloh lai in,,,,Nangkia a khosa ka hon sak leh, tanu nungak bang nei a, na nih ua khosa neive ua maw,,,,,,Eric bang om leh, ta, tangval leh nungak nei a khosa himai di hi chi'n a maw, namel etmai in zaw, nungak mah na bang lai in kon thei, " ka chih leh aman le bangmah gen tuanlou in hon en a, hon nuihsan hi. Huchi'n ahon gen zawm zel a]
Ka omdan tengteng theisiam vek din ka gingta a, theisiam hileh a khanvualte lak ah bangchi'n a om dia, ka nu ahi, chi'n ahon chi ngam diam,,,,,,ahon zah hpih diam ka tanu in,,,,,,? Dotna tampi a hong lut a khat leng dawng theih ka neikei. Himahleh ka omdan topsan kiphamoh ahi chih bel chiangtak in ka thei veve hi. Zingkal khat ann ka nek lai un ka tanu, Siamte in, phailam a lehkha zir a ut thu hon gen a, keimah sum leh pai neih in lah daihlou, a utna leh a tupna lah ken leng hoih sakpih ka hih ziak in ka lungsim abuai petmah, Siamte in, a ut zong kei lak a khatvei a genna hi in ka thei hial hi. Huiaziak mah in ken leng hih pichin sak ka ut a, ka lungsim in a lampi di ka dap den hi.
Bangteng hileh kei neihsa in daihlou ahih chiang in, chi'n Siamte pute lak ah ngen ding in Siamte ka sawl hi, Siamte leng thumang tak in a kuan a, kipak tak a hong kik di ka sak leh, hehmel tak in hong kik a, "Bangchi e, na pute'n ana pe nuamlou u maw, ana tai ek u hia,,,? Chia ka dot leh, "Na nu toh hong hoh thak un a hon chi" chih teng in hon dawng hi. Ken leng hoh pah hoih chi'n Siamte baan kaih in a pute innlam zuan in kong kikaiphei nak nak ua, innsung ka lut un, ka Pa'n, "Emily,,,,,, ka thugen hoihtak in ana ngai khia oh, mi lungsim piching mahmah leh kizen mahmah hi'n kon theisek, himahleh na thil hihdan leh na omdan hoih sa hetlou ka hi, Tanu nungak nei thei na hita, Lungsim pichingtak nei in, kingaihtuah thak oh", chi'n hon tai punpun a, ka thilhih teng theivek hinteh, chi'n lau in ka ling man hial hi, Huchia lau a ling pepep a ka omlai in. " a himhim thu in, Siamte phailam om di chih kei lak ah kamkhat bek in na hon gen kha hia ? Kam khat lel a le genlou a, sum ngen dia hong kuan, huai le amah kia hon sawl zawmah, bang lungsim nei neita ua ? " Chi'n hon tai sunzawm a. " bangmah genlou a, sawtlou ka tut nung un. "Bangteng hileh kou leng na nutoh ka na genkhopsa uh ahi, kou khut ah koih mai le chi'n", ka pa'n ahon chi thak a, kipak tak in ka pawtkhe nawn uhi.
A kal nawn in Siamte a pute dawr van la di toh a zin ua, admission leng hihsak ua, a poimoh bangkim a hihsak vek ua, tuni tan in ken chengkhat lel leng Siamte lai zirna ah Class-XII a zohnung ka seng kha nai kei, Tun BA-II year a zil lellel hi, Exam khin hong pai zual khong sawm sim a, a pute'n lem a sa di uam ah, ken zaw ka muh louhna le sawtta in chin, hon pai zual lele poi sa khollou hing a, hon phone chia lah a laizir nalam a ngaihzawng aneih thu khong hon hilh, zirlai na hi, ngaihzawng buaipih louh di, chi'n thuhilh zel sam mah leng, ngailua haichilh hipen in ka thei, Gen lou in a omthei mahmah kei a. A khenchiang bang in kineih khong hon ngen sek hi. Ken bel phal bilbel nailou ka hih dan ka gen a, himahleh kei bang a a tankhelh khak ka lauh ziak in, ka theih bang kham kham in ka thuhilh zel sam hi. Khatvei houh nget chih petmah a hon nget ziak in, "Bangteng hileh na pute thu thu ahi mai di chu" chi'n, kua, koilam mi, chih khong ka dot leh, "Lamka lamte ahi" chi' hon dawng hi, Ken leng kintak in, "o ahoih ve leh", chih teng in ka dawng hi. A ngaihzawngpa a ngaih luatziak hia, ahi di mah a akoih ziak, lamdang sakna himhim a neikei. "amah le kei bang a pa neilou, nu-le-nei nawnlou hia, hilele ken chu it thouthou", chi'n kam siamlou chik in hon gen zel hi.
Ka phone hon ging a, ka et leh ka pa ana hia, ka lak leh, aw hampi in, "koi a om e, ka office kai kuan deka sep di ka chih ana semlou namaw ? Kintak in hong pai ou, bangmah sempeihlou, thadahlua,,,,,," ka buaidan gen sawm a "Pa,,,,,pa,,,,, pa,,,,, chia ka sap leh hon dawng nawn himhim kei a, ka et leh ka pa'n a ut teng a gen khit a aphone ana cut dan ana hi a, sana ka et leh nitaklam dak 3 bang ana pelta ahihman in, kei leng pai mai hoih ka sa hi. "Emi ka vapai phot dia, a baih thei lam in kong pawt nawn di,,,, "ka chih leh aman le, "na pai ma'n khatvei singpi dawnlai zual ni" chi'n singpi hon awm a, singpi ka dawn khit un kei leng vuahmal phin seseih nui ah inlam zuan in ka pai kheta hi. Inn ka tun in ka kawt gaivek a, ka pa'n gum deuhtak mai in ana melh a, gen di a vang khopmai. Huaini sese, ka chih simsim nu bang thu bang laa thei ahi maimah diam ah, kei kiang a bangmah gen masa lou in ka inn uah ana om mawk hi. Amel ka muh in lamdang ka sa hial a, ka pa hon tai dan tengteng zavek ahihziak in ken leng nuam ka sa kei mahmah hi. Aman le nuamsalou chu ahi ngei dia, sawtlou ka nu toh a kihoulim nung un hon pawtkhiaksan vanglak hi. Ka kikhen loh hial uh kha maw,,,, hahaha. Himahleh ka nu'n ka van kikheng nang hong pepah vanglak a, sawtlou ka pa toh ka kibauh nung un, vuah lah theu theilou ahih chiah lupna tung ah, Emily thil gente ka gelh didan khong ngaihtuah in ka lum maimai hi .
Niteng hun teng in Emily ka ngaihtuah a, ka sep ka bawl ah leng lungsim ka pethei mahmah kei hi. Tua a tanchin a gen khak nailouhte bangchi'n hong omtou zel dia aw, a tanu Siamte ngaihzawng pen toh a kitengsak dia aw, a nu leh pa (James nu leh pa) tetoh bangchi'n Siamte tungtang a gel di ua aw, thil theih utna ngen in ka dim a, lah inn lam a sep di tuamtuam boss pa'n a gen chiang in sep louh theih louh dan in hon koih khazel hi. Kha 2 lam vengveng nasem a ka buai nung in, vangphat huai tak in nikhat khua ahong se nawn zenzen a, ka pa'n sep di gen di ka sak leh bangmah a gen louh ziak in, Emily toh kihoulim nang hun ka muthei nawn hi. Emily ka phone a, "Pawtna ka nei zual a ka pai naikei deuh, paiphialta, dak 10 leh akim lak vel in inn ka tung di, na utleh ana hoh le chi'n, Siamte le zanhal a inn hong tung in chin, amah kia a ka nutsiat eive, chim ana kisasimta maithei,,,," chi'n hon dawng a, kei bel amah omlouh lai a hoh utlou ka hih ziak in, a tanchin a gensate gelhkhia in, ka om khomuang phot lai a, ka buai mahmah mai hi. Dak 11 hong ging in, inn apat in Emily te innlam manoh in ka kikhalh suah nawn hi.
BUNG 8 NA
::::::::-:::-:::::
A inn uh ka tung a, Emily le ana manfel mahmah ta hi, "Eh ! nang kia oim lah nabang a, Siamte hong tung chi hilou maw,,,,, koi a om a, muh uthuai na e,,,,,,," chi a ka kan leh, "A pute'n pawt dia hong zawn ua, tu mahmah a api toh ana kizuikhia uh hi. A pute innlam ah om, apute'n ngailua ua, a tunu muh masak pen uh ahih mai ban ah, a neihsun uh ana hih sawnsawn toh, giak di khong in ana zawn sek ua, himahleh ken le ngai teisam ka hih chiah chi'n a giah di pen lem ka sa hial kei a, a hong tun nung sunlam chia huailam ngen a om ahi,,,," chi'n hon dawng hi. Ken bel "ahoih himai lou di maw,,,,,, amah hampha khat suak kha himai eivoi, huchia duat a ngaina thei a ana om uh ahihleh" ka chih leh, "himah e, nungak vual engthei bang hita ua, ken lah kei sepsuahsa kia a adeihte leh a poimoh hihsak zou silou ing a, apute'n ana hihsak zel ua, kei a dia le zangkhai huai mahmah aka,,,,,, eh ! zanlam a ka tanchin ka gente ka ngaihtuah kik chiang in zumhuai bang ka sa sek a, na hon muhsit loh di lauhuai sa ing a, ana genlou hileng chih khong ngaihtuah kei ve", ahon chikhe mawk hi. "Musit zenzen lou e, hiaitan i tuntak vanglak leh nang le topsan ken la, hehpihtak in hon gen zel in aw,,,,,," chi'n ka dawng a, bangmah genlou in, alu asing ngauhngauh hi.
Hichi'n hon genpan nawn hi,,,,,,,, "Huchia, Siamte in a tangvalpa haichilh phial a vei ahihman in niteng hunteng in kei kiang ah a gen den hi. Ken leng loh ngaihna thei nawnlou ka hihman in tai di et inle ka en nawn kei a, hoih taktak in ka kikuppih zel hi. Zankhat lupna tung a Siamte toh kihoulim a ka luplai un, a tangvalpa'n hon phone a, sawtsim tak a kihou nung un, Siamte in, kei toh hon kihousak hi. Siamte tangvalpa aw ka zak phet in bang chi hiam khat in ka om hi. A ziakbel a aw pen ka zakzak sa mah abang a, lah kuapen aw hi hiam chih ka thei zou kei. Sawt simtak ka kihou nung un ken leng khatvei bek hong zin hen la, kimu thei leng ut huai ka sak thu ka gen hi. Aman le "ka sungte lak ah kon ngen dia, tua khol ka zatsung un hong zinman teitei kon sawm di" chi'n hon dawng hi. Siamte phone ka penawn a, mangpha kikhak in, phone a koih hi.
A kihoudante uh ka ngaihtuah chiang in, lamdang ka sa a, ka tanu vangpha ka sa mahmah hi. A ziak bel kei anu'n ka nungak hun sung in hiai bang a houpihtu di leh itt tu diktak ka mukha kei a, lehlam ah kei siamlouhna himahleh, vangtah kisakna lianpi ka nei veve thou hi. Siamte in a tangvalpa hong hoh hun chiang a om didan khong ka kiang ah hon gen zel a, lupna tung ah kou nuta kia in ka nui zel ua, Siamte kipahnate'n kei le hon kipaksak ahihziak in, kipahna'n ka nuta un ka dim uh hipen in ka thei hial hi.
Ka kihou nung uh karkhat vel aliam nung in, Siamte room sung apat in ngaihtak in hong kikou a, "Nu..nu..nu,,,,,,,, Eric hong zin dek, zing chia hong flight di, ka pute car zat di hon vanget pih ou, Eric lengpi a i vapi nang in,,,,,,," chi'n om ngaihna le theilou in, ui meikang bang mai in phe velvul hi. Ken bel, "kua e, Eric na chih", chia ka dot leh, "Tu tantan amin le ana thei nailouh maw, zanlam nitak a hong hoh dia na zot pen eivoi,,,," chi'n hon dawng a, ken leng ka theisiam ngal hi. "Eric,,,,,,,Eric,,,,,,, ka tapa Eric pen ahithei diam, ka tapa pen ana hileh, ken bang gen di,,,,, Siamte in lah hailoh phial hita,,,,,,,, ka tapa hitheilou ahi,,,, Midangteta Eric hi'n teh,,,," chia ka kingaihtuah lai in, Siamte in, a lungkimlou hon sa in, ka nung ah hon boh kawm in, "Nu nang hehna nei maw ? Eric hong hoh di ziak zaw hikei maw,,,,"? Chi'n hon dong hi. Ken leng, "heh zenzen lou e, thildang khat ka vangaihtuah kha guih ahi. Na pute innlam ah nang mah in a motor uh vangen lechin le hon phal mahmah un teh, kei hong hohpih ngaikei maw,,,,, a himhim in, na pute lak ah na tanchin khong an hilhta hia,,,,,?", ka chih leh, "Nu ka pi leh pute kiang ah leng bangkim ka hilh vekta, hon tailou uh,,,,,, kei kian ka vangen ut kei, nang toh i vangen di,,," ch'n Siamte in hon ngen nguut-nguut mai hi."Kin huai kei, zingchiang in ngen leng le, zat nang poimoh a neih kei ua leh hon pe mahmah un teh". Chi'n ka dawng hi.
Zingkhua hong vak a, ann ka nek zoh un, "ka tanu a dia nuhoih ka hih theihna omsun,,," chi'n lin kawm pipi in a pute innlam ah motor ngen di'n ka diangphei uhi. Ka nu leh pa'n Siamte duat chih petmah a duat ahihziak un, phallouh chu koilam ah ! A Driver pa kiang ah, "Tuni Siamte te nuta, lengpi lamah na vahohpih zual mai di aw,,,,," achi hi. Innlam ah kisa di'n ka ki'k nawn ua, dak 1 lak a hong tung pan di a chih ziak in kou leng kin lawmlawm lou in ka kisa uhi,,,, horn hong ging a, inkong lam ka va-et leh driver pa'n ana ngak ahi chih ka thei a, "Motor jam nak thei lua ahi,,,, kuanpah apoina om kei", chi'n ka kuankheta uhi. Lampi ah ka ngaihtuahna a kisualden a, Siamte lah ui meikang bangmai in, om didan le thei lou in a phe velvul maimah hi. "Ka tanu ngaihzawng dawn dia hoh chu ka hi ua, lehlam ngaihtuah in chu piching thil hih di'n a kilawm lah deuh ka sa a, himahleh ka tanu neihsun in hon hah zotlua ahihman in, nuhoih ka hih theihna omsun chi a hoh ka hi.
"Kua Eric ahi mahmah dia aw, ka tapa Eric ana hi zenzen leh kei bang chi om ta di,,,? Unau kingaizawng omthei di a maw ? Kingaizawng kia hilou a, kite'n hial sawm uh lah ahi ngal a, bangteng hileh a hoihlam ka kipe dia, ka tapa Eric hilou di'n ka koih phot dia, a hilou ahihleh Siamte vangphat ahi dia, ka tapa Eric ana hih zenzen leh lah kei vangphat, kum hiaitan mulou a ka na om, kimuhna hun remchang himai",,,,, chi'n ka kingaihtuah den hi. Siamte leh driver pa bel kihoulim in, chiamnuih khong a gen ua, driver pa leng Siamte chiamnuih dan siam ka sa mahmah mai hi. Hiai ni a Siamte kipahna leh kei lungsim buaidan hih kibang di'n ka gingta hial hi.
Dakkar khat phial mahmah ka ngak nung un, lenna hong leng a kigalmuh theihta, thumvei vel hong lengkual nung in kum di'n a hong kisa a, kou leng gate pawlam ah ka na ngak mai uhi. Sawtlou nung in Siamte kikou kawm in gate lam manoh in hong tai a, "Eric.......Eric........ Chi'n, kou in hong kikou khia a, midang omte le zah zoulou in hong kipawm maimah uhi. Eric mel ah thil diklou khat muh ka nei, ka lungsim tengteng hong buai a, ka kho-ul in hon buak a, ngaihtuahna mumal neitheilou a ka ding lai in, Siamte hong pai a, "Nu Eric chibai lou di maw,,,,,,? " Eh ! nang maw Eric, na aw kizaza na in chi'n i hon khatvei muhna ahihleh ka na hamhaih khasim a, i kichibai aw,,,! Ka kichibai lai ngei un leng ka chi tengteng aling a, banghiam khat hon sia om hileh kilawm in ka om hi. "Ric na gim mah di maw, na pi na pute damdam uh hinte maw, i pai di ua, innlam ah i tawldam zaw mai di uh aw,,,,,", chi'n motor sung ah ka lut uhi.
Driver pa kiang seat ah ka tu a, Siamte leh Eric a nung ah ka tusak hi. A thilgente uh ngaikhia in bangmah genlou in ka tu a. Eric hong pau khiak chiang in, nungak a di'n a melhoihna chu genlouh, a aw vuak le ngaihzawng tham ngawihngawih hi'n ka thei hi. "Nupa hithei di hile u chin zaw, khovel a nupa kituak leh nupa enghuaite lak a khat na hi kha ngei ding uh. Himahleh khovel a ka damsung nougel nupa hitheilou di na hi uh, na nu uh ka hih na ziak liauliau in ka nna/mohpuakna ka hih pichin ngai ahi. Ahihziak in ka sih nung chiang in bel na ut ua leh na kiteng thei di ua, nupa kipaktak, inkuan kipaktak na dinkhe thei ngei ding uh. Himahleh ka damsung in hiaibang thil nou gel tung ah ka tungsak theikei. Huaiziak in hehpihtak in hon ngaidam un aw,,,,,," chia ka kingaituah lai in, driver pa hong khawl a, ka dakkhiak leh inn ka na tung uhi. Innsung a lut in Siamte singpi awm, dawn in ka kihoulim uhi.
Siamte bel kum naupang chik ahihziak in a lungsim leng a naupang lai mahmah mai hi. Siamte lungsim pichin louhdan ka theih ziak in, hun remchang zong a, lungsim piching zaw leh upa zaw Eric kiang a thil bangkim gen nang hun ka zong ngai ma sa ahi chih ka thei hi. Eric lah karkhat kan om theilou di ahihziak in kou gel kihou na hun remchang ka zong den hi. Siamte lah Eric mei mah bang, daileng di, zuntha di na ngawn zui den ahih chiah a gu-k in ka lungkham mahmah mai hi.
Nikhat ka pa'n Siamte a dawr van hong tung di, ana etfel pih zual di'n hon zawn hi. Eric omlai ahih toh Siamte le ut law lawmlawm lou hi. Himahleh apute duatdan khong a ngaihtuah chia, "hitheilou di" chia vadawng utlou chu ahi ngei dia, "Nu, Eric toh ka vahoh mai di uam,,,,"? Chi'n hon ngen hi. "Amah a ut nak leh poilou pi ", chia ka dawng leh, Eric in, "Siamte,,,, na hong paikik hak kei di nakleh inn ah ka na om mai di, ka om nuam chiah lou hiveh aw, nang le hong tung kik pah nawn sawm di aw,,,,," chi'n dawng hi. Siamte leng lungkim ngellou ahi, chih theih di khop a amel a langsak in, kuankhe hna-hna mai hi. Ken bel ka thil gen ut hun remchang neithei dan a ka lat ziak in ka kipak gu sim mahmah mai a. Himahleh genkhe dek hi leng, "Eric in bang lungsim anei dia,,,,,,ka thugen a gingta nuam diam ? Gingta hita tok lele kei iiplah na'n a pumdim maimah diam? Lah genlou theilou hi ing a,,,,,,,,! Lungsim buaitak in ka kingaihtuah den hi. Bangteng hileh, haksatna hiaitan ka na thuakta, ka mailam a haksatna omte leng ka thuak dia, ka thuak zel di, ka tate adia hoih leh dik ahih nak leh, NU ka hihna a ka mohpuak ahi, chi'n ka lungsim ka bawlfelta hi.
Siamte pawtnung Eric leng lupna tung ah, la khong ngaikhia in lum maimai hi. "Ric hiai lam ah hong paiphei zual ve, thu tamlou genpih ut kon nei zual,,,," chi'n ka samphei a, ka kiang ah hongtu-a, a nu leh pa, api leh pu tanchin bangkim ka dong vek a, aman hiaidan in hon dawng hi. "Ka pute'n a hon duat in ahon homthoh mahmah ua, tua ka hong zin di le khouh chih petmah in hon khou uhi. Himahleh hah tangtak a ngen ka hihman in ka lungkim louh di alauh ziak un phallou kawm pi'n hon zinsak uhi. Ka neulai in ka nu'n mi inn khat ah hon pawtpih a, huai ka pawtnate ahihleh tua hon enkol lellel ka pute inn ahi. Ka pu'n nektheih lei dia hon pawtpih kar in, ka nu ana pai a, sawtlou nung in pasal dang nei ngal hi, chih ka theih ziak in kei leng ka pute in ah ka omden hi. Huai lai in ahihleh ka pa bel mi giloute khut thuak in ana sikhinta hi. Huchi'n nu leh pa neilou in ka pi leh pu te kiang ah ka khangkhia a, ka pu te'n ahihleh hon duat ua, hon homthoh mahmah uhi. Khosakna lam ah leng genthei lua ka hi kei ua, ka pu ahihleh tu'n Ex-MLA ahita. Huai hun lai a sum leh pai tampi ana kholman ahihman in tuni tan in leng ka deihdeih hon leisak ua, ka ut na na ah lai ahon zirsak uhi. Ka pi leh pute ziak in nu leh pa neilou ka hihlam leng a khen chiang in ka mangngilh phialphial sek hi".
A thugente'n ka sintang hon khei mahmah mai a, paukhiak ka sawm chiang in leng ka paukhe thei kei hi. Ka gawl ka hahsiang a, "ahihleh na Nu tanchin bangmah thei zui nawnlou maw,,,,, na pute'n hon hilh ngeilou uhia,,,,,,,? Na nu min bang a, na pa min bang a,,,,,,,,"? Chi'n, pau haksa sakawm pipi in ka dong nawn hi. "Ka nu ahih leh ********Kim' ahia, huai hon taisan nung in, zu ngawlvei khat toh kiteng in Lamka vengkhat ah a om uhi. Ka let nung a zongsuah sawm a, aguuk a ka zong bawlbawl sim chiang in leng huchi didan kuamah ka muh ngeilouh ziak in zong leng sawm nawnlou in hichi'n ka om mai hi. Ka pa min ahih leh **********Muan ahi,,,,,,,". Chi'n hon dawng nawn hi.
"Bangteng hileh thil omdan ka hilh vek ngai ahi. Hiai hun remchang ka neih sung a ka hilh kei leh, Siamte hong pai man leh hilh manlou di ka hihziak in" chi'n thil omdan tengteng Eric kiang ah ka hilh vek hi....... Eric,,,,,na nu ka hi,,,,,,," gen sunzawm theilou in ka kap a, lamdang satakmai in Eric in hon en hi. "na nu tanchin a na thutheihte a tam zaw diklou ahi. Na nu'n ka hon paisan zenzen kei, na pa sih ziak in a gal di'n i vahoh a, na pu'n nektheih lei dia hon pawtpih a, na pu'n a hon phone a, gamdang a hon zinpih ahihdan hon hilh hi. Ken leng nileng phial na hong tunkik nawn leh chi'n ka hon ngak a, hong tung ngei mahmah lou na hih chiang un, chi'n kon paisan hi. Pasal ka nei zenzen kei a, ka haksat mangbat lai pen a hon panpih u omsun Ukhual, sanggam bang a ka et ahihziak a a inn a hontungpih ka hia, na omlouh nung in leng huai inn mah ah ka kik nawn hi".
"Tun chu thil omdan teng na thei chiangta di maw,,,,,,? Gintak melsim lah gintak haksa sakmel tak in Eric in hon en a, "ka tapa na hihleh hilouh kei na nu'n a chiamtehna tuni tan a mangngilh nailou kei ve,,,,,"na kawng bom lak ah chivom khutpi maichiah khong om ahi,,,,,,? Chi'n ka gen hi. Eric in ginlelh vuallouh a theichiang ka hi chih a theih in Nu,,,,,,ka nu maw nang, amel ah a khasia ahi chih ka thei, himahleh pasalpha tak a omtheilou chu ahi ngei dia, a mittui hong pak nilnel sam hi . "Eric bang teng hileh, pasal na hia, piching khat na hita, hiai dan a omlou in, lungsim siangthou tak nei in, thu i genkhom zek lai di. Siamte hong pai leh thil teng kigenthei nawnlou di,,," chi'n Eric hon kawina khut ka lakkhiak sak a, hoih tak in ana ngai khia aw,". chi'n hiaithu ka gen sunzawm nawn hi.
Siamte toh na kal thu uh ahi. Unau na hi ua, unau na hih lam uh na kitheihlouh ziak un hiaitan dinmun ana tungkha na hi a ua, kon mohsa zenzen kei. Ahi ziak in NU ka hihna ah, ka mohpuak bangbang na tung uah ka hih ngai ahi. Na kiteng uh lem ka hon sathei kei,,,,,,"Eric in theihsiam haksa sa mah leh, ka theihtawp a ka khem nung in lungsim piching tak in hon theisiam thei vanglak hi. "Nang bel na lungsim pichingta ahihman in na theisiam a, himahleh nanau Siamte in thil theisiam lou di ahihman in tu tawtot ahilh pen thil hithei hilou ahi. Huaiziak in na omdan pa-ngai un na hong omtou zel di ua, awl-awl in nang khen dan na ngaituah ngai ahi. Na khen didan zaw nang le na theisiam mai di,,,,,," chi'n ka gen hi. Eric in, "Nu, Siamte toh unau ka hihlam uh tu'n eigel kia'n i thei a, kuamah kiang a genlou in kitengsuk mai le ung, ahitak in gen leng ken bel ka Nu na hih ziak in na thugen bangkim pomthei ka hi. Himahleh, Siamte in hiaithu bang chik mah chiang a pomthei mahmah lou di ahi. Hiai thu hilh bang hileng, kei ahilhtu ahon huat ban ah, nang a Nu ngei le hon haw tel dia, thil hoihlou zaw hong tung khak lauhuai sa zaw ka hi". Chi'n hon gen hi.
BUNG 9 NA
:::::::-:::-:::
Ka kihoukhin uh Siamte leng polithyne vah simtak khai kawm in hong lut a, ka mel uh ahon muh tak in lamdang sakna'n hong dim hileh kilawm in ahon en hi, "Nu bangchi u e, kap khin mah nabang ua,,,,,,,,? Ka pu'n pai hon phal zok kei a, nna ka sep khitna uh zaw sawtta hi a. Bazar lam ah ka van di lei di chi'n ahon hohpih a, van tampi hon leisak, hiai Eric khedap di le ka nget leh hon leisak, Rs 4000 man chi ua, Rs.3500 a hon pia uh", chi'n a van leite hon phorh a, "Nu nang di le hiai numei handbag hon leisak" chi'n bag mantam chi simkhat hon phorhkhe nawn hi. Eric in, "Siamte nang a di lah,,,? Chi a adot leh, Siamte in, kei a di bangmah lei lou, hon leisak sawm na a, nougel a di ahon leisak nak leh, kei a di ngailou ka chih leh, nektheih hon nek pih a, kou hichia hong pai,,,,," chi'n kipah mel tak in hon gen hi. Siamte khosakdan leh paukam ka zak chiang in, a lungsim singthou dan khong ka phok thakthak a, vakhu bang mai a nunnem, kei ka ginat louh ziak a alungsim liam natak a hong awm mai di ka ngaihtuah chiang in, dam utna lungtang le ka nei kei a, sih mai khong ka ut hial hi.
Omdan pang-ngai a om in, Siamte theihsuah di laukawm pipi in ka om uhi. A haksa ngeimai,,,,,, Eric paini di lah nai hiaihiai, khatvei bek "Ka tapa", chi a sap a ngongkawi vongvong khong ka ut hi. Himahleh Siamte in lah khah ngei mahmah lou, a omna tenga zuizel ahih chiang in, kou gel in leng kihoulim nang huntuam ka nei thei nawn kei ua, Eric innlam pai hun dekta ahihman in, atam theilam inn ah ka kipawl khom zel uhi. Siamte Bathroom a kisil dia a lut kal in Eric lupna tung a phone zang a pau ka ngaih gu-k leh, apu toh kihou uh ahi chih ka thei a, ken leng bang gen uh hiam chih thei ut ka hihman in, a thugente aguuk in ka ngaikhia hi. Eric in apu kiang ah, "hiai lam ah ka nu leh ka sanggam numei ka mu a, tu'n amau inn ah ka om lelel hi. Ka hong pai chiang a innlam a hon thruai ut ka hihman in ka bank account ah sum tamlou na hon khak ngai di,,,,,,,! A pu'n bang hiam khat, Eric thugen a awilouh thu gen chu ahi ngei dia, "Ka thugen gingta lou a, ka hon ngetna na hon pomsak kei di leh, innlam leng ka hong kik nawn kei dia, ka nuta un, hiai lam ah ka om mai di uh, tua lam ah deihdeih, nei in, ut dandan in om thei mah leng, ka kipahna bukim tuanlou ahi. Huai sang in ka nu, leh ka sanggam nu lak ah genthei tak in om leng kipahna ka mu zaw thouthou di chi'n a phone koih khum hi.
Room apat in Eric hong potkhia a, apu a houdante ziak a tai dia ka kisak laitak in Siamte kisilzou ahong potkhe chet hi,,,,,Siamte in atheih khak lau ka hihman in bangmah genlou in ka tu maimah a, Eric in ka mel apat a lungkimlou ka hihlam thei in, pai hun di a chih ni a pai nailouh phot a ut thu hon gen a, ken bel, "bangteng hileh na pai phot hoih di ahi,,,,,"chih teng in ka dawng hi. Eric phone hong ging a, apu toh hong kihou uhi. A pu'n banghiam chi a khemthak chu ahi ngei dia, A kihoukhit un Eric in, "bang teng hileh paini di ka chih ni'n ka vapai phot mai dia,,,,,, a kin thei lam a hong hoh kon sawm nawn di, hon chi thei vanglak hi. Ken leng, "na pai di mah ahi, Pathian oimpihna'n i dam di ua, kimuh ni hong om nawn mahmah di ahi, na laizilna lam bang ule lakloh lua ahih chia, hiai thute ziak a na tawpsan mok uh lemsalou ka hi,," chi'n ka dawng hi.
Eric pai ni di hong tungta ahihman in kou eng Eric kha ding in Siamte pute motor mah in lengpi airport lam manoh in ka kuankhia ua,,,,,,,,,, lenna hong landing hun ngak in bangbang hiam gen in ka kihoulim uhi. Lenna hong tung a, Eric leng lut din hong kisa a, kimuh nawn hun di theilou in ka kivailiamta uhi. Siamte in hichitel a a sanggamppa ana iit/ngaih theih lamdang ka sa hial hi . A sanggampa, a sisan zoppih ahihlam thei leh hiai bang in a ngai in a vei diam,,,,,,? Ka kiklam un kamkhat in leng apau kei a, ka houpihnate leng paukam a hon dawng lou in, alu a sing/pei thoh in hon dawng lel hi. Inn ka tung ua, lupna tung kidenna in, ann ne di na ngawn inle hong thou nuam kei a. Kei kia in annkam limlou tak in ann ka ne a, ihmut hun in kiplou tak in, ak ihmu bangmai in ka ihmu a, ka nuta un ka taksa un a thuak loh hial in ka thei hi.
Hun hong pai zel a, Siamte le Eric avei/ngaihnate neukhah hong dan omta ahihman in ka nih un ka potkhom theita ua, ann ka nekhom theita ua, lup hun in ka nuta un kalum rual theita uhi....... Ka neu apat ka hinkhua ka suikik a, nidang a ka ngaihtuah khak ngeilouh leh ka hih ngeilouh Pathian kiang ah ka haksatna tut ka ut na hong lian mahmah a, mihing lemgelna in a phak vuallouh kou nutate mailam hun di Pathian khut a ngak kaan a hoih zaw lampi dang omlou hi'n ka thei a. Himahleh thanghuai tak a ka na om khak nate, ka numeina mi tuamtuam lak a sum muh nang a ka na zatnate ngaihtuah in, Pathian in ahon ngaihdam theih ka kilamen nawn kei hi.
Beidong leh mangbang tak in hun leh ni te ka zang tou zel a, Siamte bel a u Eric aw a zak nak leh bangmah dang lungkhamna neilou hileh kilawm khop hial in omthei veve hi........... Hichia Emily in a tanchin a gen laklawh lai in inkongkhak hong kihong a, nungak melhoih leh duangching, a melhoihna sang mah a apian nalhna in etlawm sak zaw hileh kilawm khop a piannalh ahong lut a, ka muhtung apat in ah Emily tanu Siamte hi ding in ka gingta ngal hi. Emily in,,, "Eh , Siamte hong paita maw,,,,? Pawtsawt na chia, na pute inlam na omchia zaw nuam sathei lua hidi na ka maw, inn lam le na hon ngaihsak phasek kei a,,,,,,,,nekbawl bang le hunta, nasiam dandan in nek khong hon bawl inla,,,,,, chi'n kei toh kimeltheina ahon neisak ngal hi....... Siamte toh ka kichibai ua, ka min khong ka hilh a, a tanchin theihsa himahleh ka siam bangbang in ka dong teisam a, phailam a a laizilna lamkhong ka genpih a, kum thum lam ka na omkhak tei ziak in ken le gen di hunkhop ka thei a, ka om lai a ka gamtat dan tuamtuam te gen in, ka nui zaizai uhi.
Siamte in, "Pa **** singpi kon om di aw [anu lawm ka hih ziak ahi ngei di,,,,,,,,,,,,,,,,,,,,,,.] Eh tangval lailai a "pa", kichih pah in ah, "u" chi'n hon sam ngal ve,,,,,,,, ka chih leh Siamte hong nui nanalh hi. Siamte gamtatdan in anu Emily tuk kei mahleh a melhoihna leh a piannalhna te'n ka mit ala riau in ka thei mai a, "Siamte,, nungak melhoih leh feltak na hi a, pasal hoihtak neih na sawm di aw,,,,,, chi'n, kei gen dia kilawm leh lawmlou ngaihtuah sese lou in ka thuhilh tei ringot hi. Nui kawm in, Singpi hon tawiphei a, bangbang hiam gen in ka nui zaizai uhi. Himahleh Emily in a tanchin agen pen Siamte theih a gen ut nawnlou ahihman in huailam pen ka tawpsan ua, singpi ka dawn khit un, bangmah gen rem nawnlou ahih chiah,,,, hun remchang dang a kihoulim thak di'n Emily te in ka potsan hi.
Inn ka tung a, bangmah gen lou in ka room ah ka lut paisuak ngal a, computer ka hih hing a, Emily tanchin ka gelhsate ka en a, huai ni a agente ka gelh belh zel hi, ka nu ka room ah hong lut a, buai tak a lehkha ka gelh lai hong houpih hi,,,,, buailua ka hihman in ka nu hon houpihna le dawn nachang ka na thei kei zawzen hi. Ka lu a hong beng in ka nu'n bang e tulai na gelhgelh,,,,? Chia hon dot kawm in ka thugelh simsawm in ahon en a, EMILY HINKHUA chi a athupi ka taklat amuh phet in sim ding in nget chih petmah in hon ngen hi, ken bel gelhkhin nailou ka hih dan leh hun remchang dang a Emily tanchin a kim sipsip a ka theih vek hun a ka simsak di thu in ka dawng hi. Huai hun remchangsa in ka nu kiang ah, nileng leng a ka pawt sek ziak khong ka gen a, ka pawtna ziak theilou a hon taitai sek khong uh, a hon tai nawn kei khak leh chi'n ka pa kiang a hilh ding in ka nu leng ka ngen ngal hi. Ka chih simsim nu bel Emily tanchin buaipih a ka kipei nakluat ziak leh, ka pa hon taina aw a zak khak ziak in ka kikhen loh hit-het uhi. Bangteng hileh iitna dik a ki iita kingai hi le ung, hiai bang thil maimai te ziak a ka kikhen uh ka gingta het kei. Himahleh amah le buaipih manlou khop a thildang ka buaipih theisiam nuamlou in, ka theih bang khamkham in ki genfel sawm mah leng vokpi mai a tuikepsuang paih a gen bangmai un, phattuamna himhim anei kei a, kei le kiniamkhiak peih biklou chu ka hi maithei, atawp in kong kikhen loh hit-het uhi.... hahahaha.
Emily mi vangtah leh mi hehpih huai tanchin, mite theih dia puankhiak ka ut na hong lianta mahmah mai a, a ziak bel, amah Emily tanchin apat kuahiam khat in banghiam bek a phattuamna amuh ka gintak ziak ahi. Amah gen bangbang ka gelh khin vekta, Himahleh a tanchin kim sipsip ka theih vek nailouh ziak in ka puang khe nai hial kei hi. Siamte leh Eric kal thu khong ka ngaihtuah a, kei tan dingdan khong in ka kikoih sek a, vaihawm didan ka thei bun kei. Unau piangkhawm, sisan laigui kizawm hinapi, a kitheih khaklouh ziak ua, unau ki iitdan hilou, nungak leh tangval ki itna a hong ki iit chih mok pen, a gilsung a ana pai a, haksa tak a ana neikhetu anu adi mahmah in haksat mel ka sa hi. Pasal muanhuai leh hoih deuh khat khong nei hileh bel tua a dinmun amah numeisia in buaipih ngailou in, apasal in thil bangkim abuaipih vek thei dia, lungkham huai thou mahleh a lungkhamna aneep deuh din ka um hi. Himahleh bangkim amah meithai Emily khut a kinga lah ahi ngal a.
Hun hong pai zel a, keimah nasem a ka buai leng khanih sung vengveng hong phata a, himahleh Emily tanchin bangmah ka theihbeh a om non naikei, aziak bel a innlam ua vapawt dia hun ka neihlouh ziak ahi. Nidang a ka vei leh ka ngaih poimohna bang in leng ka vei in ka ngai poimoh nawn lawmlawm kei, aziak bel hun a kipelh sausim taak ziak hi'n ka thei. Himahleh hiaitan ka na buaipih, tha leh zung seng a, ka hun manpha tak ka na zatbeina pen, athawn a luangmang sak maimai ka tumkei himhim hi. Hun remchang masa penpen a kimuh nawn ka tup tinten lai hi. Nikhat Emily phone call ka dawng a, Phur tak in ka la a, himahleh Emily in bangmah genlou in a dai dide maimah hi. A kidiik feihfeih ging bak ka bil in bangmah zak a nei kei. Huai hon dawng le hon dawng lou a, dai dide a awm sung in ka lungsim ah,,,," kei toh kihoulim a ut ziak a hon phone ahi dia aw, a in lam ua pawt dia hon deih ahi ngei di,,,,bangchi ahi dia aw, kap lah a bang a,,,,,,,,,? Thil tampi hong lut man hi.
Sawtkuam tak ka ngaihkhiak nung in leng bangmah a gen louh ziak in, "signal ginalou hi'n teh", chi'n ken ka call back hi, Himahleh ka call a pick-up tuan mongmong kei a, vuai nga mahmah khollou in a ki ring bei hithet hi. Vuai nga mahmah ki ring bei ahihman in ken leng "hon hih khelh hin teh", chi'n ka nna ka sepsan nawn hi. Banghiam thil hoihlou hong tung di ahi chihlam himhim ka ngaihtuah kei a. Ka nasep semtui lua ka hihziak in, thildang bangmah leh ngaituah lou in ka sem hi. Sun singpi dawn hong hun tak in ka nu'n tukverh apat a hon sam a, kei leng singpi dawn di'n innsung ah ka lut hi. Singpi khong dawn a ka nu tawh ka kihoulim lai un, ka nu'n Emily tanchin hon genkhe mawk hi. Ken leng lamdang ka sa a, "kei vei bang a ka nu'n le ana veitei hi di eive,,,", chi'n ka ngaihtuah a, ka nu'n bel, kou gel kingaizawng sek dia hon ngai ana hi maimah a, ahon gen khiak tak in nuih chih petmah in ka nuikhe hial hi.
Singpi dawn khin ka nasep sunzawm mailou in ka room sung ah ka lut kawi masa nawn hi. Ka lungsim ah Emily ngaihtuahna hong lian mahmah mai a, ka phone chiang a lah pick-up theilou ahih chiah ka lungsim abuai mahmah mai a, "khatvei himhim call thak di", chi'n dawhkan tung a ka mobile ka la a, Emily ka call ngal hi. Sawtlou nung in papi khat, a aw putek melsim lam khat in phone ana la a, Emily ka kan leh lupna ah om ahihdan leh, tu mai a houpih theih ahih louhdan hon gen hi. Ken bel lamdang ka sa a, "damlou maw leh,,,,,,,? Chi'n kintak in ka dong kik pah ngal hi. "Dam mah e, himahleh buaina ka tuak ua hi. Nang kua e,,,,,koi lam apat na hia,,,,,? Chi'n hon dong nawn hi. "Hiai ah, (ka veng min uh leh ka min ka gen a) ka hia, amah hih ka lawm hoih mahmah ahihziak in a tanchin ka thei ut a, hon phone ka hi, tu zingkal lam in hon phone a, ka lak le lah bangmah genlou in a koih kik zel a, ken le ka sep di poimoh semkhin a hon call thak ka hi,,,,,banghiam buaina om na chih, hehpihtak in non hilh thei diam,,,,,,,? Chi a ka dot leh. "Bangteng hileh naman thou leh hiailam ah hong hoh zaw maive maw, phone apat a gensang in, a lawmhoih na hih thou leh paukam mahmah in kihou zaw ni,,,,", ahon chih ziak in ken leng selbuai sese lou in ka phone ka koih a, Emily te in lam manoh in kintak in ka diangkhia hi.
Lampi a ka tai lai in leng bangmah thil dang himhim ka ngaihtuah thei kei a, ka motor khalh le ka lungsim ah a omkei, motor dang toh kiphukha phialphial a ka tai chiang in traffic police te whiistle mutging toh, motor horn gingte'n hon halhsak guih zel a, ka lu kising harh kawm in, "Emily tung ah bang thiltung ahi dia aw,,,,, damlou in houpih theihlouh hileh ka maban lakloh chi na mahmah maizen e,,,,,a tanchin ka gelhsate, a tawptan tunglou a mite lak a ka gelhkhiak mawk di lah hilou dia, bangteng hileh, a tanchin ka gelh pen zaw thutuam ahi. A tanchin kim sipsip a ka gelhkhiak ut ziak a asih di lau ka hi", chih ka ngaihtuah in, ka ang-ma sialdan ka kitheikhia a, bangteng hileh, mihing hinna himhim ah le, Emily sithei hilou ahi, a tapa leh atanu toh inkuan kipaktak dinkhe lou a amualliam mai di lem sathei mahmah lou ka hi,,,,,", chi a kingaihtuah kawm in ka tai zel hi.
Nidang a ka bike parking sekna mun a parking sawm in ka taizel a, himahleh parkingna mun ong himhim ka mu kei, nidang a motor 4/5 kan khawl ngeilou hinapi huai ni in, parking area ana dimvek mawk hi. Lamdang satak in ka taikik a, a sak deuh lampi gei ah ka koih a, kintak a step a taisuk in Emily te inlam ka zuan hi........ Ka thilmuhte'n ka lungsim ahon kisual sak den lai hi. Emily te innkiim teng ah mipi kivei mutmut ka galmuh a, "Siatna thupitak khat Emily tung a tung ahi", chih ka thei siam ngal a, ka tha teng bang a ling zoihzoih zou hial hi. Awl-awl in ka naihsuk zel a, Emily te innsung ah leng mipi tam hun tawk tak a om uh chih ka muthei ngal hi. A ziak bel a inn zuaak(baang) saklam teng uh kilakhia ahihman in.
BUNG 10 NA
:::::-::::::-:::::::
Innsung lam a lut ka sawm leh mihing a tam ziak uhia, a inn aneu ziak chih ka theikei, inn dim phitphet in mipi ana om ua, mipi kar ah bangmah genlou in, di'p kisai lit-lit kawm in ka lutphei zel a, lupna khat tung a Emily kidik feih-feih ka mu a, "Emily silou ahi", chih ka muh tak in, neukhah in ka lungsim hong nuam deuh hi. Himahleh Emily innsung a banghiam buaina tung omlou hileh mipi hiai zahzah bangchi mah in a omkhawm kei di uh, chih bel mihai nilenglou adi'n chu kuamah hilh ngailou in achiang huntawk hi. Emily lah va houpih ngam chiah lou, mipite lah kuamah ka meltheih omlou ahihman in, ka buai mahmah mai a, thil omdan lah ka thei ut si a, va dot mai di kuamah ka thei kei. Tutna mikhat tutna di awm khong lel awng a om a, huai ah ka va kihentei ringot hi. Huchia, ka tutlai in, ka nung a nupi nihte kihouna in ka lungsim hon khoih in temta a dot bang mai a hon sun hileh kilawm khop in ka om hi, "Siamte, nungak fel leh melhoih in hiai banga thil ahih ut ka gingta thei kei a, himahleh ka nung a nupi tu te gendan lah ahi ngal a, bangteng hileh, hiaidan a thiltung mawklou di ahi. Thuchiang tak ka theih kiphamoh ahi, chi'n zum leh zah le khual lou in, Emily lupna tung a tu kianglam manawh in ka paiphei hi.
A kah-kah na a aw suak di le om nawnlou phial ahihman in, aw heu thiuthiau in hong paukhia a, "Eh,,,,,**** hong hoh maw, hiai ah hong tu tei ou,,,,", chi'n a lupna tung a tu di'n hon kokmuh hi. Kei leng ka vatu ngal a, bangmah le genlou in, Emily in amittui nul-nul mai hi. Emily in ka lungsim theisiam hileh kilawm tak in, ka maitang a hon en kawm in, "ka thiltuah, ka tung a thiltung tu zingkal a hon hilh di ka chih leh, bangmah ka gen thei kei a, hong hoh nachang bang na thei a, nafel lua, ka tanu Siamte in hon mualliamsan a,,,,,,,,,,,,,", gen sunzawm theilou in hong kidik nawn feih-feih hi. Bangmah gen di le ka theikei a, pasal chih mahtak in a nep didan le ka thei tuankei, "Emily, kap-kap keive,,,,,,,bangteng hileh, thil tungkhin chu bangchi zong teng in bawlhoih ut mahleng, hih didan tuan omlou ahi. Piching tak a na om di ahi,,,,,nangkia tung a thiltung hilou, hiai khovel a mi tampite ana tuahsa ahi,,,,,,", chi'n ka siam bangbang in ka hehnem teisam hi.
Nupi tek lam simkhat hong pai a, Emily kiang ah, a innlam ua kihihhalh hoihsa ahihdan hong gen a, Emily in "ngailou, kihihhalh ka ngai kei,,,,,,,", chi'n dawng mahleh, huai pitek in hahzot lua ahihman in leh, ken leng a thuakna adan hong om deuh khakleh chi'n pitek hong thil gen ka na huh pah hi. Pitekte innlam ah kisuhalh di'n ka thum un ka diangkhia uhi. Lampi a ka pai lai un, Emily in, a lawmte ka hihdan khong anu kiang ah gen in, huai pitek leng, Emily pasal James nu ahihdan hon hilh hi. Sawtlou nung in, Emily nute inn ka tung uhi. Innsung a tutphahsau ah ka tu sak a, a kiang a tu kawm in thildang ngaihtuah leh, ka chih man in, ka siam bangbang in chiamnuih khong gen in, ka chiak naknak teisam hi. Emily phone ahong ging a, Eric ahi ngei di,,,,,,,,, sawt le kihou manlou in, Emily khophok lou in hong puk suk mawk hi. Chouka a anu singpi bawllai kintak in hong taiphei a, ka nih un ka siam bangbang un ka buaipih uhi. Harh thei zoklou ahihman in, Emily nu'n a innveng ua nurse training suakthak khat om ahi ngei di chu,,,,, huai sam ding in a vapawt khe ngal hi.
A lu khong puankawt a dep in, ka siam dandan in ka buaipih sunzom zel a, sawtlou nung in, pang-ngai tak in hong omthei nawn vanglak hi. A nu hong pai pah di sa a ka ngakngak hang un hong tung thei himhim kei hi. Nurse sam dia a kuanphei leh, Emily te inn luahna pa'n, Emily te in zuak a phelh khong uh lungkimlou in, Emily pa toh kina buai in, huai innneitu pa'n, Emily pa singtum a khen ana hia, huai Emily nu'n vatuak kha in, Emily khophok lou a om le ngaihsak manlou in, apasal abuaipih zaw hi. Emily le hongharhta ahihman in, a thiltuahte leh Siamte sihna ziak thei ut ka hihman in, huailampang mah ka gen pih zel a, atawp in Emily in leng hichi'n hon gen nawn hi.
"Ka tapa in hon phone masak pen khah karkhat vel paita hi'n ka thei, phone apat in Eric in hichi'n hon hilh hi". "Siamte kiang ah Unau ka hih dan leh thil omdan bangkim ka hilhta a, himahleh i gintak bang ngei in, Siamte in a gingta nuam kei himhim hi. Thil hithei hilou ahi, khovel omsung hiaibang a thiltung ngeilou di ahi. Tung di hi lehle eigel kar sese ah tung lou di ahi , na hon deihloh man a na suanlam bawl hi maw,,,,,,hehpihtak in hon khen mahmah ken aw Eric,,,,,,chi'n kap zoihzoih kawm in hon ngen hi. Ken bel unau ka hih dan uh thei chiangta ka hihman in, kei theihchiang bang in Siamte inle theichiang meng henla, unau dan in, kikhosa vanglak leh ka nih ua a dia zangkhai huai di chi'n, ka hun remchang teng ah ka hilh den hi".
"Ni 3 nung vel in a lawm nu'n hon phone a, Siamte in, ann le ne nuamlou, bangmah ne nuamlou, class lah kai nuamlou, lupnatung a lumden ahihdan hon hilh a, kei leng a nitaklam ka hostel ua pat in, Siamte mu di'n ka vakuan hi. Siamte in hon mu mahleh hon mu dan inle alang kei, et le hon en kei a, a etna ngei en in, atu ngem-ngum maimah hi. A kiang ah ka vatu nai a, thil omdan ka dot leh, "i kiteng theih kei di leh, ka kihih lum mai di,,,,,' chih teng in hon dawng hi. Himahleh ken bel paukam nem leh paukam pang-ngai tak in ka thuhilh a, a kihihlup mok leh, a nu leh kei a sang-gampa thuak ahaksat didan khong gen in, ka khem zel a, damtak in i om dia, pasal hoihtak hon nei di nei voi, na mel lah hoih, na pian lah nalh si,,,,, khovel ah kuamah phulouh na nei kei,,,,,,,,,,chi'n chiamnuih thutak in ka gen hi. Amah a tawp in hong nuikhe khong a, ka awm a hong bawh in, "tuni apat Eric chi'n ka hon sam nawn kei dia, 'U' chi'n kon samta di aw,,,,, ka damsung in na nau ka hi dia, nang le ka u hidenta in aw,,,,,,chi'n kah-nuih chihdan in hong om hi".
Ken leng hichibang thu khong Siamte in a hon gen man in, muanmohna himhim ka nei kei a, Nitaklam khomui zul in ka paisan nawn hi,,,,,, ka ki phone zel ua, ka hostel uh kigamla lawmlawm kei mah leh Exam khong naita ahihman in, nitak chiang in bel ka mu man kei. Huchia lungmuang tak a ka omlai in, tuzingkal a ka thou ka phone ka et leh miss call 20 lam mahmah ana om a, ka et leh Siamte ana hia, kei bel huaizan ka ihmut baih ziak a theilou hilou in, ka phone silent a ka koih khak ziak a theilou ka hi,,,,,A nuai ah msg khat ah "mangpha" chih teng ana kigelh leuhlauh hi. Ken leng nitak a mangpha hon khak na hin teh chi'n, zingkal ka wish ki'k pah hi,,,,,Nidang a ka msg second khat le kihal manlou phial a hon reply sek ahia, huai ni in dakkal khat pai nung in leng ahon reply kei a, lamdang ka sak man in ka va phone hi. Ka phone thei tuankei, swich off a kichi zel bok si. Ka buai a, thu theihchiang ut in, a lawmnu ka phone nawn leh, a omna theilou chi'n hon dawng mawk hi. Kei leng breakfast le ne manlou in, Siamte te hostel lam ah ka taiphei ngal a. Kin tak in Siamte room ah ka lut a hi. Siamte room sung ka va et leh kuamah ka mukei, beidawng tak a ka om lai in, lukham nuai a aphone koih ka mu a, phone la dia ka kun leh lehkha them khat ka mu a, a lawm nu a dia agelh ahi. Hostel building khang huan ah ka om chi'n ana kigelh hi.
Innkhang huan lam manawh in kin leh buang in ka diang suk ngal a, ngaihtak a kikou kawm in, Siamte,,,,,,,,,Siamte,,,,,,,! Kuamah hon dawngtu di himhim a om kei a, hosteler te'n ka aw za in et in hon en kheukhou maimah uhi. Ka zong zel a, huansung teng zongsuak vekta ka hihman in kik ka sawm hi. Kik sawm a ka kihei laitak in, ka pamlam singkung ah mikhat kikhai lai ka mu a, ka kiguih nakluat ziak in, kei leng ka kikoukhe hial hi,,,. Kua ahi hiam? Chih theilou ka hih man in kintak in ka naih phei a, akiang chit ka tun in, ka sanggam nu, Siamte ahi chih ka thei hi. A hinna ka hut man khak leh chi'n kintak in singkung ah ka kal tou a, ahih ziak in nitak a ki-oklum ahihziak in lamet di bangmah a om nawn kei. Midangte le hong paikhom ua, midangte'n bel khoih nailouh a police hilh phot di chi'n gen uhi. Himahleh ka sanggam nu singkung a aluang kikhai en maimai theilou ka hihman in, kuamah gen ngaikhelou in ka valakhia hi".
Emily in Eric gendan teng ahon hilhsawn khit in, khasia kisum chih theih ngoih-ngoih kawm in, hichi'n hon sunzom nawn hi,,,,,, "Huaithu ka zakna ahihleh zingkar lam, na hon phone maa deuh ahia, hon hilh di chimah leng ka khasiat luat ziak in bangmah ka gen khe thei kei hi. Tua ahon phone nawn na ah, tuni a hon puaktouh a sawm dan Eric in hon hilh a, lenna a hon paipih di uh ahihman in, hong tung hak lawmlawm uh ka gingta kei. Ka pa lah tua khua phoklou a ICU a om, ka nu lah hat nawnlou,,,,, ka tanu ruang dawn dia kei le ka kuan ngai ahi, chi'n, mihai bangmai in, thakhat thu in hong ding guih hi. Emily Innkong lam pawtsawm a apai ahihman in, ka vadelh a, abaan ah ka valen a, "Emily, na lungkham didan bangkim ka thei, ahihziak in, piching tak a na thuak poimoh mahmah ahi. Na tanu ruang dawn din mi tampi a kuanta uh. Innlam a na om hoih ahi", chia ka nep hang in bangmah a ngaihkhiat utlouh ziak in, a nung ah ka zui ha tei top hi. Gengen mahleng hoh thouthou di chih ka theih ziak in, taxi ka chang pih a, ahong taitak in, taxi ah ka lut pih a, airport lam zuan in ka taikhe nawn uhi.
Tagah ahihziak hia, Siamte ruang dawn di mipi a tam lawmlawm kei ua, vengsung makaite leh a lawm hoih ahi ngei di chu, mi 5 vel toh Siamte ruang ngak in ka tu ninep uhi. Emily lah ka houpih zou nawn mang kei a, a vengsung makaite ulah meltheih kuamah ka nei kei. Ahihziak in siatna lamthil ahihziak in, phatuam ngaihna hiven chi'n ka thuak hamham a, lenna leng hong tung a, Siamte ruang lakhia in vengsung heutute'n motor zat di achih uah ka kiguang uhi. Lenna tuangte ahong kumkhia uh amuh rual-rual in Emily in, "ka tapa, ka tapa neihsun Eric,,,,Eric,,,,,, chia kikou kawm in, na sang gamnu na nau Siamte koi a koih na hia, bang hong kiloh na hi ua,,,,,,,,, chi'n tangval lian mahmah, amel bang buangsim thing-theng zawzen, kawi in hon kap keuh-keuh mai hi. A tapa ahi chih ka theisiam ngal. Ken bel gen di theilou ka hih chiah a kiang ua ding in ka mittui luang di ka na dang tei hamham hi.
Innlam zuan in ka kipankhia ua, azan azan a vui di chih ahihziak in, kin-le-buang in vengsung makaite toh vaihawm ngai leh hih di kulte ka buaipi zungzung uhi. Huchih lai in Eric in vengsung heutute lak ah, tuzan bek hon kolsak lai mai un, dan nana neihsa uh palzuuttu hih di pen thil nuam leh hoih hikei mah leh, ka nu leh kei mahmah le ka nau sihna in hon haisak zou hial di abat ziak in, tuzan bek a ruang bul ah hon omsak lai hamham mai unla, zingchiang bel bangkim nou khut ahi vekta di,,,,,,,, chia a ngetna pomsak in, vui dia a kisak uh topkik in, aruang ka zanhahpih uhi. Kei leng sunlam a ka nasepna gimsim mah leng Emily leh atap Eric lusun mangbang a om mu gegu paisan thei ka hihlouh man in, siamlou kawm kawm a a nem di'n a kiang uah ka tu zanhak tei hi.
Zingkhua hong vak a, khovak in Emily te nuta kipahna atun tuan kei,,,,,,,akap ua, a tanu hankuang beng in, ngaih taktak a kikou in, mipi ma ah a tanu ngaihdam a ngen den hi. Mit ngei a mu a, bil a zatute adi'n bel et maimai ahaksa ahi,,,,,,,,Pasal kichi sek mah leng huai ni bel ka kipasal sak zou kei a, ka mittui luang di dang zoulou in ka kapkhe tei hial hi. Hanmual gamla ahihman in dak 11 hong ging in, Pastor pa'n Siamte khakna hun ahon nei a, a neihkhit in hanmual lam ah Siamte, nungak melhoih, lungsim singthou tak mai, a taksa vuiliam ding in ka kipawliamta uhi. Siamte han tung ah Emily kahlaa in kuamah kisum sak theilou in, Siamte it ziak a kap toh, Emily hehpih ziak a kap toh,,,,,,,,Siamte vuizou innlam zuan in ka hong ki'k nawn uhi.
Eric in Lamka a apute hong zin uh ahihdan a nu kiang ah agen a, Siamte vuizou in ka tung ua, sawtlou nung in mipi tamzawte'n hon paisan ua, sungkhat laina leh mi tlawmngai tamlou toh ka tu tuantual lai hi, Eric phone a hong ging a, apu in anu, Emily te inn a theihlouh ziak a thuai a ngaih thu gen ahi ngei dia, Eric le kintak in a pute vathuai di'n apawtkhe ngal hi,,, Sawtlou nung in, Eric te leng, a pu toh, a pi toh hong kizuilut ua, Emily nu bel a pasal damdawi inn a om ahih ziak in, Siamte vuina a hong tel zual, a kin theilam a damdawi inn lam paikik sawm ahi. Himahleh Amah Emily nu leng ahon nangman geih uhi. Huchi'n thil omdan khong gen in, Siamte iit a khasia kisa kap pawl toh, ahun paisate ua hihkhial kisa a kisik ziak a kap pawl toh akap in hong kap thak vengvung nawn uhi. Awl-awl in thom hong dai hiaihiai a, Sungkhat laina ngen omkhom ahita uh. Emily te innkuan khosak zel didan khong gen a hong kihou tak un, kei leng sungkhat laina a telkhalou ka hi chih kithei in, ka siam bang tawk in, Emily te innkuan ka thuakpihna thu gen in ka innlam uh zuan in ka paisanta hi.
Writer's Note : Bung 1 na apat bung 10 na kal, siamlou tak a kon gelh himahleh, phatuamngai tak a na hon simsuak sak ziak un, noute tung ah kipahthu naktak in ka gen hi henla, na hon fuihna, phatna paukamte uh, zak anuam a, phurna/lilawpna tamsem hon pia ahihman in chikmah chiang in ka mangngilh ngei kei dia, noute'n le a tangthu in a etsak, i hinkhua a zir di omte zir suahna a zang a, kibawlthak a ngaihna te a kibawlthak thei chiat ding in, ka deihsakna sang penpen kawn laan ahi.
EMILY HINKHUA - II
By ~ Nasri Jona Tawmbing TxNâ
BUNG 1 NA.
THUMAPI : Awle ! "EIMLY HINKHUA" Bung 1 a ka gelh pat, Bung 10 na ah ka na beisak hi. Vok-ek ka napsak ziak hilou; ngetna a tamsim ziak in, reader te ngetna zahtakhuai ka sa a; Pathian panpihna toh, Part - II a hon sunzawm di'n ka hong kisa hi. Hiai Part - II ah a tawpna di tan genthei naikei mah leng; a tawpna chiangchiang pen, facebook lam ah sutzop kisawm nawnlou ahi chih, ana theihsak chiat ding in ka hon ngen masa hi. Doc lam ah, koikhom di leh koihkhom lou di chu; group Admin te khut a, thuneihna sangpen toh ka pia ahi. :putnam:
Pathian thu gensiam taktakte'n; "ginna a ka unau," chih paukam ana zatsek mah bang un; hiai laigelhna tungtawn a ka unau pa' Naa Muu Samte tangthu gelh; "ITNA LALGAM (Khuanu ruatloh) chih a gelh pen, ka gintak sang in a hon gelhsawt vanglak a. Huai in, kei leng ka post ut hun in ahon post sak theikei hi. A ziak bel, ka post di ahon dal ka chihna hilou in, kei ka kidalsak ziak ahi....lol
Huaichiah ka gelhdan tangpi; i pau u hi gelhsiam ahaksa a, theih leng ka theisiam gina thei mahmah kei hi. Ets na; "ka kipak lo petmah/ ka kipak law petmah" chih khong, 'O' i nei ua, 'AW' i nei bok uh, tamtak in i zatdan kibanglou ahihman in, ken le dik a ka theih "kawn ngai LAW petmah" 'LAW' hon zang mai ka hi. Adang, gelhmat di leh gelhmat louh di khong leh thil dang tampi a-om; diklou le tampi a-om di chih bel; ka khutzung zah ka theih chiang bang in ka theichiang; a tangthu paidan i ngaihtuah kawm in, gelhdan dikloute khong hon en kawm zel unla; comment na lam khong ah hon hilh zel ding in ka hong ngen ahi. Aziak bel, agelh dandan in i sim a, geldan dik hia, diklou chih thei gegu a na hon gen louh chiang un; ei, a gelhtute adia le masawnna omlou ahihman in, i theih bangbang genkhom in kikumkhom siausiau leng, a kuakua in leng ma' i sawnphah ngei di'n ka gingta. Huaiziak a hiai bang a ngetna, kisuanglah hetlou a hon bawl ka hi :)
-----------------------------------------
Emily hinkhua ngaihtuah in kei leng ka hun tamzaw ka zang bei a. Siamte sih ni a; lungleng taka a-omlai mu gegu a ka paisan mok khong ka kisiamtan thei hetkei hi. Himahleh innkuan vai gen ahihman un kei ana kidaihlah nang omlou hi-a ka theih ziak a paisan ka hih man in ka kimohsa lawmlawm khol kei hi. Huchi-a lupna tung a thazoi mel tak a ka lup lai in ka room ah ka nu hong lut a; thil omdan bangkim ka gen leh ka nu'n "a kin thei lam in na'va pha nawn mai kei dia. Ahimhim thu in, innkuan vai a hawmna ua nang na va tel le nang hih di hilou mah ahi,,,,,,hithei hi leh ei inn lam khonga ompih mai ka ut maimah,,,,", chi'n ka nu leng kisu'm zoulou in hong kidiik hial hi. Ka pian nung, ka nu kah khatvei ka muhna' ahihman in lamdang ka sa hial hi. A ziak bel ka pa' tawh nupa kituak tak himah le uh, kinak hun khong nei sam thou uhi. Himahleh huai hun ah pe'n; ka pa'n na'k taktak in sal in, soisa sek mahleh khitui luang hial in a-om ngei kei hi.
Ka nu thu gen in hon zoh mahmah ziak in; ka phone ka lakhia a, ka nu muhlai mahmah a phone ut ka hihman in, Emily No. ah ka call ngal hi. Hun sawt kivei simta mah leh Emily in ka aw azak ziak hia ? bang ziak ahia chih ka thei kei; khasia in, bangmah le gen theilou in hong kap nawn hi. Bangmah gen' lou a, sawt simtak ka om nung un, kah(cry) aw kawm in, " Nas, chim ka kisalua, hun na neih leh hehpih tak in hong pawt ve,,,,,Eric pu te nupa lah nidang a hon bawldante ziak un ka ngainna in; akiang ua om leng ka peih mahmah kei a, amel uh ka muh vuak in le'ng ka thangpaihna abei thei nai kei. Ka nu lah damdawi inn lam ah, ka pa' ompih in abuai den a,,,,,,Eric lah, nelou, dawnlou a om theilou ka hih chiang un; kilawh a akuan khiak ngai,,,,,,lungleng tak in inn ah ka om,,,,", chi-a hon gen tak in, kei leng Emily te inn lam a potkhe di'n ka kisa nawn hi.
Emily te inn ka lut a, kaal nih lam bang paita ahihman in midang kuamah lengla' le anei nawn kei ua, Emily gen bang ngei in, Eric pu te nupa sitting room ah a-om ua, Emily bel sam thou lingleng kawm in varanda ah atu hi. Eric pu te nupa Aizawl a ataam lai ziak uh bel Emily lungleng nem di hilou in, Eric thuai kiik teitei a-ut man uh hi di'n ka va gingta mok hi. Ka houpih ut tha le asuah louh ziak in; varanda ah Emily kiang ah ka tu tei hi. Sawtlou ka tut nung in Eric pu te nupa leng kholak pawt dia kisa hileh kilawm tak in, kichei kawm tak in innkong lam ah ahong potkhia ua; pau lou a ka na et lai un, Eric pu hong paukhia a, Emily kiang ah. "Damdawi inn lam ah na pa veh in ka va hoh dek ua; ka hong paihak kei di-uh',,,", chi'n a potkhe ngal uhi.
Emily in apot nung un hiai dan in hon gen hi. "Eric pu te nupa le'ng Siamte sihna ziak a Aizawl lam a hong hoh ahi zenzen kei uh. Eric a taan khak uh alauh ziak ua hong hoh uh ahi. Kar masa pek a paikiik sawm ahi ta ua, himahleh Eric in zui ut bilbel lou ahihman in, ka pa' hong damsuah hun a kihouna thak nei di'n a chamlai uhi. Tu'n kar nih vengveng a-om ta ua; Lamka lam paikiik ding in hong kisata uhi. Himahleh kou nuta tungtang, ahun paizel di gelfel ngal vaklak hoihsa in, ka pa' dam hun ngak uh hi. Himahleh ka pa' lah damlam manawh sang in kiakniam lam a manawh deuhdeuh mai si a, amah pen omlou a vaihawm di lah dik khin lou ahihman in; ahong hoih lam-en ngellou kawm in Eric pu' te nupa in leng karkhat dang cham di'n thu pukna a bawl thak uhi. "
Hon gen zel a,,,,,"Siamte sihna ziak in Eric le'ng ka gintak sang in thuakdan a siam vanglak a; lungsim pichinna tak khat aneih ziak le ahi maithei. Kei ahon neem zaw mah sek hi. Mahni tate phat hih thilnuam hikei mah leh, Eric pen namuh leh natheih bang in tangval melhoih, a taksa lah lian thetthut zawmah ahih ziak in ka vengsung ua nungak hon in a ngaizawng thei mahmah mai ua, himahleh Eric bel Siamte sihna ziak le ahi maithei, numei ngaihsak lawmlawm lou hi'n ka thei, a gu-k a ana buaipih sek ahih lebel ken bangmah ka theihpih kei; kei muhdan in bel ngaihzawng le neih ut na lungsim nei nawnlou hileh kilawm in ka mu hial hi,,,,,. Lehlam ka ngaihtuah chiang in, Siamte sihna ziak hi lawmlawm kei mah leh niteng hun teng a ka nek di uh lawh a midang nasem ahih ziak in nungak lak khong a kisuanlahna' nei hi ding bang in ka gingta sek hi.
Ka vengsung ua nungak melhoih tak; anu leh pa le officer lian mahmah ahi uh, ka tapa Eric ngaizawng ahihman in, ka inn uh; mi inn nuai kawtong leh neu zaw mah khong ah leng amah in hong hawh sek hi. Himahleh Eric in bel ngaihzawng di et a le enlou in, lawm pawlh in kipawlhpih zel hi. Himahleh huai nungak nu'n buaipih zou law mahmah ahih ziak in; Eric leng a omdan zanlam deuh apat in hong danglam deuh in ka thei hial hi. Ka ngaihtuah sek a, numei mei in pasal va hichi buaipih chih mok, deih telthei dinmun a ding hi leng ka tapa Eric toh ka kiteng sak kei hial di. Himahleh tu dinmun in bangmah ka hih thei kei. Kei ziak a Siamte in ahinna taanta, ka tapa neihsun lungkim lou tak a ka koih di ka lau ahi. Nasem a akuan ding leng ka phal ngei kei, himahleh talou ahihman in; ka khouhna bangmah a ngailou in a kuankhe teitei zel hi.
A sum lawhsuahte leng a kim sipsip in ahon pe vek zel a, himahleh chikmah a nasem ngeilou ka tapa', nna asep ziak a akhut teng dulh gai vek khong ka muh chiang in hehpihna'n ka dim a; kuan nawn lou di'n vuaitam ka gen ta, himahleh ahon dawnnate thupi ka sa in ka suang mahmah mai hi. Tuzing akuankhe di bang houh a-om nuam ngellou ahihman in, kuanlou dia ka khouh leh hichi'n hon dawng hi,,,,,, "Nu, ka ut ziak a nasem a kuan ka hi kei, kuan lou in, inn ah om leng le, nek di chu inn veng, louvengte ziak in imu ngei di, himahleh, midangte huh ngai a' om utlou ka hi, tangval ka hi teita a; lawhsuah bangmah neilou a' om ut nawnlou ka hi, huai ziak in ka zirna lam le ka sunzawm nawn kei dia; tua ka nasep dan in niteng in ka kilawh mai dia, i nih a i nekkhop ka lawhsuah naak leh; kipak veve ka hi,,,,, " ahimhim thu in hiailam nuam ka sa, nungak lah ei buaipih ngailou, amau hon buaipih zaw uh. Lamka lam hiam, ka laizirna lam khong bang ah om leng ngaihzawng neih di le zong petmah ngai di hia,,,", chih toh nasem dia potkhiak thuah ngal hi.
"Eric, tangval kitoudelh mahmah khat hi di eive maw, ahoih mahmah ve, hiai bang a tapa fel na neih khak na hampha lua,,,," chia ka gen lai in, Emily phone hong ging a, Eric pi'n, damdawi inn a apa serious ahih dan hon gen a, akin thei lam a damdawi inn lam zuan di'n hon gen hi. Huai thu in Emily lungtang phong mahmah ahih ziak in huai thu azak phet in hamhaih mahmah mai a; ahih dipen leh gen di pen le theilou in hong khol dedu maimah hi. Sawtkuam tak huchia hong om nung in,,,,,,, "ka pa hong sih mok leh ka maban a ka thil tuah di bangkim ka thei vek; Eric ka tan theih nang a hon panpihtu-di omsun ka pa' hong si leh Eric pute'n ka tapa' hon laksak nawn di ua, bangchi'n kei kia'n ka khosa thei mahmah dia, ka tung a hehpihna neuchik bek le neilou uh ahihdan nang le nathei mahmah ta di maw,,,,,,,chi'n ka liangkou a alu nga' kawm in hong kidik nawn feihfeih hi. "Emily hiai dan di himawklou ahi. Bangteng hileh na tapa Eric le sia-le-pha thei ahi ta a; nang hon taisan a' apute' inn lak ah ahon paisan ka gingta thei kei. Bangteng hileh huai thu chu i gen nai dah mai di. Damdawi inn lam ah akin thei lam in i va hawh peumah phot dia, Eric le bangmah hilh naidah mai inla,,,,", chi-a ka gen kawm in, kisa mengmeng ding in ka hilh ngal hi. Emily le a kinthei bang pen a hong kisa in, room apat hong potkhia a; ahong kichei hial zaw, nungak tamtak sang in le etsuak zaw ka sa hial hi. Bangmah genlou in ka na en maimah hi. " Nas, ka manta, na hon khak mai ngai di keive maw, damdawi inn apat na ut leh nawn paisan nawn na di,,,", chi'n ka kipawkhia ua, damdawi inn ka tung tan un kamkhat in le ka kihoupih kei uhi.
Kintak in Emily pa' omna word ah ka lut ngal ua, bangmah khua phoklou ahihman in ICU ah koihlut thak nawn uh ahihdan ana hilh uhi. Emily nu leng kongkhak bul ah kap kawm in ana tu a. Kou ahon muh phet in hong ding khia a, Emily toh kikawi in hong kapkhe nawn mok uhi, Emily pa' dinmun thei kei mah leng damsuah dia gintakna neilou ka hihman in, anep didan tuan le ka thei kei. Akiang uah bangmah genlou in ka tu a. Eric pu te nupa leng bangmah gen di le theilou in ka ki-entuah maimah uhi. Sawtlou nung in Doctor pa ahong potkhia a, lamet di bangmah om nawnlou ahihdan hon gen a; a buaipih di dang om tuanlou ahihman in, Eric pu toh ka buaipih ua, a inn lam uah ka kipawkheta uhi.
Misi om gegu a paisan kilawm ka sak louh man in, kei leng Emily pa' te inn ah ka om lai hi; himahleh vengsung mite hong tam ta uh ahihman in, Emily kiang ah ka va pai a, inn lam a paikiik phot ngai ka hihman in, paikiik ka sawm dan ka va hilh hi. Emily in leng kipahthu khong gen in, zingchiang a hun ka neih leh hoh nawn dia hon deih thu khong ahon gen a; ka paisan hi. Himahleh ka kisiamtan thei mahmah kei. A ziak bel, siluang om gegu a va paisan chih mok, pi-le-pu dan a le kilawm lou ahi, chi'n ka kiik nawn a, ka nu ka phone a, thil omdan gen in ka va zanhak tei hi. Zingkhua hong vak a, a vuina khong neih khit in kei leng ka inn lam uah ka pai a; ka pa mel ka muh in hon hehsan ahi chih ka thei siam ngal a, pautam louh hoih ahi; chih ka theih ziak in, bangmah genlou in ka room ah ka van khong kheng in, kisil di'n bathroom ah ka lut hi. Ka phone bang tui lak ah ka suke kha zawmah a, Bawlhoih theih nawn louh ahihman in, Emily No. leng ka nei nawn kei, digit 10 lel ka na byheart louh poi ka sa. Himahleh a inn uh ka thei thou, chi'n ka kineem lai thou hi.
-----------------------------
BUNGA 2 NA
Nitak ann ka nek lai un ka pa'n, "Na sanggam nu, khanawn mai a pasal nei di chih thei gegu chin a', kisak ngai a tamtam maizen toh, amah ngaihsak manlou zen a potpot tel di ahia hia,,,,"??? Eilah i nna a kibuaiden,,," Chi'n hon gen hi. Himahleh bangchi mah in ka dawng kei a, ka pa'n leng bangmah a gen nawn tuan kei. Gimsim ka hihman in ann nekham ka lum ngal a, lupna tung ah Emily pa sihna sang mah in, Emily te nuta om didan in ka lungsim a zou zaw hi. Emily te nuta tung a thil tungthei dia ka gintak dan banglou teng ngaihtuah a ka om lai in ka na ihmu a, nidang a ka nu'n ahihdan pangngai in, singpi hong pia a, kei leng ka thoukhia hi.
Ka sanggam nu' pasal nei di buaipih a hun ka zat ngai ahihman in, kei leng Emily hon ngetna ka hih buchi'n sak thei kei; ka hun tamzaw ka nau buaipih ka hihman in, thildang ngaihtuahna hun le ka nei man nawn kei hi. Kha hong thak a, ka nau inle pasal neita ahihman in, "inn sung enkoltu di numei poimohta,,,,,,," chih ka nu leh pa paukam ka zak tampen ahita.
Mahni nasep hong ngaita ahihman in, Emily te inn lam ka phak louhna le a sawt ta mahmah mai; Emily in lah hon contact lou ahihman in, hun remchang masa pen a a inn uh vaphak ngai ahi chih ka thei, a ziak bel a tanchin uh bangmah theilou ka hihman in leh; ahon ngetna tangtun saklou ka hihman in kisathei hon sak di bang ka lau hi. Sep di lawmlawm omlou ahihman in, khanih nung vengveng in, nikhat Emily te inn lam pha di'n ka kuankhia hi. Emily te inn ka tu'n in, tangnel tak a, kongkhak le kiu lou a ka lut leh midang ana om mok uhi,,,,, Kei leng hamhaih kisan in gen di pen le thei lou in, "Emily koi-a om a ?, chi'n ka kan mok hi. Himahleh huai mite'n Emily kichi himhim ana theikha kei ua, ka lungsim ah banglou teng hong lang dundun man hial hi.
Huchi a lungsim buaitak a ka kingaihtuah lai in, room sung apat nungaknou khat hong potkhia a, huai nu'n, "Emily na chih hiai inn luahtu, meithei kha maw,,,,,,"? Chi'n hon gen hi. Ken leng, "himah e, nang theikha maw; koilam a kisuan uh a,,,,"? Chi'n ka kanzui pah hi. Vengdang a kisuanta uh, chi'n, a kisuanna veng khong ahon hilh a, himahleh a innluah uh theilou ka hihman in ken leng lawh ngaihna ka thei kei hi. A kisuankhiak na ziak khong uh huai nungak nu'n a theih bangbang hon hilh a, huai thu ka zak phet in, thangpaihna'n ka pumdim ngal hi. Bangbang hiam gen a sawtlou ka tut nung in, singpi khong hon piak sawmmah le-uh, dawnman ka hih louhdan ka gen a, ka potkhe ngal hi. Bangteng hileh Emily nu kiang ka va pha himhim dia, aman bel thei mahmah ngal di hiven, chi'n, Kintak in Emily nu te innlam ka zuan a; inn kongkhak a, tala kikhai ka mu hi. Lawh didan thei tuanlou ka hihman in paikiik ka sawm a, step a ka paitouh lai in, Siamte sih lai a nupi khat ka muh khak ka tuak kha hi. Ken leng Emily te nuta tanchin a theih khak leh chi'n, ka dong mok hi. Aman Emily nu'n a inn uh potkhiak san a, inndang luah ahihdan leh; a innlui uh midang in leita uh ahihdan ahon gen a, a kisuan khiakna veng uh a gen toh, nungak nu'n, Emily te kisuanna veng a gen kibang ahihman in, inn khat a tengkhom uh hidi'n ka gingta mok hi.Kipahthu khong gen in, ka inn lam uh zuan in ka paikiik a, Emily tung a Eric pu gamtatdan, nungak nu'n a gen pen dik hia diklou chih thei chiang chiah kei mah leng; dik dia gintakna nei ka hihman in ka lungsim abuai mahmah mai a. Thangpaihna'n ka pum dim hi.
Emily tanchin lah bangmah theilou ka hihman in, ka thil hih teng nuam sakna ka nei kei. Ka lungsim hon kam gemgum tu khat om hi'n ka thei a, Emily zonkhiak didan ah ka buai mahmah mai hi. A phone No. ka na byhert louh tel khong ka kimohsa a, aman le khatvei bek hon phone ngal leh kilawm hi-a, ka tung a lungkim louhna' khat nei hi'n teh chi'n, ken leng ngaihtuah buaibuai ka sawm nawn kei hi. Himahleh hun awl ka neih chiang in thil dang himhim ka ngaihtuahna ah alut thei kei. Emily om didan ka suangtuah a, ka hun tamzaw amah ngaihtuahna'n ka zang zawmah hi.
Vuaitampi Emily te' veng, a genna uah ka pawt a, Emily muh khak leh chi'n, ka meltheih leh ka maingal deuhte khong ka gamdot sek hi. Himahleh huchibang mi theikha kuamah ka tuak kha thei kei a. Pathian in, ka thil buaipih a tawptan ka tu'n di rem hon sakpih lou ahi di,,,,,, tuban zaw ka buaipih nawn dah mai di,,, chi'n vuaitam kihih buaibuai nawnlou di'n ka ngaihdan le ka bawl hial hi. Himahleh buaipih nawnlouh ka tup chiang in, buaipih utna leh poimoh ka sakna hong lian deuhdeuh hi. A ziak bel, Emily banghiam lampi khat bek a panpih theihna ka neih a, panpihtu a pan tei himhim ka ut ziak ahi.
Hun bangtan kihalta ahia,,,, chih ka thei chiang nawn kei a,,,,, Shillong a ka om lai a ka lawmpa, Khasi te khat in Aizawl muh a ut thu hon hilh ziak in ken leng ka na zawn pah a; amah leng a hong zin hi. Huai a hong zin, amah kia a potkhe theilou ahihman in ken leng kholak ka potpih a hong ngai hi. "Tuni chu Bazarpi lam ah vak ni,,,,,", chi'n zinglam dak 11 lak vel in ka potkhia uhi. Ka lawmpa van deih zawng khong en in; dawr tuamtuam ah ka lut ua, ka lawmpa ahih leh kicheina deih changkang sim mahmah ahih ziak in dawr neu ah ka lut kei himhim uhi. A van deih zawng tam simtak ka lei khit un, lei didang aneih leh neihlouh ka dong a, puanak lum lam adeih thu hon gen hi. Ken leng hoih dia ka gintakna lam ah ka thuai ngal a, dawr 4 le 5 lam ka et nung un leng a deihzawng ka muh louh ziak un paikiik mai ka sawm uhi. Huchia paikik mai ka sawm lai un; amah dawr khat ah a va lut thak a, ken bel inkong ah ka na ngak hi. Sawtsim tak ka ngak nung a le hong pai ngeilou ahihman in kei leng dawr sung ah ka diang lut tei hi; a van et te etpih dia ka kisak leh Emily ka mukha mok hi. Huai dawr ah Emily muh kigingta hetlou ka muh tak in lamdang ka sa a, hamhaih tak in ka om hial hi. Aman leng kei ahon muh tung in lamdang sakna a dim ahi ngei di chu, gen di pen le theilou in, ka ki-entuah heuhou mai uhi.
Emily,,,,,,,,hiaisan a bang hih e ? Damdam maw ? Na inn luahna na kisuan bang dia hon hilh lou e,,,,,? Chi'n ken leng ka gensuk pah hi. Huchi-a kimaingal tak a ka kihoupih lai uh ka lawmpa'n amuh tak in lamdang sak mel tak in hon en a; a khonung a agen dan in, aman Emily melhoih salua in, kou kingaizawng hi dia hon gingta a, hoih tak a ka kihoupih lai uh ana en ana hi dan in hon gen a; kei leng ka nuikhe hial hi. Ka lawmpa amah kia a paikik sak di lah ka ngaingam chiah kei a, Emily te dawr a ompih nilouh di lah a ning khak ka lau a, bangteng hileh chi'n ka paikikpih hi. Ka pai dek un, kei leng hun remchang masa pen a Emily te dawr lam a a pawt ngei kichiam in ka lawm pa toh innlam zuan in ka kiikta uhi.
Ka lawmpa'n aphak utna tuamtuam a neihte phakpih in, karkhat mahmah hun hong bei man hi. Shillong lam a apaisuk tak in, kei leng Emily dawr ah ka va dianglut ngal hi; Emily ahih leh ka gensa mah bang in, Siamte sihlai vel a amel, a taksa omdan toh a danglam mahmah ta; amel hoih in a maam mahmah ta. Neukhah lungsim nuamdeuhta le ahi maithei. Siamte a iit kei a, avei kei ka chihna hilou in, mihing in chu sih leh manna ituahlai in kithuak mah leh hun leh ni hong kivei tam hiaihiai leh, a thuakdan kisiam tou zel mai ahi,,, chih thei chiang tu te lak a khat ka hih ziak in, Emily le ka mohsa kei, a lungsim thaksak thei di, huai lampang bangmah genpih ka sawm kei a. A dawr khong ka enkual a athupi ngeimai, ka ngaihdan maimai in Lamka lam a a-omlai ale dawrngak lunglut ziak a kilawh sek hi-a, huai nna mah sem nawn eive. Chi'n ama' dawr hi dia gintakna neuchik le ka nei kei hi. A dawr a lut luat ziak in munkhat ah tu in customer a buaipih lai ka na en maimai hi. A gamtat a zangkhai in a fel mahmah mai a, paukam lah tasamlou zawmah. Huaiziak le ahi maithei, customer le ahau mahmah mai hi.
Dakkar khat phial mahmah ka tut nung in, nungak khat hong lut a, van lei di sa a ka et-et hang in huai nungak a neitu bangmai in a tangnel hi. Dawr neitu hi di'n ka na gingta mok a, Emily ka kiang ah hong paiphei a, amah khektu hong tungta chi'n, a innlam ua kipawl di'n ka kizuikheta uhi. Nidang a Emily zong a ka na vakvak na sa mah a hia, nidang a Emily inn neuchik, huai le mi inn nuai kawtawng a teng hizawmah lai. Himahleh tua ka omna uh, Emily tenna inn bel huai lai a atenna toh, lei leh van kikhiat tuk a kikhia ahi. A building le lianlua hikei mah leh a changkang a, hiai bang a inn thupi Emily in aluahzou mok pen lamdang ka sa hi; a dawr ngakna a kivak a, a kichawm zoh ka gingta theikei hi. Common room ah keimah in ka tu a, Emily room ah a van kikhek kawm in bangbang hiam gen in hon houpih zauzau hi.
Sawtsim keikia a ka tut nung in room dang apat in Emily nu, damlou chih theih ngawihngawih a gong, a hong potkhia a, kei hon muh phet in ahon chibai pah hi. Emily toh inn luahkhom uh ahi chih ka thei ngal a, huailam thu bangmah ka dong tuan kei, Emily nu'n damlou a khakhat vengveng lupna a lum ahih dan khong hon gen a, sawt dam dia a kigintak louh thu khong hon gen tak in, ken leng, "tua dan di hi mok lou ahi, natna khong miteng tung ah tung theivek ahi a, tu'n nang tung ah hong tung kha ahi mai; himahleh kigaihsiat nang bangmah omlou ahi. "ka dam pah di", chih lungsim nei a na thuak ngai ahi, a se lam kipiak di hi zenzen lou, ahoih lam zel kipiak di ahi,,,,,,", chi'n ka neem tei sam hi. Emily in singpi hon domphei a, singpi ka thum ua ka dawnkhit un, Emily nu'n, "kei zaw sawt tu' zoulou ka hi, ka na lum nawn ma idi,,,,,,", chi'n hon lupsan a. Kou leng Emily toh ka kihoulim zui ngal uhi.
Emily in a tanchin hichi'n hon gen sunzom pah hi. "Ka pa hon sihsan lai chu nang le nathei ngei dia, ka pa sihnung in Eric pu' te nupa' leng karkhat a chamlai uhi. Huai karkhat a cham sung uh bel kinakna leh kidouna phual a om bangmai in ka buai uhi. A ziak bel ka pa om nawnlou ahihman in; kou ka nu' toh numei maimai chi'n Eric pu'n zahtakna nengkhachik leng hon nei kei a, adeih pen Eric Lamka lam a pikiik a sawm tinten hi. Ka tapa ahi a, iit in ngai mah leng kei numeisia in lawh didan bangmah ka thei nawn kei, huai lai a panpihtu ka poimoh dan hon thei hi lechi'n zaw, na hon hehpih thou di'n kon gingta. Ka nu lah awhaam azak zek chiang a om theilou, lingpah zelte ahihziak in, ka kiselbuai chiang un, mundang ah hon paikhiaksan a ngai zel a; himahleh ka nu' bel dem nang bangmah ka thei tuan kei. Inn veng louveng samkhom di chi leng lah namdang ngen, eimi daan a indongta' chih khong ngai poimoh lawmlawm lou uh ahihman in ka tawpkiik zel hi. Ka beidong in zingkal khat hon phone ka sawm leh a paithei hetkei zaw mah a; Ka beidotna ahon behlap mahmah mai hi. Nang hon phone thei leng na hon panpihna ngen di chi- a hon sap sawm ka hi. Eric piching thou mahleh bang chi hiam in khem khe mok leh ka tap chaan nawn zel di; kei a dia damman omlou di,,,,,,karkhat phial mahmah ka buai nung un zingkhat kong kisel kha nawn uhi. Eric ngaihdan hong hi nawnlou ahihman in, room apat hong potkhia a,,,,,"kei le piching khat ka hita; ka om dandi ah bangmah buai na'ng a-om kei, ka deihtelna dan a om di ka hi,,,,,"chi'n apu hon hang san hi.
Eric in deihkhop mai di ka sak leh, "ka neu apat hon enkol a, hon kemtu na hih ziak un, ka hon zahtak a; huai ziak a bangmah genlou maimai ka hi. A himhim thu in kum hiaitan ka nu tellou in na hon koihta ua, tu'n Pathian lemgel ziak in ka nu leh ka sanggamnu ka mukheta. Huchih lai in ka sanggamnu' bel ka chaanta a; ka nu bel chaan thei ka hi nawn kei, ka nu'n leng hon chaan lou di ahi. Ka neulai a zuau thu na hon hilh na te uh, ka nu a sethei bang penpen a na gennate u leh, ka nu tung a na thil hihte uh mangngilh haksa ka sa mahmah hi. Himahleh kei hon enkoltu na hih ziak un bangmah ka gen ngei kei; huai na thil hihkhelhte uh ziak a ngaihdam nget nak sang a, hiai dan a na gamtat ut lai mongmong, hehpihna nei hetlou tel maw,,,,,, ! ? ", chi'n ka tapa Eric hong hang a, kisum zoulou in a mittui bang hong pawt hial hi.
Eric in huaithu a genlai in, kapkawm in gen nawnlou di'n ka na khou hi. Himahleh alungsim naa sa petmah zaw ahi dia, ka khou zou mongmong kei hi. Huai dan a Eric in hon gen tak in a pute nupa le a hong neem mahmah ta ua, bangmah thudang le genlou in munkhat ah atu maimah uhi. Eric kisiamtan theilou ahi ngei dia, "Pu, hehpih tak in hon ngaidam un aw, ka nu ka hehpih luat ziak a hiai bang a na tung ua paukam zangkha ka hi. Hehpih tak in ka nu kiang ah hon omsak unla; i dam dia, kimuh hun khong hong om zel di ahi,,,,,", chi'n apu ngaihdam a va ngen hi. Eric lungsim hoihdan ka thei a, a kingaihniam dan ka muh in ka mittui ka dang zou kei. Munkhat ah tu in ka na kap hi. Eric hong paiphei a, ka mittui hon nulsak kawm in, "Nu, nang hon taisan a koimah a pailou di ka hi, hehpih tak in na kahlai mel hon musak ken la, kipaktak a na nuih mel mah munuam ka hi. Na kahmel ka muh cha zaw ka nau Siamte,,,,,,,,,,,,,,," gen sunzawm thei lou in Eric hong kapkhe tei hi.
---------------------------
BUNG 3 NA
Huchia, a tanchin a genlai in. Kongkhak hong kikiu a, Emily in a va hong pah ngal hi. Tangval melhoih sim mahmah, mi hausa ta' ahi chih haih vuallouh, hong lut a, sitting room ah Emily tawh kia a' tu ka hihman un, hong heh a, kei sang a naupang zaw tham chih ka thei. Himahleh kei upa zaw le zahtakna nengkhachik le neilou in hon hangkhum lailai hi. Emily ngaihzawng ahi chih ka theisiam mai. Emily hel a pawt ka hih louh dan gen mah leng a gingta ut tuan mongmong kei hi. Paukam naa taktak hon zatkhum a, huchi mah bang in Emily le musittak in, nuthlawi maimai, chi khong in hong hangkhum lailai hi. Mineu zaidamna in a daih zou nawn kei. Ka tutna apat ka ding khia a,,,," Nang kua kisa e, kua e na hih, Emily toh hon muangmoh thei di'n bang chitan na tungta ua, ka gamtatdan leh ka kicheina athring ziak in maw non simmawh, nu leh pa nekgu-k sum a kilalian maimai; tuni tan a cheng khat le lawhsuah lou in hiaibang paukam maw nawn zat khum ngam,,,,,,,?? Emily toh kingaizawng ka hi zenzen kei uh, lawmta maimai ka hi uh. A hihziak in ka kitheihpatna uh bel na pianma' tham ahita maithei,,,,", chi'n ka hangkhum zialzial hi.
Emily in hon khouh ziak in ka dai a,,,,,, "Nunpui', ka gen hoih tak in ana ngai khia oh, nang toh kingaizawng di'n ken khatvei mah ka hon gen kei. Hiai inn ka hong luahtung un leng na lungsim put di bangkim, na gamtatdan apat in ka thei siam vek. Himahleh sun leh zan le genlou a na hon vil det ziak in, ko'n hehpih a, hon niallou maimai ka hi. Ahi tak in gen leng ka ta vual lek na hi. Ka tung a tuabang lungsim na put di leh, tuni apat in khatvei mah i kimu nawn kei di;" chih toh, inkong lam ah a sawnpawt hi.Innkong lam ah bang a' agen uh chih ka theikei; sawtsim tak, inkong ah a kihou uhi. A kihou sung un thil tampi ka na ngaihtuah a, kei bangmah lawhtak neilou a buaibuai mawk pen thildik pen hi'n ka thei kei hi.Emily kiang ah ngaihdam ngen ahi ngei dia, sawtlou nung in Emily le honglut nawn hi.
Bangmah le genlou a ka tut leh, amah hong paukhia a; " hiaipa'n hiai inn a ka kisuan tung ua-pat in hon buaipih den a, ken le ka ninglua a kingai dan a om mai ka hi uh. Chitei zensam leng; tulai khangthakte zumna amuhlouh dan lawmlawm uh. Ka ta vual lek in kineih sawm in, kei kiang kia hilou; ka nu lak khong ah ana ngen sek hi. Ka nu'n lah hon awi mahmah lou, amah lah uang deuhdeuh khat in hong om hi,,,,,"
Hichi'n a hon gen sunzawm nawn hi. "Ken leng Eric hon khouhna ka zak tak in, kap nawnlouh ka sawm a, khase mah leng ka ki-uum haamhaam hi. Ka tung uah Eric pute nupa lungkim mahmah lou uh ahihman in, huai zan mahmah in mundang ah hon kisuansan ua, koilam a om uh ahia chih le, bangmah ka thei zuui nawnkei. Kei ahihleh nna ka sempeih lawmlawm kei a, Eric leng atha zawi ahi chih zaw ka thei. Semlou in om leh, ngawl di chih thei in, niteng in, a kuankhe tei hamham sek hi. Ka nu lah ka pa' ngai a ahun leh nite zang in, a inn khong ua ka va pawt chang in, munkhat ah tu in ana ngui thei mahmah sek hi. Ka nu muhtheih khop in a taksa hatna a keniam hialhiai hi. Nu hichi tel di hilou ahi, hehpihtak in kihihhalh inla; ka pa' na ngaih tuahtuah hang a bangmah a phattuamna omlou ahi,,,,, chi'n ka siam bang tawk in ka ne'm teisam sek hi.
Eric in leng kei hon awlmoh ziak in, a zirna sutzop sawm non hetlou bilbel hi. Eric leh ka nu ahihleh, a kimaingal lawmlawm kei uhi . A ziak bel Eric pen ka ta ahi chih theithou mahleh, a tangval nung a amuh pat ahih ziak le ahi maithei. Eric in a zirna a tawpsan mok di ngaingam mahmah lou ka hih ziak in, ka theihtawp in ka genpih zel hi. Eric in, "Nu kei om kei leng bang ne-a, bang dawn di, damlouh hitaan ni a, kuan hon kem a, hon enkol di e,,,,,?" Eric thugente leng dik ka sa' himahleh,,,,,, Eric, kei na hon khual a, na hon hehpih taktak ahih leh, ka thupuukna na zuih ngai ahi, damlouh hitaan, chih khong zaw, ka na thuak thei law di; hon ngaihtuah ken la; na zirna sunzawm di'n na lungsim kibawl fel mai aw,,,, chi'n ka dawng hi.
Eric in le ka gente theisiam ta chu ahi ngei dia, bangmah in ahon dawng nawn kei hi. Hunte hong pai zel a, Eric niteng a asum lawh khiakte lah ka nuta ua ne gai zel ka hihman un, Eric zinna'ng chi'n ka nu kiang ah sum ka va ngen hi. Ka gintak hetlouh hinapi in, ka nu'n leng ana pe vanglak a, ka nu sum hon piak ziak in Eric in a zirna hon sunzawm thei non ta ahihman in; ka nu tung ah leng ka kipak petmah hi. Eric lah om nonlou, linkawm pipi in a zirna sunzawm di'n a hon zinsan hi. Huainung teng lungleng tak in hun ka zang a, nikhat lel leng kei a di'n a sawt thei mahmah mai hi. Kei kia a om-om tel chim kisa in, ka nu kiang khong ah ka va pawt zel hi. Himahleh ka nu kiang ah leng kipahna muh naksang in, lunglenna leh khasiatna ngenta ka tuak hi. Ka nu lah mi nehnou mahmah ana hih zawkmah toh, ka pa a gen louh chiah, Siamte agen a; akhen chiang bang in ka kah ni uh atam mahmah mai hi.
Ka nu panpina nget di lah nuam ka sa kei a, Sem lou in om lenglah ngawl di ka hihman in, ka hihtheih dandan in, puansop, anhawi, chihkhong in ka kilawh zel hi. Ankhong kon hawi a, mipuan niin taktak khong ka sawp chiang in; ka neulai a ka paneu zi hon hihsak dan tengteng ka lungsim ah hong langthak dundun mai hi. Himahleh huai hunlai a genthei leh simmoh tak a ana koihna ziak a, tua kei kisin ngailou a siam ka hi chih ka kitheih man in, lehlam tak ah kipahhuai ka sa veve hi. Himahleh ahunlai a ahaksatdan leh ka gentheih dan tengteng ngaihtuah in, ka paneu zi bel ngaihdam haksa ka sa petmah hi.
Ka nu kiang ka phaklouhna ni 4 lam hita ahihman in, kilawh zou, sunnung lam in, ka nu in lam ah ka va pawt phei hi. Nidang a ka nu varanda a tudeuh gige ahihman in, ken leng varenda a' muh kilamen tak in ka en hi. Himahleh ka nu mel ka muh louh tak in, mundang ah pawtkhia hi'n ka ngai a. "Omlou ahihleh, ka kiik mai di,,," chi'n kiik sawm ma hleng, ka lungsim khat hon kam gemgum tu om ahihman in, kiik hial lou in ka pai zel a, inn kongkhak ah kikalhlouh man in, kei leng ka lut paisuak hi. Room sung ah khuhging kheuhkheuh ka za' a, kintak in ka naih phei h. Ka thilmuh in ahon phawng telmai, lamdang ka sa, mulkim huai ka sak luat ziak in, ka mitkha ah a thamden a, ka kikoukhe hial hi.
Huchia, room a ka lut leh ka nu khua le phok gina' lou in, vuaktang petmah in ana lum ka mu hi. Ka naih phei zel a, thil omdan ka theichiang ta, ka nu'n pawngsual tuak ahi chih haihvual louh in, a van tengteng a kiang ah, kibotke'k sa vek in a-om a; amah leng akam, anak lak khong ah sisan aluang hial hi. Buaipih didan thei tuanlou ka hihman in ka siam dandan in, ka ne'm a, himahleh ka nu'n huaithu a za hia zalou chih ka thei kei,,,,,,,, Hamhaih tak a ka omlai in, police ah Report pah hoih ahi, chih ka theikhia a, police ka phone ngal hi; police te le'ng, sawtlou nung in ahong tung ngal ua, thil hihngai tuamtuam ahih khit un, damdawi inn lam ah a hoin puaktouh sak uhi. Damdawi inn ah ni 2 ka om nung un, pangngai tak in ka pawtkhethei nawn uhi. Ka nu amah kia' omsak kia hilou, kei leng numeisia hi ing a, mahni kia a khosak lauhhuai ka sakna hong lian mahmah ta a, ka nu tuah bangbang ken le tuakthei ka hihman in chi'n, keikia a teng ngam nawnlou in, ka nu kiang ngen ah ka va khosa hi. Ka nu'n leng a hon lungmuanpih mahmah hi'n ka thei. Ka nu bel ka gensa mah bang in, enkoltu di neilou a, a inn ua ka lut top lai a le hehpihtak leh duattak a hon na kem a, hon enkoltu ahihman in; a tung ah ka hih theih bangbang a siam ka suah sawm tinten hi. Ka nu leng hoihlam hon manawh zel in, ken leng naa poimawh tuamtuam ka sem thei nawn ta hi. Himahleh ka nu kiang ah ka om nung, ka nu'n milak a kilawh a hon phal ngeikei a, kuankhiak sawmsek mah leng, a hon hehsan maimah sek hi. Ka sep di teng semkhin in, ka niteng hihdan pangngai un, varanda ah lampi a motor tai leh mi kiveite en kawm in, ka kihoulim maimai uhi.
Ka ki houlim lai un ka phone hon ging a, Lamka a Eric pu ana hi. ' Na damzel uhia, na hoih zel umaw ,,,,,? ' Chi a hon kan di ka sak lai in, ka gintak louhdan tak in; "natung ah ka thangpaihna beithei mahmah lou ahi, phuba ka la lai di,,,,,, " chi'n bangbang hiam gen in hon koihsan hi. Ka nu'n kamka zen in a hon en a, a ziakbel ka omdan apat ka nu'n ana theisiam ahihman in. Ken leng thil omdan ka genkhe ngal a, ka nu'n bel lungkham huai mahmah kei, a hon chiamnuih na maimai in ngai ni,,,, chi'n hon gen hi. Sawtlou nung in Eric phone hong pai non a, a pu'n kei lak ah agen mah bang in, Eric kiang ah leng ana gen a, Eric in hon lunghimoh lua ahihman in, hong pai di ngen gengen mai hi. Himahleh ken bel "lauhuai lou ahi; bangchi mah a hon hihbuai thei nawnlou uh ahi. A hon hihbuai ua leh, dan bang in ka gamtang dia, athil hih diklou gah amuta di,,,,, lungkham nang bangmah omlou, nang ki-enkol hoih in aw,,", chi'n ka koih hi.
Bangmah genlou a ka om lai un, Ka nu hong paukhia a. "Lawmlawm tel maw, Eric khah huai na accident lai ua na paai pen hilou maw,,,,, bangkim na tanchin James in ahon hilhvek aka,,,,,, lamzang mahmah kei un teh. Kei tuahsia tuah le ka deih khopkhop maizen toh,,,," chi''n ka nu hong kapkhe maimah hi. Bangmah genlou a ka nu ka etlai in, ka nu'n amah pongsualtu hichi'n hon gen sunzawm nawn hi. "Varanda' a ka tut maimai lai in, pasal khat gas sia bawl dan a kigen in ahong lut a, ka gas chiang ngellou ahihman in, ken leng ka check sak hi. A check kawm in hon houpih zel a, ken leng hon houpihnete ka dawng zel hi. Na pa'n a hon sihsan a, ka lunglen dan khong ka gen leh, thakhat in hon bohphei a, kei damlou, tha le neilou, pitek in, huai tangval thahat zawh ngaihna a-omkei, ka kikou dek chian ka muuk hon humsak zel a, zou mahmah lou ka hihman in, a deihkhop amuh khit in kintak in hon taipawt san hi. Panpihtu samdia thohkhiak ka sawm leh ahon sualna ka taksa tengteng naa gaivek ahihman in, ka tha ahat nawnlouh toh; ka thou zok theikei a, ken le manman nawn tuanlou dia ka kigintak ziak in, lupna ah ka lumden hi. Huchih lai in nang na honglut geih a, huchilou hilele ka sih hial ka kigingta,,,,," chi'n hon gen hi.
Eric in a hon ngaihtuah ziak in hong paitouh di sawmsawm mah leh rem ka sak louh luat man in, ahong pai hial kei a, a vangkim in hon phone den hi. Himahleh Eric pu'n hon phone nawnkhak ka lauh ziak in, ken leng pilvang mah hoih chi'n, Eric kiang ah ka simcard haltum ka sawm dan ka gen leh Eric in leng rem a hon sakpih a, ken leng ka simcard ka haltum a; mobile nasan leng ka kem ngam nawn kei hi. Ngaihtuah dik kisa in, ka simcard ka haltum pen hihfuh kisa mah leng; nang contact nang neilou ka hihman in, ka lung abuai guu mahmah mai hi. Nang le hon phone ut mah lechin, nang le hon phone theilou di, phet lou a, ka innluahna uh nangawn kisuan ka hihman un, hihkhial bang ka kisa petmah hi. "Pathian lemgel ahi maimah diam maw, kei le, na inn ua pat ka pai, inn ka tung a, ka kisil leh ka phone tuilak ah ka hihke kha a, nang phone theih nang le ka nei nawn bik kei a, ka buai tei mahmah mai hi,,,," chia ka gen leh lamdang sakmel tak in a hon en hi.
Ka pa sihnung ka nu'n halh siang sitset a' om chihte nei ngeilou ahihman in, ken leng ngeina a seh gop ka hi diam ah, ka nu'n om nuamlou chia a lup chiang in leng ka ngaihsak lawmmlawm kei hi. Aman le bangmah gen ngei tuanlou ahihman in. Nikhat ka nu' ann ne dia le hong thou khelou ahihman in, a singpi di leh sang di tawi in a room ah ka va pia hi. James toh ka kineih tuung ua ahon sapdan in, "Milyte,,,,,, hiai lam ah hong pai zual dih" a hon chi hi. Huai ka nu hon sap na aw ka zak tak in, ka om heihuai zou hial hi. A ziak bel, nu' taktak bang a ka-et masak pen in a hon noutawina' ka mangngilh thei kei a; Ka zak louhna kum hiaizah ana paita, kum hiaizah nung a huaibang paukam kilawm ka zak ziak ahi....... Ka nu hon sapna lam ah ka paiphei a, ka nu'n a thugen hoih tak a ngaikhe di'n hon ngen hi. Ka nu'n; "Milyte,,,,,,napa damlai a innkuan ka kipah sek dante khawng ka ngaihtuah a, kei kipak tak a ka om lai in nang dinmun di bel bangmah ka hon ngaihtuahpih kha ngeikei hi. Tu'n ka theita, huailai a na lungkham mangbat didante khong,,,,, hehpihtak in hon ngaidam in aw! nang a di'n nu' hih ka ching zou kei a, na lak ah lungsim hoih leng ka na pu ngei kei. Tua ka thugen di pen leng, na pa toh ka gen khawm lai un, ka na nial a, himahleh na pa'n ka thu la lou in; ama thu in ana paisuakpih a, tu'n bel napa thilhih dan ah ka hehna sang in, ka kipahna a tam zaw ta,,,,," chi'n file a lupna kiang a dohkan tung a' akoih la di'n hon sawl hi.
------------
BUNGA 4 NA
Siamte goutan dia ka pa'n hon na seh nalai ana hi a. A omzia bangmah ka theisiam kei a, ka nu kiang ah ka kan leh, "Hiai napa'n Siamte gou dia a nutsiat liauliau ahi; himahleh Siamte in lah hon omlouh santa, na pa'n lah hon omlouh san zel ahih chiah, kei leh huai ukil pa kian ka thei ua, phuangzak lou in, ken ka deihsak penpen pedek leng le, ukilpa bel sum tamlou chik in ka khemkhe thei ngei di. Ahihhang in huaidan thil ahih hoihlou ahi chih ka thei a. Siamte nu na hihna ah, nang tan di liauliau in ka koih ahi ",,,,,,,,nu nang a' chu kei a' himai eivoi huai khawng hih tuantuan ngailoupi... Chi'n ka dawng hi. Ka nu'n aw ngaihlou chik, lah ka bil a ngaihtak si in,,,,,,, "Mily,,,, ka hih di diktak mah ahi ka hih; hiai nang kem inla, hiai teng mai ban ah, ka sumdawnna tengteng nang khut ah om vek hoihsa ka hi. Ka suul a piang hikei mah lechin, ka tanu taktak bang a kon et na hi, nang le nu' taktak dan a hon ngai gige na hi chih ka thei a, ka kipak petmah hi,,,," chi'n a biang ah khitui hongluang a, ka singpi piak le dawn theilou hial in hong khasia hi. "Nu' na singpi di dawn inla; tawldam phot lechin hoihsa ka hi, denchiang in na hong bah law dia, ahoih kei di,,,, "chi'n singpi nou ka pia a, ka pawtsan hi.
Ka nu' thugen in a hon zou mahmah mai a, "ka tanu' taktak bang a kon et na hi,,,,,,," a hon chih pen mahmah zaknuam ka sa hi,,,,,, ka bil hem ah a ging den zouhial hi. Ka nu' haksa sakawm tak in a hong thoukhia a, varanda ah ka nih un, nileng in ka tu uhi. Nitaklam nek di bawl hunta ahihman in, kei leng neekbawl di'n ka kisa a; ka nu a gamtat di phallou ka hihman in, TV khawng en in a-om maimai hi. Ka hihdan pangngai un, nitak ann nekham sawtlou tv en in ka tu ua, lum di'n kong kisa uhi. Ka nute inn bel lian mahmah ahihman in ka room uh le a kigamla sim mahmah mai a, huaizan ka nu'n banghiam lungsim noplouhna khat nei ahi ngei dia, a kiang a giak di'n hon zawn mawk hi. Ken le ka nu' hon zotna nial sese lou in, ka pa damlai a alupna uah, ka valum tei hi. Ka nu'n hon khamuan pih mahmah hi-a ka theih man in, kei leng aguuk in ka kipak mahmah mai hi.
Lupna tung a bangbang hiam gen a ka kihoulim lai un; ka nu' thugen in hon khim sim ahi ngei dia, ka nu ka na ihmutsan hi. Thawmging ka zaak in a hon khanglousak a, ka et leh, ka nu omlou ahi,,, chih ka thei hi. Kintak in ka thoukhia a, chouka lam ka naihphei pah hi. Chouka ah mi 2/ 3 kihou ging ka za a, sana ka et leh zan dak 12 ana pelta hi. Tu zan nungnung a kua hong hoh ahi maizen a, chi'n ka kingaihtuah lau man hial hi. Chouka ka tungphei a, ka nu' mangbat mel tak a om ka muh in; kou nuta tung a thil hoihlou tung omdek ahi chih ka gingta ngal hi. Innkong apat pasal pau ging ka za a, a gen pen tak uh ka theihlouh ziak in ka nu' kiang ah thil omdan ka dong pah hi. Ka nu'n "Mily, bang a agen uh ken le ka theisiam kei, nou pau mah a bang a? agen uh ka theihlouh man in inn kongkhak le ka hong ngam kei, migilou khawng ahih ka lau,,,,," chi'n aw ling peppep kawm in hon gen hi. Kongbul ah ka va paiphei a, aw thuum simtak khat in, innkong hong sak di'n hon ngen hi. Kuate na hi ua ? Koilam mi na hi ua ? chi-a ka kan chiang in lah a hon hilh utsi kei ua, ka lungbuai mahmah mai hi.
Ka nu'n bangteng hileh innkong hawng phot mai ni; kuahiam khat in i panpihna lamen hi'n teh, a chih ziak in, ken leng ngaih phalou kawm in, ka hong a, maituam mi nih in, pistol a hon ngiim kawm in, tanglou di'n hon gen ngal uhi. Thil omdan bangmah theisiam lou ka hih man in; ken leng ngaihtuahna pilvang tak in thu ka dong zel a, ka nu bel lau in a liing a, kilkhat ah ana tom thiinthe'n hi. A hong kigen ua, Lamka a Eric pu'n a hon sawl ahih dan a hon gen a, ahihleh kou nuta hon that dia hong kuan u maw ? Kou nuta na hon thah ziak ua bang phattuamna om di e? Chi'n ka dong hi,,,,, "amau, nou nuta that dia hong kuan ka hikei ua, nang, Emily na hih leh, nang that dia hong kuan ka hi uh. Nang ka hon thah ua leh sum tampi lawh di ka hi uh. Na innluahna kisuan ziak in, sawtpi ka hon zongbuai ua, ka beidot nung un,(Eric pu) ka phone ua leh, hiai mun a hon kokmuh hi. Kou leng haksa tak in ka hon zongsuah uh". a hon chi hi. Ken leng ka dawng pah a, "Emily, na mi zawn uh ka hi, na-ut ua leh na hon that thei di uh, ahihziak in, na hon thah maa un thu tamlou kon gen zual di,,,(ka nu'n huai ka gen lai a lauhthawng mel tak a a hon etlai, ka mitkha ah tunitan in a mangtheikei) chi'n, Eric pu toh ka kisuklungkim louhdan tengteng uh leh, nidang a a hon bawldan tengteng uh ka gensuk vek hi. Huchia ka lungsim a om te ka gen zawh in, zangkhaituan hi'n ka kithei hial a; keimah kia kingaihtuah hileng, sih lauhna le ka nei nawn kei. A hihhang in ka nu leh ka tapa Eric ka ngaihtuah chiang in, ngaihdam ngen a, a hon thahlouh nang ua thum khawng ka lungsim ah hong lang dundun hi. Himahleh huaidan a ka kingaihtuah lai in ; mikhat pe'n in, a lawmpa, pistol a hon ngiim pa kiang ah, hihlou di'n a hon gen hi. Ka nu' bel houpih theihlouh in ana om hial hi.
Amau le, ka thugente ziak a hon hehpih uh ahi ngei dia; "ka hon that kei dia ua, bangchi mah in ka hon khoih sam kei di uh. Ka sumduhluat man un gam hiaitan hong pai a, hiaiteng hih kihuam a hong kuan ka hina' ua, na tanchin in a hon zou mahmah mai a, ka suahsuah uh ka suak mai di ua, ahih hang in, kou hon hawi mahle ung, na tung a athangpaih luat ziak in, midang hong kuansak nawn thouthou dia gingta ka hi. Huaiziak in, hiai mun ah na om ua leh suakta nawnlou di na hi uh; a kin theilam in, hiaimun na' pawtsan di ua, (Eric pu) a hon zongkhiak theihlouh na'ng mundang ah na om uh ngai ahi,,,,," chi'n hon pawtsan uhi.
Ka nu kiang ah kintak in ka paiphei a, ka nu bel alauh ziak in ana lingden lai hi. Thil omdan kintak in hon dong a, ken leng ka hilh vek hi. Ka nu'n, huchi ahihleh zingchiang in, i kisuankhe ngal maidi, a hon chi a, ken bel hiai inn, ka pa damlai a atenna, hichi mawk a pawtkhiaksan ka phal thei kei hi. Ka pa' kei tung a ahoihnate ka ngaihtuah a, hiai inn pawtsan mawk le ung, va'n a' pat in hon na mu zenzen leh alung a kim diam,,,,,,? chia ka kingaihtuah lai in ka nu hong pau khia a, "tusun a ka thilgen, Siamte gou tan dia napa'n aseh, huai ah (vengdang) midang in aluah lellel ua, amau pawtkhe di'n i sawl dia, en i valuut mai di, na pa tungtang nagen pen dik thou mahleh, misi leh mihing kibang theilou i hi. Ken zaw sih mengmeng a, napa' kiang a om maimai ka utna asawt lawta, ahih hang in Mily, nang hiai bang a sithei nailou na hi. Huaiziak in, ka thu puukna bang in zingchiang in i kisuan ngeingei di ahi,,," chi'n a hon gen hi. Ka nu lungsim hoihdan leh kei a hon ngaihtuah dan ka thei thakthak a; ka pa ngai a, lungleng tak a om, ka pa' sihnung teng bangmah le sem peihlou khop a zawngkhal hial in, kei a hon ngaihtuah man a' hiaibang lungsim a neih theih mawk lamdang ka sa a. Ken leng ka nu kiang ah, nang thuthu chi'n ka dawng hi.
Sana ka etleh zinglam dak 3 ana gingta a, kou nuta leng sisa thoukiik bang a kingai hial ka hihman un, ihmut suah lam leng ka theikei hial uhi. Ka nu'n "lup phot hoih ahi,,,,," achih man in, ihmut suaklou pi lum di'n kong kisa non ua; ihmu dia ka kisak chiang in, ka nu thakhat a' hong kikoukhe guihguih ahihman in, ka halh khazel hi. Ak hong khuang hialta ahihman in, chia thawhkhiak ka sawm leh, ka nu'n a hon phal kei a; kei leng ihmut suaklou ahihman in, lupna tung ah ka hak kelkul maimah hi. Ka thiltuahte ngaihtuah in, "Eric in hon thei leh bang lungsim anei dia aw, a hon ngaihtuah luat ziak a, innlam hong pai a sawm lai a ka phallouh khawng a hon mawhsa law dia aw,,," chia ka kingaihtuah lai in, ana ihmu kha chu ka hingei dia; ka nu'n singpi nou tawi in a hon phawng hi. Sana ka-et leh dak 8 bang ana ging velvol ta ahihman in, dawr lam a nasemte kiang ah, dawr hong lou-a, inn lam a panpih di'n phone apat in ka hilh hi. Neekbawl kawmkawm in kou nuta' leng vengdang a kisuankhe ding in ka kisa kawmkawm ua; ka vengte un leng hon guuk theihsim uh ahihman in, mi phatuam ngaizual leh, ka ki closed pih deuhte khong uh a hong dianglut ua, thil omdan khawng a hon dongdong mai uhi. Ahihhang in thil omdan diktak ka gen tuan kei ua; ka nu'n "veng dang a ka inn uh, midang khut a a-omna sawt lawta mahmah in chi'n, huailam ah tukum sung khawng va ki-om leh chisim ka hi uh,,,," chih teng khawng in a dawng lel hi. Vengsung miteng in a hon mawhsa mahmah mai uh. A ziak bel, zanlam zek a ka pa' si-a, hiai inn mahmah apat a kivuiliam a, ni tam le bei nailou a hiai inn pawtsan ka sawm pen uh, thil kilawm le hilou,,,,chi'n a hon gengen mai uhi. Ka thiltuah uh thei hile uh; kuaman a hon mawhsak bik uh a gintakhuai hetkei hi. Himahleh kou ka thil tuah uh kuamah lak a genkhelou ka hihman un, a hon mohsakna uh leng a awmlou tuan hetkei hi. Demthei leng ka hi samkei uh. Neek ka bawl khit in ann ne di'n kong kisa ua; dawrlam a ka nu nasemte le'ng ahong tung ngal uhi. Ka nu'n van packing didan teng agen dandan in ana buaipih ua, ken bel van tengteng tawilouh a, hun awl ka'lka'l a valak zel maileng pawi ka sakei, himahleh ka nu'n hiai inn a vakilat pen galmuanglou ahi; chi'n a hon phal bilbel kei a, ann nekham ka ki-load ua, ka inn thak luahna di ua, Ka pa'n Siamte gou tandia a sehte lak a khat, huailam zuan in ka kipawphei uhi.
Khatvei mahle ka muh nailou ahih ziak in, muhkal bang ka ngaklah petmah mai a, ka pa, mitaima leh lungsim pichingtak nei in, a tunu neihsun, Siamte gou tandia aseh hial chu a siat luat lawmlawm ka gingta theikei hi. Huchi-a ki ngaihtuah kawm a ka tailai un, Eric ka lungsim ah a hong lang a, "apute hon bawlna ziak a hiaibang a buai vengvung a, ka om lam uh hon thei hileh bang lungsim anei dia aw,,,, apute amawhsa dia aw, ahih kei leh kei anu khawng a hon mawhsa maimah dia aw,,,," chi-a ka kingaituah lai in, ka motor uh a hong khawl a, hiai, tua i omna inn kong ah ka na khawl uhi. Hiai inn omdan chu nang le namit a hong muta na hih chiah gentam le ngai ka sa nawn kei, kei meithai, tagah, sungkhat laina le neilou, tenna ding inn chu a thupi ka sa petmah a, phulou hi'n ka kithei hial hi. A hihziak in Pathian in ka damsung genthei tak a ka zatdi rem a hon sakpih lou ahi ngei dia, tu'n chu keimah khe-a ding in, ka kitoudelh theita. Zanlam a i kimuhna dawr leng kei khut ah ka nu'n a hon pekhe vekta a, huaikia le hilou in, veng dang ah gam (inn mun) lian mahmah mun nih a ahon nutsiat a, sum dawnna tengteng kei khut a om vekta ahihman in; keikia a etkol buaihuia di ahihman in, Eric ka samtou a, tukar a inn hong tung ka gingta.
Ka nu lah hat nawnlou ahih chiah, Eric hong paitou he'nla; aman sumdawnna' lam hong enkol henla, huchi'n ken innlam ah ka nu ka enkol dia, khosak zaw nidang bang hial in haksat ka gingta non kei,,,,,," chi'n Emily kipah mel tak in hong nui khe seusau hi. Singpi ka dawn ut leh ut louh a hon dong a, ken leng kimaingalta thou ka hihchiang un, ka dawn-ut chi'n ka dawng suk mai hi. Singpi a hon bawl a, room-a anu lum, singpi pe di'n alut masa hi. Himah eh singpinou ahon tawikiik a, ka tutna lam ah hong paiphei hi. "Bangchi dan a, na nu'n singpi dawn nuamlou a maw,,,,?" Chia ka dot leh, hiailam ah eitoh kipolh kawm a dawn ut chi a, hiailam ah hon tusuah dek hi'n teh. Nileng leng a lum ahih chiah, chim kisa theilua a; tuni chu nang hong pawt di na hihtoh chi'n innlam ah ka om zenzen a, nidang bang hileh ni lengleng a dawr ngaksan ka hihchiah, chim kisa thei lua, lawm polh di a-om sunsun chia zaw khelah thei law sam e,,,,,, chi'n, singpi nou ahon pia a, Emily nu leng kou tutna lam ahong tuphei hi.
Emily nu'n ka mel ahon muh phet in, kintak in ahon naihphei a, ahon chibai pah ngal hi. Nang na hi maw, innvengte tangvalpa hi'n teh, chi ing a', thoh le hong thou nuamlou hi'ng a', ka lum ning lua kong thohkhiak leh nang kon mu mawk a, nang na hih lam thei leng denlam pek a hong thoukhe di hi'ng a', chi'n Emily enkawm in hong nui viiviai hi. Emily le nuihza kisum chih haihvual louh in; "ka nu'n chu innvengte tangval pa toh hon dem deuh gige a, lah ahon deihsak louhlam lah kithei mahmah, (thutak sim tak in) nu, nang deihlouh dan in ka om hon gingta het ken aw !! ken pasal neih ka sawm zenzen kei, tapa tangval kinei hialta a, pasal neih ngainawn sese lou pi, hichi'n i thum un i tengkhawm di ua, nang le sawtpi na hon dampih dia, sungkuan kipak leh nuamsa tak a nang ziak a ki-omta di eivoi, Eric le na phone apat, tuzingkal a ka phone hi a, tukar khong in hong tungtou thei in teh. Ka neu apat a ka na ngaihtuah gige; damtak a pichin touh a, pasal hoihtak neih a, innkuan kipak tak dinkhiat pen, ka neu apat a ka na sawm gige ana hisam eive nu, ahih ziak in ka vangtah a, ka ut dan leh ka deihdan in ka omthei bik kei a, himahleh ka huchi om gige pen Pathian inle rem hon sak pihlou hi'n teh. Tu'n huailai a ka ngaihtuahna hong taangtung taktak di abang ta hi,,,"chi'n hon gen siamsiam hi.
Emily paukam zak nuam ka sangei mai, nidang a feldan ngei a felden lai ahi chih ka thei a; anu azahtak dan leh aduat siamdante ka mitngei in ka mu a; "Emily genthei gige lou a a-om le amah hoihna ziak leh a felna ziak ahi," ka chi lou ngam kei hi. Singpi dawn kawm in ka kihoulim zel ua, a innkuan maban hun uh a limchitdan khawng ka genpih a, paukam siam kholkei mah leng, ahon kipahpih mahmah uh hi-a ka theih man in, nuam ka sa tuan mahmah hi. Eric ahong tung tou dia; amah tangval laisiam, fel zawmah ahih toh, aman thil bangkim, na sumdawnna lam uh ahon enkol tou dia; a lunglutna lam ahih le zaw, khovel a mi enghuai penpente laka' telpha zou hial di na i uh,,,," chia ka gen leh, huai hial zaw Emily nu'n uang ana sadeuh ahi diam ah, kamsiam inle huntawk nei eive,,, chiteng in hon dawng bong top hi. Emily nu sawt tu ngaplou ahihman in, singpi dawnkhit in ana lum nawn a, Emily in gen ut nei hileh kilawm in ahon en den hi, ahih hang in bangmah a genkhiak louh ziak in ken leng ka dong tuan kei a; bangmah genlou a ka tut lai un, Room apat Emily chi'n anu'n hon sam a, kintak a Emily a va paiphei leh, Eric in anu phone ut ana hi a, Eric toh sawtkuam tak ahong kihou nung un, lungkim mellou tak in Emily ahong potkhia hi. Ka kiang ah hong tu a; Eric in a lawmte (namdang, vai nungak) hon tonpih a-ut thu ahon gen a, ka phal kei leh Eric le heh in ahong heh petmah hi; chi'n, kei lak ah thil hih didan khawng hon dong zawzen hi. Ken bel ka kigolh na'ng ahih ka gintak louh man in ka dawng gina kholkei hi; Emily le nitaklam neekbawl dia kisak hunta ahihman in, kei leng ka innlam uh zuan di'n ka kikhen nawn uhi.
---------------------
BUNG 5 NA
Inn ka tung a. Nidang banglou tak in ka sungte leng ka tung ah a mawk in aheh maimai nawn kei ua, ken leng nuam ka sa deuhta hi. Ka unaunu tawh a pasal (ka makpa pa) ka inn uah ana om ua, sawtsimtak ka kihoulim uh hi. Ka makpa pa paukam zat in ka lungsim ahon khoih mahmah mai hi. Ka nu a sap chiang in leng, "NU", chi'n asam zawzen zel-a, zanlam zek a ka sanggam nu toh kiteng pan in, ka nu NU chia a hon sapsap chiang in kei ka ngaihdan a hong hinawn kei geet hi, ahihziak in bangmah ka genkhe ut samkei a, ka lungsim ah hichi'n ngaihtuahna a hong piang hi. "Na nupi (zi) nu, nang NU chia nasap di hilou pi, NU chia nasap leh, ka pa le PA chi-a sam di neive maw leh, mah ni pizawn, puzawn te lak a mark score sawm mahmah di nei ve maw,,,," Ka paikhiak dek in, "makpa feltak nahih sinkha maw !!!" chi'n, Sawt le kihoulim lou in ka room ah ka lutsan hi
Ka thugelhte sunzawm di'n ka computer ka on a, ka thu theih leh zakte buai tak a ka gelhlai in, ka nu'n a hon sam hi. Ken leng thil poimawh om hi dia ka gintak ziak in, kintak in ka nu hon sapna lam ka zuanpah a, ka va paiphei leh, ka sanggamnu toh apasal mai ah a hon tai mawk hi. Ken bel heh a ka gen le hilou, ka lungsim a hong lang ahihziak a ka gen khiakmawk ahi a; ahihziak in, ka sanggamnu'n ka nu kiang ah ana hek man ahihman in, ka nu'n leng a kilawmsak naang a hon tai ahi chih bel ka thei. Himahleh midang maa ah hon tai sese ka lung a kim hetkei hi. A hon taikhit in ka nu'n ka sanggam nute innlam a pawt dek ahihziak in, inn hoihtak a ana ngaak di'n a hon thukhak hi. Kei le'ng room ah ka lutkiik a, ka thil hih ka sunzom nawn hi.
Hun leh nite hong bei zel a, a kum asim bang tanchin kithuzak lou in Emily tawh ka om ta uh hi. Hun remchang ka zong sek a, himahleh mahni hihtheih lamlam sem a ka buaiziak in hun ka nei thei mahmah kei hi. Nikhat ka pa'n a office apat in a hon phone-a, "nasep di (hihdi) poimawh ka nei a, hong tung pah theilou di ka hih ziak in, nitaklam chia na hong pi' ngai di ka hi,,,,,," chi'n a hon gen hi. Ken leng hun remchang ka sak ziak in, ka nu kiang ah thil omdan hilh in, ka pa car chahbi ka la a, kholak vak malam di'n ka kikhalhkhia hi. Ka inn ua pat gamlalou chik ka taipan chih in, kou innlam manawh a hong pai ka galmuh a, a hon naih zel a, ka kiang a hong tung un, ken leng Emily ahi chih ka thei ngal hi. Ka car ka khawlsak a, ka sap leh lamdang sakmel tak in a hon en hi. A hon muh phet in kei lam manawh in kintak in a hong taiphei a; ka kichibai ua, ka motor ding sakna diklou ahihman in, ka tuangsak a, manawh nang lam le thei tuanlou in ka taikhiak pih mawk hi.
Emily a hong pau a, " Nas, koilam phak sawm, koi a hoh dia hong potkhia na hia, na hon tai pihpih mawk a?" chi'n ahon dong hi. Ken le'ng nitaklam chiang a ka pa office apat thua idi ka hihdan ka gen a. Aman leng, "Hun tamlai thou hive'n, kou innlam ah hong pawt le chin, gen di haulua ka hi, ka beidong lua a, panpihtu di kuamah ka neihlouh man in, kum khat vengveng kimu nawnlou himah lehang, na hon panpih theih khak leh chia, na inn uh hong zonkhiak sawm a hong kuan ka hi. Lampi ah i kimukha zenzen a, huchi hikeileh zaw, muh le hong mu zoulou maithei hi'ng a,,,,,," chi'n hong nui siuseu hi. Lampi' a kihoulim kawm a sawtlou ka tai nung un, Emily te in ka tung ua, innsung ah ka kizuilut ngal uhi. Nidang a a inn uh ka phak lai batlouhna khat nei hileh kilawm in, ka om heihuai mawk hi. Bangziak ahi hiam chih bel ken le bangmah ka thei tuan kei.
Sawtle tu manlou; bangmah le gen manlou a ka tut lai in, ka pa'n a hon phone a, ka omna ka gen leh, kintak a a office lam a va pai di'n ahon gen hi. Ken leng bangmah dang le genlou in, Emily kiang ah hun remchang masa penpen a kimu di'n, a inn uh ka pawtsan hi. Lampi a ka tailai in le'ng thildang ka lungsim ah ka ngaihtuah thei kei. Emily in "Ka beidong lua a; na hon panpih theih khak leh chi a, na inn uh hong zongsuah dia hong kuan ka hi,,,,," achih ka ngaihtuah a, bangziak a kei panpih ngai di khop a beidong ahi dia aw,,,,? Ka kimuh nanung pen lai un lah; a kipah mel mahmah mai a, huai chiah, nidang a akhosak dan toh, huai lai a a khosak dan, lei leh van bang a kikhia ahia, inn thupi' tak a teng a; sum dawnna lianpi nei-a, enkol zawmah ahih toh, bangteng hileh sum-le-pai a buai ahih chu ka gingta theikei hi.
Motor a ka tuangkhawm lai un dong pah leng hoih di hi-a, ka na dot pahlouh khawng ka kisik khonung phing a; lah bangmah a ka'nna le a-om nawn tuan kei hi. Huchih lai in ka lungsim ah thilkhat a hong lang a; "Eric in namdang nungak a ngaih houh lungkham pih ahi dia aw !! Ahih kei leh, a nu toh kimuh siamlouhna nei uh ahi' hia leh ? Bangteng hileh, ka theih hun hong om thouthou di hive'n kei hichi tel a ka na buai naang le om kei,,,," chi'n ka kingaihtuah halh a, thil dang ngaihtuah sawm in, laa peuh ka ngaikhe thepthup hi. Bang ngaihtuah kha ka hi diam ah, ka laa ngaihkhiak in ka lungsim ahon zou mahmah mai a, ka lawmte tawh, zu ka dawnsek lai ua, zukham kawm a ka na laampih sek uh, laampih mai le deihkhop lou a, ka na kahpih hial uh, ka ngaikhe meuh chu, a hunlai ngaihtuah in, ka lung khawng ahong lengthak vungvung maimah hi. Lehlam ka ngaihtuah chiang in, ka nuihkhawng a zaa a, keikia in motor sung ah ka na-ngawng nuih khe phutphut mai hi.
Ka pa te office ka tung a, ka pa'n inkong ah ana ngak hi. Bangmah genlou in motor sung ah ahong lut a. Ka laa play le off tuanlou in, Ken le'ng bangmah genlou in, ka innlam uh manawh in ka taipih zel hi. Sausim ka tai nung un, mundang phak utna nei ahihlam ahon gen phingphing a, kei le'ng hehngawh simtak in ka taikiik a; Ka laa play pen ka pa'n off di'n ahon sawl hi. Ken bel ka off maa in, "bangziak a off dia hon sawl mawk na hia,,,?" chi'n ka dong hi. Ka pa hon dawnna in a hon thangpai sak ngei mai; "hiai bang a laa thulimlou pipi khawng ngaihngaih di hilou ahi, a himhim thu in, kholai khawng a la ngaih taktak play di hilou, mi'n mibanglou a hon ngai di uh eingal ve,,,,,," chi'n ahon dawng hi.
Kei bel ka ngaihdan hilou ahihman in ka pa ka nial a; "bang e laa thulimlou ahih na, zawlla ahih ziak a laa thulimlou chih maw,,,,,, zawlla hi'n Pathian la hita leh, a phuaktute'n deihtak a aphuak uh, banghiam omzia neitak leh, kawk nei tak a a phuak uh eingal ve, thulimlou va chih sese,,,," ka chih leh, ka pa'n le'ng bangmah a hon gennawn sam kei hi.
Motor khawlsak di'n ahon chi-a, kintak a kumkhia in; inn hoihsim mahmah khat ah a va lut hi. Sawtkuam tak ka ngaknung in, file khat tawi in ka pa a hong pawtkhia a, innlam manawh in ka taikiik nawn uhi. Ka pa file tawi sung a om theinuam ka hihman in, ken leng ka pa kiang ah ka kanpah ngal hi. Ka pa'n hichi'n ahon dawng hi. "Hiaipa lak ah sum loan tam hun tawktak ka la a, huai ka loan lakna lai ahi,,,,,, "bangdia loan la e, ken lah bangmah ka theikha hetkei a,?" Chi a ka kan nawn leh, "inn a om gina manlou na hih chiah bangmah le ka hon hilh sese kei a; na theih hun hong om thou dia, natheih chiang in le na heh ka gintak louh ziak a hon hilh sese lou a, kei thu a ana hih ka hi. Zanlam in mikhat in gam za huntawk mahmah a hong zuak a, huai kia le hilou in, a dawr u leh, a dawr inn khawng toh hong zuak khawm in chi'n, ken le etlah huai ka sak ziak a, loan lak a lei ana sawm ka hi, ,,,, !" chi'n a hon dawng hi.
"Kum hiaitan Govt nasem a, niteng a buai gige hive'n, ditsuahna lampi hong kihawng le hita'n teh,,,," chi'n ngaihpha tak in ka om hi. Inn ka tung ua; garage ah ka khalh lut a, kei leng innsung lam ah ka lutngal hi. Ka pa'n ann ka nek lai un, a lunglut huaidan khawng leh, a gam leh a mun et a, kima'n asak dan khawng ahon gen a, ka nu'n leng lunglutpih mahmah chu ahi ngei dia, ann nek lam le mangngilh khop in ahon gen uhi. Ken bel hiai lampang bangmah theisiam phalou ka hihman in, ka na kuppih khawl kei a; ann ne mengmeng in, room ah ka lutsan hi.
Zing ann ka nek lai un ka pa'n office a khakngai ahi chih a hon gen ziak in kei le, ann nekham ka kisa pah ngal hi. Office ka tung un, ka pa'n "Ana kiik inla, nitaklam dak 3 lak vel khawng in na hong thuai nawn mai di, tulai zaw vuah a zuk ut tawh, midang motor a hong pai nuamlou ahi,,,,," achih ziak in kei leng innlam ah ka kiik nawn phot hi. Lampi ah ka nu ka phone a; "Phak utna dang ka neihziak in, innlam ka hong pha kei dia, nitaklam ka pa vapi dia kuan nawn ngal sawm ka hi, ana lung himawh dahmai aw,,,," ka chih leh, ka nu'n, pilvang tak a motor khalh di'n hon thukhak a, thildang bangmah a gen nawn tuanlouh ziak in; kei leng kipak gu' kawm tak in Emily te inn lam manawh in ka taingal hi.
Emily inn ah a-om dia aw ! Dawr lam ah a-om dia aw,,,,,? Chi'n lampi ah ka kingaihtuah a, phone na'ng a Number lah neilou ka hih chiah; bangteng hileh, a inn lam uh manawh a taiphot hoihpen in ka thei hi. Emily te inn lam manawh in ka tai a. A inn uh ka tung a; kongkhak ka kiu a, Emily aw ngei mai in, "Hong lut uau," chih kawm in, inn kongkhak ahon hawng hi. Kei leng ka lut ngal a; Emily pawt dia kisa a ana buai laitak ka va tuak kha hi "Pawtsawm na maw ? ", (ka kisuanlah ziak in) ka pa' office kai di vakha hong ba'ng malam maimai ka hi,,," khong bang ka chi khemkhem hi. Emily in; tuni Siamte sih champha ahihziak a Siamte haan vaphak sawm ahihdan ahon gen a. Ka kiang ah ahong paiphei a, bangmah genlou in a hong kapkhe mawk hi. Pasal ka hi a, a hehnep didan le ka siamkei, bangmah genlou in ka tu maimah hi. Emily hong paukhia a, " Nas kei kia in ka tanu Siamte haan vaphak ka sawm a, a guuk tak in ka na kihta mahmah mai hi. Tuni hun khawng in, ka tanu haan phakpih di kua hiam khat bek nei leng chi'n zingkar apat in ka na kingaihtuah a, nang bek in na hon phakpih kei dia maw;,,,,,," chi'n mittui paak niilnial kawm in ahon en hi. Hih di poimawh dang naneih ahihleh, haanmual lamah sawt omlou in, i kiik pah mai di, kei le ka dawr lam va phak poi ka sa kei, ahihziak in, kihoulim di na chih leh ka dawr lam ah le ka kuan dah mai di,,,,,,," chi'n a hon gen hi.
"Emily nanu lum hia, ahoih zel na maw,,,," chi a ka dot leh, Emily mittui hul dekpan, mittui mah in a hon luan nawn hi. Bangmah genlou a, sawtkuam tak a tut nung in. " Nas , ka nu'n hon omlouh san ta eive,,,," chih teng kia'n a hon dawng nawn hi. Ken leng Emily buailai ahihman in, bangmah ka gen sunzawm tuan kei a; munkhat ah ka na tu maimai hi. Emily pawt dia kisa zou ahong pawtkhia a, Siamte haanlam manawh in ka kipawkheta uhi. Hanmual ka tung ua, hiai bang a haksa thuak di kisa le'ng, Emily ka va zui het kei di, ahihhang in, amah ka hehpih ziak a va zui ka hi a, a paukamte leh akah laa in, kei pasal chi a, ana kiphasak sek le'ng a hon kapsak zou hial hi. "Ka tanu neihsun, Bawi, na nu hehpih tak in hon ngaidam in aw, kei ziak a hiai bang teng natung a hong tung lah ahi ngal a,,,,,"Emily thilgen teng ka thei se'ng kei, ngaihtuahna mumal tak le neitheilou khop hial in a hon koih hi. "Bawi,,,,, Na u leng hehpih tak in ngaidam in aw, na-om na apat in, thil bangkim nana theivek di maw,,,," Emily, innlam ah paikiikta ni,,,, chi'n abaan ah ka va kai a, himahleh, paizou didan ahihlouh ziak in a kiang ah ka en maimah hi. "Bawi,,,,,, tuni hun a ka tung a thil deih huailou taktak hong tungte, nang damlai hilechin zaw hong tung hetlou di hi a. Kei ziak vek ahi,,,,,,,,,,,,,,,, Emily innlam ah paiphot ni, hiai a i om om hoihlou ahi, chi'n a khut ah ka len a, ka liangkou ah alu ngakawm in, lampi ah ka motor koih uh ka manawh pih hi.
Inn ka tungkiik ua, singpi khawng dawn in, Emily zong kihahsiang in, ka kiang ah a hong tu nawn a, a tanchin hichi'n hon sunzawm nawn hi. "Eric ka tapa neihsun chi a ka duat mahmah in ahon su lungkham mahmah mai hi,. A ziak bel a lai va zirna lam ah vai nungak va ngaizawng kha chu ahi ngei dia; nidang teng a kei hon ngaihtuah ziak a a zirna le topsan poi asaklouhdan teng gen sek mahleh, huai numei ziak in, ka thu himhim a mang nuam nawn kei hi. Innlam ah hong pai hen la; ka sum dawnna hong etkolpih leh chi-a ka deih mahmah ha'ng in, suanlam tuamtuam bawl in, a zirna a lakloh thu khawng in hon dawng zel hi. I kimuh nawn tung a Eric hong paitou di, chi a ka genpe'n na theilai di maw,,, " chi'n kei lam hon en a, ken leng ka lu ka na su ngauh hi.
"A hong paitou a, himahleh a hon ngetna; a nungaknu hon thuai dipen rem ka saklouh ziak in alung akim kei mahmah mai hi. Kar khat le cham manlou in, zirna lakloh chi'n ahon paikiik san a. Kei thu mangkei mahleh a Pi thubek a man deuh khak leh chi'n ka nu kiang ah leng hoihtak a genpih di'n ka ngen hial hi. Himahleh ka nu thu leng bangmah in a ngai tuan kei a. A vangkim in hon houpih zel mahleh, niidang abang thei nawn kei a, ka ngaihtuah chiang in, Lamka lam a apute'n ahi loulou a, ana khem uh ahi dia aw,,,, chih khawng ka ngaituah hi. Ka ngaihtuahna a kisual den a, a pute'n ana khem hitawk le-uh le ka tapa in hiai bang lungsim a neih ka gingta thei kei, lah ka tung a alungsim putdan lah ahi ngal a, ka buai mahmah mai hi.
Ka khawsakna un changka'n lam manawh panpanta chi a ka na kipah guukguuk maizen toh, ka tapa omdan in ahon lungkhamsak mahmah zel a. A khen chiang bang in, kihihlup hial khawng ka uut sek hi. Himahleh lungsim taktak a ka lupkawm khawng a ka kingaihtuah chiang in, mahni kithah khawng, mi dawilokte hih di'n ka ngai a. Ka tanu Siamte in le hangsan tak in haksatna ana thuak paisuak peih hi leh, tuni hun in bel a kisik ka gingta nawn kei hi. Huai thu in a hon hanthawn mahmah mai a, ka piankhiak apat a gentheihna thuak di maimai a piang ka hi. Hiaitan haksa, gentheihna kan thuak ta a, ka hinkhua ah, haksa, mangbatna bangteng hong tung mahleh, hangsan tak in ka thuak dia, chik ni chiang hiam in kipahna ni a hong suak ngei di, kei adia kipahna, nopna omlou di himahleh, ka sihdong in ka thuak di ahi,,,, chi'n ka lungsim ah ka ngaihtuah hi.
---------------------------
BUNG 6 NA
Buai kawm pipi in ka sumdawnna uh ka enkol tou zel a, ka nu lah teek hatnawnlou ahihtoh, kei lah amah buaipih man a khosa mahmah lou ka hihchiah chi'n, ka nu enkdoltu di, lohnei a ompih di ka la hi. Huchi a ompih ka hon neih nung un chu kei a di'n le a zangkhai huai mahmah ta a ; innlam lung himawhnate le'ng neukhah in a dan hong omta hi. Ka nu le'ng alungsim kipak ahi chih amel apat in muhtheih hial in ahong lang a, ka lungsim gu-k in, ka ompihnu u-toh ka nu kituak mahmah uh eive, chi'n kei leng ka kipak mahmah mai hi.
Ann nek lai khawng leh ka tutkhawm chiang khawng ua ka nu toh ka ompihnu hong kichiamnuih khawng chiang bang un, nuam ka na sa thei mahmah mai hi. Amah lah mi pau ut mahmah, seplit le neilou ahi zawmah a. Himahleh, ka naupanlai a ka gentheih dante ka ngaihtuah kiik chiang in, sikhaa dan a etkol pen ka kisiamtan theikei a, tanu bang a en in, ken leng duat chih theihtop in ka duatsam hi. Hun hong pai zel a, ka innsung vante uh khawng a mang hong om panpan hi. Himahleh ken bel ka ompihnu uh ginlelhna himhim ka neikei a, ka nu'n a van hoih simsim leh sum tanpha mang ahihdan hon gen zel mahleh, kamkhat inle amah muanmawhna paukam ka zang ngei kei. Lawm leh vual ngaina hun lel na hi ua, na lawmpolh ah pilvang inla, innsung khawng ah na lawmte tangnel tak in ompih mawkmawk nawn louh di ahi,,, chi'n paukam neEm tak in ka thuhilh zel hi.
Vangtah huai tak in ka nu dmalouhna in ahon buak a, alu naa sa in, tut leng tu theilou in hong om hi. Kou leng innlam a ki etkol pen thil dikpen hilou chi'n damdawi inn lam ah ka kipawlut ngal ua, doctor te'n ka nu mit in khua mu gina thei nawnlou di ahihdan ahon gen uhi. Ka lungkham petmah a, himahleh hihtheih ka neih louh ziak in, ka hihtheih omsun, ka nu duat tak a etkol leh amah hehnepna paukam zat ahi mai hi. A natna dang kisoisel nang a nei nawn kei a, kei leng dawr lam ah ka hun tamzaw ka zangthei nawn hi.
Nikhat customer om mahmah lou, ka dawr ngakpihte toh kihoulim a ka tut maimai lai un, a vengsung lam thiltung khawng ahon gen uhi. Ken leng a thugente uh hoihtak in ka na ngaikhia a, huchih lai a mikhat hon thugen in ka lungsim ahon la mahmah mai hi. Zanlam deuh a thiltung ahi a,,,,,, "Putek khat in naupang kum sagih (7) mi pawngsual a, a pawngsualtu le mipi'n khoihlum man phial uh,,,,,," chi'n a pawngsual tupa, putek min ahon gen leh, ka naupanlai a ka omna ka paneu min mahmah hi'n ka thei a. Thuchiang dot sawm in, mundang ah ka samkhe pah hi. Amah gendan toh kei theihdan kibang chiah kei mahleh ka paneu min mahmah ahih ziak in, nitaklam a amah toh vapawt a, thuchiang theih ka sawmta hi.
Ka tutmun ah ka kingaihtuah den a, nu leh pa kiang a khanglian lou himahleng, nu leh pa diktak nei ka hih chiah, bangteng hileh amau le ka zonkhiak ngai ahi, chi'n ka kingaihtuah a, himahleh ka lungsim abuai mahmah mai hi. A ziak bel, ka nu'n pasal dang neita a,huai apasal ka pa diktak hilou, ka nu va mukhe mawk leng le ka pa diktak bang chi'n ka muthei dia, huchi mah bang in, ka pa va mu hitawk leng le, ka pa zi ka nu diktak hilou zel,,,,,, ka lungsim abuai petmah mai hi. Himahleh ka hih di masa pen chu, ka dawr ngak tunu gen, ka paneu hi-a ka theihte inn vaphak masak ahi. Nitaklam ahong hi-a, kou leng dawrkhak in, ka paneute innlam zuan in ka kizuikhia uhi. Ka ompih nu' kiang ah, paihak maithei ka hihziak in, ann ne dia ana ngaklou di'n ka hilh ngal hi.
Ka mitkha in amuh dan toh, tua nu hon paipihdan a kilamdang ngei mai, lampi ah ka lametna tengteng a beizou hial hi. Ka paneute inn ana hi kei leh bamgchi'n ka zongkhe thei dia, ana hi mawk lelah ka paneu pawngsualtu hizel di,,,,,ka kisaikaak den hi. A genna in ka tung ua, inn hoihlou chik khat ah hon lutpih a, pitek khat ana om hi, huai pitek ahih leh kua dang hilou in, ka naupanlai a, hihduhdah chiteng a hon hihduhdah tu, skul kai-ut ngawih-ngawih a ka omlai a le hon kaisak nuamlou, skul ahon kaisak khak leh chi a, ka sep di teng ka sep khit chiang a skul kiang, gamnuai a ka lawmte skul kai ka va et zel khawng thei a, a inn ua pat a hon hawlkhetu, hehpihna neilou, naupang kum 7 mi lel, piching nasep teng hon semsaktu ka muh in, thangpaihna'n ka dim hi.
Himahleh huai piteek tung ah ka thangpaihna ka latsak pen thil dik hi'n ka theikei a, ka hehluat ziak in gen di pen le theilou in, ka ding deedu hi. Aman bel nengkhachik inle ahon theikei a, bangmah genlou a pawtkhiakdi hii ka saklouh man in, sawtlou ka tu ua, midangte omna khawng ka dong hi. Hun remchang dang a va phatak nawn di'n ka pawtkhiaksan uhi. Ka dawr ngakpihnu'n lamdang sa tak in ahon en a, gen-ut nei hileh kilawm, lah genkhe ngamlou dan in ahon enden hi. Lampi a ka pailai un, ka dawr ngakpihnu kiang ah, a tanchin uh ka dong zel a, aman le atheih dandante ahon hilh zel hi. Ka thei ut na ziak ahon dot chiang in, ken bel nidang chiang a bangkim ka hilh di thu'n ka dawng zel hi.
Ka dawr ngakpihnu'n, tu'n chu a teekta a, a hatlai deuh khawng in chu anasa thei khopmai, a pasal lah lauhna himhim neilou, inveng louvengte mitmei venna khat le neilou in a gamtang sek a, a pasal toh a kihihbuai chiang un le apasal inn apat hawlkhiak khawng sawm zawmah hial sek hi. Huai khawng ziak le ahi maithei, a khosakna uh a lamzang kei mahmah mai ua, kum nih paita in a tenna inn uh a kangtum vek a, van khat le tuah manlou in, a tate uh nih leng hiai meikang ah a kanglum uhi. Amau nupa kia a khosa in, vengsung ah aphallouh uh, khamtheih chi tuamtuam zuak in a-om ua, vuaitampi vengsung apat hawlkhiak ding in ana warning ta uhi. Himahleh a vangphatna uh paitlung zel chu ahi dia, tunitan hiai veng ah ateng lai uh. Himahleh zanhal in apasal in numei naupang kum7 mi di khawng a pawngsual lai matkhiak ahia, amaban uh zaw limchi lawmlawm khol kei leh kilawm,,, chi'n hon gen hi.
Ka lungsim ah, ka naupan lai a hon hih duhdah nate,ken phuba ka laak ngailou a Pathian in kei taang a ana laksak eive, himahleh kei le amah bang a thilsual bawl a khosa, ka hun leh nite zang den hi'ng a, Pathian kei tung ah hoih hina maizen e aw,,,, chi'n ka kingaihtuah vongvong hi. "Umily,,,,,Neek lim aw,,,," chi'n ahon paukhia a, a inn pialna lampi uh ka na tung uhi. Awle,,,,, nang le neek lim, chi'n ka kikhen ua, mahni innlam chiat manawh di'n taxi ka la a, khomui philhphelh nuai ah motor tai zungzungte kar ah innlam ka manawh tei hi.
Inn ka tung a ka nu leng ana harh deuh ahihman in sitting room ah, tv en in anih un ana tu uhi. Ka gimsim ziak in, ann nekham lupna ka kidenna pah a. Lupna tung ah ka kingaihtuah a, ka paneu zi in ka paneu bail nang bangmah le neilou di hia, kuamah lah panpihtu amuh uh ka lawmnu gen apat, aneih uh ka gingta kei hi. Himahleh a thawn apanpih ka sawmkei, alak uah thil phut ka neih ahon hih lawhchin sak kei ua leh, ka panpih kei di, chi'n ka lungsim ka bawl felta. Zingchiang in a inn uh ka va pha dia, ka nu toh ka pa omna (tenna) ka dong dia, ahon hilh theih leh panpih a ngaih dandan in ka panpih dia, ahon hilh theilou ahihleh, chengkhat lel inle ka panpih kei di.
Nu leh pa kiang a khosalou himahleng, amaute'n genthei tak in ana koih kei uh hen la, atanu bang un ana en le uh, hiai bang a ka hinkhua a haksa gentheihna ka tuah tengteng ka tuak kei dia, midangte bang in, pasal hoihtak nei in, sungkuan kituaktak ah ka khosa ngei di'n ka kigingta, himahleh amaute ziak a hiaitan tung ka hihman in, athawn mai a ngaihdam hiam, panpih hiam hithei mawklou di ahi,,, chi'n kei leh kei ka kisiamtan zel hi. Ka kingaihtuah chiang in ka thangpaihna a sousang deuhdeuh hi'n ka thei a, himahleh a dinmun uh ka ngaihtuah chiang in, hehpihna bel ka nei veve hi. Ka nu leh pa ka zonkhiakna a ahon panpih theih kei ua leh panpihlou di,, chi'n ah thupukna ka na bawl khawng ka ngaihtuah kiik a, dik khinlou hi'n ka thei zel hi. Himahleh ka thupukna bel bangtan hiam paisuakpih ka sawm tinten hi.
Zingkhua hong vak a, sunlam chia ka thil hih di ngaituah kawm in, zing singpi ka dawn hi. Ka ngaihtuahna ah thildang himhim a-om thei kei. Ka nu leh pa zonkhiak a, ka muh hun a uttawk a hangkhum zialzial ka-ut hi. Ka thangpaihna hong kibehlap deudeuh ahihman in, ka annkam bang alim kei a, nidang a ka neek kimkhat le ka nekei hi. Ka nu hiam, ka pa hiam va mu hileng, a tanu uh ka hihlam ana theilai di ua aw,,,,, ? Hehpihna nei hetlou a asisan ua piangkhia kei naungek ka hihlai apat a hon kem peihloute'n, tu'n hon mu le uh le ahon kipahpih uh ka gingta lawmlawm kei hi. Himahleh ahon kipahpihna uh lamen a zongkhiak sawm ka hikei a, ka tung a a gamtatdan uh dik ka sakei a, amau ginat louh ziak a ka hinkhua a haksa ka na tuah tengteng thei le uh chih ka deihman a zongkhiak sawm ka hizaw hi. Ahi tak in, ka pianna nu leh pa sang in ka pasal James nu leh pa ka ngaina' zaw a, khovel a nutak, patak ka tuah masak pen hi'n ka thei a, pawm le'ng ka pawm hi.
Zing ann nekham thazawi kawm pi'n ka kisa a, ka kisak zawh in, dawr lam zuan di'n ka pawtkhia hi. Dawr ka tung in, ka dawr ngakpihte le'ng ana tungkim vekta ua, dawr kong ah ana ngak uhi. Ken leng dawr chahbi ka pia a, dawr ahon hawnkhit un dawr sung ah ka lut ua; hih di poimawh tuamtuam ahon hihkhit un, kei leng ka paneute innlam zuan in ka diangkhia hi. Ka potkhiakma in, ka dawr ngakpihte kiang ah; ka kiik hun di gen theilou ka hihman in, ana lunghimawh lou-a, nitaaklam tan-a ka kiik man kei lele, dawr chahbi ana kem mai di'n ka mimuanpe'n kiang ah ka thukhak hi.
Piteek lungkham ahi chih haih vuallouh in, ka paneu zi ana om-a, ken leng zahtakna nei tuan sese lou ka hihman in, tu di'n hon sawlkei mahleh, tutna ka naih a, ka tusuk hi. Bangmah genlou-a ka tut nung in, "kua na hi hiam, koi a hong kipan, bang deih nei-a hong pawt na hia,,,,,? Chi'n ahon dong hi. Ken leng, kum hiaizah paita in, numei naupang khat, tagah ompih nanei uh maw ? chia ka dot leh, sawt simtak ahong kingaihtuah nung in. "Haaaa,,,,, neimah ung e ! Amah numei naupang kizen mahmah leh fel mahmah ahi, himahleh nungak dia hong kisa, atha khawng ka nek theihdek pat un, Lamka lam a apute'n ahong thuaikhia ua, huainung khatvei mah le ka kimukha nawn kei uh,,,," chi'n hon dawng hi. "Nang huai theikha na maw ? " chi'n lamdang sakmel tak in ahon dongkiik a, "Ka theikha a, anu leh pate, naungek chik ahihlai in, akikhen ua, huai anu leh pate omna na thei hia ? " chi'n ka dong nawn hi. Lamdang sakna ahong lian deuhdeuh a, ahih hang in ka dotnate bel ahon dawng zel sam hi. Kikhen mah uh e, nupa ginalou tak ahi ua, atanu uh, a sisan ua piangkhia ngawih-ngawih le iit zoulou in, akikhen nung uh sawtlou in, koppih dang tuaktuak anei ua, ken phatuam ngaitak in ka na enkol hi,,,,," chi'n ahon dawng nawn hi.
"Ahihleh a kikhen nung un, koppih dang anei uh na chi-a, huai nung, nou kiang ahong phakha ngei uhia ? ", chi'n ka dong nawna. A pasal, ka pasal sanggampa'n zaw hong pha zeuhzeuh mah e, ahihziak in, a zilui pen zaw kholak khawng ah ka kimuhkhak louh ngal uh, inn ahong phaaklam ka thei ngeikei", chia ahon dawngtak in, lametna lianpi ka nei ngal hi. Ka maitang ah ahon en a, hon theikhe guih di hileh kilawm in, ahon enden hi. Himahleh piteek khat kiang maimai a ki-iim zawh pen ka kihtak louh man in, zumna himhim ka neikei hi.
"Huchi ahihleh, huaite nupa muh utna ka nei a, na hon panpih thei diam ? Chi a ka dotleh, panpih theih louh nang bangmah a-omkei, ahihziak in, ka tung ua thiltung ziak in ka buai mahmah mai a, ka pasal lah tua police khut-a om lellel ahih chiah, kei kia'n zaw bangchimah in ka hon panpih theih ka kigingta kei. Ka pasal hong potkhiak chiang in, amah toh na kihou di ua, aman hon panpih thei mahmah in teh. A hihziak in ahong potkhiak hun di bangmah ka theikei. Tumaa lamkhawng in chu zu khawng ka na zuak sek ua, ka zu zuak uh amat chiang un, amah hong mansek mah le uh ni 3/4 nung khawng chiang in ahawn pawtkhesak zel uhi. A hihziak in tutung zaw ken le ka thei siam kei, naupang khat vasual achi ua, ken lah bangmah theih pihlou ka hihman in, bangchia malak di ahia chih leng ka thei bun kei. Innveng louvengte'n lah hon panpih utlouh di uh theihsa,,,," chi'n amel khawng hong liap zou hial hi.
"Huchi ahihleh ken police station lam ah ka na buaipih dia, ahong pawtkhe thei ahihleh, na nih ua na hon panpih uh ngai di ahi,,,", chi-a ka gen leh, amah leng lametna lianpi nei ahi ngei dia, amel khawng alatdan hong tuam zou hial hi."Hitham heh aw, na va lakkhiak theih leh, kou leng kon panpih theih dandan in ka hon panpih di ua, nang leng theihtawp hon suah inla, ka pasal lakkhiakdan hon ngaihtuah sak mahmah in aw,,, chi'n a nget in hon nget thoh hial hi. A paukam, kiphahniam tak ka zak in ka hehtha ahong suaksak mahmah a, ka neulai a ahon kepdan leh ahon bawldante genkhiak a, hang a hangkhum zialzial khawng ka-ut maimah hi. Himahleh huaidan in om mawk leng, ka thiltup teng fail vek di ahihziak in, ka kisuum hamham hi. Hun remchang masa pen a police station lam hawh di ka hi, ana lungkham ken la, na pasal ka hon lakhiak sak di,,,," chi'n, ka pawtsan hi.
-------------------------
BUNG 7 NA
Dawrlam manawh phot hoih ka sakziak in, koimah ah piallou in, dawrlam ka zuan ngal hi. Dawr ah sun singpi dawn in ka tu khomuang a, ka dawr ngakpihte bel, amau thawven dandan a thawvengte ahihman un, kei mitmei le hon veng sese lou in, amau chiakchiak in ana chiak uhi, ka phone hong ging a, ka pick-up ngal hi. Ka ompih nu un, ka nu, a natna in phathak ahihdan ahon gen a, ahih theih leh, a kintheilam a innlam hong zuan di'n ahon gen hi. Kei leng ka singpi dawnlai taisan in, ka dawr ngakpihte khat, hon panpihtu di chi'n, ka thuai ngal hi. Taxi la in, ka innlam uh ka zuan ngal ua. Inn ka tung un, ka nu houpih theihlouh, khua le phawklou in ana om hi. Buaipih didan dang thei tuanlou ka hihman in, damdawi innlam ka manawhpih ngal ua. Damdawi inn ah ka luutpih ngal uhi. Doctor duty nu'n, ana check ngal a, sawtlou nung in admit ngai ahihdan hong hilh a, kou leng buaipih ngai tuamtuam ka buipih ngal uhi.
A khen chiang in, ka nu hong harh deuh zel mahleh masawn theilou ahihman in, ka lungkham mahmah mai a, ka ngaihtuahna a paisau thei petmah hi. "Ka maban a hihdi tampi neilai ing a, ka lawhchin hun chiang a, ka nu hilh di ing a, ka nu'n le naktak a hon kipahpih ngei di. Tu'n hon omlouhsan mawk leh bang ka chita maizen dia, ka maban lah sahlai mahmah ngal a,,,,,?" Ka lungsim abuai petmah mai a, A diktak in, ka nu damsuah sang in, a damsuahlouh gintaakna ka neilian zaw hi. A ziak bel, ni thum lambang paita mah leh, houpih le houpih theihlouh, bangmah lah nelou a om ahihman in. Sawtlou chik khong amit ahong hak a, banghiam gen-ut nei hileh kilawm in, akam khong hon kaa zeel hi. Himahleh a aw suak di om mahmah lou ahihman in, bangmah zak di'n a genkhe thei tuankei a. Beidong tak a ka om lai un, ka gintak bang ngeingei in, ka nu'n ahon mualliam san a, lungsim naa leh lungleng in ka hun leh nite ka hon zat a ngai nawnta hi.
Ka thawmhau mahmah mai a, inn ah om leng lah, ka ompih nu toh kia; ka ompih nu'n lah, ka nu ngai ahi ngei dia, ka nu damlai a a-omdan toh ka nu sih nung a a-omdan a kikheng mahmah mai hi. Bangteng hileh, sihna ziak hive'n ka tapa Eric in le hon ngai poimawh deuh khak leh chi'n, sawtsim nung in, phone in ka nu sihthu ka vahilh hi. Himahleh, Eric in huchi lawmlawm in ahon ngai poimawh kei hial hi. Ka lungsim ah banglou teng ahong lang a; tulai khovel paidante khawng, mi tamtak te'n, numeite mawhsa in, namdang tangval, sum leh pai deih ziak a, akop khong uh, leh huaite, nak taktak a ademnate khong uh ka na theisam a, kei ngei inle ka na mawhsa mahmah sek hi. Himahleh, kei, ka tapa ngeingei in namdang a kop ziak a, anu le hon ngaihsak utlou; huaikia hilou a, api sihthu atheih ale, hon ngaihsak louh khawng ka theih thakthak chiang in, kuamah mawhsa thei ka hihlouhdan ka kithei a. A guuk tak in ka zak ata thei mahmah mai hi.
Eric in bangmah hon hilh kei mahleh, ni 3 nung in ahong pai di thu ahon hilh khonung hi. Ka ngaihdan hikei mahleh, hong pai henla, hon panpihta maileh chih khong ka ngaihtuah ziak in, lungkimlou dan in leng ka om nuam kei hi. A nungak haichilh pen hon thuaikhak ka lau mahmah mai a, himahleh huaithu le bangmah ka gen ngam tuankei hi. Ka ompih nu kiang ah, Eric room hihsiang ngai ahi,,,," chih gendia a room a ka valuut leh, ka ompihnu a van tengtoh pawtkhia ahihdan ka mu-a, lamdang ka sa mahmah mai hi. Kintak in, a inn uh ka phone a, a sungte'n leng,,, "inn a hong pailou ahi,,,"chi'n ahon dawng zawmah lai uhi.
Bangteng hileh kei nawhkhiak le hilou; amah ut mawng a apawtkhiak ahihchiah chi'n ken leng ngaihsak ka sawm nawn tuankei hi. Ka theih bangbang in, Eric room ka hahsiang a, thil tuamtuam ngaihtuah in ann nangawn ka negina thei kei a, ih-leng ka ihmu gi-na hetkei hi. Ziangkhua hong vak a, Eric, inn ahong tung ni di himahleh, nitaklam pek di ahih ziak in, kei leng ka maban, ka nu leh pa zongkhiak nna sunzawm di'n pawtkhiak ka sawm nawn hi. Police station lam hohpah di chi a, ka na thupuuksa himahleh, ka nu sihna ziak in ka ut-hun in ka hoh theikei a. Bangteng hileh, a innlam uh pha masa di'n thupukna ka bawlthak hi. Ann nekham ka kisa a, dawr lam tot masak hoih ka sakziak in dawrlam ka manawh phot hi. Ka lungsim a kisaikaak den a, Eric ana ngak vanglak hoih di hia, ahih kei leh keimah a ana zongkhiak di, chi'n ka ngaihtuah na a kisual den hi,,, chi'n Emily in ahon gen hi. Sana ka et leh ka pa office kai tawphun dek ahihman in ken leng paikhiak a, hun remchang dang a kimu nawn di'n ka gen hi. Kei ziak a ahun manpha tampi bangmah lou a azatbei mawk khong ka ngaihtuah chiang in, kei adia a kipiak zawhna leh a kihawng dan thupi ka sa mahmah mai a, ka siam bangbang in kipahthu genmah leng, kei sang a, amah paukam siam zaw ahihman in, gen di bangmah theilou in hon koih hithet hi. Ka nuihkhawng aza hial a, Emily in le, "a kinthei lam in kimu nawn le maw,,," chi'n ahon gen a, ka pa te office lam zuan di'n Emily te inn ka pawtsan nawn hi.
Ka pate office ka tung a, ka pa, ana mansiang nailou deuh ahihman in, innkong ah ka pa ngak kawm in Cigarete teep in ka tu maimai hi. Sawtlou ka tut nung in ka pa hong pawtkhia a, innlam manawh in ka kipawliam nawn uhi. Lampi a ka tailai un ka pa toh bangbang hiam gen in ka kihoulim ua, zanlam a gam leh inn (dawr) alei tungtang khawng ahon gen hi. Zingchiang lam, hun remchang a-om leh, va-et hoih asak thu ahon gen a, ken leng ka pa'n huchi khop a a awlmawh pen lamdang ka sa hial hi. A ziak bel, ka pa, mingaihsam mahmah khat ahi a, thil thupi simsim khawng le ngaizam maimai theite ahi. Himahleh huai a thil lei bel, vei chih petmah a vei ahihman in, a gengen mai hi. Huaiziak mah in ken leng neuselua hilou di'n ka gingta mawk a, ka pa, huai agam leina en dia a hawh chiang in, amah toh ka hawh ngei di, chi'n amah toh hawh ka na sawmtei ringawt a.
Inn ka tung ua, ka kihahsiang zawh in, nidang a ka hihdan mah in, ka room ah ka luut hi. Computer ka on ngal a, Emily tanchin tuni lam a ka theihbelhte gelh in, ka awlmawh mahmah mai hi. Sawtlouchik tu ka kisak lai in, ka nu'n ann ne di'n ahon sam a, sana ka etleh dak 5 lam ana gingta ahihman in. Ken le'ng "ann nekkham chiang a sutzop di,,,,," chi'n, ka room ka potkhiaksan hi. Ka ann neklai un ka pa'n thudang bangmah gen tuanlou in, a gou (gou chi'n gelhgzel ta mai di aw) lei te mah haichilh ahi ngei dia, a gengen mai hi. Ka nu'n leng alunglutpih mahmah ka chih taak kha. Anih un agen ua, zingching lam a va etkai di, ka pa'n ahon gen tak in, ka nu'n leng, muh a ut thu ahon gen a, sungkuan a hawh di'n thupuukna ahon bawl uhi.
Tapa mal neihsun ka hi a, ka nu leh ka pa'n, hiai gou a lei pen uh, kua dang adi hilou in, kei atapa neihsun uh aa di ahi chih ka theichiang a, nidang a, athugente khawng uh kikuppih utlou a, ka na lunglutpih louh khawng haihuai ka sathak mahmah mai hi. Himahleh ka nu leh pa le tek selua ahi nai kei ua, sawtpi hon dampih lai di un ka gingta hi. Huai khawng ziak le ahi maithei. Keimah ah mohpuakna hong omleh, tu dinmun a di'n ka chin hetkei di' chia kingaihtuah a, banghiam vangsiat thil thu ziak in, ka nu leh pa'n hon omlouhsan thei uh ahi, chih ka theikhia a, ka lungsim kibawl theih dandan a kibawl di'n ka kisak ngai ahi chih ka theikhia hi.
Tangval piching khat kihita, bangmah sep leh bawlpe'n lah ki neilou; phet lou a, sep di ahon gente ule, seppeih gam neilou ka hih man in, haihuai ka sa mahmah mai a, ka gensa mah bang in, ka nu leh pa'n, zankhat mitsi'n hon tuak mawk uhenla; kei kia a khosa a, innsung enkoltu dinmun in ding mawk leng, bangchi'n ka om dia, huaikia ahi kei, zi leh taa kinei henla, sungkhat pa dinmun ah kiding leh, ka zi leh tate bangchi'n ka chawm dia, ka nu leh pa sepsuahsa a, zi leh ta chawm di hileng, pau selou in, ka nu leh pa sepsa in le ahon chawm zou mahmah di'n ka ging. Himahleh khut leh khe kim, lungsim ngaihtuahna mite a bang kinei sam a, nu leh pa sepsa a, zi leh ta chawm di chihpen, pichinlouh huai ka sathak mahmah mai hi.
Bangteng hileh, ka nu leh pa'n, tua athil hih uh, ka theih tawp suah a ka panpih hoih hi'n ka thei a, amau nuaksak zawng a paukam zat ka sawm nawn kei hi. Room sung a ka luut nung in leng Emily thilgente sang mah in, huai ka ngaihtuahna ah ahong om zaw mawk hi. Ka thugelh laile sunzawm theilou in, lupnatung ka kidenna a, kingaihtuah a ka lup lai in, ana ihmukha ka hingei dia, ka harh in ziinglam dak 2 ana ging man hi. Ihmut sawm in lumthak mah leng, ka harh deuhdeuh mawk a, thildang ngaihtuah theilou in, ka pa gou lei mah in ka lungsim ah mun aluah mawk hi.
Zingthoh hong hun a, kei leng ka thoukhia hi. Ka nu leh ka pa, ka thoh khalh a, singpi bawl in, ka nute room ah, singpi nou nih tawi in ka valuut hi. Ka nu zingthou toh, kongkhak bul ah ka kiphukha phial ua, ka nu'n lamdang sakmel tak in ahon en hi. Ken le'ng ka ihmut baih ziak a thoubaih ka hi, chi'n ka gen a. Ahitak in, nidang a ka omdan diklou leh piching lou taktak a ka omnate ka tawpsan ngai ahi chih chiangtak in ka thei a, huai di'n tua pat bul ka patngai ahi, chih leng ka thei hi. Sawtlou nung in, ka pa le'ng ahong thoukhia a; nidang teng a kei sang a thou masa gige ahih ziak in lamdang asa hial hi. "Tua bang zel a na-om le chu zineih lam bang le ngaihtuahta leng poilou di eive,,," chi'n a singpi dawn kawm in ahon chiamnuih a, a singpi dawn khong thalh zawzen hi. Ka nu hong paukhia a, "zi hoih leh feltak na neih di ahi, ei innsung a om di khong, pilvang tak a nateel ngai ahi,,,,,,,," chi'n bangbang hiam ahon gen zauzau hi. Kei leng ka nu'n thu tamsimtak genta ahihman in, kaningtha ahong suak a, "Ka nu na hi a, kum hiai zah innkhat ah i na tengkhawmta uh. Himahleh na tanu, moufel leh mouhoih hi dia na thuhilh lam vuaikhat mah ka za kha naikei, huiziak in, mou fel leh hoih neih kilamen ken la, ka muhmuh ka hon nei dia, afel lehlah nang vangphat, a gitlouh lelah na vangsia,,,," chi'n ka nu ka dawng hi.
Huchi bang paukam ka nu ka zatkhum ziak in, ka nu heh chih petmah in ahong heh a, zingkal kal in ngaih taktak in ka hong kina ua, ka hangkhe loiloi uhi. Ka pa'n le (ka thugen diksa in) ning deuhta ahi ngei dia, ka nu atai lohhial hi. Ka nu'n ka pa taina a zaak chiang in, haang sunzawm lou in, ahong daithei vanglak a, kei le'ng kihahsiang zou, ka room ah ka lut nawn ngal hi. Sawtlou nung in ka nu'n ahon sam a, ka vapai leh, ka gintak louh tak in, "gas abei a" chi'n, gas buuk kheng di'n ahon sawl hi. Ken le'ng kudam a gas-buuk ka vala a, keikia a ka dopphei leh ka kawng ka hihna kha zawmah lai hi, ding leng dingtang theilou in ka om a. Ka nu'n neek abawlkhit in, ann ne di'n ahon sam a, kei leng peihlou pipi in ka vathoukhe hamham hi. Ann ka neek lai un, ka pa'n, "Sunlam chiang a, gam leina phak i sawm uh, tuni'n kikhelsak mawk le'ng, hun remchang dang hong-om zok nawnlou di ahihman in, tuni chu na nu toh ka va-en phot di ua, hun remchang dang ah, nang zaw ka hon hohpih thak mai di,,,,,," chi'n ahon gen hi. Ken bel vahoh a bangmah phattuamna omlou di ahihman in, kamkhat inle ka pa thugen ka dawng tuan kei. Ann nekham, ka nu leh pa kisa in, keikia ahon nusia uhi. Ken leng hun remchang ahi, chi'n ka thugelh sunzawm di'n ka hong kisa nawn hi.
Emily hinkhua in ka lungsim ahon zou mahmah mai a, bangchi'n tua ka kimuhlouh hunsung uh a zang mah dia aw,,,, Eric bang le inn hong tungta ngei di hia, anu leh pa a zongsuah ta dia aw,,,,, chi'n ka ngaihtuah den hi. Himahleh, keimah ah tutak dinmun in bangmah hihtheih ka nei kei; ka damdia, hun ka neih masak penpen chiang in, ka vapawt nawn ngeingei ngai dia, Emily vamuh ka sawm di ahi,,, chi'n ka kingaihtuah hi. Bangteng hileh, anu leh pa a zonkhiak nang panpih theihna lampi ka nei ahih zenzen leh, ka theihtawp in ka panpih dia. A nu leh pa tung a, athangpaihna tengteng, a uttawk in haangkhiak khum zialzial henla, a lungsim gimnate le a dan omdeuh di,, chi'n ka ngaihtuah hi.
-------------------------------
BUNG 8 NA
Huchia ngaihtuahna buaitak a ka kingaihtuah lai in, ka nute ahong luut ua, kei leng haksa kawmpi'n ka va paiphei hi. Ka nu leh pa' mel ah kipahna leh lungliapna lang kop hi'n ka thei a, ka nu bang nidang a pawt chiang a, inn a hong luut phet chiang a, hong nuiluut selsal gige hia. Himahleh huai ni bangthu va za a, bangthil va mu uh ahi diam ah, amel uh nguai in ahong nguai mawk hi. Ken leng bangmah genlou in, ka peih dandan in ka nute singpi di va bawl ka sawm hi. Ka nu'n singpi dawn peihlou chih ahon gen tak in, ka pa'n le, "ken le ka dawn peih dah mai di, ka hong paidek un, singpi ka hon dawn malam ua, ka duhtha le asuak kei, achih ziak in kei leng ka tawpkiik thak hi.
Ka nu leh pa hohna tanchi'n donglou a omtel hilou ka sakman in, ka pa kiang ah a lungtun huai asak leh saklou ka dong khemkhem hi. Ka pa'n bel lungtun huai mah e,,,, chih teng in ahon dawng lel hi. Ka nu ahong paukhia a, lungtu'n huaitawk lele a neitu hehpih huai salua ka hi. Hiaidan a hih teitei bang le ken zaw hoih salou ka hi,,,, ahon chi hi. Thil omdan ka theihlouh man in, ken bel bangmah ka gen kei, huchia dai dedu a ka-om leh, ka pa a hong pau nawn a, bangkim hihfel vek di, haksa kawm pipi a sum tampi kipuuk a, tua tawpsan belbul hitheilou ahi. Zingchiang in Revenue office ah ka va hoh dia, thil hihfel ngaiteng ka va hihfel vek di. Huai a Director pa ka meltheih hoih mahmah ahi a, bangmah buainang a-om ka gingta kei. Ahih ziak in sum bel tamlou piak ngai di'n ka gingta." Chi'n hon gen hi. Ka pa'n room ah ahon lutsan nung in, ka nu toh ka kihou ua, ka nu thilgen lamdang ka sa mahmah hi.
Ka nu'n, Bawi,,, na pa'n gam leh inn a leimawk na a, thil diklou khat om ahi. Tuni a a neitu ka va muh na uah, a neitu'n a gam lai (LSC) pen mi'n guksakdan a ana genmawk ahi. Ken le'ng lamdang ka sa mahmah a, gintak huai di hia, gintak huailouh di chih le ka theisiam kei. Himahleh alai ka et chiang un, ama' min a tuangkha kei zel hi. Ei hon khem sawm khawng ahi maimah dia aw,,,, chih khawng ka ngaihtuah mawkmawk a. Na pa'n lah buaipih nak lua ahih chiah, hiai khawng ziak in tawpkiik a utnawn lah gintakhuai sikei a. Bangteng hileh, na pa'n a saisai in a hon sai dia, ei sepsuahsa bangmah omlou ahih chiah, va gengen le nuamlou ahi, chi'n ka nu'n zong hon gen hi.
Ahi mah ve maw nu', ei sepsuah bangmah omlou ahih chiah, thil va gengen bang le nuamlou, huai chiah, tulai zaw kikhemna tamlota mahmah in chi'n, kua hiam khat in ka pa' ana khem khong hi dia gingta maimah ka hi. Ka chih leh, ka nu'n, "tua na pa gam leina pa' zaw huchi dan a ei hon kheem di chi hikei, tuma pek a ka na kimeltheihsa uh ahi a, himahleh aman le alei dan diktak ahon gen kholkei; a leina le zanlam zek hihtuak ahi a gen dan, chi'n hon dawng hi. Ka pa'n, ka nu toh ka kihouna uh hon za ahi ngei dia, room apat ahong pawtkhia a, bangmah gen buai di om nawnlou ahi, LSC a fel a, kuahiam khat in hon hihbuai sawm mah leh zing chiang in office ah ka va hihfel dia, banngmah lauh nang om nawnlou di ahi,, chi'n ahon gen hi.
Kei le sawt tu theilou ka hihman in, lum di'n ka room ah ka lutsan nawn hi. Ka nu' thugente ngaihtuah kawm in ka hun ka zang a, thu kuanlam leh pailam le khen theilou khop in ka lung abuai hi. Emily zong ka ngaihtuah man kei. Ka lungsim in bangmah ngaihtuah mumal theilou ahihman in, ka lumsuk a, ana ihmu kha ka hingei dia; ka nu'n nitaklam ann ne di'n ahon phawng hi. Ihmut khamlou pi'n ka thoukhi a, annkuang ah, huaithu mah gen in ka kihoulim uhi. Ka phone hong ging a, ka sanggam nu'n zing chiang a ka nu a inn lam ua pawt dia adeih thu ahon gen hi. Ken leng ka nu toh ka kihousak hi. Ann nekham, nidang a ka hihdan pangngai un, sungkuan kihoulimna sawtlou ka neih nung un, lum di'n ka kisa uhi. Kei bel room ah ka luut ngal a, ka nute leng luppah sawm hinapi; huaizan lengla aneih ziak un alumpah thei kei uhi.
Zingkaal ka thoh in, ka nu leh pa' ana thoukhinta ua, bathroom lam manawh a ka pailai in, ka nu'n, "zingkal khat kia ei maw na hon thohkhalh, na lup baihbaih maizen toh,,,,,," ana chipah hi. Bangmah genlou in kihahsiang di'n bathroom ka luutsuak a. Ka pa ahihleh bangmah genlou in, news paper sim in atu meeumaau hi. Ann neek hun ahihman in; nidang a ka hih ngeilouh, ann thuk di'n ka kisa a, lehlam ka ngaihtuah chiang in, tangval toupi, ann thuk chih khawng zumhuai ka sa zensam hi. Kuaman hong mukei na'n teh,,, chi'n ann ka thuk hi. Ann nekham ka pa' gam lai hihfel a, Revenue office a hoh di'n akisa a; ka nu ahih leh ka sanggamnu te innlam pha di'n a kisa' hi.
Kei bel pawtkhe thei hilou ka hihman in, ka nu leh pa' pawtkhe di en in, ka tu maimai hi. Ka pa'n ka nu, ka naute innlam a khak masak di'n, a car ah a tuangsak a, huchi'n anih un hon pawtsanta uhi. Bangmah semngaplou ka hihman in, tv khawng en in ka tu maimai a, sun dak 12 lam hong ging in; ka inn kongkhak uh hong kikiiu a, ken leng; "hong lut ua,"chi'n, kuate hi hiam chih le ngaihsak tuanlou in ka thoukhe sese kei hi. Numei aw in, ka pa min lam in, "Pu Mawia (minlem) te inn ahi maw,,,,," chi'n hong dong a, ken leng, "Himah e, nou kua te, bangthu hita ahia,???? ka pa tu'n a pawt lellel a,,,,,,,,,, chi'n, pau zauzau kawm in ka thoukhia hi. Innkong khak lam ka-et phei leh ka kiguih zou hial hi. Kong bul ah; Emily mangbat mel leh gimmel mahmah, kho-ul kai niipniap kawm a ding ka mu a, aman le ahon muhmawk peen, lamdang sa ahi ngei dia, bangmah le gen sunzawm theilou in, kongkhak bul ah ading dedu maimah hi. Innsung lam a luut dia ka nget nung in, bangmah genlou in a hong lut a, atutnang ka kokmuh a, tawldam di'n ka hilh hi.
Emily in,,,,, "natna nei na maw, na om nopmel kei na mahmah e,,,,? Chi'n, ahong pau khia a. Ken leng ka kawng ka suknatdan ka gen a. "Nafel luat ziak eive maw,,,,," chi teng in ahon dawng hi. "Emily,,,,,,,, bangchidan e, tu sun lailai a na hong pawt mawk, ka inn uh bangchia thei e, zanlam na hong hoh dek a lah, ka inn uh tung manlou a hon kiikpih ing a, bangthu poimoh om ahia ? Gimlah na gimmel mahmah ngal a,,,,,," chi'n ka dong zungzung hi. Emily, awl a hong paukhia in, "Aaaaa,,,,Nas, gen di ka haulua, tuni bel nang mu dia hiai inn a hong lut ka hi zenzen kei, hiai inn neitu houpih utna khat ka nei a, huai ziak a hong lut khamawk ka hi. Na inn uh ka thei kei, himahleh hiai inn neitupa min ka thei a, mi ka hon dong zel a, hichia hong tungthei ka hi. Hiai inn neitupa nang pa hi'n teh maw?" chi'n ahon kan zui ngal a. "Himah e, ka pa ahi, bangthu bangla om ahia leh,,,,???". Eh,,,, kidot chi ahi hia hilou chih zaw ka theikei a, na nu leh pa zongkhe dia na gen pen, bang chita e ? Emy, kei lah ka kawng anat ziak a koimah a pottheilou ing a, hilou hileh, tuni lam khawng a hong phak di ka sawm sim hi a. Chi'n a ka dawng hi.
A lungsim a gim ahi chih amel ah haihvual ahikei, "Emily, hon panpih theihna ka nei hia, namel ah lah na lungkham mel mahmah ngal a, lah abaan bangmah na gen sunzawm si kei a,,,," chi-a ka dot leh. "Nas, na ut phot in chu na hon panpih thei mahmah di'n ka gingta, ka nu leh pa zawngkhiak sawm in, buaitak in ka pang hi. Himahleh, ka thiltup ka mualsuah ma'n, buaina ka tuak a, sunzawm theilou in ka om hi. Tua ka hon hohna ziak bel thildang ahi, huai ziak in hiai thu gen leng na hon panpih nak sang in na hon huat ka kigingta. Genkhiak le ngamhuai ka sa kei hial hi. Lah genlou thei ka hihlouh ziak in, bangmah imm lou in ka hon gen dia, nang le hoih tak in ana ngaihkhiak sak inla; hiai thu ziak a na hon huat lele hon haw mai inla, kimelmak na i kaal ah, ahong piang ahih lehle, damsung a kimelma' i hi ta mai di. Tua chiang a lawm hoih a i na kithuahnate le hunkhop ahita thou,,,,deih teelthei ka hinawn kei,,,,," chi'n ahon gen muatmuat hi.
"Emily huaithu khawng gengen lou in, na hong pawtna ziak hon-gen maive, kimelmaak chih khawng bang na hon gen tel ngal a; kou innkuan in na tung a hihkhelh nei ka hi uh maw !! " Nou hihkhelh bangmah omlou ahi; ahih ziak in hiaithu ziak in i ki huah theih ka kigingta nawn kei. Zanlam a ka thilgente na thei lai di'n kon ging, ka tapa Eric leeng inn a hong tungta a; kipak tak a om di ka kisak lai in, ka kigintak louhlam tak in thil a hong tung mawk hi,,,"Eric ziak maw leh" chi'n a thu genlai ka bottah sak a. Ih hi zenzen lou; ka nu damlou ziak a, ka nu kem a enkoltu di, chi-a ka ompih nu uh na thei di maw, aman ka gintaak louh tak in ahon khem a, kei lah inn a om gina' manlou; ahun tam zaw ka nu toh kithuah ahi ua, ka nu mit hong siat tak in, aman remchang a zang in, ka nu ana khem hi. Ka nu'n le thil bangkim huainu kiang a hilhvek ahih ka gingta. Ka tanu Siamte gou tan dia ka pa'n a damlai a ana gelsa, huailai ana lakhia a, ka nu khem in,, huai gam lehkha teng ah ka nu suai ana kaisak hi.
"Huainung lah ka nu'n sawt hon dampih nawnlou zaw mah ahih chiah; amah le ka nu sih nung sawtlou in, ka theihlouh kar in ana taimang hiau hi. Ken bel ka nu a ngai a, ka nu lah om nawnlou ahih chiah, a ompeih nawnlou a, taikhia hi'n teh, chi'n ka ngai pawimoh lawmlawm kei hi. Himahleh, Dawr ah hih di poiimoh tuamtuam hih a ka buai vengvung lai in; papi khat ahong lut a, ken bel customer maimai di ka sak ziak in, ka na ngaihsak lawmlawm kei hi. Himahleh customer ahikei chih ka dawr ngakpih nu'n ahon gen a, kei mu dia hong hoh ahihdan ahon hilh hi. Napa huai laitoh munkhat ah ding ka mu a, kei ahon muh phet in, bangbang hiam gen in; a kinthei lam a ka dawr pawtsan di'n hon gen hi. Lamdang ka sa a; thil omdan bangmah ka theihlouh ziak in, a chiamnuih maimai in ka ngai hial hi. Himahleh napa' mel ah chiamnuih a genlouhdan chiangtak in ka mu a, ka dawr kia hilou; veng dang a ka gam neihsa tengteng leng ahon gen a. Alai toh ahon ensak vek hi.
"Alai peek ah ka nu suai diktak kikai ka mu a; thil hithei himawk lou ahi, chi'n ka theihsiam louh ziak in, na pa'n thil omdan taangpi ahon hilh hi. Na pa'n thil omdan tengteng ahon gentak in ken leng ka ompihnu uh thil hih ahi chih ka theisiam ngal a. Hiai dawr mai hilou, huai gam tengteng neitu ka hi a, ka thu lou in bangmah na hih thei mawk kei di, chi'n ka dawng hi. Himahleh alai ah ka min atuang kei a, ka suai leng a kikai kei. Ka nu ka muang luat ziak in, ka nu damsung chu, ama khut ah om leh ka chih ziak a, bangmah ana buaipih lou ka hihman in, gen di leh pansan di bangmah ka neikei hi. Ahihtheih liai leh, huai gamte zaw nei unla; himahleh ka dawr, ka kingakna, ka neihsun leh, neuchik ka hih apat a ka lunglutna mahmah ahih ziak in, huai beek zaw hon laksak kei le uchi'n, chih hon ngen nuam ka hi." chi'n khase tak in hon gen hi.
Ka phone ka lakhia a, ka pa phone ka sawm ngal hi. Thumvei mahmah ka fone nung in leng ka pa'n a phone pick-up theilou ahih chiah, kei le ka theih tawp a kihalh sak in; Emily ka panpih theihna' omsun, chi'n ka kawngnaa le ngaihtuah nawn selou in; ka pa'n athil buaipih a zohfel ma' nang/dal man sawm in, Revenew office lam zuan in, Emily toh taxi la in,kong kuankheta uhi. A nung ah Emily toh ka tuang uh; chih bel chiang tak in ka thei. Himahleh Emily hikei hen la, midang kuahiam khat hileh chih khawng peuh ka ngaihtuah mawkmawk hi. Ahon het khak zawng in a chi bang aling keuhkeuh mai a. Bangteng hileh; ka pa' ngaihdan ahi hia, hilou chih ka ngaihtuah kei, ka pa' thilhih kikhelsak teitei sawm in, dawite speed a taidi'n driver pa' ka hon nawh hi. Trafic jam kar ah a taihat theih tuan kei, taihaat ut mahleng, hattai theihlouhna atamzaw hi.
Ka houpihnate leng gina' tak in ahon dawng theikei a. Emily, lungkham nang bangmah omlou ahi. Kei ka-om sung, nang panpih dia kimansa gige ka hi. Ka pa'n ka thugen mang nuam kei mahleh, nanglam a pang zel di ka hi,,,,, chi-a huistle ging tuartuar lak ah; kingaihtuah kawm in ka taaizel ua. Ka tup gam uh ka tung ua; motor tuangman ka pia hi. Emily toh ka pa mu di'n office lam ka zuan ngal ua. Office a lut dia kisa a; step ka zuihtouh lai un, ka pa ahih di teng hihzou, step ah hong paisuk toh ka kituak ua; ka pa'n kou gel ahon muh tak in, lamdang sak chi tak in ahon en hi.
"Bang ngaituah a hiai san a hong hoh na hi ua oi ? Nang kawngna sa a, bangmah sem peihlou; bang dia hiai tantan hong pawt na hia oi, hiai nu' toh bangchia hong kimankha zenzen e,,,,,,,,?????? Dotna ngen, dotna ngen, ka dawngseng kei a, dawng masak di pen le ka theikei. Emily hong paukhia a, "Pu, thil omdan bangkim chu na theihsa ahih kha, zan a dawr a na hong hoh lai ua ka thugente mah buaipih dia hong hoh ka hi uh. Ka tanchin bangkim le na theihsa ahi. Kum hiaitan tagah genthei tak a ka na om nung in; ka pasal nu leh pa hoihna ziak in, dingsuah di dinmun in ka hong omta hi. Himahleh hiai bangthil ka tung a hong tungzel ahihman in, kei a di'n damman le om nawnlou in ka ngai hial hi. Nou sungkuan tung ah bangkim a kinga ka hi, chih hon theihsak unla; ka gam uh zaw na deih ua leh na hong piakkik teitei uh ka hon phut ngam kei. Himahleh, ka kingakna omsun, ka dawr bek zaw hon pekiik mahmah mai le-uchi'n chi ka hi" chi'n, office gei ah Emily hong kap hithit maimah hi. Ka kiang ua midang omte'n zong hon en nuam mahmah mai ua; ka pa'n le nuam salou ahi ngei dia. "Bangteng hileh ka inn lam uah i pai kiik phot di ua, thil omdan hoihtak in i genkhawm phot di uh aw Emily. Hiaidan a thil felthei mawklou di ahi. Ken le sum tampi ana sengta ka hihman in; haksa tak a ka na sepna athawn a mang mai di phal samlou ka hi. Bangteng hileh, i pangkhawm dia, hiai, thil diklou tak a hihtu matkhiak sawm in pan i la dia, a thil hihkhel tungtawn a gawtna amuh ngei theih nang in, eigel i pangkhom ngai ahi". Inn lam ah i paikiik phot di uh aw. Emily lungkham ken, chi'n ka pa' car ah ka thum un ka lut ua, ka innlam uh zuan in ka taikheta uhi.
Note:- Hiai tangthu, hiaitan a topsak kisawmta ahi, chih kon genmasa zual hi.Gen sasa himahleh genthak non zel di aw. Part 1 ana simkhalou bang i omkhak zenzen leh. Sial lut nung a sialdai kaih sang in, alutma in daikai le hang.
Hiai thugelh hi, a gelhtu phalna tellou a koimah a laksawn phal ahikei.
EMILY HINKHUA I
Writer's note: [ Phalna la masa lou in, koi group, koi blog, koi magazine mah a laksawn phal ahikei]
BUNG 1
:::::::::::::
THUMAPI :
Mihing te'n mihingte hinkhua mah i sui ngei dia aw ,,,, ! chih khong ka ngaihtuah a, mihampha pipi i om lai in, amah Emily vangtahdan a ana vangtah kha le hiai khovel ah mi tampi a ki -om din ka gingta hi. Hiaithu agen
lai leh, ka gelh lai in leng ka ngaihtuahna apai sau in, vangpha ka hih dan ka kithei a, amah Emily ka ngaihtuah ching in hehpihna'n ka dim hi. A hinkhua a thil tungte leh athil hihte le amah ut ziak hilou in, a mangbat, beidot tawp khawk atun nung a hiaibang a gamtang kha ahi chih ka thei a, amah dinmun ah kei leng om hileng, ama hih sang a nasa in ka hinkhua ka zang ngei di'n ka kigingta.
________________________
Computer dawhkan maa ah tu in, games ka kimawl a, ka mit a kham sim ziak in, ihmut mai ka sawm hi. Ihmu dia ka kisak lai in, "ka online louhna le sawt lawta", chi'n, online di'n ka kisa khonung phing hi. Himahleh ka ihmut hong suak lua ahihman in, ka notification teng ka et zoh in, lup mai ka sawm thak hi. Huchia Log-out dia ka kisak laitak in, massage khat hong lang san velvol mawk hi. "Lamdang na mok e, kuan hon inbox a tam aw,,,,"! Chia kingaihtuah kawm in, ka massage open ka sawm hi. Net hatlouh ziak in ka open pah thei kei a, minute 5 vel ka ngak nung in ka hon sim thei pan hi.
F ~ "Hallow **** damzel maw? Buai thei lua maw? Tulai, na tangthu gelh sim di om nawnlou in chin chimhuai thei lua. (khaih kei thugelh maimai, a sangsiat theih theih maizen toh, ana simsak zel hi di-ei ve chi'n, ka nui tret tret hi).
M ~ Pathian ompihna tang in ka damzel, nang la,,,, damzel maw? Tangthu gelh di le kithei zoulou hi veh aw, mite bang a siam lah kihilou a, hun mahmah le kineilou hi veh aw. Ka thugelhte, a sangsiat theih theih toh, nawn hem phatna ah ka kipak lua.
F ~ Eh ! Sangsia chimawk kei ve, kei chu na thugelhte ka simnop zong ngen ahi, paukam kulmut tak zat sawm tuan het ken aw, tua na gelh dan a, paukam tual-leng khong zang a thugelh mah sim nuam ka sa.
M ~ Ahi maw, paukam kulmut zang ut leng le siamlou ihih chia, i siam dandan a gelh zel mai ngai ahi. Nang le na hon gelh zel kei dia, midangte gelh simsim lou in hahahaha
F ~ Gelh chu utlua ing a, hilehle paukam kisiam lou lua in chin, post ngamlou, den chiah mite nuihzabuk khong i suak di chih lauhuai ka sa a, gelhsa chu ka nei aka.
M ~ Eh! Zum nang bangmah omlou pi, siamlouh dan dan a hih di hang a, mite phazou kei mah leng kal nih khat bek a chu maa kisawn mai di eivoi, hon post pah ou, ka sim ut gopta.
F ~ Ka post ngam mahmah kei, nang ana post sak mai ve, huaichiah a thu le edit ngai tamsim maithei.
M ~ Nang post lechin hoih zaw lou di hia ! A hih kei leh na Password leh na E-mail hon hilh le chin, nang Account ah ka na post mai kei dia.
F ~ Ka password zaw kon hilh hial dah mai di (hon hilh le chin le, bangchi mah a na Account khoih hetlou di kei ve, huchi bang lungsim nei dia hon ngai na hi di maw ?!) nang post dan in ana bawl maive maw !
M ~ Ole, poikei nang chih dandan ahimai, ahih ziak in ka edit dandan a na lung kim ngai di ahi aw. hahaha
F ~ hahaha Zuau na hel kei phot leh heh lou e, ka thugelh chu kon khak di.
M ~ Eh,,,,,,,,,paukam mahmah in kihou thei leng ut huai ka sa, na omna hon hilh le chin, ka hun remchang masa penpen ah, kon pawt zaw mai diam?
F ~ Poilou, nang hun na neih theih di nak leh. (A veng uh a hon hilh a, a phone No. a hon pia a, ka hoh theih hun a phone mai di'n a hon gen hi)
Ka Pa'n, ka sep di tuamtuam gen in, office kai di'n hon kuansan nung in, tutphah tung a tu in ka kingaihtuah neuhneuh a.,,,,, Tuni Emily te inn va kizongsuah henla, amah hon ngetna bang in atanchin tamlou va kidong leh, chi'n, zing ann nekham, ka Pa'n sep di hon hilhte semlou in, inn apat in ka kikhalh khia hi. Phone apat in ka kan zel a, a veng uh agen-na ka tung in, ka phone thak nawn hi. A hon hilh dan a pai zel in, step sausim tak ka zuih nung in, Numei khat, lian lampang, ngoulua lah hilou, vom lua a gen di lah hilou ka galmuh a, akiang ah "hiai lak vel ah Emily kichi, amah kia a teng na theikha hia"? Chi'n ka dong a, nui seisai kawm in, "**** na hi maw? Na mi zawn kei ka hi, hong lut ou" chi'n a inn uah ka kizuilut uhi.
Innsung ka lut phet in, lamdang ka sak mahmah ka mu ngal hi. Inn neuchik himahleh innsung van kirepfel dan khong ka mu a, zuntha dia bath room ka lut nawn leh bathroom leng a felfai mahmah mai a, ka lungsim in "hiai nu mi kizen mahmah khat eive chi'n ka ngaihtuah neuh neuh a, ka potkhia, bangbang hiam gen a ka kihou nung un. "Nong potna a gamla si a, singpi kon lum di o" chi'n singpi a hon aw-m a, a gam tatdan ka et chiang in mifel leh kizen mahmah khat ahi chih ka thei hi. Vuah hong zu a, ka thugente uh kiza gina thelou ahihman in kinaih tak in ka tu ua, akisil zouphet chu a hi ngei dia, gim a namtui in, a sam kot niangniang, tang silsel zomah te'n, ka mihing hinna ahon langsak phial hi'n ka thei mai hi. Kinaichik a tu kawm in aman a tanchin a hon gen panta hi;
September 19 (khovel a Ni teng teng lak a, kei a dia Ni danglam leh Ni mulkimhuai ni pen).19** in khovel haksatna leh lungkhamna zang ding in, Aizawl Civil Damdawi inn ah, khovel vak ka hon mu hi. Khovel hiai bang a kei a dia lungziin huai di saleng zaw hiai khovel ah ka piang hetkei di, ahih ziakin huai hunlai in sia-le-pha bangmah ka theih louh ziak in, khovel in kei a dia kipahna hong tun theih lamen in, ka nu'n duat tak in, a gilsung ah ana paai lian hi. Ahihziak in sia-le-pha ka theih nung in ka nu-le-pa itna himhim ka mukha kei hi. Phet lou in, pi-le-pu, sungkhat laina it-tu di himhim mulou in, ka khovel ka zang tou beuh beuh hi.
Kum thum (3) mi lel ka hih in ka nu-le-pa ana kikhen ua, ka nu'n Pasal dang nei in, mundang ah a om khia a, ka pa'n leng sawtlou nung in zi dang nei in, ana inn tuan khia hi. Tagah ka hihman in, ka Pa sungte'n leng hon hih duhdah mahmah ua, Naupang kum 5 lel himah leng piching nnasep bang bang hon semsak ua, Kum 8 ka hih tanpha in school leng kailou in, inn ah nasem in ka om mai zel hi. School kai thei vual ka hih bang in ka lungsim a nna in, ka vualte ka eng thei mahmah mai a, ka nasep dite ka sepkhit chiang in, ka potkhia a, ka lawmte school kai na lam ah ka vahoh zel a, school kiang gamnuai ah, ka lawmte laisim ging leh a kimawl khong uh en in ka tumai zel hi.
Huchia ka omdante, ka sungte'n a hon theihkhia ua, school hon kaisak nak sang in, ka gentheih na behlap tumai ana hi zaw mah lai hi. Genthei kisa lua ka hihman in, ka Pa U numei (ka Ni chih di ahi di chu) pasal neitate inn lam a om di'n kei thu in ka paikhia a, amau school khong hon kaisak ua, ahihziak in, ahaksat dan bel a kikiamtuan kei hi. Niteng in "mahni inn a le om peihlou, na thadah ziak, hiai nana hih di, hiai le.........."chih ka zak gige te khong ka ngaihtuah chiang in, huai hunlai a kei bang vual di naupang ka muh chiang in lainatna in ka pumdim zouhial lai hi.
Kei a di'n Pathian min loh le kisuanlah huai mah leh, Pathian kepna leh vualzawlna tang in, Kum 14 ka hih in Class 7 ka Pass a, Kum 14 sung vengveng nam-mang in ka om hi. Paite ka hih lam himhim ka kithei kei a, huai phet lou in, Paite pau malkhat leng ka thei kei a, ka lawmte toh, pau dang zangte nuihsan a, musit tak a ka om chang un leng, a uang pen in ka na pang gige zaw mah hi. Ka kimohsa kei, aziak bel, Paite ka hih lam kua mah hon hilhtu di a om kei a, Paite pau zat nang himhim omlou ahih ziak ahi.
Class 7 ka pass kum in, mikhual ka nei ua, huaite ahihleh kua dang hilou in, ka Nu Unau (ka Pu) te, kei hong mudia hong hoh ahi ua, ken leng amau ka muhtung in ngaina theipah kei mah leng, Ni 3 tan a om nung un chu ka ngaina in, a kiang ngen uah ka om hi. Ka Pu in, "kou omna lam ah na hong hoh ut leh hon thuaithei di ka hi uh, na Ni te'n hon phalkei mah le uh, nang "ka ut" chi le chin hon phallou ngamlou di uh ahi" a hon chi a, kei leng ka ut lamtak ahih ziak in, ka Ni te'n hon phal lou sim mah le uh, ka Pute kholam Lamka zuan in ka paikhia uhi.
Ka school kai nang khong hon buaipih sak ua, " calss 8 di himah le chin zirlai bu a kibatlouh toh" chi'n class 6 ah hon lutsak thak ua, a tunglam in, lelsim mah leng laisim nang hun tampi nei ka hihman in, vual phalou lua in ka om kei a, Kum 20 ka hih in +2 ka zou a, Pathian hehpihna tang in, BA zou in, hiailam ah ka hong kik hi. "Ka tanchin gen di atam mahmah a, na ning ahihleh non hilh mai di aw" chi'n kei lam en in hong nui seihsaih hi. Ken bel, "Ning zenzen lou e, na gen peih tantan ngaikhe peih ka hi. Huaithu ngai dia hong hoh kei voi" chi'n ka dawng hi.
Ka Pu te khua Lamka ka tung ua, a hon duat un, tangnel tak in omthei mah leng apau uh bangmah theilou ka hihman in, ka tangnel di bang in le ka tangnel thei zok kei a, kei le ka theitawp a kizir in, kumkhat ka om nung in, ka ut dandan in, ka zangtheita hi. Ka inn kiang uah, sungkuan khat, a pa uh, Politician, hausa mahmah a teng ua, amau toh leng inkuan khat bangmai in ka om ua, ahihziak in, ka khosakna uh a kikhiak luat ziak in, amau innlam ah ka tangnel thei hetkei hi. Ahihziak in a Tapa uh bel a ut-le-dah in kou inn ah hong khosa zel hi.
Lungsim ah naupang kisa mah leng, ka innvengte tapa pa'n nungak chei a hong chei sek ahihman in, alou theilou in, lengla tutpih chihkhong ka hih a ngai a, amah le Saptuam, Tuailai pawl khong a kizang, Gospel mahmah (alat dan in) ahihman in, ka pu te'n le hon hal lawmlawm lou un ka thei hi.
Ka hunluite ka ngaihtuah kik chiang in, tua ka omdan pen nuam ka sa a, kei leng ka hlim thei mahmah mai hi, ka pu te ahih leh gentheitak, nektom zong a khosa mai ahi ua himahleh, Aizawl a a ka sungte, khaloh tampi pi la te sang in ka kithutuak zaw ua, inkuan kipak tak leng ka hi zaw ua, ka gentheihna un, a hon kipumkhat sak hi'n ka thei hial hi.
"Piching ki hi ta a, sungte chawmsa a om om hoih kei" chi'n nasepa, sum tamlou khong laklut theih khak leh chi'n, sep di zong in ka buai thei mahmah mai hi. Huchih lai in, nikhat vangphat huai tak mai in, Dawr ngak di ka mu a, kei leng phur tak in innlam ah ka paikik a, ka sungte ka hilh ngal hi. Amau leng "sep di mu na hih leh, a thupi hi'n thupi lou himahleh, ginom tak in na sem di" a hon chi ua, a zingchiang in kei leng Dawr ngak a kiloh di'n ka sempan ngal hi.
Ka lohsuah sunsun, ka sungte ka pevek zel a, innkuan poimoh tuamtuam lei nang in ka zang ua, neukhah in ka khosak na uh leng adan omdeuh hi'n ka thei a, ka kipak a, nuam leng ka sa mahmah hi. Nikhat Dawr van hong tung ziak in, Dawr ka khak khit nung in, innsung lam ah, hih di tuamtuam te hih in, ka buai mahmah mai hi. Ka hih di bangbang hih khin a ka potkhiak leh, khua leng ana mial mahmah ta a, Ka Dawr ngakna leh ka inn uh kigamla lua ahihman in, "khe in pai leng tunghak law mahmah di ka hi,,,,", chih ka kithei a, ka Dawr ngak na kiang a Dawr ngak thou in a Scooty a hon khelsak hi. Kei leng kipak tak in innlam zuan in ka taipah ngal a, saulou khah ka tai nung in, ka maa ah, pasal khat akhe bai laihlaih apai ka mu a, a kiang ka tu'n in, ka khol a, a painang lam ka dot leh, kei painang toh kibang ahihman in, chi'n ka inn tan uh hong tuang tei di'n ka chial hi. Himahleh amah pen ka theih ngei mi ahihlouh ziak in, ka ngaihpen apha vak kei hi.
Inn ka tungnang a sawt tai le ngai nawnlou, khe in pai leng le, minutes 10 in chu inn ka tung man himhim di, chihkhong a gamla ka tun in, kei lam manawh in, car khat hatsim tak in a hong tai a, kei bel lampi a siat luat ziak in ka taihat thei tuan kei a, ka kiang nai a hong tu'n in, hong hat tai lua, lampi lah sia ahihman in, kei taina (side) lam ah wrongside in hong tai a, ken leng lampi nawl thei bangpen ah ka na awn hi. Himahleh lampi selua ahihman in, kei lam ah neukhah a hon cut phei leh, a nunglam in, ka scooty a hon hetpuk hi. Olchik a kipuk himah le-ung, ka khe a hon delhkhak ziak in ka thou thei kei a, ka nung a tuang, khebai pa ahihleh bangmah liamna le neilou ahi dia, a thou a, bangmah genlou in a hon paikhiak san hi. Lamdang ka sa a, "ken khebai chia, ka hehpih ziak a, a thawn a pua ing a, Vangsiatna ka tuah a le hon ngaihsak lou" chi'n ka heh mahmah mai hi. A hon delhna pen nalua hikei mahleh, thohtouh ka sawm chiang in ka thou zou kei a, panpihtu khat lel om lele olsam tak a thou tou thei mai di hing a.
Khebai pa'n hon paisan pen thutuam hi leh, car a hon hetpai tu'n leng a hon ngaihsak hetkei lai hi. Ka kipuk uh a hon mu a, "parking nang omlou ziak a taisuak a, denchiah hong buaipih na'n teh" chi'n ken leng ka na ngak mai hi. Ahihziak in, minutes 5 khong ka ngak nung in leng a mel muh di himhim a omkei a, "bang nachi a, a na hia ? Chia kamsiam bek in hon gen leh a kilawm lai a, wrong side atai hizomah lai, kamkhat lel a le ngaihdam le hon ngen lou" chi'n ka heh mahmah zel hi.
Keimah a ding thei vual ka hih louh man in leilak ah ka lum top a, "kuahiam khat hong pai na ve" chi'n lamen tak in ka ngak top hi. Mi hong pau ging neuhneuh ka za a, kintak in, ka en phei a, kikhom tawp innlam zuan ana hi ua, "hiai te zaw hon panpih di'n ka ngenta ngei ngei di", chi'n lamen tak in, ka na en hi. Gamla lou chik hong tu'n tak un, mikhat in agal apat in ahon mu a, kei hong panpih dia hong taiphei a sawm leh, alak ua khat, upa lam sim mel pu khat in, "huai zukham, omhoih utlou khong, panpih khemkhem ngaikei" achih ka za a, ka et thak leh, kei panpih sawm a, hong tai pen le ka munawn kei a, lampi dang ah a hon pial khiak san uhi.
Ka khe a hon delh khakna pen na lua hikei mah leh, ka kipuk nung, leilak a ka lupna sawt lawta ahihman in, votsa in ka taksa ahong ling hial a, panpihtu di ka zong chiang in lah kuamah muh di himhim a om kei ua, beidong tak a ka omlai in, puan-ak angkilh le kilh lou, nin anin zawmah, pasal khat kei lam zuan a hong pai ka mua a, ka kiang hong tun in, ka mai zul chit ah hong en a, a gim a pat in zukham ahi chih ka thei pah hi. Aman panpih ngai ka hi chih thei in, ka scooty ahong phong a, kei leng olsam tak in ka thou khe thei hi. Kipak lua ka hih man in, ka sum neih sunsun cheng 100 ka phorh khia a, piak ka sawm leh a la ut het kei a, ka piak teitei lele alak ut tuanlouh ziak in, ka pelui ut kei a, "ahihleh na inn tan uh kong kha di" ka chih lele a ut tuan louh ziak in, a Phone Number ka ngen a, ka lak khit nung in, innlam zuan in ka taikhia a, zukham pentak in hong panpih kha, chih ka ngaihtuah chiang in lamdang ka sa a, ka ngaituah den hi.
Ka lungsim in, " hon panpih tupa kiang ah, kipahthu gen nang in, bang-hiam ka hihsak ngai ahi" chi'n ka ngaihtuah a. "Himahleh, thil ka hihsak phut hileh, huai zan a cheng 100 ka piak le hon laksak di hi a, huaisang in hun remchang ah, restaurant ah nektheih ka treat zaw mai di" chi'n thupuukna ka bawl zaw ta hi. Ka Dawr ngakna abuai theilua ka hih man in, hun remchang ka nei thei kei a, ka Dawr ngak louh ni, ka man ni te lah Band ni hi zel, Band ni a lah restaurant te le kihong boksi lou ua, Khakhat lam mahmah liamta ahihman in, ahon mangngilh man di chih ka lau gu mahmah mai hi.
Nikhat, ka dawr ngakna neitute'n innkuan vai ah banghiam hih di aneih ziak un, kei leng Dawr hong lou a, om tawldam di'n a hon hilh ua, ken leng hun remchang sa in, huai Tangval pa ka phone pah ngal a, kimuh nang hilh in, an nekham kimu di'n, thupukna ka bawlta uhi. Kei ka tung masa zaw a, sawtlou ka ngak nung in, a hong tung a, ka ngaihdan mai mai in chu, "nalh lua hikei mahleh, neukhah bek a hong frest deuh di'n ka na gingta hi. Himahleh ka accident zan a a van ak tengmah aa in, ka kiang ah hong tu a, huihnung zong in leng a gim hong nam hamham zel hi.
Nektheih a duhzong khong dong in, a gente ka order a, bang bang hiam gen in ka houlum u hi. Ken leng huai zan a a hon panpih ziak in ka siam bang bang in kipahthu ka gen-a, Dawr apat a ka paikhiak, aman a hon panpih maa a ka thil muh leh theihte khong ka gen a, aman le lamdang sakmel tak in hon en hi. "Nang hon panpihlou hilechin, kei, keimah alah thou theilou ka hih chia, kipak lua ka hi, sep di poimoh khong na neih khak leh", chi'n mahni innlam chiat ah ka kikhen nawn uhi.
Ka accident ziak in bangmah khonung a gen di natna ka nei kei a, ka Dawr ngakna leng hoihtak in ka sunzom thei zel hi, himahleh ka period (numei te khabi) hong hih dek chiang in ka khua khong hong sik a, lupna ngak a damlou hial hikei mah leng ka ngaih aphat louh ziak in, nikhat ka Pu lak ah Doctor ki check up sak ka ut thu ka gen hi. Ka Pu'n le, "zingchiang sunma in va ki ensak inla, sun-nung in Dawr na hong mai di" chi'n, ka ngetna theisiam tak in hon pomsak a, kei leng ka kipak mahmah hi.
Zingkar ann nekham baihtak in damdawi inlam zuan in ka kuan khia a, Receiption room ka naih pah a, card lasuah in ka ki entry ngal hi. Ka maa ah mi 3 chouh a om ua, kei leng sun-nung lam Dawr ngakman a tungkik dia ka kigintak ziak in ka lungsim a nuam mahmah hi. Sawt kuam tak ka ngak nung un leng Doctor a hong tung thei kei a, ka lungsim a kinoh sim ziak in Doctor hong tung hun di mi vadot ka sawm hi. Meltheih ka neih louh ziak in, ka tawpkik thak hi. Himahleh Dak 11 lam gingta, "tutan hong kuanlou ahihleh ka maa a mi 3 om zawmah lai, ka nasepna ka Pu chih hun in kuan theikei leng hoihlou di" chi'n ka kiang a Nupi khat kiang ah, Doctor hong tung hun di ka dong hi. "Nidang bang hileh zaw a hong tung hunta hi a; ki-ensak atam sim ua, hong zekai hi'n teh" chi'n hon dawng hi. A dawnna theisiamlou ka hih man in, "ki ensak di te lah hiai ah i omvek ua, koi a, kuate a ki-ensak na chih te "? Ka chih leh, "Tulai Doctor hiai a semte'n innlam ah Dawr khong bawl in, hahpan mahmah ve uh aw, a hitak in gen leng, a office louh hun-ol kar a, sum muh nang chia a hong uh zaw hi'n teh, hilehle customer a tam chiang ua, huailam mah ngai pomoh zaw zel uhi. En le sum kinei leh huailam mah kinaih di hia ! Sum i neihlouh ziak a, hong kuan di leh kuan louh di theiloupi a ana kingak mai mah ahi" chi'n hon dawng nawn a, bangdang genlou in kei le ka Dawr hong man louh khak lau in, ka Dawr lam ah ka paisuak ngal hi.
BUNG 2 NA
:::::::::::::::::
Pathian ompihna in, ka hoih tou zel a, ka kisoiselna te le damdawi bangmah hihlouh in hong hoih tou zel hi. Ka Dawr ngakna a buaitheilua ka hih man in, nitak ann nekhin ka lum a, zing ann nekham ka nna ah ka diang ngal zel a, lawm leh vual polh nang hun himhim ka neithei kei hi. Himahleh ka nasep ah ka lunglut ziak in ka kipak in nuam ka sathei mahmah thou hi. September Ni 18, nitak ka lupdek in sms ka dong a, ka et leh, ka innkiangte tangval pa'n. "Zingchiang na Birthday kon loppih di, sumseng ngai tengteng ken ka tum vek di", chi'n sms hon khak mawk hi. Ka lungsim kipak mah leh, lamdang ka sa a, ka nna kholsan ngai di ahih le chu hitheilou di hi a, lah ka pian nung Kum hiaizah paita a, khatvei mah le ka Birthday lawm kha nailou, chi'n sawt simtak ka kingaituah nung in, "a kipah huailua, huai na gen vuak le, kei ka dawr ngakna a kuan ngai teitei di, khol ngenmun lua ka hih chia, kei adia kisuanlah huai ahi", chi a ka reply leh, "ahih di kul-le-poimoh omte ken ka na hihvek mai dia, nitak chiang in i lawm mai ke", chi in hon thawn/khak nawn hi."Kei Birthday lawm di maimai kiphal na lawm lawm e, ka Pian ni ka gen-na a sawt taktak maizen toh, ana theilai dan ahi maw"! Bang teng hileh "zingkal in genkhom thak ni maw. Mangpha hoihtak aw"! "Nang le Mangpha hoih lua Bye !!
Zingkal in ka inn ua hong pawt a, nidang a le hong pawt gige ahih ziak in ahi di mah in ka koih hi. Himahleh ka gintak louh tak in, "Emily Birtday, lawmte toh lop sawm ing ua, na phalna lou un lah bangmah aman gen ngamlou ahih chiah, ken hon ngetsak kei ve", chi'n ka Pu te kiang ah hon gen mawk hi. "Tulai khovel zaw, pilvang tak a zatkan omlou eive, thil houchik a minsiat theih, i mualphounate'n lah damsung daih thei zaw mah, ahih ziak in nang na tel theih di le zaw phallouh hial zaw omkei", chi'n ka Pu'n a dawng hi.
Ann ka nek lai un, ka Pu'n "na vahoh di ua, sawtpi nong om kei di uh, ahihziak in sunlam na nna zaw kholsan kei le chi'n", a hon chi a, ken leng, ka khol louh di thu leh, zansawt omlou di chi'n ka dawng hi. Ahitak in chu Umuan ziak in, Saptuam ah Tuailai pawl bang kholkhol ah ka tangnel phah a, amah ziak in lawm leh vual lak ah leng tangnel tak in ka omthei hi. Huaiziak in a guuk tak in zahtak huai ka sa a, amah lah mi hausa tapa, lawm leh vual lak a le mite tung et, saptuam lam chi leng lah, kizang mahmah, tuailai pawl khong ah OB a telpha chiang ahih toh, muang in ka muang petmah hi.
Nitak lam hong hi a, "Umuan, innlam hong phalou in, Birthday lop nang na chihna mun ah kong pai ngal mai di, koilak a"? Chi a ka text leh, aman a Motor a hong thuai thei di chi'n, dawr ah ana ngak di'n hon hilh hi. Hichi tel a kei a dia a kipiak zoh mok lamdang ka sa tawpthei kei a, ka ngaihtuahna apaisau mahmah mai hi. Amah ziak in, leh ka Pu te inkuan ziak in ka hunlui, haksatna tampi ka tuahte ka mangngilh a, amaute ziak in, ka neulai a genthei tak a hon koihtute lak a phuba lak utna lungsim ka neih teng leng a beizou hial hi. Horn hong ging a, inkong a ka vadak-khiak leh Umuan a pa car sung a tu ka mu a, ka mitkha in, a kiang a tu dan khong in ka kimu hi. Ka liangkou ah hong beng thepthep kawm in, "Emily bang ngaihtuah e, lungkim louhna nei maw? Hon chi a, ka halh guih a, ka etleh amit leh ka mit chiangtak in hong kituak kha a, mundang en in, "hong tungbaih na chia Umuan, ka dawr kon khak di aw", chi'n ka dingkhia hi.
Inntung lam kaltouhna leilawn ka lak-khiak na lam ah, ka khut bang ka hih naa zawmah hi. Kongkhak keikia a kai niam zoulou ka hih man in, Umuan in hong kaih pih a, Tala a kalh in, a chahbi le Umuan ka kemsak hial hi. Motor sung ah lut in, bang bang hiam gen in ka tai zel ua, inn lianlou khah, atuam sim a om kawng ah ahon kholpih hi. Huai inn ahih leh Umuan in ka birthday lopnang chia Hotel room khat ana booking na ahia, asung ah ka lut ua, room sung lam ka zuan ngal ua, kei gintak dan in, lawmte mi tampi ana omta di ua, bang bang hiam hih a ana buai vingveng di-uh ka sak lai in, kuamah midang himhim muh di a om kei ua, "bang chi dan a hon lop-pih sawm ai dia aw,,,,,,,,"! chi'n ka na buai gu mah mah hi.
"Umuan lawmte kuamah lah omlou ua, hong tel om di hia omlou di, eigel kia a zaw.................." ka chih leh Umuan in "hong tel om mah ke, lungkham keive, hong tung phialta un teh", chi'n in konglam ah hon pawtkhiak san hi. Keikia in room ah ka om a, table tung a cake nalh deuhmai a ki design khong, a kiang kimvel teng a candle (bati) kitungte khong leh, pak nalh taktak te ka muh in, ka lungsim hon khoih mahmah mai hi. "Kei tagah, nu leh pa chi a gen di le neilou, genthei zawmah, kei Birthday lop nang chi a bangdia hiai bang tengteng buaipih a sum tampi seng ahi dia aw, na Birthday lop nang chi'n sweet tangkhat lel hon pe lele kei a dia manphalua hia", chia ka ngaihtuah lai in, Umuan hong lut nawn hi.
"Nang a Birthday neitu pen, bangchi e, lungkim chikei na chia, hehna nei maw", ahon chi a, "Ih, nei zenzen lou..........." chi a ka dak-khiak leh ana nui seisai hi. "Emi, lawmte ka Phone leh manlou di chi pawl toh, dak 9 lam a man pan di chipawl toh, bang i chi dia le, na Pu'n lah paihaklou dia hon chi zawmah a", Umuan, nang ngaih dandan", light hong mit a, room sung mial-lua ahihman in, Umuan ka bohphei a, aman le hon na pawm in, khomial nuai ah, ka muk ah hon tawp hi. "Ka hihkhelh ahi , Umuan, hiaite hih louh di ahi, lingt hong mit leh ka lau lua a", chia paikhiak ka sawm leh hon lenkip lua ahihman in ka paikhe thei kei a, ka muk ah khatvei hon tawp nawn hi. "Zu gim hong nam na chia U muan, zu dawn maw"? light leng hon vak nawn kuau hi.
"Zu chu dawnlou, khua a lum lua a, beer ka va hih cheuh a" chi' hon dawng hi. Duh maw "? hon chi a. "Ih , duhlou, nang le dawn nawn het ken aw, Umuan, hoihlou ahi; Saptuam khong bang a kizang zawmah chin a" ka chih leh, "Saptuam a kizat ziak a a poina omlou pi. Mu hihlouh le hilou a, tuzan khong chu, hih cheuh lele poilou hilou maw, nang le tamlou hih ve", chi'n a bag a beer bottle hon lakhia hi. Kei a dia a kipiakzawhna leh a kiphalnate ka ngaihtuah a, a lungkim louh di ka lauh ziak in, nou khat ka dawn a, aman bel bottle 2 lam dawn bei hi. A beer dawn kawm in, "lawmte le hong hoh lou di-uh hita'n teh. A na patsan mai ni maw"! Chi'n candle hon hal a, beer khong dawn in, amah le hong pau ut panta hi. Kei bangmah dawnlou a ka ompen, nuam salou in, inkong ah Pepsi bottle khat a kihongsa in hon tawilut a, ka dawn di'n hon pia hi. Zu hel ahihlam theilou in ken leng a kimkhat mahmah ka dawn a, candle mutmit din hon sawl a, ka mutmit khit vek nung in, cake hon cut a HAPPY BIRTHDAY TO YOU chih laa sa kawm in ka kam ah hon guang lut hi.
Aman beer a dawn a, ken Pepsi ka dawn a, bang bang hiam gen a ka omlai un, ka lung hong am mawk hi. Bangkim ka thei a, himahleh bangmah hihthei ka nei kei, ka khanlawh in, lupna khat ah ka na lumkhawm ua, zinglam Dak 1 ana pelta ahihman in, innlam zuan in kong pai ua, ka tung a Ka Umuan thil hih ka thei a, himahleh bangmah gen ngamlou ka hih man in, a theilou dandan in ka om maimah hi.
Kha 3 khong hong kivei tak in, Naupai ka hih lam iim vual louh a hong langkhe di ahihman in, ken leng lin kawm pipi'n ka Umuan kiang ah ka hilh hi. "Poilou pi, i kiteng dia himai" chih paukam za dia ka kilamet mahmah lai in, ka lametna leh a hon dawnna, lei leh van kigamlat bang in a kigamla hi. A khen chiang in "kei ka hi kei, midang hi'n teh" a chi a, a khen chiang in, "damdawi zang in hih ke mai aw" a hon chi hi. Ka lungkham mahmah mai a, kei tagah, Nu leh Pa le neilou, hon hehpih ziak ua ka Pu te kiang a om mai hi'ng a, ka tung a thiltung theihsiam haksa ka sa petmah hi.
Ka Umuan in kiteng mai ni hon chi leh bel lungkham nang bangmah a omkei dia, kipak tak in nupa ka hi ding ua, himahleh ka Umuan in lah, hon neih himhim a sawm kei a, "Saptuam a ahihnate khong gen in, nikhat ka kiang ah nau suke ding in nget petmah in hong ngen hi. "Pathian in nupa hihmaa a thil hih louh dia a deih pen hihkha ing a, huai ka hihkhelh le khok salou a, tualthat tu hih zokmah lai di" chih khong ka ngaithuah chiang in thil hithei hilou chih ka thei a, ka tuhgah hangsan tak a aat ngam ding in ka lungsim ka bolfel a, ka Umuan kiang ah, "na ut leh hon kitenpih inla, na ut leh hon kitengpih ken la, huai chu nang thu ahi. Ahih ziak in, thilkhat, nau suk-kiak chih pen hihlou himhim di ka hih man in, vuaikhat mah le suke di'n hong ngen nawn ken la, hon nei ngamlou na hih leh, ken zawlta ka pom dia, nang le zawlgai hi veve thou na hi" ka chih leh, "Emi hehpih tak in ka dinmun hon theihsiam pih inla, naungek na hihke nuamlou ahih lele, kei zaw hon gentel hetken aw, ahih kei leh na naupai hong kilat khiak ma'n mundang ah hon paikhiak san mai le chin chih kon ngen" a hon chi hi. Ken le "Aw le ahoih e, kei hon ngetna bangmah na hon pomsak louh lai a, nang ngetna kei hon pomsak dia deih nei ve maw, na angmasial dan lawmlawm, thil hithei lou ahi. Ka mualphou bang in nang le na mualphou thou di ahi. Hiai lei ah, mihingte lak ah iimthei mah lechin Pathian kiang a immthei tuanlou di na hi" chi'n ka dong hi. Aman le lungtangpha honsa ahi dia, paulou in hon paikhiak san hi.
Ka sungte hilhkei leng a hon theihkhiat hun uh om thou thou di ahihman in, ka Pi Man kiang ah, ka tung a thiltungte, ka Umuan in hon kitengpih a utlouh dante leh, nau suke dia ahon sawl dante, a vek in ka hilh a, aman bel ahon theisiam mahmah mai a, "nungak hi chi'n ua, khatvel tatkhelh ziak a thil omthei mah hi. Nau suk-kiak khong ngai zenzen lou, ahih ziak in, hiailam mite khosakdan nang le na thei di'n kon gingta. Pasal neilou a nau pom chih khong kuaman mi muhlou uh ahia, huaiziak in nang le thil bangkim nathuak ngai di ahi. Bangteng hileh na Pu le i hilh ngai di ahi. A ziak bel tu'n hilhkei mawk leng denchiah ahon theihsuah hun om thou dia, nang a dia haksa zaw di ahi. Nitak lupna ah ka na hilh di" chi'n hon dawng hi.
Ka Pi paukam in a hon khamuan mahmai a, ahihziak in ka Pu'n thei leh bang a hon chih dia aw, chih ngaihtuah in ka lungsim a buai mahmah mai hi. Lungsim buaitak a lupna tung a ka kingaituah lai in, ka Pu'n hon sam a, a room uah ka vapai ngal hi. "Nang mihing nu zaktalou maw, (a hon taina te paukam hoihlou ngen a hon tai ahihman in, a genkhiak leng nuam ka sa kei hial hi) a ut tawk a hon tai khit in, innsung apat in hon hawlkhia a, ka Pi'n khouh chih petmah in khou mah leh, talou ahihman in, kei leng thumang tak in, ka potkhia a, "koilam manawh di, kua vabel di ka hia, genthei tak a ana khanglian ing a, tua ka gentheihna te'n hon paisanta, nuamsa a omdek pan a ka kingaih lai in, ka gentheihna kipan dekphet ana hidan eive" chi'n khase tak in ka kap maimah hi.
BUNG 3 NA
:::::::::::::::::
Kap kawm a innkong lam a paikhiak ka sawm leh, ka pi leh a tanu Momoi in ka potkhiak di phallou in hon dang uhi. Momoi ahihleh kei sang in Kum 1 lel a naupang a hia, unau dan a le ki-en lou in, khanvual polh in ka kipawl zel ua, a sia apha kihilh in ka hlim thei mahmah mai uhi. "U Kim (Momoi hon sapdan) koimah ah na potkhe thei kei, ka Pa kiang ah khatvei bek ngaihdam ngen le chin, hon ngaidam di eive, na paikhiak di leh ken le kon zui di" chi'n hong kap hi. Ka Pu ngaihdan hong hi nawnlou chu ahi dia, room apat hong pawtkhia in, "nou tegel le hawlkhiak ut umaw,,,,,,,,! kintak in innsung ah hong lutsan ua,,,,,,,," ch'n hong hang phunphun hi. Ka Pi'n bel a pasal zahtak siam mahmah ahih ziak in, innsung lam ah alut kawm in, "Emi, mangpha, damtak in", chi'n mangpha hon khak a, Momoi ahih leh innsung a lut dia ka sawl nung in leng a lut nuam het kei hi. A tawp in ka Pu in aban ah kai in hon kai lut a, kei leng manoh nang lam theilou in inkong ah ka pawtkhia hi.
"December phalbi khovot nuai ah, mi varandah khong a giah di chih ka ngaihtuah chiang in, nidang in genthei ka na kisa sek na a, hiai ka'n-a gentheih huai khovel ah om tuan dia hia,,,,,,,,,? Kuamah mohsak di ka nei kei. Ka hihkhelh ahia, ka gilsung a naungek om, sawtlou chik nung a mihing hong suak mai di ngaihtuah in, amah adia haksa chiteng ka thuak ngai ahi,,,,,,,,,,". Chi'n ka lungsim ka khauhsak a, a zankhat nang in, phalbi khovot nuai ah mi Varandah ah ka giak hi.
Umuan tanchin ka theih ut ziak in, Momoi kiang ah Phone in ka dong zel a. Amah ziak a haksatna chiteng thuak a, inn-le-lou, innten nang neilou a ka omlai in, Ka Umuan ahihleh, a omdan kilamdan na himhim anei kei a, a nu-le-pa'n leng bangmah in a ngai kei ua, "zawlgaitu" ahi chih mite'n thei mah le-uh, aman "ka hi kei" achih chiang in, a nu-le-pa'n leng amah gen mah gingta in, Saptuamte natan in, gawtna bangmah pelou in, a hihna bang bang sem sunzom sak uh chih khong ka theih chiang in ka lungsim hong naa in, "kei leng ka nu ka pa mite nu leh pa te bang a hausa a, neizou hile-uh zaw, hiai bang tel dinmun a dinglou di hi'ng a, apoikei, ka maa a thil ka tuah di om bangbang ka tuah ngai ahi" chi'n ka kihanthawn zel hi.
Ka Umuan kiteng ut kei mah leh a nu-le-pa te'n ka sung a naungek tagah mai di chih a ngaihtuah chiang un, hithei salou uh ahi dia, Momoi kiang ah, "na Ukim ana houpih inla, a Umuan toh kite'nsak dan ngaihtuah ka sawm uh,,,," chi'n Momoi ana hilh ua, Momoi in leng kei kiang ah hon hilh sawn pah hi. Kei leng kipak tak in ka om hi. "Bangthu bang vai hon hawm di ua aw,,,,,,,? " chi'n akhen chiang in lam-en tak in ka om a, a khenchiang in lah ka bei adong thei mahmah mai hi. Nu leh Pa nei hi'n innsung pa-ngai tak a khangkhia hileng zaw, ka mel leh puam ah zaw ahon sit uh ka gingta bik kei hi.
Hapta khat vengveng scooty a ka accident lai a hong buaipih tu Ukhual innluah ah ka om hi. Sum nei hi leng zaw Lamka potkhiaksan a, koilam hiam a zinmang vengveng ka ut hi. Ka dawr ngaknate lak a ka loh lakkhitlouh lak di om chih ka theisuah a, kintak in a innlam uh zuan in ka pai ngal hi. Himahleh ka pute'n ka lawh tengteng lakhin vek uh ahi chih ka theih in ka heh mahmah mai a, himahleh hihtheih dang bangmah neilou ka hih ziak in, lungkimloupi in ka kiik hi. Lampi a ka pai lai in ka Umuan toh ka kituak kha ua, ka Umuan in, "Eh ! Emi, koilam pha dek, koi a om e,,,,,,,,,? Chi'n hon dong a, ken leng ka omna pen gen leng hon hehpih sang a hon simmoh zaw di chih ka theih man in, ka omna genlou in ka hohna kia ka hilh hi, chih leh ka Umuan in hon hehpih ziak hia, gamdang a ka om a deihziak chih ka thei kei, sum sang nga hon pia hi. Sanglou theilou ka hihman in zakta kawm pi'n ka sang hi.
Khawlak a mipi kivei mutmut te kawmkal a ka pai lai in, ka cellphone hong ging a, Momoi ahi. Thu kipah-huai lam gen dia gingta tak a ka pick-up leh, Ka nu leh pa hinkhua apat Mou dia hon sit uh chih thu Momoi in hon hilh hi. A tapa uh sawn ka pai nung a le ka nu-le-pa khang a na suisui lai uh ahi chih ka thei a, pilvang zou uh ka sa mahmah hi. A dik, zi-le-pasal kinei di pen ni 2/1 lel adi hilou, damsung adi ahih chiah hon khah/suang tute kisui leng thil poimoh mahmah hi'n ken le ka thei hi. Himahleh, ka tung a thil tung di bangbang tungkhin ahihman in, ka nu leh pa, ka pi leh pu te hinkhua va suisui lou in, hon kitengsak lel le uh, kou gel adia le hoih zaw di hia. Bang teng hileh, hiaitan ka thuakta a, hangsantak a thuak mualsuah teitei dia hatna ka neih a ngai chih chiangtak in ka thei thak hi.
Ukhual innluahna a om kawm in sum tamlou khong ka lohkhe zelsam a, sum khol a koilam hiam a zin mang ka lung gel hi. Ukhual ahihleh khamtheih ahih nak luat ziak a a nu-le-pa'n insung apat a hawlkhiak uh ahia, himahleh kei tung ah bel a hoih mahmah mai a, sang-gam taktak dan in hon en thei mawk hi. Nikhat Ukhual in, "Emi nou bangbeh e,,,,,,? Chi'n hon dong mawk hi. Ken le lamdang ka sa a, ka behmin uh ka thei kha ngei kei himhim chin ka dawng hi. Himahleh ka ngaihtuah thakthak leh ka pa u in amin tawp a agelh zel pen hi din gintakna ka nei a, ka gen leh Ukhual in leng, ka omna veng ua ka behte tamdan hon hilh hi. Ken bel bangmah a phattuam nang himhim ka thei khe zoukei.
Nikhat inn a ka om leh, papi khat hong lut a, ka kihoulim nung un, Emily ka hih leh hihlouh hon dong hi. Ken leng "ka hi, bangziak e,,,,,"? Chia ka dotkik leh Ukhual in ka tanchin ana hilh a, behkhat ka hih dan uh khong vagen ahi ngei dia, hon hehpih luat ziak a kei mu a, panpih dia hong hoh ahihdan hon-gen hi. A inn lam ua kisuan di'n hon zawn a, himahleh Ukhual ka haksat mangbat ni a hon panpihtu omsun, taisan nuamlou ka hih man in suanlam ka bawl hi. Ka ngaihtuah a, sisan laigui zoppih le hilou behkhat chih ziak a tanau dan a hon bawltheih pen lamdang ka sa a, ka ngaihtuah den hi.
Ukhual lak a kha 3 vengveng ka om nung in Aizawl lam a paisuk ka ut dan Ukhual lak a ka gen leh Ukhual in le lem hon sakpih hi. Himahleh sum omlou in bang chin ka zin thei dia,,,,,,,? Ka lungsim a buai petmah a, lamet di dang nei tuanlou ka hihman in zanlam a ka behpa hong pawtte kiang ah, ka haksat dan gen in sum ka vangen hi. Amau le hon hehpih lua uh ahihman in "Imphal to Aizawl Air tricket ka na laksak di ua, adang le na poimoh leh na poimoh dandan ka hon pe di,,,,,,", chin hon dawng hi. Flight tricket kei ka kilak mai di chi a ka gen leh, "ahihleh thildang a na poimoh na a om khak leh......." chin Cheng 10000 hon a pia uhi.
Ka kingaihtuah a, fligt lou in, sumo in pai leng sum save zaw di chin sumo ticket ka la ngal hi. Ukhual in "Pai di na hih leh", chi'n kikhakna di'n bawngsa ana lei a, ann nekham awl a kisa in, Zingchiang zing dak 7 a pawt din ka lum hi. Zingkal in Ukhual in hon phawng a, "dak 6 pelta eive, dak 6:30 a na tungman ngeingei ngai, na late kha di", hong chi hi. Ken bel dak 7 a pawt di bang dak 7 khong in kikuankhe pan leh le, kilapman nalou di a maw, dak 8 ma'n hon pawtpih thahah kei un teh,,,,,", ka chih leh, Ukhual in a punctual dan uh khong hon gen hi. Punctual tak in dak 7 chet in Lamka nusia in, sumo kum tamtak a na service ta hileh kilawm tak a, mel upa simtak a tuang in ka pawtkhia ua, ka kiang ah Papi khat Kum 40 vel a upa khat, sum hauh ziak a saptuam Upa pangthei chiang melpu a tu-a, afel mahmah mai a, lampi ah ka kihoulim zel uhi. Singngat a sipaih te check gate ka pel ua, ka kiang a tupa'n, "Guite kual kilut-ta" chin hon hilh hi.A sakmin "Guite kual" a chih chih uh ka za mun, ahihziak in a mun ah khatvei le ka mu naikei a, ka mit ngei a mu di ka hih ziak in ka kipak petmah hi.
Ka tai zel ua, A nungpen line ah Tangvalnou, lup hun theihlou bang a zingthoh hun theilou hileh kilawm a, mit bing chi'kche-k tu te ahihleh, apau kholkei ua, Driver pa kiang a nungak amah sepsuah sa zang a van a lei hileh kilawm tak, nalh deuh mai a kithuam/chei a tu tei bok a, a kicheinate ka et-et chiang in, Paris khopi konglai a vakte kichei nang hileh kilawm khop in nalh ka sa hi. Ka vek un mi 8 ka tuang uhi. A lunglen huai ngei mai, khatvei ka muhna mai himahleh a gam a teng ka ut tha a suak mahmah mai hi. Lamka zaang a mihausate neihteng eng a, mi nuai a ku'n a kilohtawm sang in, hiai lam ah kiteng hen la, mahni ut dandan in nna kisem leh, nuam kisa zaw di chih khong ka ngaihtuah hi. A khen chiang in ka ngaihtuahna ka kinialsak a, ana om himawk leng, kipaipohna lampite lah kuva hailou in muam thoh lele amah a zanvek thei di khop a sia, khuate en le lah, luahloh vangkhua mah bang a lui gepguap, chih khong ka ngaihtuah lai in, ka kiang a tupa hong paukhia a, "bang e , na ngaihtuah"? A hon chi a, kei le thakhat in ka halh a, ka ngaihtuahna tengteng ka genkhiak leh, aman hiai dan in hon dawng hi. "Ka neu apat hiai khua (Guite kual sung a khua khat) ah ka teng uhi, hiai kual sung a di'n kholian pente lak a khat ahi. Ahih hang in a neizou masasa in Lamka lam ah hon pemsan zel chiang un, chi'n haksa sakawm pipi in nikum masa in ka na pem tei uhi".
"Bangziak a pemkhia khia uh ahi dia aw,,,,"? Thei ut a ka kingaihtuah lai in, ka ngaihtuahna thei hileh kilawm in, "A ziak bel, kumpi dang vaihawmna nuai a om a kihihziak in, hiailam a tengte Govt. in hon phokpha kei a, Lamka chiang bel a dan omdeuh ahihman in, Lamka lam mah kinaih zel mai ahi. Denchiang in hun hong pai zel dia, hiailam a teng di omlou in Lamka zang ah i kisekhawm nouhnouh di-ua, hiailam a teng di le ki-om nawnkei di chih lauhuai sa mahmah ka hi. Ei mahmah le ki-om peihlou ahih chiang in, midang om dia sawlluih theih lah hilou, Huchi'n awl awl in Namdangte hong teng di ua, kum bangzah hiam nung in namdang khut ah a om maimah di chih lauhuai sa mahmah ka hi", a chi a, a gente ka ngaihtuah chiah dik ka sa thei mahmah mai, kua moh ahia ? Eite lak a le MLA/Minister khong le kinei thou hilou maw ? chi a dot ka sawm laitak in, ka maa a nungaknou in, "an nelou di maw"? A hon chi a, kei le ka gil kialsimta ahihman in, kintak in ka kumkhia a, hotel ah ka lut hi.
BUNG 4 NA
::::::::::::::::
THUMAPI :- ("Vai nanung vuahsia in lap", chih hisek mahleh, vuahsia in hon lap hial louh ka lamen,,,,,,,,,Min[name] tuamtuam hon gkizang zel di ahihman in, nang min toh kibangkha hong tel khak zenzen leh kipak in na nui di hia, dah in na kap di chih kon-gen theikei, a ziakbel na min a telkhak leh nang na hikei chihna ahi.) Mihing telak ah, Pathian in a zat ut deuh mi omtuam ahi hial dia aw,,,,! Chih khong ka ngaihtuahna ah hong piang mok hi. Himahleh Pathian in a mizat ut te, a zatdan kibanglou in, a tuamtuam in zang thei hi. Amah Emily ngei in le, hiaithu genkhe dia Pathian in mengmuh theihna hon pia ahi hia, ahih kei leh zawlnei khat a hon bawl chih amah leh amah le a kithei kei hi.
---------------------------------------------------------
An nekham sawtlou ka khol nung un, kong kipankhe nawn ua, ann ka nekna uah driver pa'n zu hon dawn ahi ngei dia, apau ut in, a motor khalh bang ahat sim vutvut mai hi. Lampi lah sia, driver pa'n lah hek hat ngal, a guk in ka lau petmah a, ahihziak in bangmah ka gen hial kei hi. Ka tai zel ua, a vangkim a driver pa'n zu dawn zel ahihman in, ka tuangpihte'n le laugu sim uh ahi ngei dia, ka kiang a tupa'n, driver pa kiang ah, "Nakham lua, hiai ah khawl phot ni. Na kham a veng deuh chiah i tai nawn mai di-uh", a chih lele driver pa ut bilbel lou ahihman in a hon taipih zel a, a khen in motor apat tawmkhiak a sawm ua, a khen in driver pa khoih sawm hileh kilawm in a melh ua, abuai a ka buai vengvung lai un; "KA UTKEI" chi a kikou ging ka thilza'k nanung pen ahi.
Vak ka galmuh a, vak in ahon naih zel a, ka kiang a hong tu'n in, vak lak ah mikhat melhoih leh siangthou mahmah mai khat in ana en gige hi. Kei lam hong naih zel in ka baan ah hong len a, nidang a ka muh ngei nailouh na mun ah ahon pi hi, Ka ngaihtuahna thei hileh kilawm tak in, "chikmah a namuh ngeilouh leh na theih ngeilouh thil hon musak a, hon theisak di ka hi", ahon chi a, ka baan ah hon kai hi. Gamlak, sing leh mau ngen a dim, inn himhim omlou, phetlou a mihing mel himhim muh di omlouhna ah ahon pi-a, koi gam ahi dia aw ! Chi a ka ngaihtuah lai in, "ZOGAM ahi, Zomite luah dia ka chiam gam hi", chi hi-awmtak in a hon en hi. (Hiai ka kithuah sung un, kuamah ka paukhe kei ua, ka ngaihtuahte aman a theivek a, aman leng genkhe tuanlou in ka lungsim ah hon theisak dan in a hong lang khezel hi).
Leng ka hi uh hia pai ka hi uh chih bel ka thei kei a, leng hipen in ka kithei hi. Ka leng zel ua, tang tung lam khong ah ka kal ua, phaizang zaapi mun ka tung ua, a khopi mahmah a, paakhuan a paak chi tuamtuam te bangmai in ka mu hi. A paak kilawm taktak te kal a Inn thupi taktak te leh mihing kize mutmut ka mu a, lamdang sa tak a ka et lai in, aman, "Hiai khopi en mahdih, ka nam/chi te'lte khopi ahi. Ahihziak in ka thu bangmah a ngailou in thang-huaina chiteng in a dimta uh. Ken ka mite kibang vek a ka et lai in, amaute lak ah, genthei leh hausa a kikhentuam mahmah mai ua, mi hausa leh thil hihtheite vaihomna a suakta. Hiai a inn thupi mahmah te khong en mah dih, amaute sepgim ziak a sum-le-pai lawhsuah a kilam sang in, migenthei taktak te neih sunsun laksak a kilam a tam zawtham ahi,,,,,,,,,, "ka lungsim ah hong lang a, 'Ziin hong li'ng henla, nekgu'k ziak a inn kilam teng puk mawk leh inn puklou a vang mah di,,,,,,,,,,", chi'n ka na ngaihtuah man get hi.
Biakinn lian leh thupi taktak bangzah hiam ka mu a, a inn a thupipi maizen toh, a sung a kikhom di mi atawm mahmah mai ua, bang chitel ahia,,,,? chi a ka ngaihtuah lai in, 'kei bangkim hihthei amaute Pathian ka hi chih bel athei uh, ahihziak in, phat di ka hih dan leh biak di ka hihdan bel a mangngilhta ua, en mah dih kikhawm sunsun te le a biakna uh a keu mahmah mai. Kei biak sang in khovel nopbawlna lam a uangbawl zaw uh' chi'n mundang a hon musak a, nungak tangval zu-le-sa ne a dawn a om ka mu nawn hi. Aman "ka gam sung ah hiaibang khelhna a om ding chih ka gingpha ngeikei, ahihziak in amaute lak ah ka melmapa diabol in naktak in nna asem hi. A khosak dante uh en mah dih ka melmapa deihlam ngen ahi,,,,,,," chi'n, zukham a vuaktang phialphial a laam, kikawi, leh thang-huai taktak a gamtangte omdan ahon musak nawn hi. (ka omdan teng leng hiai apat a ana kilang vekthei ahihdan ka thei khia hi).
Hon lengpih zel a, zanmial bangmai a mialna mun ka tung uhi. 'Mialna mahmah e' chi a ka ngaihtuah lai in aman, 'ka mi-le-sate tenna en mah dih, nidang in ka lungtuak zong in vai a hawm ua, amau leh amau le'ng a ki-it siam mahmah mai ua, kei leng kipak lua ka hihman in, vualzawlna chiteng in ka na vukh hi. Ahihziak in ka vualzawlna theisiam lou in, amaute thil hihtheihna ziak asa ua, zahtakna himhim a hon nei kei ua, kimuhsuahna hun ka bawlsak ahi. Hiai hunhoih ka piak sung a kimusuah lou uh ahihleh, a hoih louhna uh a tawpsan ua kei lam ahon naihtheih nang un, a tung uah vaidang ka hawm lai di.
Kum 100 val paita in, hiai lai ah ka sikhate tungtawn in ka thu theihsak in a omta, ahih hang in, mitampite'n ana sang lai un hiai mun a tengte'n zu-le-sa ne a, dawi leh kau biakna ana topsan nuam zok lou uh hi. Ka sikhate le thangpai mahmah uh ahih chiah, a thugente uh ana pawm theih nang un, vauna ka pesak hi. Huai ka vauna tangtungsak ka hi' chi'n ahon gen nawn hi. Lamdang ka sa a, "kei hihtheih hileh zaw hiai bang a ka mi leh sate a om uh zaw phallou di hi'ng a,,,," chi'n ka kingaihtuah hi.
Malam nawt komzel in ka leng ua, sotlou nungin lui liansim mahmah khat kamu nawn ua, ahih hangin aluiguam te asia in kawl-lak ngen mah abang hi. Aman '"hiai luiguam en mahdih, ka melmapa'n aki neitu bol mahmah ta, kamite tunga athangpaih chiang in, agotnang in azanga, mitampi te hi'nna ana laksak ta, ahih ziak in sotlou nung in ka lakik nawn dia, hiai kima awm, ka mite hamphatpih di khop in ka vualzawl lai di" achi hi. Sot en ngamlou kahih man in aman le hon theisiam in ahon le'npih zel hi.
Luidung apat khosaklam manoh in ahon lengpih zela, tang sang taktak tunga inn kilam sesouh te ka mu a, nopmel kasa mahmah mai hi. Huchih lai in aman, 'nop zaw nuam mahmah, ahih ziak in hiai laia kamite'n kei ahon zumpih ua, atung uah kathang apai ahi. Khovel ah Nam hiaizah kabola, Pau leh ham hiaizah kana omsak hi. Ka thilbol leh hihte, khat lel zong hih khelh kanei kei, ahih ahang in, amau te kiangah anam di-ua kapiak azahpih ua, apau leh ham, tawndan te amangilh ta uh, amau te'n ahihna te uh zumpih loh ua, ahihna bangbanga lang khe ngam hi le uh tu hun in nuamsa takin ka bolthei, a hihna azahpih ziak un kei ahon zahpih na uh hi'n kangai hi". Chi'n hongen muat muat hi.
Kenbel bang mi, bangnam gen ahia chih huai hunlai in bangmah ka theisiam hetkei hi. Huai tak in aman, 'Zosuan kichi te te'n-na leh khosakdan hon musak nuam kahi' ahon chi hi. Ka namtel te ahi uh. Tangtawn gawtmuna apai di-uh ka phal louh man in, gamlapi apan in amute honkhe dingin mi kasawla, amau te'nle thumang takin ka sikha te thu mang in, dawi leh kau, singbul suangbul biakna topsan in, kei kiangah ahong kipelut uh. Hun bangtan hiam ka lungtuak zawnga khosa a, aki vaipuak lai un, khovel changkan-na zang in setan in akhema, huai ah mi tampi ana khempuk hi. Ahih hangin amaute honkhe dingin ginom taka ka gamnasem tamlou a omlai uh, amaute ziak in ki ngaihtuah na hun kapia ahi' achi hi'.
Mal-lam manawh in ahon lengkik pih a, mualtung leh guam kense mahmah lak a kilam, khopi thupi mahmah khat ahon ensak nawn hi. Thupi salua a ka et vengveng lai in, aman, "hiai khopi en mah dih, 100% Kristian kichite khopi ahi. Ahihhang in kum tampi paita ahihman in, ka thu sang in khovel thilte a ngai thupi zawta ua, ka thu a nelhsiah ua, thil thak a kipahpih ua, ka thu a theihna un, kum 100 bang val thamta ahihziak in, lui sa in, thilthak, pawlthak hong om peuh a bawh ua, hiai inn ding metmutte sang in Pawl a tamzaw phial hi.
"Ka vualzawlnate chapou/kisaktheihna'n a zang ua, ka namtel chi tuamtuam te'n,amau nam/chi te tawndan chiat humbit dia ka deih lai in, hiaigam vaihawm tute'n amau lalna gam chi'n amau Namte pau leh ham, tawndan zuiloute amusit ua, a nelhsiah ua, tu'n amaute tung ah ka thang apai mahmah ta". mailam ka sawn zel ua, nungak tangval, ut-le-dah a omte, nupi - papi, amau nupi/pasal telak hilou, midangte zi/pasal te lak a thang-huai tak a gamtangte ka mu nawn hi. Aman, "Mei leh kaat a ka gawt, Sodom leh Gomorra khelhna le hiaite sang in a thupi zaw tuan kei, ahihhang in, Sodom leh Gomorra ah bel kei a dia mi ginom 5 bek muleng ka hoi ngei di, ka muhlouh ziak a gawt ka hi. Hiai ah leng kei a dia mimuanhuai leh ginom tamlou a omlai uh, amaute hon ngetna ka ngaihkhiak sak ziak in, ka thangpaihna langsak nailou maimai ka hi. Tua bangzel a khelhna a tawpsan louh ua, nam tuamtuam te tawndan a nelhsiah zel ua leh bel, amaute tung ah ka khut ka lik lai di', chin hon gen nawn hi.
"Hiai gam ka hon etsak a te'ngte tengteng namkhat a ka bawl ahi uh. Ahihziak in amaute a tenna uh a tuam ziak un, unau ahihlam uh a kithei kei ua, a kihaza ua, a kidou ua, namtuam chituam a kichi ua, ka thu dung zui a namkhat chikhat a hong kibawl hun chiang un, nam tawm leh nam neuchik himahle uh, khovel a nam tuamtuam te sang in a hong thupi zaw lai ding uh hi". Huaite banah hiai suahlam gam phaizang tengteng leng a telvek ding, a chi a,
(huchih lai in, ka ngaihtuahna ah, namkhat, chikhat a bawl vek di ahihleh, a gendan, pau leh ham khat zangsak di ahi dia aw?.......... Chi'n ka ngaihtuah a). ahihhang in tu'n vapai inla, hun remchang dang ah ka hon ensak nawn di" chi'n a hon paisan hi.
Emily................Emily............... Chia hon sap ging ka za a, awl a kihei in, ka mit ka hak khia a, ka thilmuh a fiahlouh ziak in, koisan a om ka hia chih ka thei kei, gimlua ka hihman in ka mitsi kik a, ahihziak in ka kiang a omte pau ging ka za thei ta. Ka naupan lai a ka zakzak sek ahi chih ka theisiam ngal a, kuate hi u hiam chihbel ka thei zou nai tuankei. Ka khut lakhia a thakhat a thoh khiak ka sawm leh, ka khut ah ling (phim) ana kivuah a, nuimei puanak ngou silh khat in, thoulou di'n a hon hilh a, kei le ka lumsuk nawn ngal hi. A tawp in ka mit ka hak fiah theita a, ka kiang a thil omte ka mutheita, nungaknou minih puanak ngou silh ka kiang ah atu ua, huaite kiang ah tangval naupang mel mahmah khat in lamdang sak meltak in hon na en hi. Ka veilam lupna ah ka motor tuangpih Numei khat leng ana lum a, amah bel a harh mahmah hi'n ka thei. Ka tuanpih midangte muh kilam-en a ka dak kualkual hang in, midang kuamah muh ka nei kei.
Nurse te'n ahon paikhiak san ua, tangvalnou pen ka kiang ah hongtu phei a, ka maitang tak a hon en in, "Emily na hi maw"? Chi'n a hon dong a, ken le ka hih thu ka gen ngal hi. Amah kua ahia chia ka dot leh aman, "awl in kon hilh di, lungkham ken la, dampahta di na hi, na dam siangma na kiang a om di ka hi. Hangsan tak in thuak hamham in aw", a hon chi hi. Nurse te'n damdawi ahon kap ua, kei le bangmah phoklou in ka ihmu suk nawn hi.
Khua ka phok in nitaklam dak 5 ana pelta a, kei le amaa sang in ka harh zawta a, ka ut-ut gen in, kei mah in le ka thou ngapta hi. Nurse te ahong pai ua, ka omdan ka dot leh Ni 3 leh zan 3 omta ka hihdan ahon gen ua, huai sung bangmah phoklou a om ka hih dante, ka damsuah a gintak louh dante uh ahon hilh vek ua, kemtu leh enkoltu kuamah ka neihlouh ziak a ahon hehpih dan tengteng nurse khat in ahon hilh a, amah leng kei ahon hehpih ziak in, abiang ah a mittui hong luang hial hi. A gen ut teng a gen khit in ahon paikhiak san hi. Enkoltu, kemtu neilou a hon chih pen ka ngaihtuah chiang in ka lungsim a naa in, ka khase mahmah mai hi. Ka lupna tung ah mittui ka nulnul mai hi. Tangval nou in ka mittui nullai hon muh tak in, ka tal ah hon zut kawm in, "Emily kemtu, enkoltu neilou kisa in lungkham hetken, nang enkol leh kem dia kimansa ka hi. Kei zu-le-sa ne mi ka hi a, himahleh zankhat mumang lamdang tak ka nei mok hi. Ka mang in, putek khat ka na mu a, putek pa'n, hiai damdawi inn ah mikhat kemtu neilou a om a", chi'n huai kemtu dia hon deih ahihdan hon gen hi. Ahihhang in ken mumang maimai chi'n ka ngai thupi lawmlawm kei hi. Zan nih na in leng ka mumang ah huaidan mah in ka na munawn a, ka gingta tuankei, a zanthumna in ka mang in, kawl kense lak ah ka na om a, zandang a ka mimuh sekpen a hong pai a, 'kawn sawlna a na kuan kei leh, na tung ah gotna thupi tak ka hon tungsak ding', chi'n, huai kemtu neilou a om, natna thuakdan bangkim ahon hilh vek a, ahon paikhiak san nawn hi.
Ka khanglou a, sana ka etleh zinglam dak 3:30 ana gingta hi. Ihmut sawm mah leng ka inmu thei nawn kei a, putekpa thugen ka lungsim ah hong lut thakthak hi. Kingaituah a ka om lai in, ka room kong ahong kihong a, ka nu'n singpi nou tawi in, thou di'n hong sawl hi. Ka nu lak ah ka mang ka gen leh ka nu'n leng a theisiam kei mahmah mai a, atawp in, ka nu'n, "bangteng hileh huai damdawi inn ah vahoh inla, huaibang mi a om leh omlouh va en himhim le chin", ahon chi a, kei le kihahsiang in hiailam manawh in ka hong diang ngal hi. Na min lah theilou ka hih chiah na natdan gen in ka hon gamzon a, atawp in nurse khat in huchi bang mi, Emily kichi om ahihdan ahon hilh a, ka mumang a hon theihsak bang in nurse nu'n leng kemtu neilou na hihdan tengteng a hon hilh vek hi".
Doctor khat a hong pai a, "damdawi inn a tawt sim ziak in, na pawtkhe theita, ahihziak in damsiang vengvong zaw na hi naikei. Innlam ah ki-enkol theita na hi, awl-awl in na hong hoih tou mai di" chi'n ahon gen hi. Ahihhang in hiai damdawi inn apat in potkhe dek leng koilam ka zuan dia, kua ka bel dia,,,,,,,,,,? Ka lungsim a buai petmah, doctor pa thugen James in a zak tak in, ( kei enkol dia hong kuan pen khah James ahi) "Emily lungkham ken aw, kou inn lam ah ka hon thuai dia, ka inn uah na hong om phot di. Ka nu leh ka pa te'n le ahon theisiam law mahmah di uh" chi'n ka lungsim theisiam hi awmtak in ahon genkhia hi. Nurse khat ahong pai a, "Nangmah ah soisel nang lawmlawm a om nawn kei, ahihziak in, na sung a Naungek pen na kitahna lam ah na suk khak sim ziak in, na ki dopdeuh a ngai dia, a tam theilam lum inla, nna naseplouh, nang a dia hoihpen ahi" ahong chi a, kou leng damdawi inn nusia in James te innlam zuan in ka paikhia uhi.
Inn sung ka lut ua, nupi khat a kum upatna liahkhuh thei di khop a kichei peih hileh kicheisiam, mel siangthou tak leh fel mel mahmah khat ana om a, James in a nu ahihdan leh, a thu uh bangmah dong masa lou a inn a kei a hon thuailut dante gen in, James leh a nu hong kihou ua, anu'n kei leng hehpih mel tak in hon en a, room awng khat ah hon thuailut in, hon lumsak hi. Khathum sung veng veng James te inn lam a ka om nung in, innluah di ka mu-a, amaute'n hon phalbawl kei sim mah le uh le, ka kisuanglah ziak in inn luahthou thou di ka hihdan ka gen hi. Amau le rem ahon sakpihta ua. Inndang ka luah nung in leng James nu leh pate'n ahon awlmoh mahmah ua, avangkim in ka inn luahna ahong phazel ua. Ka lung a nuamtuam mahmah hi. James in ahihleh niteng hunteng in ahong vehzou gige hi. Phet lou in itna thu khong a hong genzel a, himahleh kei ka kisit luat ziak in, thutak in ka dawng ngei himhim kei hi. James in leng kei ziak a akhamtheih hihte a tawpsan dan khong, damdawi inn a hon muh tung a alungsim ka khoih dan te leh nupi dia ahon deih thute imm nei hetlou in ahon gengen sek hi. Sawnpai ka hih dante, tagah maimai, nu leh pa, inn leh lou neilou ka hih ziak a hon hehpih a hon nem maimai ahih ka gin ziak in ken le ka tanchin bangkim ka hilh vek hi. Himahleh James in huaite ziak maimai a kei hon iitna a kiam tuanlouh dante hon gen zel zawmah hi. Kei leng kisoisel nang ka taksa ah ka nei nawn kei hi.
Keiziak a akhamtheih hihte tawpsan thei ahihdan khong ahon gen chiang in kei le ka kipak a, ka ngaihtuahna ah, ka UKhual bang ka lungsim ah hong lang dundun mai hi. UKhual leng amah James bang a khamtheih hai mahmah khat hi a, tua James thilgente khong le Ukhual lungsim a le omkha maithei, a lungsim ah huaibang om hen la, ka bil a ka zak di'n khatveibek hong gen thak leh ka ut ngeimai.......Ukhual in ka tanchin a thei dia aw, ken lah bangmah amah tanchin theilou ing a, ka tung a ahoihdan ka ngaihtuah chiang in batnei hi'n ka kingai hial hi. Himahleh kei tagah inn leh lou neilou, phet lou a nektawm di nangawn neilou in ahih dan tuan ka theikei. James kiang ah ka Ukhual hon panpihdan bangkim ka hilh leh aman phone a huopih himhim ding in ahon sawl a, ken phone neilou ka hih chiah, ama phone ahon pia a, ka Ukhual ka phone leh ahon ngaihdante, ka paikhiak ni a pat a alunglen ziak a ann a nektheihlouh thu khong ahon gen hi. Ken bel tuahsia ka tuah thu kamkhat in leng ka hilh nuamkei, a ziakbel ahon ngaihtuah luat di ka lauhziak ahi. Ka kihou lai un ka kiang ah James in lamdang sa tak in ahon en a, ka kihou zoh un, James in "Bang pau a nazat uh, kei hon gensia maw , hon phat,,,,,,"? Chi'n nui hiuhiau kawm in ahon en a, ken le, nafeldan leh na hon ngaihsak nate ziak a ka kipahdan gen ka hi, ka chih leh, ka kiang ah hong tu nai in, ka sam a hong zuut a, nunglam a hon kuai vandak in, ka muk ah ahon tawp mok hi. Lamdang ka sa a, ka buai vek hi'n ka kithei hial hi.
BUNG 5 NA
::::::::::::::::
James hiaidan di himawk lou ahi. Sawn ka pai ziak a ut leh dah a khoihtheih di na hon sak in chu na ngaihtuah khial lawtel di. Ka mangbat lai a na hon panpih ziak in ka kipak a, ka kipahna langsak thei a, ka tung a na hoihna hon thukthei hileng ka langsak dia, aleh sangtampi'n ka hon thuk ngei di. Ahihziak in ka dinmun na thei a, neih leh lam bangmah ka neikei, ka taksa ka numei na a hon din ding in ngaihtuah het ken aw. Ka vangtah ziak liauliau a hiaibang dinmun a ding ka hi............ Chi a ka gen leh amah le kisik melpu kawm tak in a hon en a, "Emily,,,,, huaidan in ngaihtuah hetken aw, na mel ka muh chiah kisum haksa ka sa lua ahi. Tuban nang remsakna lou in khatvei mah ka hon hichi bawlnawn hetkei di, rem nasak leh i kiteng dia, na sung a naungek napai lel pen le, kei ta bangbang in ka pawmthei dia, nang le nahihna bangbang in ka hon pawmthei vek", ahon chi hi. Ken bel tu dinmun a hithei mai ka hihlouh dan in ka dawng a, "hon it hon ngai a, hon deih taktak na hihleh, hun sawtlou ana ngak lai in", ka chi hi. A pai dek in "Emily, na mel mulou alah om zoulou ing a, mel i kimuh louh sung a tanchin i kithuzak zel nang in", chi'n mobile phone luisim khat ahon pia hi. "Ngailou ka la kei di,,,,,", chimah leng dawhkan ah nusia in a hon pawtsan hi. Huai ah ama number leng anuse ngal hi.
Pathian min lou ding in ka kisuanglah a, chinglou ka ki sa a, Pathian min lam ding in ka kizahpih hi. Himahleh ka hinkhua hun zatdante ka ngaihtuah chiang in, mikhial penpente lak a khat himahleng Pathian min ka lam lou thei kei. Hun leh nite hong pai zel a. Pathian kepna tang in Tapa deihhuai takmai ka nei hi. Amel ka et chiang in kipahna'n ka dim hi'n ka kithei a, himahleh lehlam ka ngaihtuah chiang in ka tapa in a pa, ka Umuan suun law mahmah ahihziak in amel ka muh chiang bang in ka hehtha khong hong suak maimah zel hi. Himahleh ka suul apat a naungek piang huatna a ka dim pen kei mah siamlohna hi'n ka kithei a, ka hihthei khamkham in Pathian kiang ah ngaihdam ngen in, naungek ka iit theih theih nang in ka ngen zel hi. Pathian in ka ngetna chinglou himahleh ahon ngaihkhiak sak a, hun sawtlou nung in ken leng awl-awl ni ka tapa ngaihna leh iitna ka nei thei hi. Naungek damtheilou tak hileh a etkol nang sum leh pai ka buaibuai maizen di toh, vangphatna ka tung ah ahong tung sawnsawn hi'n ka thei. A ziak bel ka tapa in hitang khosik leh damlouh chite a neingei kholkei vanglak a, kei a di'n le zangkhai huai mahmah hi.
Ka tapa ka chawm nang banghiam bek sep ngai ahihman in, zingkal baih taktak in ka thou a, singtang lam a meh hong tungte ka sum neih sunsunate zang in ka lasawn zel a, ka veng uah ka innzuak zel hi. Ka sepgimnate mite'n hon muh chiang-un ahon hehpih thei mahmah ua, meh di nei gegu mahle uh, ka mehzuakte phatuamngai tak in ahon na leisak zel uhi. Huchih lai in "Nungak ngak mehzuak a kivei, amel ahoih hoih maizen toh, pammaih na e,,,,,", chi a musit tak a ka nunglam a hon gen le hunkhop ka tuak hi. Meh di zuak a ka potkhiak chiang in ka tapa amah in lupna tung ah ka nuse zel a, sawtpi taisan theilou ka hihman in, a kin thei lam in inn lam ah ka ki'k zel hi.Meh zuak a kha nih phial mahmah ka kivei nung in, ka veng ua Private school khat ah mi tang a sem ding in ahon
zawn zenzen ua, kei le mehzuak a kiveivei sang in chi'n huai school ah ka vasem
tei a. Nau pawkawm in school ka kai zel hi. A sik a ka sepnapa a hong tung a, kei
leng semthei nawnlou di dinmun a ka om tak in, ka lung a kham a, meh zuak a kivei louhngal hih di dang theilou ka hih chiah chi'n mehzuak mah ka sunzom nawn hi. Ka pute tanu Momoi toh bel a vangkim in ka kithuzak theizel uhi.
Nikhat ka sepnalui schoola principal pa hong hoh a, a school ua semtu kidaih louh ziak a semtu lakbelh a sawm thu uh ahon hilh a, kei le kingen tei ding in ahon hilh hi. Ken le mehzuak a kivei sang in chi'n, thumang tak in ka ngen tei ringot hi. Vangphat huai tak in alakte lak uah ka telkha a, ka lunglutna lamtak ahihziak in nuam ka sa petmah hi. Ka lawh bel atam kei, himahleh kou nuta khosak nang khop aphathei thou hi. Kum hong kivei zel a, Ka tapa Eric leng school kaithei di dinmun a hong omta ahihman in ken leng huai school ah ka kaisak ngal hi. Eric pen a khen chiang in kei ahon muh chiang in nuak din ahong kisa sek a, huai chihlou chu haksatna bangmah tuaklou in, ka sem theizel hi.
Semtou zel ding a ahon nget ziak un ken leng phatuamngai takin ka vasem sunzawm nawn hi. Nikhat Lamka a ka pute tanu, Momoi phone call ka dong a, Moimoi in ka Umuan sihthu hon hilh mawk hi. "Kei hon ittu le hilou, hehpihna nengkhachik le neilou, chia ka na mangngilh taak, ka Umuan si chih thu ka zak in ka om a nuam thekei a, hamhaih tak in ka om dedu hi. Huchia bangmah hih na chang theilou a ka ding lai in, ka principal pa un a hong mukha a, "Emi bangchi e, damlohna neimaw,,,,,,,"? Chi'n a hong dong hi. "Dam mah ing e, ahihziak in Lamka lam a ka sungte sihthu ka thei a, lamdang ka sak luat ziak in hih di pen le theilou a om maimah ka hi", ka chih leh aman le, bangchi dan a kisungkha zenzen e,,,,,na kuate a......? Chih khong hon dot nung in, ken leng thil bangkim ka hilh vek a, Eric pa ahihdan tengteng leng ka gen vek hi. Aman le hon theisiam in, "kalnawn in khawl ni 20 na ladia na vagal kei dia,,,," ahon chi a, kei leng huaidan a khawl hon piak theih leh ka kipah didan leh, a gal a vakuan ngei ka sawmdan ka hilh ngal hi.
School kaitawp ticket la ding in ka kuankhe ngal a, ken bel sum neilou hileng le by road a paipen ngam nawn mahmah lou ka hih ziak in, lenna ticket ka vala ngal hi. A karnawn in Eric toh Lamka lam zuan in ka hong lengkheta ua. Momoi le hilhlou in Ukhual ka phone a, ama inn luah a kingak ka sawm dan leh ka tapa toh zin ka hih dan teng ka gen hi. Ka aw a zak in Ukhual leng a kipak in ahon muh ut tak thu khong ahon gen tei sam a, damtak a kimu pahta di i hi,,,,, chi'n ka phone ka koih hi.
Lamka ka tung ua, tleirawl lai hun tengteng zatbeina ahih sam ziak in nuam ka sa mahmah mai hi. Himahleh ka lungsim khat ah, ka meltheihte ka muh khak ding ka lau mahmah mai. A ziak bel, ahon muhsit didante khong uh, ka ngaihtuah a, aguk thei bangpen in ka gamtang hi. Ukhual in thil omdan bangkim a hon hilh a lamdang sakna'n ka dim hi. "Emi, bangteng hileh tawldam un la'n, ken bazar ah meh di ka valei zual dia, ka hong paipah di", chi'n a hon pawtsan a, kou ka tapa Eric toh inn ah ka na om uhi. Ukhual innsung ka et velvel chiang in, ama a ka muhdan toh kilamdanna himhim ka mukei a, ka lungsim in, 'Ukhual in ahinkhua lui topsan thei nailou hi di eive' chi'n ka ngaihtuah hi.
Eric ka sil zawh in, kei leng kisil di'n Bathroom ah ka lut ngal hi. Ka kisil lai in Eric in ngaihtak in hon sam a, midang hong pawt om ahihlam a hon hilh hi. Kei leng kintak a kisil in, ka pawtkhia a, tutna tung ah Momoi in Eric pawmkom in ana tu letlat hi. Momoi in ahon muhphet in bangmah le gentheilou in, kun dedu a, amel apat in gen ut tampi anei chih chiangtak in ka thei hi. A kiang ah ka paiphei a, 'Moi',, chi a ka sap leh mittui pak nilnel kawm in hong dakkhia a, "Ukim, huaipam ah Ukhual toh ka kimukha ua, na hong zin thu ahon hilh a, kei leng innlam a pailou in hiailam ah ka hong diang ngal hi. Hehpih tak in na tung a ka pa thilhihte ngaidam in aw, mangngilh in la'n kou innlam ah na nih un hong paisuk ua" chi'n hong kapkhia hi. Eric in lamdang sa in Eric leng hong kapkhe phemmphom hi. Huchia sivui dikuan bangmai a ka kah vengvung lai un, Ukhual hong lut a, himahleh Ukhual in thil omdan teng theisiam ahi ngei dia, bangmah thu hon dong tuanlou in, Room sung ah hon lutsan hi.
Moimoi in Ukhual kiang ah amau innlam a kisuan di'n nget chih petmah in ngen mahleh Ukhual in phallou bilbel ahihman in Moimoi leng lungkimlou tak in a innlam uah a kiik nawn hi. Momoi paikhit in Ukhual in hichi'n hon gen hi,,,,,,, "Eric pa sihna ziak ahihleh nathei naikei maithei. Kei ahihleh a theichiangtu pente lak a khat, mit ngei a mutu ka hi. A bultung apat in gen leng sau mahmah di ahihman in, tomkim in kon-gen mai di, na uMuan pa khah tua MLA Election omkhin pen ah a ki candidate tei hi. Huchia chikmah a ki candidate ngeilou himahleh, saptuam leh vengsung khong a mite theih, mihoih chi a atheih uh ahihziak in, a khingpih di lamte'n leng aguk tak in kihta petmah uhi.
Khatvei zu dawn khin innlam zuan a ka pai leh na Umuan nungak hel ding hong kuan toh ka kituak kha ua, bangmah genlou in ka enzui hi. Atawp in, Lulun te inn ah alut lai ka mu hi. Lamdang ka sa mahmah mai hi. A ziak bel, Lulun Pa leng huai MLA ki candidate, Na Umuan pa toh kikhing kha di ahihziak ahi. Himahleh amah bel huailam lungsim nei a pawt ahih ka gingta hetkei, aziak chu, Lulun toh a kizuihna uh leng kum khat lam phata ahihman in, Lulun hel dia kuan ahih ka gingta zaw. Kei le bang lungsim nei ka hi diam ah, bangthu a gen himhim uhiam, chih ka theih ut man in zu nam philphel kawm in, Lulun te inn ah ka dianglut mok hi. Sawtlou ka tu a, ka tut sung in leng Lulun Pa'n na Umuan kiang ah, paukam hoihlou pi pi'n vau den hi. Ken leng nuam salou ka hihman in ka paisan nawn hi.
Zingkal hong hi a, na Umuan migilou khut thuak a sisa a muh ahih thu ka thei a, ka lungsim ah, zan nitak a Lulun pa toh kiselbuai sim un, Lulun pa'n mi thatsak hi ding in ka gingta tinten hi. Na Umuan sungte'n Police ah FIR thehlut zel mah le-uh, lehlamte'n sum tam pipi a, ana tham zel uh ahihman in case sui gina nuamlou in, tuni tan in hiai thu ah kuamah mat leng nei nailou uhi", chi'n uKhual in hon gen hi.
Nitak an nekham hoh ka sawm leh Ukhual in zan a diankhiak rem a saklouh man in, ka naupai lai a ka lupna, nengkhah ale kilamdanna omnailou, puanphah tanpha le kikhek lou, phet lou a, anit bang bang a nin zaw mah tung ah ka tapa Eric toh kong lum uhi. Zingkhua hong vak a, gimsim ka hihman in haksa sakawm pipi in, nek bawl ding in ka thou a, sawtlou nung in Ukhual leng hong thou in, nui sisei kawm in, "nang om ziak a thou hak ka hi aw", chi'n bathroom ah hon lutsan hi. Nek ding ka bawlkhit in, Eric ka phong a, ann ka ne ua, ann nekham Umuan gal ding in ka kuankhia uhi.
Taksa lian in, tapa bang nei hialta mahleng, sigal nikhua ah, omdan di ka buai a, gen di bangmah theilou ka hihman in Ukhual ka lut masa sak hi. A sihna sawt simta mahleh, a sungte'n kei ahon muh tak un kah chih petmah in hong kah khum mawk ua, kei le numei nehnou chih mahtak in, kisuum zoulou in, mou dia hon deihlou ka Umuan Nu toh kikawi in kong kap khawm halhal uhi. Sawt kuam tak ka om nung un, a boruak neuchik hong zangkhaita ahihman in, thudang gen in ka kihoulim uhi. Eric in apa sun law mahmah ahihziak in, lamdang a sa ua, Umuan mel mu a kingai in, a pom khong hong kituh zawzen uhi. Nitaklam ann ne di'n hon khou mah le uh, Ukhual in lem salou ahihman in nitaklam in ka pai kik ua, Lamka a kar khat cham di ka hihman in, nidang chia hoh nawn di chi'n ka paita uhi.
Eric pen a lawmpolh di, meltheih huai veng a omlou ahihman in thawmhau kisa tak a a om ka muh chiang in ka hehpih thei mahmah hi. Himahleh Ukhual in ngaina lua hih ziak in amah toh kimol in lawm bang in kipawlthei veve uhi. Aziak bel Eric a pautheih tung apat in Paite pau ngen in ka hou a, amah leng siam vek kei mah leh i gen teng theisiam vek ahihman in a buaihuai lawmlawm kei hi. A nithum ni zingkal ka thoh in Momoi tutna tung a tu ka mu a, zing kalkal a mu ka hihman in lamdang ka sa a, ka lau manphial hi. Moimoi in ann ne dia hong sap sawm ana hia, ken leng "Ukhual thuthu,,,,", chi'n ka dawng hi,,,,, Ukhual hong thou a, Momoi in ann ne dia hong sam ahihlam ka hilh a, Ukhual in leng "Ann ne dia hong sam uh ahihleh a hoih voi, ei ann save himai", chi'n nui nenalh kawm in hon dawng hi. Ka kisak zoh in Momoi te innlam ah ann ne di'n ka kizui khe nawn uhi.
BUNG 6 NA
::::::::-:::::::
WARNING:- ["Hiai bung 6 na apat, aban lamteng hih, naupang kum 15 nuailam adia sim phallouh bilbel ahi." chimok leng lah, sim thouthou di chih ka hon thei a, na sim teitei ahihleh mawh ka paw kei hi.....xD
amah gen dandan, behlap hetlouh a ka gelh ahia, mi khenkhat adi'n sim nuamlou tak khat ahi kha maithei, i kitheisiam di uh.]
--------------------------------------------------------
Ann kanek kham un, Umuan nu'n ka pute inn a ann ne ka hihlam uh thei ahi ngei dia, hong hoh a, a inn ua pawt ding in hong zawn hi. Ut law kholkei mah leng hong hahzot lua ahihman in ka vapawt uhi. Umuan pa'n Eric amuh phet in pompah ngal a, a kipah theih nang in kimawlpih den hi. Sawt simtak ka tut nung un, Umuan pa'n Eric nektheih lei di'n a zawn khia a, Eric le phurlua ahihman in kei kiang ah le gen sese lou in apu toh innkong lam ah kizui pawt ngal uhi. Ni hong sun a, Eric leh apu pawt lah hong pai thei lou uh, a tawp in ka beidong sim mahmah mai a, ka lungsim ah, thil hoihlou tampi hong lang a, ka tapa taimangpih ai maimah dia aw, taimang pih leh ka tapa tellou in bangchi'n ka hing zou dia? Keimah leh keimah dotna ka kidong den hi. Hong pai thei mahmah lou uh ahihman in, Umuan nu kiang a ka gen leh, lungkham nang bangmah omlou chi teng in hon dawng hi.
Umuan nu phone hong ging a, Emily in Eric ana paisan mai heh, gamdang ah ka zinpih dek chi'n Umuan pa'n hon gen hi. Huaithu ka zak tak in om didan ka thei kei a, ka lungsim tengteng hong buai vek hi. Ka tapa ahihleh ngaithuah huai ka sa kei, naupang fel leh tangnel pahpah thei, pau bang pau ut zawmah ahih chiah, a omna teng ah a tangnel theipah dia, nuam satak in a omthei pah dia, kei anu le hon mangngilh pah di chih ka thei. Himahleh kei a nu bangchi'n ka tapa tellou in ka damzou dia,????? Kap kawm in innkong ah ka pawtkhia a, Umuan nu'n kamkhat lel in leng hong nem tel lou hi. Ka tapa tellou a pai sawmlou tinten ka hihman in, innsung ah ka lut thak a, "ka tapa neihsun, ka kinepna pen, hiai bang maimai in na hon laksak thei mawk kei di uh,,,,, ahong pai maa uh hiai ah ka ngak di,,,,,,,,,,", chi'n tutna tung ah ka tu top hi. Umuan nu'n room apat in hong pawtkhia a, ka ngakngak hang a bangmah a phattuam louh didan khong hon gen a, "na Umuan ta ahia, a tung ah bangteng ka hih uh siang ahi,,,,,,na ut leh police ah report inla, na ut dandan in panla in,,,,,,", chi'n musit tak in hong pau khum zawmah lai hi. Ka thangpailua ahihman in kisum zoulou in ka kapkhia a, khua kai lawta ahihman in leh ka om om hang a bangmah phatuam lou di chih ka theih man in, nidang chiang a hoh nawn di'n ka paisan hi.
Inn ka tung phet in ka omdan apat in Ukhual in ana theisiam ahi ngei dia, Eric ana kan pah ngal hi. Bangmah gen theilou, khase lua ka hihman in, Ukhual in hong kawi a, kaplou ding in hon nem hi. Kap kawm a thil omdan ka gen thei hamham hi. Kisil harh di'n bathroom ah ka lut a, ka kisilkhin, underpant teng dia ka kisak leh mangngilh kha ka hihlam ka kithei a, kinulna puan toh kia pawtkhe ngamlou ka hihman in, Ukhual kiang ha, ka bag sung a underpant hon laksak di'n kisuanglah kawmpi'n ka sawl hi. "Emi,,,,,,na underpant sisan kai tam na mahmah eeee, bang chidan a,,,,,,,,,,,", ka theikhe guih a, ka period lai ahihziak in, ka zin maa zan ua ka underpant teng khah sopman nawnlou, Lamka a sawp dia ka puak, sawp mangngilh ka hih dan ka thei thak a, inkong a ka phou pen hon laksak hi. Huai ni'n ann le nelou in ka lum suk a, Ukhual in ne hia nelou, chih le ka thei kei, ka gim luat ziak in. Zing ka thoh un, Ukhual in bangmah genlou in kintak a pawtkhia hi. Nileng in keikia in ka om a, kap ding in ka mittui a pawt di le a om nawn kei a, ka aw teng leng a heu vekta hi. Nitak khomui kuan in Ukhual hong tung a, beidot huai ahihdan leh Police a FIR thehlut ngal ahihdan hon hilh hi. Neukhah in ka lung a muang deuh hi. Himahleh Umuan sihna thu a case le sui gina nuamlou in, kei mi genthei buaina a sui uh ka gingta thei kei hi.
Ka tapa muhkik Lametna toh niteng inn ah ka om a, ka lametnate tangtu'n ni om ngeilou hi. Aizawl lam a ka pai hun di kuan in, phone call ka dawng a, ka lak leh Umuan pa ana hia, Eric ngaituah lou di leh lungmuang tak a om ding in hon gen zawmah lai hi. Ken leng Eric aw khatvei bek zanuam ka hihman in hong kihou sak a, damtak a kimukik pah ding chi'n, ka kimangpha uhi.
Ka paikik hunta ahihman in, Ukhual in, "zing chiang a paikik di na hih leh meh di khong lei in ka va bazar di", chi'n hon pawtsan hi. Ukhual bazar hoh nitaklam annhuan hun kuan in, zukham sa in inn hong tung hi. Ka lungsim a gim mahmah mai a, lungsim nuam a ka om theih nang in zu dawn khong ka ut hial hi. Himahleh Ukhual in ka zu dawn di hon phal ka gingtat louh ziak in bangmah ka gen utkei hi. Ukhual in nek a bawl a, kei zing chiang a paikik di ka hihman in ka van kisa in ka buai mahmah hi, mahni buai buai a ka om nung un, ann nek bang hong hunta ahihman in ann ne di'n kong kisa uhi.
Ann ka nek dek un Ukhual in, "Emi,,,, na lungkham luat di hilou ahi, Eric leng hong dam dia, chik ni chiang hiam a na kiang a hong ki'k nawn di ahi. Na kimuh pah uh ka lamen, bangteng hileh hiai dawn tei himhim inla, i kimangpha khak nang in", chi'n vodka (magic) buk khat hon lakhia hi. Ken leng bangmah ngaihtuah sese lou in ka dawn zialzial hi. Tholkhat ka dawn gai ua, khamlua ka hihman un, ann ne di himhim omlou in, Ukhual toh tutphat sau khat ah ka tu ua, bangbang hiam gen in ka kihoulim uhi. Ukhual in "Emi,,, kon ngai mah di e, paikik nawn dah maive", chi kawm in, ka liangkou ah hon kawi phei hi. Ken leng "Ukhual, ken le kon ngai mah di,,,ka sanggam taktak bang a kon et na hi", chikawm in a khut ka lakkhiak sak a, "nang kiang om thei hileng om utlua ka hi, ahihziak in hiai lam a ka om kei a dia hoihlou ahi", chi'n ka dawng hi.
Ukhual in, "bangmah gengen ngai kei", chi'n hon pawm a, room sung ah hon lutpih a, alupna tung ah hon sial hi. Ken leng Ukhual thil hih di bangkim ka thei vek, himahleh dang ka sawm kei, ka lung a kham a, bangmah poisak himhim ka neikei, ka puanak hon phelh sak a, ka van tengteng hon phelh khit in, amah leng vuaktang in ka tung ah hong lumsuk hi. Ka zukham uh areh/veng deuh chiang in ka dawn belh zel ua, bangmah zumna himhim ka nei thei nawn kei, zan khovak in, lupna khat ah ka lum ua, zingkhua hong vak in gim kisa kawm pipi in zin ding in ka kisa a, ann leng nelou in, airport lam zuan di'n ka pawtkhia a, ka pawtkhiak ma in, Ukhual in, "a topna pen ding in", chi'n lupna tung ah hon pawmphei in, nitak a ka om bang un hon ompih nawn a. Airport lam zuan in ka paikhiak san hi.
Lampi a ka pailai un James in hon phone a, "tuni a hong tung di na hih leh Lengpui (Lengpi) ah ka na dawn di", hon chi a, airpot ka tung nung sawtlou in lenna leng hong tung ngal a, hih di poimoh bangkim ka hih khit un, Lengpi lam manawh in, Imphal ka nuseta uhi. Lengpi ka tung ua, van ngak a ka ding lai in ka liangkou ah hong kibeng a, ka et leh James ana ding hi a, kinai chik a ding ka hihman un, ka kihoupih na lam ua, zannitak a ka zudawn gim ana za a, lamdang satak in hon dong a, ken leng ka vathiltuah teng gen in, ka lungkham luat ziak a dawn ka hih dan ka gen hi. Ka van hong suak a, innkong lam a kinawr pawt in, James car ah ka lut uhi.
Ka lu nalua ahihman in, ka pau ut tha leng a suak kei a, James ngaihphalou in, ahon dong hi. Ken leng, zannitak a zu ka dawnna ka lu nna ahih dan ka gen leh, "tamlou dawnbelh le chi'n dam mai in teh" chi'n hon dawng a, ken leng "poilou" chih teng in ka dawng hi. Ka tai zel ua, RV ka tu'n un, lamgei ah hong ding a, "ana om zual in aw" chi'n hon pawt khiaksan a, ken bel zuntha a pawtkhia hinteh chi'n bangmah ka ngaihsak vak kei hi. Sawt simtak a om nung in, polythene bag in zu umkhat hon khai hi. Bangmah genlou in ka taizel ua, innlam a hon taipihlou in, lampi dang ah hon taipih a, ken leng zu hon dawnpih sawm ahi chih ka theih man in, bangmah ka gen nuam kei hi.
Ka taina lam uh, mi muh di atam kei ua, lam gei ah motor park loungal motor dang muh di a omkei a, ka mimuh omsunte ulah, apair ngenta, lamnawl ah akhawl a, "hiai ah dawn zual ni" chi'n munkhat a tu in ka dawn uhi. Ka dawn khit un, pai di'n kong kisa ua, motor sung ah ka lut ua, start mailou in James in, khoih hon sawm nawn hi. Poisak ka neikei ka chih sa mah bang in, a hon khoih dandan in ka om a, a deihkhop amuh nung in innlam zuan in hon paipih nawn hi.
Hun hong pai zel a, Kei leng ka sepna pen kum beita ahihman in, kum nawn lam in le sep ka sawm lai thou hi. Himahleh James in leng kiteng dia hon zawn munlua ahih chiah a sungte lemsak leh lemsak louh uh theiloupi'n ka kigu uhi. Ka gintak sang in anu leh pa afel un, ka tung ah ahoih mahmah mai ua, amau ahihleh nupa a sumdawng in a zin deuh reng ua, inn a a om sang un, a omlouh uh a tam zaw hi. Huaiziak mah in kei leng innngaktu di'n kizen a hon sa uh ahi ngei dia, zin hong tung chiang bang un, thil, van chi tuamtuam a hon puak ua, ahon duat ua, ta bang taktak in ahon en uh, hipen in ka thei hial hi. A nu leh pa'n hon duat mah le uh, James in a khamtheih hih tawpsan theilou in, zu ringot hihlou in khamtheih dang amuh remchang teng ane in a dawn theih zel pen in ka lung a hon khamsak mahmah hi.
A kum a sim kong kite'n nung un, Nau ka hon pai a, himahleh ka taksa a tawldam ziak hia, chihbel ka thei kei. Kisawisel nang ka nei lawmlawm kei, ka nu leh pa'n leng tu te mel muhkal a ngaklah thu ngen uh agen ua, damtak in kinei mengmeng leh chih ka ut mahmah mai hi. Ka nu leh pate'n hon ngaihsak mah le uh, ka pasal pen in ahihleh kei sang in a khamtheih hih a ngai poimoh zaw hi'n ka thei a, lupna tung khong ah leng vuaitam ka kina un ka kisuheh deuhreng uhi. Ka kinak thawm uh ka nu leh pa te'n azak chiang un, ka room uah kintak in a hong lut ua, James naktak in ahong taihuan zel ua, kei ahihleh kamkhat in leng hon tai ngeilou uhi.
Ka nu te phailam a van laa dia azin ni, nitaklam in ka gil hong na a, James kiang ah, nauvei hunta ahihman in, nauneih ka kigintak thu ka gen leh nau nei di hial zaw James inle hon ngaihthah sak ngamlou ahi dia, kintak in Damdawi inn lam hon hohpih a, a nitak dak 6 lakvel in tanu ka nei hi . Damtak a naunei ka hihziak in ka kipak mahmah a, James leng bangmah gen kei mah leh amel ah a kipak ahi chih haih vuallouh in ka thei hi. Kipak tak in ka tanu mel ka en a, alian in amel leng hoih ka sa mahmah hi. Huchia melhoih sa, kipak tak a ka et-et lai in, thilkhat ka lungsim ah hong lang a, kei mah ka kingaihbel ziak hia,,,,, chih bel ka thei kei. Ka tanu mel in, Ukhual mel toh kibatna khat nei hi'n ka thei a, ka lungsim a anuam theikei. Himahleh ken bel ka thilhih bangkim James kiang a genkhiak sawmlou ka hihman in, bangmah ka mel ah danglam sakna ka langsak nuamkei a, ka kisel teitei hi.
Ka nute zin hong tung ua, naungek mel ahon muh chiang un kipahna'n adim uh hipen in ka thei, himahleh ka nu paukam tuni tan a ka mangngilh theihlouh leh, kei mah ka kisiamtan theihlouhna khat a om hi, "A pa mel sang in a nu mel sun zaw eive maw", chi'n ka nu'n hon gen a, a lungsim ah muanmohna nei kawm a agen ahi hia, ahih kei leh amah muh dan diktak a gen,,,,,,,? 'Kei mah ka na kizephok ziak le ahi maithei' chi'n ka kine'm zel hi. Ka pa'n ahihleh "kar khat le pai nailou a, amel sut di le theibaih na chia, hong lian hiaihiai dia, sisan kizopna nei chu hong kisutna uh le hong om zel kei dia, mel leh puam a kisut louh ale, a gamtatdan khawng i entou zel dia,,,,,,, a himhim thu in, a pa a sut sang in a nu sun zaw leh ken chu deih zawtham ka hi. Numei mei khong zu khong hon kham le-uh, a pi leh pu adia le zumhuai law di hilou maw,,,,,,,! Chi'n ka nu enkawm in nui phaphalh hi.
James omdan ka nu leh pa'n diksalou in, "tangval hinawnlou chin a, ta bang neita na hih chia, na tangval lai leh na ta neih maa na omdan a om thei hi nawnlou na hi. Na tawpsan tak di ahi. Paching tak in na om dia, na nu leh pa'n nna ka sep zohlouh nung ua hon chawmtu di na hih mai ban ah, na zi leh na ta chawm dia mohpuakna nang khut a kinga hita di ahi,,,,," chi'n vuaitam thuhilh sek mah le-uh James in ngai poimoh lou in, amaa sang a uang zaw hileh kilawm khop in khamsa in inn hong pai gige hi. "kal khat hun ka hon pe dia, huai sung a na tawpsan louh a ka thu na zuih utlouh ahihleh na zi nata tawh hiai inn sung ah na teng nawn kei di ua, noumau in na kitoudelh uh a ngai di, na zi leh na tanu khongaih huai samah leng, nang na omdan in zir mahmah lou ahih chiah, amau le athuak uh ngai hi'n ka thei", chi'n ka pa'n James tai muatmuat hi. Ken leng ka theihbang tawk in, thuhilh mah leng a ngol veita ahihziak in aman leng tawpsan thei tuanlou hi. Ka pa, a thugen kikhelsak ut ngeilou, lungtang khauh tak ahihziak in, a thugensa mah bang in a inn sung apat in kou nupa leh ka tanu bangmah theilou a inn sung apat in hon holkhia a, himahleh ka pa'n ka inn luah di-uh, huai kalkhat James hun apiak sung in ana zong sak a, mi inn nuai kawtong ah, inn lianlou khat ahon luahsak hi.
Inn ka tuan ua, kalkhat sungvel zaw ka nu leh pa'n hon ngaihtuah ziak ua, sum tamlou toh hon intuan na uh zang in ka khosa nepnep ua, haksalou chik in ka khosa thei uh hi. Himahleh hun hong pai zel in, James niteng a mi nasem a kilawh a kuansek, antang leh mehman dia a sumlawh khiak hon pezel pe'n a omdan hong kikheng in, nasem tawp khamsa a hong tung hon ching nawn hi. A lohkhiak kimkhat khong inn hon tu'n zel a, zan a hong hi a, a zuduh in ahon phak chiang in buai in ka buia thei mai uhi. A leinang sum lah omlou, sum om mahleh a lei di zu a kizuakna lah kitheilou, a khen ching bang in James nu leh pate kiang khong ah ka vatai thepthup zel a, ka tai sunsun chiah zaw hoihtak in ana hou ua, sum leng ana pezel sam uhi. Himahleh a deihlouhsa ahon holkhiak uh kihi a, mangbat zek chiang a vataitai pen ka ngaihdan hilou ahih chiah, kei mah a ahithei tantan a kitoudelh ka sawm hi.
Sun chiang in nasem ding chi leng ka tanu ngek lawlai, taisai theih hilou, semlou in om leng lah ngawl di hizel, akhen chiang bang in ka pasal khen a mundang a taimangsan vengveng khong ka ut hial hi. Huchi bang lungsim ka put chiang in ka tanu pa neilou a khanglian di pen ka ngaingam kei zel hi. Ahitak in ka tanu leng James ta hilou in, Ukhual ta hin ka thei hi. A ziak bel amel leh puam khong ka et-et chiang in Ukhual toh kilamdanna anei kei uh hi'n ka thei hial hi. Bang teng hileh nikhat (dakkal 24) le kihal lou a thiltung ahihziak in, ken leng bangmah ka gen thei tuankei.
BUNG 7 NA
:::::::-:::-:::::
James in lah nna sempeih nawnlou, keilah naudawn ngai, a lungkham huai telmai,,,,,, inveng louvengte hoih ziak in ngawllou in ka hing hamham uhi. Meh leh buh kia a khosa thei hile ung bel phave'n, silh leh te'n di hong ngai lai, huai kia hilou, James in a zu dawn di hon demand zawmah zel bangchu, kei a dia damman omlou hipen in ka thei hial hi. Ka kingaituah nasat luatziak leng ahi maithei, ka taksa ahat kei a, kum naupangchik himah leng, ka mel a upa in ka langtek hial hi'n ka kithei hi. Ka tapa Eric ngaihtuah nang hun natan leng neilou hial in ka lungbuai hi.
James in zu dawn di aneih louh chiang in, a zawng ding in hon sawl ringot zel a, kei leng pasalte hon sawlna chi'n thumang tak in, ka theih na na ka vazongsak zel hi. Sum a om in zaw lei di zaw om zel a, himahleh sum a leinang kinei gige zoulou ahihziak in lohsam a kik hun khong ka nei a, a khen chiang in ka tunghak deuh chiang bang in ana ihmutsan chih khong in a om a, ken leng phong tuanlou in, ahon ngetnawn hun a di'n ka koih hoih sakzel hi. Zankhat sumlah nei nawnlou, a zu dawn dia ka koihte lah beivekta ahihman in ka lungkham mahmah mai a,,,,, James lah zuduh a ling a ling zungzung ta, ka tanu lah nawi duh a kapkap zawmah, Nitak dak 11 lam tan in leng ahon sawl den hi. A tawp in ken leng "muh leh muh, muhkei leh ahi hi hisuk heh" chih lungsim neikawm in zu zong ding in ka kuankhe top hi. Veng nuai lam manawha sausimtak ka pai nung in, papi khat smart simtak a kichei ka tuak kha a, ken bel a smart luat ziak in houpih leng ka sawm kei hi, Huchia paipel sawm a ka mitsik a ka mel h laitak in, numei kizuak a hon ngai ahi ngei dia, aman ahon houpih masa hi. Ken leng ka vanaihphei a, zu gim ana nam huamhuam hi. Zum thei ka hi nawn kei, ka tanu nawitui duh a kap a lupna tung a lum, ka pasal zu duh a ling den ngaihtuah in, zum leh zah le khual lou in, ka vak naziak ka gen pah hi. "A hoih e, na deihchu kon pe di, ahih hang, kei deih le na hon piaksam ngai in teh" chi'n hon dawng a, ken leng,'bang e na deih'? Chi a ka dot leh, "Na theisiam mai di chu,,,,,", chi'n nui kawm in, ka biang hon meksak hi. Bangmah genlou a ka ding lai un, taxi khat hong tai a, aman ana kham a, ka nih un ka lut ua, gamla simtak a hon taipih nung un, zu pack 3 di awmvel hon pia a, pai dia ka kisak leh ka ban ah hon le'n in, "ka thil deih na hon hihsak nai kei", chi'n lamnawl ah hon kai phei a, hon luppih hi.
Bang ka gen dia bang ka hih dia,,,,,? Ka pasal ka hehpih man a hiai bang a gamtang ka hih ziak in kisiamtan louhna ka nei lawmlawm kei, Ka paidek in sum tamlou a hon pe zawmah lai a, "na poimoh hun in hon hilh zel le chi'n kimansa gige ka hi", a hon chi a, a phone No. khong hon pia hi. Inn ka tung a ka pasal ana kipah dan khong ka muh in, lehlam tak ah phaze khong ka sa maimah hi. Huai nung zansawt nung chiang in vakkhiak ka ching a, ka Pasal zu dawn di ka leisak ban ah, antang man di, van man di neng neng khong ka neithei hi. Ka ut mawng ahih ka hi zenzen kei, Semthei hi leng, sun nileng a kho-ul kai a nasep in, ka pasal leh ka tanu chawm zou di khop in ka chidam hi'n ka kithei. Himahleh ka tanu naungek, nileng taisan theih hinailou, nileng nasem lou a lawh muh nang lah omlou ahih chia, zan/nitak hun a gamtang mai ka hi a, ahon dem ut te'n hon dem mah le uh, kei bang a dinmun haksa in ding tei hile uh, a hon dem un ahon mohsa bik di un ka gingta kei.
James lah zu dawn nak deuhdeuh, ka piak utlouh chiang a lah kei hon vaw dia kisa zel ahihman in, ka pelou ngam kei, a zudawn nasat ziak in, a sin teng abeita. Sawt hon dampih nawnlou di chih ka thei, A vangkim in, doctor ka ki -ensak zel ua, doctor te'n leng zu ngawl in omzia nei nawnlou ahih thu gen uh ahihman in, ken leng ka neih bang bang ka pezel hi. Doctor te gen bang geih in, khakhat lel paipan chih in James in hon mualliamsan a. Meithai ka suak nawn hi. Ka na tuahsa ahihziak in bangmah in ka ngai lawmlawm kei, ahihziak in, zu ngawlvei maimai ka pasal hon dampih lai toh teh in, ka lung a leng a, mite lak a om leng kisunglah huai ka sa hial hi.
Hun hong pai zel a, ka tanu leng buaipih luat ngailou in, amah kitoudelh thei dinmun in hong omtou a, kei ahihleh ka thilhih topsan mai theilou ka hihman in, pasal tuamtuam kop in, ka tanu laizil leng buaipih manlou in, ka pawtsan zel hi. Ka tanu in leng ngeina dan a ngaisuk thei ahi ngei dia, ka pawt di chiang in leng bangmah gen ngeilou hi. Inn ka pai chiang a, amah kia a lupna tung a ana ihmu biimbe'm khong ka muh chiang in lainatna in ka dim a, himahleh amah makhua di ka ngaihtuah ziak a hiaibang dinmun a ding ka hi chih ka theih chiang in, ka tanu in thil omzia thei mah leh a hon mohsak lawmlawm ka gingta theikei hi.
Theihlouh kal in pawl 12 hon pass a, kei leng tanu nungak nei ka hih lam thei kheguih hileng kilawm khop in, ka halhkhe guih a,,,,,,[A thugen lakloh lai in,,,,Nangkia a khosa ka hon sak leh, tanu nungak bang nei a, na nih ua khosa neive ua maw,,,,,,Eric bang om leh, ta, tangval leh nungak nei a khosa himai di hi chi'n a maw, namel etmai in zaw, nungak mah na bang lai in kon thei, " ka chih leh aman le bangmah gen tuanlou in hon en a, hon nuihsan hi. Huchi'n ahon gen zawm zel a]
Ka omdan tengteng theisiam vek din ka gingta a, theisiam hileh a khanvualte lak ah bangchi'n a om dia, ka nu ahi, chi'n ahon chi ngam diam,,,,,,ahon zah hpih diam ka tanu in,,,,,,? Dotna tampi a hong lut a khat leng dawng theih ka neikei. Himahleh ka omdan topsan kiphamoh ahi chih bel chiangtak in ka thei veve hi. Zingkal khat ann ka nek lai un ka tanu, Siamte in, phailam a lehkha zir a ut thu hon gen a, keimah sum leh pai neih in lah daihlou, a utna leh a tupna lah ken leng hoih sakpih ka hih ziak in ka lungsim abuai petmah, Siamte in, a ut zong kei lak a khatvei a genna hi in ka thei hial hi. Huiaziak mah in ken leng hih pichin sak ka ut a, ka lungsim in a lampi di ka dap den hi.
Bangteng hileh kei neihsa in daihlou ahih chiang in, chi'n Siamte pute lak ah ngen ding in Siamte ka sawl hi, Siamte leng thumang tak in a kuan a, kipak tak a hong kik di ka sak leh, hehmel tak in hong kik a, "Bangchi e, na pute'n ana pe nuamlou u maw, ana tai ek u hia,,,? Chia ka dot leh, "Na nu toh hong hoh thak un a hon chi" chih teng in hon dawng hi. Ken leng hoh pah hoih chi'n Siamte baan kaih in a pute innlam zuan in kong kikaiphei nak nak ua, innsung ka lut un, ka Pa'n, "Emily,,,,,, ka thugen hoihtak in ana ngai khia oh, mi lungsim piching mahmah leh kizen mahmah hi'n kon theisek, himahleh na thil hihdan leh na omdan hoih sa hetlou ka hi, Tanu nungak nei thei na hita, Lungsim pichingtak nei in, kingaihtuah thak oh", chi'n hon tai punpun a, ka thilhih teng theivek hinteh, chi'n lau in ka ling man hial hi, Huchia lau a ling pepep a ka omlai in. " a himhim thu in, Siamte phailam om di chih kei lak ah kamkhat bek in na hon gen kha hia ? Kam khat lel a le genlou a, sum ngen dia hong kuan, huai le amah kia hon sawl zawmah, bang lungsim nei neita ua ? " Chi'n hon tai sunzawm a. " bangmah genlou a, sawtlou ka tut nung un. "Bangteng hileh kou leng na nutoh ka na genkhopsa uh ahi, kou khut ah koih mai le chi'n", ka pa'n ahon chi thak a, kipak tak in ka pawtkhe nawn uhi.
A kal nawn in Siamte a pute dawr van la di toh a zin ua, admission leng hihsak ua, a poimoh bangkim a hihsak vek ua, tuni tan in ken chengkhat lel leng Siamte lai zirna ah Class-XII a zohnung ka seng kha nai kei, Tun BA-II year a zil lellel hi, Exam khin hong pai zual khong sawm sim a, a pute'n lem a sa di uam ah, ken zaw ka muh louhna le sawtta in chin, hon pai zual lele poi sa khollou hing a, hon phone chia lah a laizir nalam a ngaihzawng aneih thu khong hon hilh, zirlai na hi, ngaihzawng buaipih louh di, chi'n thuhilh zel sam mah leng, ngailua haichilh hipen in ka thei, Gen lou in a omthei mahmah kei a. A khenchiang bang in kineih khong hon ngen sek hi. Ken bel phal bilbel nailou ka hih dan ka gen a, himahleh kei bang a a tankhelh khak ka lauh ziak in, ka theih bang kham kham in ka thuhilh zel sam hi. Khatvei houh nget chih petmah a hon nget ziak in, "Bangteng hileh na pute thu thu ahi mai di chu" chi'n, kua, koilam mi, chih khong ka dot leh, "Lamka lamte ahi" chi' hon dawng hi, Ken leng kintak in, "o ahoih ve leh", chih teng in ka dawng hi. A ngaihzawngpa a ngaih luatziak hia, ahi di mah a akoih ziak, lamdang sakna himhim a neikei. "amah le kei bang a pa neilou, nu-le-nei nawnlou hia, hilele ken chu it thouthou", chi'n kam siamlou chik in hon gen zel hi.
Ka phone hon ging a, ka et leh ka pa ana hia, ka lak leh, aw hampi in, "koi a om e, ka office kai kuan deka sep di ka chih ana semlou namaw ? Kintak in hong pai ou, bangmah sempeihlou, thadahlua,,,,,," ka buaidan gen sawm a "Pa,,,,,pa,,,,, pa,,,,, chia ka sap leh hon dawng nawn himhim kei a, ka et leh ka pa'n a ut teng a gen khit a aphone ana cut dan ana hi a, sana ka et leh nitaklam dak 3 bang ana pelta ahihman in, kei leng pai mai hoih ka sa hi. "Emi ka vapai phot dia, a baih thei lam in kong pawt nawn di,,,, "ka chih leh aman le, "na pai ma'n khatvei singpi dawnlai zual ni" chi'n singpi hon awm a, singpi ka dawn khit un kei leng vuahmal phin seseih nui ah inlam zuan in ka pai kheta hi. Inn ka tun in ka kawt gaivek a, ka pa'n gum deuhtak mai in ana melh a, gen di a vang khopmai. Huaini sese, ka chih simsim nu bang thu bang laa thei ahi maimah diam ah, kei kiang a bangmah gen masa lou in ka inn uah ana om mawk hi. Amel ka muh in lamdang ka sa hial a, ka pa hon tai dan tengteng zavek ahihziak in ken leng nuam ka sa kei mahmah hi. Aman le nuamsalou chu ahi ngei dia, sawtlou ka nu toh a kihoulim nung un hon pawtkhiaksan vanglak hi. Ka kikhen loh hial uh kha maw,,,, hahaha. Himahleh ka nu'n ka van kikheng nang hong pepah vanglak a, sawtlou ka pa toh ka kibauh nung un, vuah lah theu theilou ahih chiah lupna tung ah, Emily thil gente ka gelh didan khong ngaihtuah in ka lum maimai hi .
Niteng hun teng in Emily ka ngaihtuah a, ka sep ka bawl ah leng lungsim ka pethei mahmah kei hi. Tua a tanchin a gen khak nailouhte bangchi'n hong omtou zel dia aw, a tanu Siamte ngaihzawng pen toh a kitengsak dia aw, a nu leh pa (James nu leh pa) tetoh bangchi'n Siamte tungtang a gel di ua aw, thil theih utna ngen in ka dim a, lah inn lam a sep di tuamtuam boss pa'n a gen chiang in sep louh theih louh dan in hon koih khazel hi. Kha 2 lam vengveng nasem a ka buai nung in, vangphat huai tak in nikhat khua ahong se nawn zenzen a, ka pa'n sep di gen di ka sak leh bangmah a gen louh ziak in, Emily toh kihoulim nang hun ka muthei nawn hi. Emily ka phone a, "Pawtna ka nei zual a ka pai naikei deuh, paiphialta, dak 10 leh akim lak vel in inn ka tung di, na utleh ana hoh le chi'n, Siamte le zanhal a inn hong tung in chin, amah kia a ka nutsiat eive, chim ana kisasimta maithei,,,," chi'n hon dawng a, kei bel amah omlouh lai a hoh utlou ka hih ziak in, a tanchin a gensate gelhkhia in, ka om khomuang phot lai a, ka buai mahmah mai hi. Dak 11 hong ging in, inn apat in Emily te innlam manoh in ka kikhalh suah nawn hi.
BUNG 8 NA
::::::::-:::-:::::
A inn uh ka tung a, Emily le ana manfel mahmah ta hi, "Eh ! nang kia oim lah nabang a, Siamte hong tung chi hilou maw,,,,, koi a om a, muh uthuai na e,,,,,,," chi a ka kan leh, "A pute'n pawt dia hong zawn ua, tu mahmah a api toh ana kizuikhia uh hi. A pute innlam ah om, apute'n ngailua ua, a tunu muh masak pen uh ahih mai ban ah, a neihsun uh ana hih sawnsawn toh, giak di khong in ana zawn sek ua, himahleh ken le ngai teisam ka hih chiah chi'n a giah di pen lem ka sa hial kei a, a hong tun nung sunlam chia huailam ngen a om ahi,,,," chi'n hon dawng hi. Ken bel "ahoih himai lou di maw,,,,,, amah hampha khat suak kha himai eivoi, huchia duat a ngaina thei a ana om uh ahihleh" ka chih leh, "himah e, nungak vual engthei bang hita ua, ken lah kei sepsuahsa kia a adeihte leh a poimoh hihsak zou silou ing a, apute'n ana hihsak zel ua, kei a dia le zangkhai huai mahmah aka,,,,,, eh ! zanlam a ka tanchin ka gente ka ngaihtuah kik chiang in zumhuai bang ka sa sek a, na hon muhsit loh di lauhuai sa ing a, ana genlou hileng chih khong ngaihtuah kei ve", ahon chikhe mawk hi. "Musit zenzen lou e, hiaitan i tuntak vanglak leh nang le topsan ken la, hehpihtak in hon gen zel in aw,,,,,," chi'n ka dawng a, bangmah genlou in, alu asing ngauhngauh hi.
Hichi'n hon genpan nawn hi,,,,,,,, "Huchia, Siamte in a tangvalpa haichilh phial a vei ahihman in niteng hunteng in kei kiang ah a gen den hi. Ken leng loh ngaihna thei nawnlou ka hihman in tai di et inle ka en nawn kei a, hoih taktak in ka kikuppih zel hi. Zankhat lupna tung a Siamte toh kihoulim a ka luplai un, a tangvalpa'n hon phone a, sawtsim tak a kihou nung un, Siamte in, kei toh hon kihousak hi. Siamte tangvalpa aw ka zak phet in bang chi hiam khat in ka om hi. A ziakbel a aw pen ka zakzak sa mah abang a, lah kuapen aw hi hiam chih ka thei zou kei. Sawt simtak ka kihou nung un ken leng khatvei bek hong zin hen la, kimu thei leng ut huai ka sak thu ka gen hi. Aman le "ka sungte lak ah kon ngen dia, tua khol ka zatsung un hong zinman teitei kon sawm di" chi'n hon dawng hi. Siamte phone ka penawn a, mangpha kikhak in, phone a koih hi.
A kihoudante uh ka ngaihtuah chiang in, lamdang ka sa a, ka tanu vangpha ka sa mahmah hi. A ziak bel kei anu'n ka nungak hun sung in hiai bang a houpihtu di leh itt tu diktak ka mukha kei a, lehlam ah kei siamlouhna himahleh, vangtah kisakna lianpi ka nei veve thou hi. Siamte in a tangvalpa hong hoh hun chiang a om didan khong ka kiang ah hon gen zel a, lupna tung ah kou nuta kia in ka nui zel ua, Siamte kipahnate'n kei le hon kipaksak ahihziak in, kipahna'n ka nuta un ka dim uh hipen in ka thei hial hi.
Ka kihou nung uh karkhat vel aliam nung in, Siamte room sung apat in ngaihtak in hong kikou a, "Nu..nu..nu,,,,,,,, Eric hong zin dek, zing chia hong flight di, ka pute car zat di hon vanget pih ou, Eric lengpi a i vapi nang in,,,,,,," chi'n om ngaihna le theilou in, ui meikang bang mai in phe velvul hi. Ken bel, "kua e, Eric na chih", chia ka dot leh, "Tu tantan amin le ana thei nailouh maw, zanlam nitak a hong hoh dia na zot pen eivoi,,,," chi'n hon dawng a, ken leng ka theisiam ngal hi. "Eric,,,,,,,Eric,,,,,,, ka tapa Eric pen ahithei diam, ka tapa pen ana hileh, ken bang gen di,,,,, Siamte in lah hailoh phial hita,,,,,,,, ka tapa hitheilou ahi,,,, Midangteta Eric hi'n teh,,,," chia ka kingaihtuah lai in, Siamte in, a lungkimlou hon sa in, ka nung ah hon boh kawm in, "Nu nang hehna nei maw ? Eric hong hoh di ziak zaw hikei maw,,,,"? Chi'n hon dong hi. Ken leng, "heh zenzen lou e, thildang khat ka vangaihtuah kha guih ahi. Na pute innlam ah nang mah in a motor uh vangen lechin le hon phal mahmah un teh, kei hong hohpih ngaikei maw,,,,, a himhim in, na pute lak ah na tanchin khong an hilhta hia,,,,,?", ka chih leh, "Nu ka pi leh pute kiang ah leng bangkim ka hilh vekta, hon tailou uh,,,,,, kei kian ka vangen ut kei, nang toh i vangen di,,," ch'n Siamte in hon ngen nguut-nguut mai hi."Kin huai kei, zingchiang in ngen leng le, zat nang poimoh a neih kei ua leh hon pe mahmah un teh". Chi'n ka dawng hi.
Zingkhua hong vak a, ann ka nek zoh un, "ka tanu a dia nuhoih ka hih theihna omsun,,," chi'n lin kawm pipi in a pute innlam ah motor ngen di'n ka diangphei uhi. Ka nu leh pa'n Siamte duat chih petmah a duat ahihziak un, phallouh chu koilam ah ! A Driver pa kiang ah, "Tuni Siamte te nuta, lengpi lamah na vahohpih zual mai di aw,,,,," achi hi. Innlam ah kisa di'n ka ki'k nawn ua, dak 1 lak a hong tung pan di a chih ziak in kou leng kin lawmlawm lou in ka kisa uhi,,,, horn hong ging a, inkong lam ka va-et leh driver pa'n ana ngak ahi chih ka thei a, "Motor jam nak thei lua ahi,,,, kuanpah apoina om kei", chi'n ka kuankheta uhi. Lampi ah ka ngaihtuahna a kisualden a, Siamte lah ui meikang bangmai in, om didan le thei lou in a phe velvul maimah hi. "Ka tanu ngaihzawng dawn dia hoh chu ka hi ua, lehlam ngaihtuah in chu piching thil hih di'n a kilawm lah deuh ka sa a, himahleh ka tanu neihsun in hon hah zotlua ahihman in, nuhoih ka hih theihna omsun chi a hoh ka hi.
"Kua Eric ahi mahmah dia aw, ka tapa Eric ana hi zenzen leh kei bang chi om ta di,,,? Unau kingaizawng omthei di a maw ? Kingaizawng kia hilou a, kite'n hial sawm uh lah ahi ngal a, bangteng hileh a hoihlam ka kipe dia, ka tapa Eric hilou di'n ka koih phot dia, a hilou ahihleh Siamte vangphat ahi dia, ka tapa Eric ana hih zenzen leh lah kei vangphat, kum hiaitan mulou a ka na om, kimuhna hun remchang himai",,,,, chi'n ka kingaihtuah den hi. Siamte leh driver pa bel kihoulim in, chiamnuih khong a gen ua, driver pa leng Siamte chiamnuih dan siam ka sa mahmah mai hi. Hiai ni a Siamte kipahna leh kei lungsim buaidan hih kibang di'n ka gingta hial hi.
Dakkar khat phial mahmah ka ngak nung un, lenna hong leng a kigalmuh theihta, thumvei vel hong lengkual nung in kum di'n a hong kisa a, kou leng gate pawlam ah ka na ngak mai uhi. Sawtlou nung in Siamte kikou kawm in gate lam manoh in hong tai a, "Eric.......Eric........ Chi'n, kou in hong kikou khia a, midang omte le zah zoulou in hong kipawm maimah uhi. Eric mel ah thil diklou khat muh ka nei, ka lungsim tengteng hong buai a, ka kho-ul in hon buak a, ngaihtuahna mumal neitheilou a ka ding lai in, Siamte hong pai a, "Nu Eric chibai lou di maw,,,,,,? " Eh ! nang maw Eric, na aw kizaza na in chi'n i hon khatvei muhna ahihleh ka na hamhaih khasim a, i kichibai aw,,,! Ka kichibai lai ngei un leng ka chi tengteng aling a, banghiam khat hon sia om hileh kilawm in ka om hi. "Ric na gim mah di maw, na pi na pute damdam uh hinte maw, i pai di ua, innlam ah i tawldam zaw mai di uh aw,,,,,", chi'n motor sung ah ka lut uhi.
Driver pa kiang seat ah ka tu a, Siamte leh Eric a nung ah ka tusak hi. A thilgente uh ngaikhia in bangmah genlou in ka tu a. Eric hong pau khiak chiang in, nungak a di'n a melhoihna chu genlouh, a aw vuak le ngaihzawng tham ngawihngawih hi'n ka thei hi. "Nupa hithei di hile u chin zaw, khovel a nupa kituak leh nupa enghuaite lak a khat na hi kha ngei ding uh. Himahleh khovel a ka damsung nougel nupa hitheilou di na hi uh, na nu uh ka hih na ziak liauliau in ka nna/mohpuakna ka hih pichin ngai ahi. Ahihziak in ka sih nung chiang in bel na ut ua leh na kiteng thei di ua, nupa kipaktak, inkuan kipaktak na dinkhe thei ngei ding uh. Himahleh ka damsung in hiaibang thil nou gel tung ah ka tungsak theikei. Huaiziak in hehpihtak in hon ngaidam un aw,,,,,," chia ka kingaituah lai in, driver pa hong khawl a, ka dakkhiak leh inn ka na tung uhi. Innsung a lut in Siamte singpi awm, dawn in ka kihoulim uhi.
Siamte bel kum naupang chik ahihziak in a lungsim leng a naupang lai mahmah mai hi. Siamte lungsim pichin louhdan ka theih ziak in, hun remchang zong a, lungsim piching zaw leh upa zaw Eric kiang a thil bangkim gen nang hun ka zong ngai ma sa ahi chih ka thei hi. Eric lah karkhat kan om theilou di ahihziak in kou gel kihou na hun remchang ka zong den hi. Siamte lah Eric mei mah bang, daileng di, zuntha di na ngawn zui den ahih chiah a gu-k in ka lungkham mahmah mai hi.
Nikhat ka pa'n Siamte a dawr van hong tung di, ana etfel pih zual di'n hon zawn hi. Eric omlai ahih toh Siamte le ut law lawmlawm lou hi. Himahleh apute duatdan khong a ngaihtuah chia, "hitheilou di" chia vadawng utlou chu ahi ngei dia, "Nu, Eric toh ka vahoh mai di uam,,,,"? Chi'n hon ngen hi. "Amah a ut nak leh poilou pi ", chia ka dawng leh, Eric in, "Siamte,,,, na hong paikik hak kei di nakleh inn ah ka na om mai di, ka om nuam chiah lou hiveh aw, nang le hong tung kik pah nawn sawm di aw,,,,," chi'n dawng hi. Siamte leng lungkim ngellou ahi, chih theih di khop a amel a langsak in, kuankhe hna-hna mai hi. Ken bel ka thil gen ut hun remchang neithei dan a ka lat ziak in ka kipak gu sim mahmah mai a. Himahleh genkhe dek hi leng, "Eric in bang lungsim anei dia,,,,,,ka thugen a gingta nuam diam ? Gingta hita tok lele kei iiplah na'n a pumdim maimah diam? Lah genlou theilou hi ing a,,,,,,,,! Lungsim buaitak in ka kingaihtuah den hi. Bangteng hileh, haksatna hiaitan ka na thuakta, ka mailam a haksatna omte leng ka thuak dia, ka thuak zel di, ka tate adia hoih leh dik ahih nak leh, NU ka hihna a ka mohpuak ahi, chi'n ka lungsim ka bawlfelta hi.
Siamte pawtnung Eric leng lupna tung ah, la khong ngaikhia in lum maimai hi. "Ric hiai lam ah hong paiphei zual ve, thu tamlou genpih ut kon nei zual,,,," chi'n ka samphei a, ka kiang ah hongtu-a, a nu leh pa, api leh pu tanchin bangkim ka dong vek a, aman hiaidan in hon dawng hi. "Ka pute'n a hon duat in ahon homthoh mahmah ua, tua ka hong zin di le khouh chih petmah in hon khou uhi. Himahleh hah tangtak a ngen ka hihman in ka lungkim louh di alauh ziak un phallou kawm pi'n hon zinsak uhi. Ka neulai in ka nu'n mi inn khat ah hon pawtpih a, huai ka pawtnate ahihleh tua hon enkol lellel ka pute inn ahi. Ka pu'n nektheih lei dia hon pawtpih kar in, ka nu ana pai a, sawtlou nung in pasal dang nei ngal hi, chih ka theih ziak in kei leng ka pute in ah ka omden hi. Huai lai in ahihleh ka pa bel mi giloute khut thuak in ana sikhinta hi. Huchi'n nu leh pa neilou in ka pi leh pu te kiang ah ka khangkhia a, ka pu te'n ahihleh hon duat ua, hon homthoh mahmah uhi. Khosakna lam ah leng genthei lua ka hi kei ua, ka pu ahihleh tu'n Ex-MLA ahita. Huai hun lai a sum leh pai tampi ana kholman ahihman in tuni tan in leng ka deihdeih hon leisak ua, ka ut na na ah lai ahon zirsak uhi. Ka pi leh pute ziak in nu leh pa neilou ka hihlam leng a khen chiang in ka mangngilh phialphial sek hi".
A thugente'n ka sintang hon khei mahmah mai a, paukhiak ka sawm chiang in leng ka paukhe thei kei hi. Ka gawl ka hahsiang a, "ahihleh na Nu tanchin bangmah thei zui nawnlou maw,,,,, na pute'n hon hilh ngeilou uhia,,,,,,,? Na nu min bang a, na pa min bang a,,,,,,,,"? Chi'n, pau haksa sakawm pipi in ka dong nawn hi. "Ka nu ahih leh ********Kim' ahia, huai hon taisan nung in, zu ngawlvei khat toh kiteng in Lamka vengkhat ah a om uhi. Ka let nung a zongsuah sawm a, aguuk a ka zong bawlbawl sim chiang in leng huchi didan kuamah ka muh ngeilouh ziak in zong leng sawm nawnlou in hichi'n ka om mai hi. Ka pa min ahih leh **********Muan ahi,,,,,,,". Chi'n hon dawng nawn hi.
"Bangteng hileh thil omdan ka hilh vek ngai ahi. Hiai hun remchang ka neih sung a ka hilh kei leh, Siamte hong pai man leh hilh manlou di ka hihziak in" chi'n thil omdan tengteng Eric kiang ah ka hilh vek hi....... Eric,,,,,na nu ka hi,,,,,,," gen sunzawm theilou in ka kap a, lamdang satakmai in Eric in hon en hi. "na nu tanchin a na thutheihte a tam zaw diklou ahi. Na nu'n ka hon paisan zenzen kei, na pa sih ziak in a gal di'n i vahoh a, na pu'n nektheih lei dia hon pawtpih a, na pu'n a hon phone a, gamdang a hon zinpih ahihdan hon hilh hi. Ken leng nileng phial na hong tunkik nawn leh chi'n ka hon ngak a, hong tung ngei mahmah lou na hih chiang un, chi'n kon paisan hi. Pasal ka nei zenzen kei a, ka haksat mangbat lai pen a hon panpih u omsun Ukhual, sanggam bang a ka et ahihziak a a inn a hontungpih ka hia, na omlouh nung in leng huai inn mah ah ka kik nawn hi".
"Tun chu thil omdan teng na thei chiangta di maw,,,,,,? Gintak melsim lah gintak haksa sakmel tak in Eric in hon en a, "ka tapa na hihleh hilouh kei na nu'n a chiamtehna tuni tan a mangngilh nailou kei ve,,,,,"na kawng bom lak ah chivom khutpi maichiah khong om ahi,,,,,,? Chi'n ka gen hi. Eric in ginlelh vuallouh a theichiang ka hi chih a theih in Nu,,,,,,ka nu maw nang, amel ah a khasia ahi chih ka thei, himahleh pasalpha tak a omtheilou chu ahi ngei dia, a mittui hong pak nilnel sam hi . "Eric bang teng hileh, pasal na hia, piching khat na hita, hiai dan a omlou in, lungsim siangthou tak nei in, thu i genkhom zek lai di. Siamte hong pai leh thil teng kigenthei nawnlou di,,," chi'n Eric hon kawina khut ka lakkhiak sak a, hoih tak in ana ngai khia aw,". chi'n hiaithu ka gen sunzawm nawn hi.
Siamte toh na kal thu uh ahi. Unau na hi ua, unau na hih lam uh na kitheihlouh ziak un hiaitan dinmun ana tungkha na hi a ua, kon mohsa zenzen kei. Ahi ziak in NU ka hihna ah, ka mohpuak bangbang na tung uah ka hih ngai ahi. Na kiteng uh lem ka hon sathei kei,,,,,,"Eric in theihsiam haksa sa mah leh, ka theihtawp a ka khem nung in lungsim piching tak in hon theisiam thei vanglak hi. "Nang bel na lungsim pichingta ahihman in na theisiam a, himahleh nanau Siamte in thil theisiam lou di ahihman in tu tawtot ahilh pen thil hithei hilou ahi. Huaiziak in na omdan pa-ngai un na hong omtou zel di ua, awl-awl in nang khen dan na ngaituah ngai ahi. Na khen didan zaw nang le na theisiam mai di,,,,,," chi'n ka gen hi. Eric in, "Nu, Siamte toh unau ka hihlam uh tu'n eigel kia'n i thei a, kuamah kiang a genlou in kitengsuk mai le ung, ahitak in gen leng ken bel ka Nu na hih ziak in na thugen bangkim pomthei ka hi. Himahleh, Siamte in hiaithu bang chik mah chiang a pomthei mahmah lou di ahi. Hiai thu hilh bang hileng, kei ahilhtu ahon huat ban ah, nang a Nu ngei le hon haw tel dia, thil hoihlou zaw hong tung khak lauhuai sa zaw ka hi". Chi'n hon gen hi.
BUNG 9 NA
:::::::-:::-:::
Ka kihoukhin uh Siamte leng polithyne vah simtak khai kawm in hong lut a, ka mel uh ahon muh tak in lamdang sakna'n hong dim hileh kilawm in ahon en hi, "Nu bangchi u e, kap khin mah nabang ua,,,,,,,,? Ka pu'n pai hon phal zok kei a, nna ka sep khitna uh zaw sawtta hi a. Bazar lam ah ka van di lei di chi'n ahon hohpih a, van tampi hon leisak, hiai Eric khedap di le ka nget leh hon leisak, Rs 4000 man chi ua, Rs.3500 a hon pia uh", chi'n a van leite hon phorh a, "Nu nang di le hiai numei handbag hon leisak" chi'n bag mantam chi simkhat hon phorhkhe nawn hi. Eric in, "Siamte nang a di lah,,,? Chi a adot leh, Siamte in, kei a di bangmah lei lou, hon leisak sawm na a, nougel a di ahon leisak nak leh, kei a di ngailou ka chih leh, nektheih hon nek pih a, kou hichia hong pai,,,,," chi'n kipah mel tak in hon gen hi. Siamte khosakdan leh paukam ka zak chiang in, a lungsim singthou dan khong ka phok thakthak a, vakhu bang mai a nunnem, kei ka ginat louh ziak a alungsim liam natak a hong awm mai di ka ngaihtuah chiang in, dam utna lungtang le ka nei kei a, sih mai khong ka ut hial hi.
Omdan pang-ngai a om in, Siamte theihsuah di laukawm pipi in ka om uhi. A haksa ngeimai,,,,,, Eric paini di lah nai hiaihiai, khatvei bek "Ka tapa", chi a sap a ngongkawi vongvong khong ka ut hi. Himahleh Siamte in lah khah ngei mahmah lou, a omna tenga zuizel ahih chiang in, kou gel in leng kihoulim nang huntuam ka nei thei nawn kei ua, Eric innlam pai hun dekta ahihman in, atam theilam inn ah ka kipawl khom zel uhi. Siamte Bathroom a kisil dia a lut kal in Eric lupna tung a phone zang a pau ka ngaih gu-k leh, apu toh kihou uh ahi chih ka thei a, ken leng bang gen uh hiam chih thei ut ka hihman in, a thugente aguuk in ka ngaikhia hi. Eric in apu kiang ah, "hiai lam ah ka nu leh ka sanggam numei ka mu a, tu'n amau inn ah ka om lelel hi. Ka hong pai chiang a innlam a hon thruai ut ka hihman in ka bank account ah sum tamlou na hon khak ngai di,,,,,,,! A pu'n bang hiam khat, Eric thugen a awilouh thu gen chu ahi ngei dia, "Ka thugen gingta lou a, ka hon ngetna na hon pomsak kei di leh, innlam leng ka hong kik nawn kei dia, ka nuta un, hiai lam ah ka om mai di uh, tua lam ah deihdeih, nei in, ut dandan in om thei mah leng, ka kipahna bukim tuanlou ahi. Huai sang in ka nu, leh ka sanggam nu lak ah genthei tak in om leng kipahna ka mu zaw thouthou di chi'n a phone koih khum hi.
Room apat in Eric hong potkhia a, apu a houdante ziak a tai dia ka kisak laitak in Siamte kisilzou ahong potkhe chet hi,,,,,Siamte in atheih khak lau ka hihman in bangmah genlou in ka tu maimah a, Eric in ka mel apat a lungkimlou ka hihlam thei in, pai hun di a chih ni a pai nailouh phot a ut thu hon gen a, ken bel, "bangteng hileh na pai phot hoih di ahi,,,,,"chih teng in ka dawng hi. Eric phone hong ging a, apu toh hong kihou uhi. A pu'n banghiam chi a khemthak chu ahi ngei dia, A kihoukhit un Eric in, "bang teng hileh paini di ka chih ni'n ka vapai phot mai dia,,,,,, a kin thei lam a hong hoh kon sawm nawn di, hon chi thei vanglak hi. Ken leng, "na pai di mah ahi, Pathian oimpihna'n i dam di ua, kimuh ni hong om nawn mahmah di ahi, na laizilna lam bang ule lakloh lua ahih chia, hiai thute ziak a na tawpsan mok uh lemsalou ka hi,," chi'n ka dawng hi.
Eric pai ni di hong tungta ahihman in kou eng Eric kha ding in Siamte pute motor mah in lengpi airport lam manoh in ka kuankhia ua,,,,,,,,,, lenna hong landing hun ngak in bangbang hiam gen in ka kihoulim uhi. Lenna hong tung a, Eric leng lut din hong kisa a, kimuh nawn hun di theilou in ka kivailiamta uhi. Siamte in hichitel a a sanggamppa ana iit/ngaih theih lamdang ka sa hial hi . A sanggampa, a sisan zoppih ahihlam thei leh hiai bang in a ngai in a vei diam,,,,,,? Ka kiklam un kamkhat in leng apau kei a, ka houpihnate leng paukam a hon dawng lou in, alu a sing/pei thoh in hon dawng lel hi. Inn ka tung ua, lupna tung kidenna in, ann ne di na ngawn inle hong thou nuam kei a. Kei kia in annkam limlou tak in ann ka ne a, ihmut hun in kiplou tak in, ak ihmu bangmai in ka ihmu a, ka nuta un ka taksa un a thuak loh hial in ka thei hi.
Hun hong pai zel a, Siamte le Eric avei/ngaihnate neukhah hong dan omta ahihman in ka nih un ka potkhom theita ua, ann ka nekhom theita ua, lup hun in ka nuta un kalum rual theita uhi....... Ka neu apat ka hinkhua ka suikik a, nidang a ka ngaihtuah khak ngeilouh leh ka hih ngeilouh Pathian kiang ah ka haksatna tut ka ut na hong lian mahmah a, mihing lemgelna in a phak vuallouh kou nutate mailam hun di Pathian khut a ngak kaan a hoih zaw lampi dang omlou hi'n ka thei a. Himahleh thanghuai tak a ka na om khak nate, ka numeina mi tuamtuam lak a sum muh nang a ka na zatnate ngaihtuah in, Pathian in ahon ngaihdam theih ka kilamen nawn kei hi.
Beidong leh mangbang tak in hun leh ni te ka zang tou zel a, Siamte bel a u Eric aw a zak nak leh bangmah dang lungkhamna neilou hileh kilawm khop hial in omthei veve hi........... Hichia Emily in a tanchin a gen laklawh lai in inkongkhak hong kihong a, nungak melhoih leh duangching, a melhoihna sang mah a apian nalhna in etlawm sak zaw hileh kilawm khop a piannalh ahong lut a, ka muhtung apat in ah Emily tanu Siamte hi ding in ka gingta ngal hi. Emily in,,, "Eh , Siamte hong paita maw,,,,? Pawtsawt na chia, na pute inlam na omchia zaw nuam sathei lua hidi na ka maw, inn lam le na hon ngaihsak phasek kei a,,,,,,,,nekbawl bang le hunta, nasiam dandan in nek khong hon bawl inla,,,,,, chi'n kei toh kimeltheina ahon neisak ngal hi....... Siamte toh ka kichibai ua, ka min khong ka hilh a, a tanchin theihsa himahleh ka siam bangbang in ka dong teisam a, phailam a a laizilna lamkhong ka genpih a, kum thum lam ka na omkhak tei ziak in ken le gen di hunkhop ka thei a, ka om lai a ka gamtat dan tuamtuam te gen in, ka nui zaizai uhi.
Siamte in, "Pa **** singpi kon om di aw [anu lawm ka hih ziak ahi ngei di,,,,,,,,,,,,,,,,,,,,,,.] Eh tangval lailai a "pa", kichih pah in ah, "u" chi'n hon sam ngal ve,,,,,,,, ka chih leh Siamte hong nui nanalh hi. Siamte gamtatdan in anu Emily tuk kei mahleh a melhoihna leh a piannalhna te'n ka mit ala riau in ka thei mai a, "Siamte,, nungak melhoih leh feltak na hi a, pasal hoihtak neih na sawm di aw,,,,,, chi'n, kei gen dia kilawm leh lawmlou ngaihtuah sese lou in ka thuhilh tei ringot hi. Nui kawm in, Singpi hon tawiphei a, bangbang hiam gen in ka nui zaizai uhi. Himahleh Emily in a tanchin agen pen Siamte theih a gen ut nawnlou ahihman in huailam pen ka tawpsan ua, singpi ka dawn khit un, bangmah gen rem nawnlou ahih chiah,,,, hun remchang dang a kihoulim thak di'n Emily te in ka potsan hi.
Inn ka tung a, bangmah gen lou in ka room ah ka lut paisuak ngal a, computer ka hih hing a, Emily tanchin ka gelhsate ka en a, huai ni a agente ka gelh belh zel hi, ka nu ka room ah hong lut a, buai tak a lehkha ka gelh lai hong houpih hi,,,,, buailua ka hihman in ka nu hon houpihna le dawn nachang ka na thei kei zawzen hi. Ka lu a hong beng in ka nu'n bang e tulai na gelhgelh,,,,? Chia hon dot kawm in ka thugelh simsawm in ahon en a, EMILY HINKHUA chi a athupi ka taklat amuh phet in sim ding in nget chih petmah in hon ngen hi, ken bel gelhkhin nailou ka hih dan leh hun remchang dang a Emily tanchin a kim sipsip a ka theih vek hun a ka simsak di thu in ka dawng hi. Huai hun remchangsa in ka nu kiang ah, nileng leng a ka pawt sek ziak khong ka gen a, ka pawtna ziak theilou a hon taitai sek khong uh, a hon tai nawn kei khak leh chi'n ka pa kiang a hilh ding in ka nu leng ka ngen ngal hi. Ka chih simsim nu bel Emily tanchin buaipih a ka kipei nakluat ziak leh, ka pa hon taina aw a zak khak ziak in ka kikhen loh hit-het uhi. Bangteng hileh iitna dik a ki iita kingai hi le ung, hiai bang thil maimai te ziak a ka kikhen uh ka gingta het kei. Himahleh amah le buaipih manlou khop a thildang ka buaipih theisiam nuamlou in, ka theih bang khamkham in ki genfel sawm mah leng vokpi mai a tuikepsuang paih a gen bangmai un, phattuamna himhim anei kei a, kei le kiniamkhiak peih biklou chu ka hi maithei, atawp in kong kikhen loh hit-het uhi.... hahahaha.
Emily mi vangtah leh mi hehpih huai tanchin, mite theih dia puankhiak ka ut na hong lianta mahmah mai a, a ziak bel, amah Emily tanchin apat kuahiam khat in banghiam bek a phattuamna amuh ka gintak ziak ahi. Amah gen bangbang ka gelh khin vekta, Himahleh a tanchin kim sipsip ka theih vek nailouh ziak in ka puang khe nai hial kei hi. Siamte leh Eric kal thu khong ka ngaihtuah a, kei tan dingdan khong in ka kikoih sek a, vaihawm didan ka thei bun kei. Unau piangkhawm, sisan laigui kizawm hinapi, a kitheih khaklouh ziak ua, unau ki iitdan hilou, nungak leh tangval ki itna a hong ki iit chih mok pen, a gilsung a ana pai a, haksa tak a ana neikhetu anu adi mahmah in haksat mel ka sa hi. Pasal muanhuai leh hoih deuh khat khong nei hileh bel tua a dinmun amah numeisia in buaipih ngailou in, apasal in thil bangkim abuaipih vek thei dia, lungkham huai thou mahleh a lungkhamna aneep deuh din ka um hi. Himahleh bangkim amah meithai Emily khut a kinga lah ahi ngal a.
Hun hong pai zel a, keimah nasem a ka buai leng khanih sung vengveng hong phata a, himahleh Emily tanchin bangmah ka theihbeh a om non naikei, aziak bel a innlam ua vapawt dia hun ka neihlouh ziak ahi. Nidang a ka vei leh ka ngaih poimohna bang in leng ka vei in ka ngai poimoh nawn lawmlawm kei, aziak bel hun a kipelh sausim taak ziak hi'n ka thei. Himahleh hiaitan ka na buaipih, tha leh zung seng a, ka hun manpha tak ka na zatbeina pen, athawn a luangmang sak maimai ka tumkei himhim hi. Hun remchang masa penpen a kimuh nawn ka tup tinten lai hi. Nikhat Emily phone call ka dawng a, Phur tak in ka la a, himahleh Emily in bangmah genlou in a dai dide maimah hi. A kidiik feihfeih ging bak ka bil in bangmah zak a nei kei. Huai hon dawng le hon dawng lou a, dai dide a awm sung in ka lungsim ah,,,," kei toh kihoulim a ut ziak a hon phone ahi dia aw, a in lam ua pawt dia hon deih ahi ngei di,,,,bangchi ahi dia aw, kap lah a bang a,,,,,,,,,? Thil tampi hong lut man hi.
Sawtkuam tak ka ngaihkhiak nung in leng bangmah a gen louh ziak in, "signal ginalou hi'n teh", chi'n ken ka call back hi, Himahleh ka call a pick-up tuan mongmong kei a, vuai nga mahmah khollou in a ki ring bei hithet hi. Vuai nga mahmah ki ring bei ahihman in ken leng "hon hih khelh hin teh", chi'n ka nna ka sepsan nawn hi. Banghiam thil hoihlou hong tung di ahi chihlam himhim ka ngaihtuah kei a. Ka nasep semtui lua ka hihziak in, thildang bangmah leh ngaituah lou in ka sem hi. Sun singpi dawn hong hun tak in ka nu'n tukverh apat a hon sam a, kei leng singpi dawn di'n innsung ah ka lut hi. Singpi khong dawn a ka nu tawh ka kihoulim lai un, ka nu'n Emily tanchin hon genkhe mawk hi. Ken leng lamdang ka sa a, "kei vei bang a ka nu'n le ana veitei hi di eive,,,", chi'n ka ngaihtuah a, ka nu'n bel, kou gel kingaizawng sek dia hon ngai ana hi maimah a, ahon gen khiak tak in nuih chih petmah in ka nuikhe hial hi.
Singpi dawn khin ka nasep sunzawm mailou in ka room sung ah ka lut kawi masa nawn hi. Ka lungsim ah Emily ngaihtuahna hong lian mahmah mai a, ka phone chiang a lah pick-up theilou ahih chiah ka lungsim abuai mahmah mai a, "khatvei himhim call thak di", chi'n dawhkan tung a ka mobile ka la a, Emily ka call ngal hi. Sawtlou nung in papi khat, a aw putek melsim lam khat in phone ana la a, Emily ka kan leh lupna ah om ahihdan leh, tu mai a houpih theih ahih louhdan hon gen hi. Ken bel lamdang ka sa a, "damlou maw leh,,,,,,,? Chi'n kintak in ka dong kik pah ngal hi. "Dam mah e, himahleh buaina ka tuak ua hi. Nang kua e,,,,,koi lam apat na hia,,,,,? Chi'n hon dong nawn hi. "Hiai ah, (ka veng min uh leh ka min ka gen a) ka hia, amah hih ka lawm hoih mahmah ahihziak in a tanchin ka thei ut a, hon phone ka hi, tu zingkal lam in hon phone a, ka lak le lah bangmah genlou in a koih kik zel a, ken le ka sep di poimoh semkhin a hon call thak ka hi,,,,,banghiam buaina om na chih, hehpihtak in non hilh thei diam,,,,,,,? Chi a ka dot leh. "Bangteng hileh naman thou leh hiailam ah hong hoh zaw maive maw, phone apat a gensang in, a lawmhoih na hih thou leh paukam mahmah in kihou zaw ni,,,,", ahon chih ziak in ken leng selbuai sese lou in ka phone ka koih a, Emily te in lam manoh in kintak in ka diangkhia hi.
Lampi a ka tai lai in leng bangmah thil dang himhim ka ngaihtuah thei kei a, ka motor khalh le ka lungsim ah a omkei, motor dang toh kiphukha phialphial a ka tai chiang in traffic police te whiistle mutging toh, motor horn gingte'n hon halhsak guih zel a, ka lu kising harh kawm in, "Emily tung ah bang thiltung ahi dia aw,,,,, damlou in houpih theihlouh hileh ka maban lakloh chi na mahmah maizen e,,,,,a tanchin ka gelhsate, a tawptan tunglou a mite lak a ka gelhkhiak mawk di lah hilou dia, bangteng hileh, a tanchin ka gelh pen zaw thutuam ahi. A tanchin kim sipsip a ka gelhkhiak ut ziak a asih di lau ka hi", chih ka ngaihtuah in, ka ang-ma sialdan ka kitheikhia a, bangteng hileh, mihing hinna himhim ah le, Emily sithei hilou ahi, a tapa leh atanu toh inkuan kipaktak dinkhe lou a amualliam mai di lem sathei mahmah lou ka hi,,,,,", chi a kingaihtuah kawm in ka tai zel hi.
Nidang a ka bike parking sekna mun a parking sawm in ka taizel a, himahleh parkingna mun ong himhim ka mu kei, nidang a motor 4/5 kan khawl ngeilou hinapi huai ni in, parking area ana dimvek mawk hi. Lamdang satak in ka taikik a, a sak deuh lampi gei ah ka koih a, kintak a step a taisuk in Emily te inlam ka zuan hi........ Ka thilmuhte'n ka lungsim ahon kisual sak den lai hi. Emily te innkiim teng ah mipi kivei mutmut ka galmuh a, "Siatna thupitak khat Emily tung a tung ahi", chih ka thei siam ngal a, ka tha teng bang a ling zoihzoih zou hial hi. Awl-awl in ka naihsuk zel a, Emily te innsung ah leng mipi tam hun tawk tak a om uh chih ka muthei ngal hi. A ziak bel a inn zuaak(baang) saklam teng uh kilakhia ahihman in.
BUNG 10 NA
:::::-::::::-:::::::
Innsung lam a lut ka sawm leh mihing a tam ziak uhia, a inn aneu ziak chih ka theikei, inn dim phitphet in mipi ana om ua, mipi kar ah bangmah genlou in, di'p kisai lit-lit kawm in ka lutphei zel a, lupna khat tung a Emily kidik feih-feih ka mu a, "Emily silou ahi", chih ka muh tak in, neukhah in ka lungsim hong nuam deuh hi. Himahleh Emily innsung a banghiam buaina tung omlou hileh mipi hiai zahzah bangchi mah in a omkhawm kei di uh, chih bel mihai nilenglou adi'n chu kuamah hilh ngailou in achiang huntawk hi. Emily lah va houpih ngam chiah lou, mipite lah kuamah ka meltheih omlou ahihman in, ka buai mahmah mai a, thil omdan lah ka thei ut si a, va dot mai di kuamah ka thei kei. Tutna mikhat tutna di awm khong lel awng a om a, huai ah ka va kihentei ringot hi. Huchia, ka tutlai in, ka nung a nupi nihte kihouna in ka lungsim hon khoih in temta a dot bang mai a hon sun hileh kilawm khop in ka om hi, "Siamte, nungak fel leh melhoih in hiai banga thil ahih ut ka gingta thei kei a, himahleh ka nung a nupi tu te gendan lah ahi ngal a, bangteng hileh, hiaidan a thiltung mawklou di ahi. Thuchiang tak ka theih kiphamoh ahi, chi'n zum leh zah le khual lou in, Emily lupna tung a tu kianglam manawh in ka paiphei hi.
A kah-kah na a aw suak di le om nawnlou phial ahihman in, aw heu thiuthiau in hong paukhia a, "Eh,,,,,**** hong hoh maw, hiai ah hong tu tei ou,,,,", chi'n a lupna tung a tu di'n hon kokmuh hi. Kei leng ka vatu ngal a, bangmah le genlou in, Emily in amittui nul-nul mai hi. Emily in ka lungsim theisiam hileh kilawm tak in, ka maitang a hon en kawm in, "ka thiltuah, ka tung a thiltung tu zingkal a hon hilh di ka chih leh, bangmah ka gen thei kei a, hong hoh nachang bang na thei a, nafel lua, ka tanu Siamte in hon mualliamsan a,,,,,,,,,,,,,", gen sunzawm theilou in hong kidik nawn feih-feih hi. Bangmah gen di le ka theikei a, pasal chih mahtak in a nep didan le ka thei tuankei, "Emily, kap-kap keive,,,,,,,bangteng hileh, thil tungkhin chu bangchi zong teng in bawlhoih ut mahleng, hih didan tuan omlou ahi. Piching tak a na om di ahi,,,,,nangkia tung a thiltung hilou, hiai khovel a mi tampite ana tuahsa ahi,,,,,,", chi'n ka siam bangbang in ka hehnem teisam hi.
Nupi tek lam simkhat hong pai a, Emily kiang ah, a innlam ua kihihhalh hoihsa ahihdan hong gen a, Emily in "ngailou, kihihhalh ka ngai kei,,,,,,,", chi'n dawng mahleh, huai pitek in hahzot lua ahihman in leh, ken leng a thuakna adan hong om deuh khakleh chi'n pitek hong thil gen ka na huh pah hi. Pitekte innlam ah kisuhalh di'n ka thum un ka diangkhia uhi. Lampi a ka pai lai un, Emily in, a lawmte ka hihdan khong anu kiang ah gen in, huai pitek leng, Emily pasal James nu ahihdan hon hilh hi. Sawtlou nung in, Emily nute inn ka tung uhi. Innsung a tutphahsau ah ka tu sak a, a kiang a tu kawm in thildang ngaihtuah leh, ka chih man in, ka siam bangbang in chiamnuih khong gen in, ka chiak naknak teisam hi. Emily phone ahong ging a, Eric ahi ngei di,,,,,,,,, sawt le kihou manlou in, Emily khophok lou in hong puk suk mawk hi. Chouka a anu singpi bawllai kintak in hong taiphei a, ka nih un ka siam bangbang un ka buaipih uhi. Harh thei zoklou ahihman in, Emily nu'n a innveng ua nurse training suakthak khat om ahi ngei di chu,,,,, huai sam ding in a vapawt khe ngal hi.
A lu khong puankawt a dep in, ka siam dandan in ka buaipih sunzom zel a, sawtlou nung in, pang-ngai tak in hong omthei nawn vanglak hi. A nu hong pai pah di sa a ka ngakngak hang un hong tung thei himhim kei hi. Nurse sam dia a kuanphei leh, Emily te inn luahna pa'n, Emily te in zuak a phelh khong uh lungkimlou in, Emily pa toh kina buai in, huai innneitu pa'n, Emily pa singtum a khen ana hia, huai Emily nu'n vatuak kha in, Emily khophok lou a om le ngaihsak manlou in, apasal abuaipih zaw hi. Emily le hongharhta ahihman in, a thiltuahte leh Siamte sihna ziak thei ut ka hihman in, huailampang mah ka gen pih zel a, atawp in Emily in leng hichi'n hon gen nawn hi.
"Ka tapa in hon phone masak pen khah karkhat vel paita hi'n ka thei, phone apat in Eric in hichi'n hon hilh hi". "Siamte kiang ah Unau ka hih dan leh thil omdan bangkim ka hilhta a, himahleh i gintak bang ngei in, Siamte in a gingta nuam kei himhim hi. Thil hithei hilou ahi, khovel omsung hiaibang a thiltung ngeilou di ahi. Tung di hi lehle eigel kar sese ah tung lou di ahi , na hon deihloh man a na suanlam bawl hi maw,,,,,,hehpihtak in hon khen mahmah ken aw Eric,,,,,,chi'n kap zoihzoih kawm in hon ngen hi. Ken bel unau ka hih dan uh thei chiangta ka hihman in, kei theihchiang bang in Siamte inle theichiang meng henla, unau dan in, kikhosa vanglak leh ka nih ua a dia zangkhai huai di chi'n, ka hun remchang teng ah ka hilh den hi".
"Ni 3 nung vel in a lawm nu'n hon phone a, Siamte in, ann le ne nuamlou, bangmah ne nuamlou, class lah kai nuamlou, lupnatung a lumden ahihdan hon hilh a, kei leng a nitaklam ka hostel ua pat in, Siamte mu di'n ka vakuan hi. Siamte in hon mu mahleh hon mu dan inle alang kei, et le hon en kei a, a etna ngei en in, atu ngem-ngum maimah hi. A kiang ah ka vatu nai a, thil omdan ka dot leh, "i kiteng theih kei di leh, ka kihih lum mai di,,,,,' chih teng in hon dawng hi. Himahleh ken bel paukam nem leh paukam pang-ngai tak in ka thuhilh a, a kihihlup mok leh, a nu leh kei a sang-gampa thuak ahaksat didan khong gen in, ka khem zel a, damtak in i om dia, pasal hoihtak hon nei di nei voi, na mel lah hoih, na pian lah nalh si,,,,, khovel ah kuamah phulouh na nei kei,,,,,,,,,,chi'n chiamnuih thutak in ka gen hi. Amah a tawp in hong nuikhe khong a, ka awm a hong bawh in, "tuni apat Eric chi'n ka hon sam nawn kei dia, 'U' chi'n kon samta di aw,,,,, ka damsung in na nau ka hi dia, nang le ka u hidenta in aw,,,,,,chi'n kah-nuih chihdan in hong om hi".
Ken leng hichibang thu khong Siamte in a hon gen man in, muanmohna himhim ka nei kei a, Nitaklam khomui zul in ka paisan nawn hi,,,,,, ka ki phone zel ua, ka hostel uh kigamla lawmlawm kei mah leh Exam khong naita ahihman in, nitak chiang in bel ka mu man kei. Huchia lungmuang tak a ka omlai in, tuzingkal a ka thou ka phone ka et leh miss call 20 lam mahmah ana om a, ka et leh Siamte ana hia, kei bel huaizan ka ihmut baih ziak a theilou hilou in, ka phone silent a ka koih khak ziak a theilou ka hi,,,,,A nuai ah msg khat ah "mangpha" chih teng ana kigelh leuhlauh hi. Ken leng nitak a mangpha hon khak na hin teh chi'n, zingkal ka wish ki'k pah hi,,,,,Nidang a ka msg second khat le kihal manlou phial a hon reply sek ahia, huai ni in dakkal khat pai nung in leng ahon reply kei a, lamdang ka sak man in ka va phone hi. Ka phone thei tuankei, swich off a kichi zel bok si. Ka buai a, thu theihchiang ut in, a lawmnu ka phone nawn leh, a omna theilou chi'n hon dawng mawk hi. Kei leng breakfast le ne manlou in, Siamte te hostel lam ah ka taiphei ngal a. Kin tak in Siamte room ah ka lut a hi. Siamte room sung ka va et leh kuamah ka mukei, beidawng tak a ka om lai in, lukham nuai a aphone koih ka mu a, phone la dia ka kun leh lehkha them khat ka mu a, a lawm nu a dia agelh ahi. Hostel building khang huan ah ka om chi'n ana kigelh hi.
Innkhang huan lam manawh in kin leh buang in ka diang suk ngal a, ngaihtak a kikou kawm in, Siamte,,,,,,,,,Siamte,,,,,,,! Kuamah hon dawngtu di himhim a om kei a, hosteler te'n ka aw za in et in hon en kheukhou maimah uhi. Ka zong zel a, huansung teng zongsuak vekta ka hihman in kik ka sawm hi. Kik sawm a ka kihei laitak in, ka pamlam singkung ah mikhat kikhai lai ka mu a, ka kiguih nakluat ziak in, kei leng ka kikoukhe hial hi,,,. Kua ahi hiam? Chih theilou ka hih man in kintak in ka naih phei a, akiang chit ka tun in, ka sanggam nu, Siamte ahi chih ka thei hi. A hinna ka hut man khak leh chi'n kintak in singkung ah ka kal tou a, ahih ziak in nitak a ki-oklum ahihziak in lamet di bangmah a om nawn kei. Midangte le hong paikhom ua, midangte'n bel khoih nailouh a police hilh phot di chi'n gen uhi. Himahleh ka sanggam nu singkung a aluang kikhai en maimai theilou ka hihman in, kuamah gen ngaikhelou in ka valakhia hi".
Emily in Eric gendan teng ahon hilhsawn khit in, khasia kisum chih theih ngoih-ngoih kawm in, hichi'n hon sunzom nawn hi,,,,,, "Huaithu ka zakna ahihleh zingkar lam, na hon phone maa deuh ahia, hon hilh di chimah leng ka khasiat luat ziak in bangmah ka gen khe thei kei hi. Tua ahon phone nawn na ah, tuni a hon puaktouh a sawm dan Eric in hon hilh a, lenna a hon paipih di uh ahihman in, hong tung hak lawmlawm uh ka gingta kei. Ka pa lah tua khua phoklou a ICU a om, ka nu lah hat nawnlou,,,,, ka tanu ruang dawn dia kei le ka kuan ngai ahi, chi'n, mihai bangmai in, thakhat thu in hong ding guih hi. Emily Innkong lam pawtsawm a apai ahihman in, ka vadelh a, abaan ah ka valen a, "Emily, na lungkham didan bangkim ka thei, ahihziak in, piching tak a na thuak poimoh mahmah ahi. Na tanu ruang dawn din mi tampi a kuanta uh. Innlam a na om hoih ahi", chia ka nep hang in bangmah a ngaihkhiat utlouh ziak in, a nung ah ka zui ha tei top hi. Gengen mahleng hoh thouthou di chih ka theih ziak in, taxi ka chang pih a, ahong taitak in, taxi ah ka lut pih a, airport lam zuan in ka taikhe nawn uhi.
Tagah ahihziak hia, Siamte ruang dawn di mipi a tam lawmlawm kei ua, vengsung makaite leh a lawm hoih ahi ngei di chu, mi 5 vel toh Siamte ruang ngak in ka tu ninep uhi. Emily lah ka houpih zou nawn mang kei a, a vengsung makaite ulah meltheih kuamah ka nei kei. Ahihziak in siatna lamthil ahihziak in, phatuam ngaihna hiven chi'n ka thuak hamham a, lenna leng hong tung a, Siamte ruang lakhia in vengsung heutute'n motor zat di achih uah ka kiguang uhi. Lenna tuangte ahong kumkhia uh amuh rual-rual in Emily in, "ka tapa, ka tapa neihsun Eric,,,,Eric,,,,,, chia kikou kawm in, na sang gamnu na nau Siamte koi a koih na hia, bang hong kiloh na hi ua,,,,,,,,, chi'n tangval lian mahmah, amel bang buangsim thing-theng zawzen, kawi in hon kap keuh-keuh mai hi. A tapa ahi chih ka theisiam ngal. Ken bel gen di theilou ka hih chiah a kiang ua ding in ka mittui luang di ka na dang tei hamham hi.
Innlam zuan in ka kipankhia ua, azan azan a vui di chih ahihziak in, kin-le-buang in vengsung makaite toh vaihawm ngai leh hih di kulte ka buaipi zungzung uhi. Huchih lai in Eric in vengsung heutute lak ah, tuzan bek hon kolsak lai mai un, dan nana neihsa uh palzuuttu hih di pen thil nuam leh hoih hikei mah leh, ka nu leh kei mahmah le ka nau sihna in hon haisak zou hial di abat ziak in, tuzan bek a ruang bul ah hon omsak lai hamham mai unla, zingchiang bel bangkim nou khut ahi vekta di,,,,,,,, chia a ngetna pomsak in, vui dia a kisak uh topkik in, aruang ka zanhahpih uhi. Kei leng sunlam a ka nasepna gimsim mah leng Emily leh atap Eric lusun mangbang a om mu gegu paisan thei ka hihlouh man in, siamlou kawm kawm a a nem di'n a kiang uah ka tu zanhak tei hi.
Zingkhua hong vak a, khovak in Emily te nuta kipahna atun tuan kei,,,,,,,akap ua, a tanu hankuang beng in, ngaih taktak a kikou in, mipi ma ah a tanu ngaihdam a ngen den hi. Mit ngei a mu a, bil a zatute adi'n bel et maimai ahaksa ahi,,,,,,,,Pasal kichi sek mah leng huai ni bel ka kipasal sak zou kei a, ka mittui luang di dang zoulou in ka kapkhe tei hial hi. Hanmual gamla ahihman in dak 11 hong ging in, Pastor pa'n Siamte khakna hun ahon nei a, a neihkhit in hanmual lam ah Siamte, nungak melhoih, lungsim singthou tak mai, a taksa vuiliam ding in ka kipawliamta uhi. Siamte han tung ah Emily kahlaa in kuamah kisum sak theilou in, Siamte it ziak a kap toh, Emily hehpih ziak a kap toh,,,,,,,,Siamte vuizou innlam zuan in ka hong ki'k nawn uhi.
Eric in Lamka a apute hong zin uh ahihdan a nu kiang ah agen a, Siamte vuizou in ka tung ua, sawtlou nung in mipi tamzawte'n hon paisan ua, sungkhat laina leh mi tlawmngai tamlou toh ka tu tuantual lai hi, Eric phone a hong ging a, apu in anu, Emily te inn a theihlouh ziak a thuai a ngaih thu gen ahi ngei dia, Eric le kintak in a pute vathuai di'n apawtkhe ngal hi,,, Sawtlou nung in, Eric te leng, a pu toh, a pi toh hong kizuilut ua, Emily nu bel a pasal damdawi inn a om ahih ziak in, Siamte vuina a hong tel zual, a kin theilam a damdawi inn lam paikik sawm ahi. Himahleh Amah Emily nu leng ahon nangman geih uhi. Huchi'n thil omdan khong gen in, Siamte iit a khasia kisa kap pawl toh, ahun paisate ua hihkhial kisa a kisik ziak a kap pawl toh akap in hong kap thak vengvung nawn uhi. Awl-awl in thom hong dai hiaihiai a, Sungkhat laina ngen omkhom ahita uh. Emily te innkuan khosak zel didan khong gen a hong kihou tak un, kei leng sungkhat laina a telkhalou ka hi chih kithei in, ka siam bang tawk in, Emily te innkuan ka thuakpihna thu gen in ka innlam uh zuan in ka paisanta hi.
Writer's Note : Bung 1 na apat bung 10 na kal, siamlou tak a kon gelh himahleh, phatuamngai tak a na hon simsuak sak ziak un, noute tung ah kipahthu naktak in ka gen hi henla, na hon fuihna, phatna paukamte uh, zak anuam a, phurna/lilawpna tamsem hon pia ahihman in chikmah chiang in ka mangngilh ngei kei dia, noute'n le a tangthu in a etsak, i hinkhua a zir di omte zir suahna a zang a, kibawlthak a ngaihna te a kibawlthak thei chiat ding in, ka deihsakna sang penpen kawn laan ahi.
________________________________________
By ~ Nasri Jona Tawmbing TxNâ
BUNG 1 NA.
THUMAPI : Awle ! "EIMLY HINKHUA" Bung 1 a ka gelh pat, Bung 10 na ah ka na beisak hi. Vok-ek ka napsak ziak hilou; ngetna a tamsim ziak in, reader te ngetna zahtakhuai ka sa a; Pathian panpihna toh, Part - II a hon sunzawm di'n ka hong kisa hi. Hiai Part - II ah a tawpna di tan genthei naikei mah leng; a tawpna chiangchiang pen, facebook lam ah sutzop kisawm nawnlou ahi chih, ana theihsak chiat ding in ka hon ngen masa hi. Doc lam ah, koikhom di leh koihkhom lou di chu; group Admin te khut a, thuneihna sangpen toh ka pia ahi. :putnam:
Pathian thu gensiam taktakte'n; "ginna a ka unau," chih paukam ana zatsek mah bang un; hiai laigelhna tungtawn a ka unau pa' Naa Muu Samte tangthu gelh; "ITNA LALGAM (Khuanu ruatloh) chih a gelh pen, ka gintak sang in a hon gelhsawt vanglak a. Huai in, kei leng ka post ut hun in ahon post sak theikei hi. A ziak bel, ka post di ahon dal ka chihna hilou in, kei ka kidalsak ziak ahi....lol
Huaichiah ka gelhdan tangpi; i pau u hi gelhsiam ahaksa a, theih leng ka theisiam gina thei mahmah kei hi. Ets na; "ka kipak lo petmah/ ka kipak law petmah" chih khong, 'O' i nei ua, 'AW' i nei bok uh, tamtak in i zatdan kibanglou ahihman in, ken le dik a ka theih "kawn ngai LAW petmah" 'LAW' hon zang mai ka hi. Adang, gelhmat di leh gelhmat louh di khong leh thil dang tampi a-om; diklou le tampi a-om di chih bel; ka khutzung zah ka theih chiang bang in ka theichiang; a tangthu paidan i ngaihtuah kawm in, gelhdan dikloute khong hon en kawm zel unla; comment na lam khong ah hon hilh zel ding in ka hong ngen ahi. Aziak bel, agelh dandan in i sim a, geldan dik hia, diklou chih thei gegu a na hon gen louh chiang un; ei, a gelhtute adia le masawnna omlou ahihman in, i theih bangbang genkhom in kikumkhom siausiau leng, a kuakua in leng ma' i sawnphah ngei di'n ka gingta. Huaiziak a hiai bang a ngetna, kisuanglah hetlou a hon bawl ka hi :)
-----------------------------------------
Emily hinkhua ngaihtuah in kei leng ka hun tamzaw ka zang bei a. Siamte sih ni a; lungleng taka a-omlai mu gegu a ka paisan mok khong ka kisiamtan thei hetkei hi. Himahleh innkuan vai gen ahihman un kei ana kidaihlah nang omlou hi-a ka theih ziak a paisan ka hih man in ka kimohsa lawmlawm khol kei hi. Huchi-a lupna tung a thazoi mel tak a ka lup lai in ka room ah ka nu hong lut a; thil omdan bangkim ka gen leh ka nu'n "a kin thei lam in na'va pha nawn mai kei dia. Ahimhim thu in, innkuan vai a hawmna ua nang na va tel le nang hih di hilou mah ahi,,,,,,hithei hi leh ei inn lam khonga ompih mai ka ut maimah,,,,", chi'n ka nu leng kisu'm zoulou in hong kidiik hial hi. Ka pian nung, ka nu kah khatvei ka muhna' ahihman in lamdang ka sa hial hi. A ziak bel ka pa' tawh nupa kituak tak himah le uh, kinak hun khong nei sam thou uhi. Himahleh huai hun ah pe'n; ka pa'n na'k taktak in sal in, soisa sek mahleh khitui luang hial in a-om ngei kei hi.
Ka nu thu gen in hon zoh mahmah ziak in; ka phone ka lakhia a, ka nu muhlai mahmah a phone ut ka hihman in, Emily No. ah ka call ngal hi. Hun sawt kivei simta mah leh Emily in ka aw azak ziak hia ? bang ziak ahia chih ka thei kei; khasia in, bangmah le gen theilou in hong kap nawn hi. Bangmah gen' lou a, sawt simtak ka om nung un, kah(cry) aw kawm in, " Nas, chim ka kisalua, hun na neih leh hehpih tak in hong pawt ve,,,,,Eric pu te nupa lah nidang a hon bawldante ziak un ka ngainna in; akiang ua om leng ka peih mahmah kei a, amel uh ka muh vuak in le'ng ka thangpaihna abei thei nai kei. Ka nu lah damdawi inn lam ah, ka pa' ompih in abuai den a,,,,,,Eric lah, nelou, dawnlou a om theilou ka hih chiang un; kilawh a akuan khiak ngai,,,,,,lungleng tak in inn ah ka om,,,,", chi-a hon gen tak in, kei leng Emily te inn lam a potkhe di'n ka kisa nawn hi.
Emily te inn ka lut a, kaal nih lam bang paita ahihman in midang kuamah lengla' le anei nawn kei ua, Emily gen bang ngei in, Eric pu te nupa sitting room ah a-om ua, Emily bel sam thou lingleng kawm in varanda ah atu hi. Eric pu te nupa Aizawl a ataam lai ziak uh bel Emily lungleng nem di hilou in, Eric thuai kiik teitei a-ut man uh hi di'n ka va gingta mok hi. Ka houpih ut tha le asuah louh ziak in; varanda ah Emily kiang ah ka tu tei hi. Sawtlou ka tut nung in Eric pu te nupa leng kholak pawt dia kisa hileh kilawm tak in, kichei kawm tak in innkong lam ah ahong potkhia ua; pau lou a ka na et lai un, Eric pu hong paukhia a, Emily kiang ah. "Damdawi inn lam ah na pa veh in ka va hoh dek ua; ka hong paihak kei di-uh',,,", chi'n a potkhe ngal uhi.
Emily in apot nung un hiai dan in hon gen hi. "Eric pu te nupa le'ng Siamte sihna ziak a Aizawl lam a hong hoh ahi zenzen kei uh. Eric a taan khak uh alauh ziak ua hong hoh uh ahi. Kar masa pek a paikiik sawm ahi ta ua, himahleh Eric in zui ut bilbel lou ahihman in, ka pa' hong damsuah hun a kihouna thak nei di'n a chamlai uhi. Tu'n kar nih vengveng a-om ta ua; Lamka lam paikiik ding in hong kisata uhi. Himahleh kou nuta tungtang, ahun paizel di gelfel ngal vaklak hoihsa in, ka pa' dam hun ngak uh hi. Himahleh ka pa' lah damlam manawh sang in kiakniam lam a manawh deuhdeuh mai si a, amah pen omlou a vaihawm di lah dik khin lou ahihman in; ahong hoih lam-en ngellou kawm in Eric pu' te nupa in leng karkhat dang cham di'n thu pukna a bawl thak uhi. "
Hon gen zel a,,,,,"Siamte sihna ziak in Eric le'ng ka gintak sang in thuakdan a siam vanglak a; lungsim pichinna tak khat aneih ziak le ahi maithei. Kei ahon neem zaw mah sek hi. Mahni tate phat hih thilnuam hikei mah leh, Eric pen namuh leh natheih bang in tangval melhoih, a taksa lah lian thetthut zawmah ahih ziak in ka vengsung ua nungak hon in a ngaizawng thei mahmah mai ua, himahleh Eric bel Siamte sihna ziak le ahi maithei, numei ngaihsak lawmlawm lou hi'n ka thei, a gu-k a ana buaipih sek ahih lebel ken bangmah ka theihpih kei; kei muhdan in bel ngaihzawng le neih ut na lungsim nei nawnlou hileh kilawm in ka mu hial hi,,,,,. Lehlam ka ngaihtuah chiang in, Siamte sihna ziak hi lawmlawm kei mah leh niteng hun teng a ka nek di uh lawh a midang nasem ahih ziak in nungak lak khong a kisuanlahna' nei hi ding bang in ka gingta sek hi.
Ka vengsung ua nungak melhoih tak; anu leh pa le officer lian mahmah ahi uh, ka tapa Eric ngaizawng ahihman in, ka inn uh; mi inn nuai kawtong leh neu zaw mah khong ah leng amah in hong hawh sek hi. Himahleh Eric in bel ngaihzawng di et a le enlou in, lawm pawlh in kipawlhpih zel hi. Himahleh huai nungak nu'n buaipih zou law mahmah ahih ziak in; Eric leng a omdan zanlam deuh apat in hong danglam deuh in ka thei hial hi. Ka ngaihtuah sek a, numei mei in pasal va hichi buaipih chih mok, deih telthei dinmun a ding hi leng ka tapa Eric toh ka kiteng sak kei hial di. Himahleh tu dinmun in bangmah ka hih thei kei. Kei ziak a Siamte in ahinna taanta, ka tapa neihsun lungkim lou tak a ka koih di ka lau ahi. Nasem a akuan ding leng ka phal ngei kei, himahleh talou ahihman in; ka khouhna bangmah a ngailou in a kuankhe teitei zel hi.
A sum lawhsuahte leng a kim sipsip in ahon pe vek zel a, himahleh chikmah a nasem ngeilou ka tapa', nna asep ziak a akhut teng dulh gai vek khong ka muh chiang in hehpihna'n ka dim a; kuan nawn lou di'n vuaitam ka gen ta, himahleh ahon dawnnate thupi ka sa in ka suang mahmah mai hi. Tuzing akuankhe di bang houh a-om nuam ngellou ahihman in, kuanlou dia ka khouh leh hichi'n hon dawng hi,,,,,, "Nu, ka ut ziak a nasem a kuan ka hi kei, kuan lou in, inn ah om leng le, nek di chu inn veng, louvengte ziak in imu ngei di, himahleh, midangte huh ngai a' om utlou ka hi, tangval ka hi teita a; lawhsuah bangmah neilou a' om ut nawnlou ka hi, huai ziak in ka zirna lam le ka sunzawm nawn kei dia; tua ka nasep dan in niteng in ka kilawh mai dia, i nih a i nekkhop ka lawhsuah naak leh; kipak veve ka hi,,,,, " ahimhim thu in hiailam nuam ka sa, nungak lah ei buaipih ngailou, amau hon buaipih zaw uh. Lamka lam hiam, ka laizirna lam khong bang ah om leng ngaihzawng neih di le zong petmah ngai di hia,,,", chih toh nasem dia potkhiak thuah ngal hi.
"Eric, tangval kitoudelh mahmah khat hi di eive maw, ahoih mahmah ve, hiai bang a tapa fel na neih khak na hampha lua,,,," chia ka gen lai in, Emily phone hong ging a, Eric pi'n, damdawi inn a apa serious ahih dan hon gen a, akin thei lam a damdawi inn lam zuan di'n hon gen hi. Huai thu in Emily lungtang phong mahmah ahih ziak in huai thu azak phet in hamhaih mahmah mai a; ahih dipen leh gen di pen le theilou in hong khol dedu maimah hi. Sawtkuam tak huchia hong om nung in,,,,,,, "ka pa hong sih mok leh ka maban a ka thil tuah di bangkim ka thei vek; Eric ka tan theih nang a hon panpihtu-di omsun ka pa' hong si leh Eric pute'n ka tapa' hon laksak nawn di ua, bangchi'n kei kia'n ka khosa thei mahmah dia, ka tung a hehpihna neuchik bek le neilou uh ahihdan nang le nathei mahmah ta di maw,,,,,,,chi'n ka liangkou a alu nga' kawm in hong kidik nawn feihfeih hi. "Emily hiai dan di himawklou ahi. Bangteng hileh na tapa Eric le sia-le-pha thei ahi ta a; nang hon taisan a' apute' inn lak ah ahon paisan ka gingta thei kei. Bangteng hileh huai thu chu i gen nai dah mai di. Damdawi inn lam ah akin thei lam in i va hawh peumah phot dia, Eric le bangmah hilh naidah mai inla,,,,", chi-a ka gen kawm in, kisa mengmeng ding in ka hilh ngal hi. Emily le a kinthei bang pen a hong kisa in, room apat hong potkhia a; ahong kichei hial zaw, nungak tamtak sang in le etsuak zaw ka sa hial hi. Bangmah genlou in ka na en maimah hi. " Nas, ka manta, na hon khak mai ngai di keive maw, damdawi inn apat na ut leh nawn paisan nawn na di,,,", chi'n ka kipawkhia ua, damdawi inn ka tung tan un kamkhat in le ka kihoupih kei uhi.
Kintak in Emily pa' omna word ah ka lut ngal ua, bangmah khua phoklou ahihman in ICU ah koihlut thak nawn uh ahihdan ana hilh uhi. Emily nu leng kongkhak bul ah kap kawm in ana tu a. Kou ahon muh phet in hong ding khia a, Emily toh kikawi in hong kapkhe nawn mok uhi, Emily pa' dinmun thei kei mah leng damsuah dia gintakna neilou ka hihman in, anep didan tuan le ka thei kei. Akiang uah bangmah genlou in ka tu a. Eric pu te nupa leng bangmah gen di le theilou in ka ki-entuah maimah uhi. Sawtlou nung in Doctor pa ahong potkhia a, lamet di bangmah om nawnlou ahihdan hon gen a; a buaipih di dang om tuanlou ahihman in, Eric pu toh ka buaipih ua, a inn lam uah ka kipawkheta uhi.
Misi om gegu a paisan kilawm ka sak louh man in, kei leng Emily pa' te inn ah ka om lai hi; himahleh vengsung mite hong tam ta uh ahihman in, Emily kiang ah ka va pai a, inn lam a paikiik phot ngai ka hihman in, paikiik ka sawm dan ka va hilh hi. Emily in leng kipahthu khong gen in, zingchiang a hun ka neih leh hoh nawn dia hon deih thu khong ahon gen a; ka paisan hi. Himahleh ka kisiamtan thei mahmah kei. A ziak bel, siluang om gegu a va paisan chih mok, pi-le-pu dan a le kilawm lou ahi, chi'n ka kiik nawn a, ka nu ka phone a, thil omdan gen in ka va zanhak tei hi. Zingkhua hong vak a, a vuina khong neih khit in kei leng ka inn lam uah ka pai a; ka pa mel ka muh in hon hehsan ahi chih ka thei siam ngal a, pautam louh hoih ahi; chih ka theih ziak in, bangmah genlou in ka room ah ka van khong kheng in, kisil di'n bathroom ah ka lut hi. Ka phone bang tui lak ah ka suke kha zawmah a, Bawlhoih theih nawn louh ahihman in, Emily No. leng ka nei nawn kei, digit 10 lel ka na byheart louh poi ka sa. Himahleh a inn uh ka thei thou, chi'n ka kineem lai thou hi.
-----------------------------
BUNGA 2 NA
Nitak ann ka nek lai un ka pa'n, "Na sanggam nu, khanawn mai a pasal nei di chih thei gegu chin a', kisak ngai a tamtam maizen toh, amah ngaihsak manlou zen a potpot tel di ahia hia,,,,"??? Eilah i nna a kibuaiden,,," Chi'n hon gen hi. Himahleh bangchi mah in ka dawng kei a, ka pa'n leng bangmah a gen nawn tuan kei. Gimsim ka hihman in ann nekham ka lum ngal a, lupna tung ah Emily pa sihna sang mah in, Emily te nuta om didan in ka lungsim a zou zaw hi. Emily te nuta tung a thil tungthei dia ka gintak dan banglou teng ngaihtuah a ka om lai in ka na ihmu a, nidang a ka nu'n ahihdan pangngai in, singpi hong pia a, kei leng ka thoukhia hi.
Ka sanggam nu' pasal nei di buaipih a hun ka zat ngai ahihman in, kei leng Emily hon ngetna ka hih buchi'n sak thei kei; ka hun tamzaw ka nau buaipih ka hihman in, thildang ngaihtuahna hun le ka nei man nawn kei hi. Kha hong thak a, ka nau inle pasal neita ahihman in, "inn sung enkoltu di numei poimohta,,,,,,," chih ka nu leh pa paukam ka zak tampen ahita.
Mahni nasep hong ngaita ahihman in, Emily te inn lam ka phak louhna le a sawt ta mahmah mai; Emily in lah hon contact lou ahihman in, hun remchang masa pen a a inn uh vaphak ngai ahi chih ka thei, a ziak bel a tanchin uh bangmah theilou ka hihman in leh; ahon ngetna tangtun saklou ka hihman in kisathei hon sak di bang ka lau hi. Sep di lawmlawm omlou ahihman in, khanih nung vengveng in, nikhat Emily te inn lam pha di'n ka kuankhia hi. Emily te inn ka tu'n in, tangnel tak a, kongkhak le kiu lou a ka lut leh midang ana om mok uhi,,,,, Kei leng hamhaih kisan in gen di pen le thei lou in, "Emily koi-a om a ?, chi'n ka kan mok hi. Himahleh huai mite'n Emily kichi himhim ana theikha kei ua, ka lungsim ah banglou teng hong lang dundun man hial hi.
Huchi a lungsim buaitak a ka kingaihtuah lai in, room sung apat nungaknou khat hong potkhia a, huai nu'n, "Emily na chih hiai inn luahtu, meithei kha maw,,,,,,"? Chi'n hon gen hi. Ken leng, "himah e, nang theikha maw; koilam a kisuan uh a,,,,"? Chi'n ka kanzui pah hi. Vengdang a kisuanta uh, chi'n, a kisuanna veng khong ahon hilh a, himahleh a innluah uh theilou ka hihman in ken leng lawh ngaihna ka thei kei hi. A kisuankhiak na ziak khong uh huai nungak nu'n a theih bangbang hon hilh a, huai thu ka zak phet in, thangpaihna'n ka pumdim ngal hi. Bangbang hiam gen a sawtlou ka tut nung in, singpi khong hon piak sawmmah le-uh, dawnman ka hih louhdan ka gen a, ka potkhe ngal hi. Bangteng hileh Emily nu kiang ka va pha himhim dia, aman bel thei mahmah ngal di hiven, chi'n, Kintak in Emily nu te innlam ka zuan a; inn kongkhak a, tala kikhai ka mu hi. Lawh didan thei tuanlou ka hihman in paikiik ka sawm a, step a ka paitouh lai in, Siamte sih lai a nupi khat ka muh khak ka tuak kha hi. Ken leng Emily te nuta tanchin a theih khak leh chi'n, ka dong mok hi. Aman Emily nu'n a inn uh potkhiak san a, inndang luah ahihdan leh; a innlui uh midang in leita uh ahihdan ahon gen a, a kisuan khiakna veng uh a gen toh, nungak nu'n, Emily te kisuanna veng a gen kibang ahihman in, inn khat a tengkhom uh hidi'n ka gingta mok hi.Kipahthu khong gen in, ka inn lam uh zuan in ka paikiik a, Emily tung a Eric pu gamtatdan, nungak nu'n a gen pen dik hia diklou chih thei chiang chiah kei mah leng; dik dia gintakna nei ka hihman in ka lungsim abuai mahmah mai a. Thangpaihna'n ka pum dim hi.
Emily tanchin lah bangmah theilou ka hihman in, ka thil hih teng nuam sakna ka nei kei. Ka lungsim hon kam gemgum tu khat om hi'n ka thei a, Emily zonkhiak didan ah ka buai mahmah mai hi. A phone No. ka na byhert louh tel khong ka kimohsa a, aman le khatvei bek hon phone ngal leh kilawm hi-a, ka tung a lungkim louhna' khat nei hi'n teh chi'n, ken leng ngaihtuah buaibuai ka sawm nawn kei hi. Himahleh hun awl ka neih chiang in thil dang himhim ka ngaihtuahna ah alut thei kei. Emily om didan ka suangtuah a, ka hun tamzaw amah ngaihtuahna'n ka zang zawmah hi.
Vuaitampi Emily te' veng, a genna uah ka pawt a, Emily muh khak leh chi'n, ka meltheih leh ka maingal deuhte khong ka gamdot sek hi. Himahleh huchibang mi theikha kuamah ka tuak kha thei kei a. Pathian in, ka thil buaipih a tawptan ka tu'n di rem hon sakpih lou ahi di,,,,,, tuban zaw ka buaipih nawn dah mai di,,, chi'n vuaitam kihih buaibuai nawnlou di'n ka ngaihdan le ka bawl hial hi. Himahleh buaipih nawnlouh ka tup chiang in, buaipih utna leh poimoh ka sakna hong lian deuhdeuh hi. A ziak bel, Emily banghiam lampi khat bek a panpih theihna ka neih a, panpihtu a pan tei himhim ka ut ziak ahi.
Hun bangtan kihalta ahia,,,, chih ka thei chiang nawn kei a,,,,, Shillong a ka om lai a ka lawmpa, Khasi te khat in Aizawl muh a ut thu hon hilh ziak in ken leng ka na zawn pah a; amah leng a hong zin hi. Huai a hong zin, amah kia a potkhe theilou ahihman in ken leng kholak ka potpih a hong ngai hi. "Tuni chu Bazarpi lam ah vak ni,,,,,", chi'n zinglam dak 11 lak vel in ka potkhia uhi. Ka lawmpa van deih zawng khong en in; dawr tuamtuam ah ka lut ua, ka lawmpa ahih leh kicheina deih changkang sim mahmah ahih ziak in dawr neu ah ka lut kei himhim uhi. A van deih zawng tam simtak ka lei khit un, lei didang aneih leh neihlouh ka dong a, puanak lum lam adeih thu hon gen hi. Ken leng hoih dia ka gintakna lam ah ka thuai ngal a, dawr 4 le 5 lam ka et nung un leng a deihzawng ka muh louh ziak un paikiik mai ka sawm uhi. Huchia paikik mai ka sawm lai un; amah dawr khat ah a va lut thak a, ken bel inkong ah ka na ngak hi. Sawtsim tak ka ngak nung a le hong pai ngeilou ahihman in kei leng dawr sung ah ka diang lut tei hi; a van et te etpih dia ka kisak leh Emily ka mukha mok hi. Huai dawr ah Emily muh kigingta hetlou ka muh tak in lamdang ka sa a, hamhaih tak in ka om hial hi. Aman leng kei ahon muh tung in lamdang sakna a dim ahi ngei di chu, gen di pen le theilou in, ka ki-entuah heuhou mai uhi.
Emily,,,,,,,,hiaisan a bang hih e ? Damdam maw ? Na inn luahna na kisuan bang dia hon hilh lou e,,,,,? Chi'n ken leng ka gensuk pah hi. Huchi-a kimaingal tak a ka kihoupih lai uh ka lawmpa'n amuh tak in lamdang sak mel tak in hon en a; a khonung a agen dan in, aman Emily melhoih salua in, kou kingaizawng hi dia hon gingta a, hoih tak a ka kihoupih lai uh ana en ana hi dan in hon gen a; kei leng ka nuikhe hial hi. Ka lawmpa amah kia a paikik sak di lah ka ngaingam chiah kei a, Emily te dawr a ompih nilouh di lah a ning khak ka lau a, bangteng hileh chi'n ka paikikpih hi. Ka pai dek un, kei leng hun remchang masa pen a Emily te dawr lam a a pawt ngei kichiam in ka lawm pa toh innlam zuan in ka kiikta uhi.
Ka lawmpa'n aphak utna tuamtuam a neihte phakpih in, karkhat mahmah hun hong bei man hi. Shillong lam a apaisuk tak in, kei leng Emily dawr ah ka va dianglut ngal hi; Emily ahih leh ka gensa mah bang in, Siamte sihlai vel a amel, a taksa omdan toh a danglam mahmah ta; amel hoih in a maam mahmah ta. Neukhah lungsim nuamdeuhta le ahi maithei. Siamte a iit kei a, avei kei ka chihna hilou in, mihing in chu sih leh manna ituahlai in kithuak mah leh hun leh ni hong kivei tam hiaihiai leh, a thuakdan kisiam tou zel mai ahi,,, chih thei chiang tu te lak a khat ka hih ziak in, Emily le ka mohsa kei, a lungsim thaksak thei di, huai lampang bangmah genpih ka sawm kei a. A dawr khong ka enkual a athupi ngeimai, ka ngaihdan maimai in Lamka lam a a-omlai ale dawrngak lunglut ziak a kilawh sek hi-a, huai nna mah sem nawn eive. Chi'n ama' dawr hi dia gintakna neuchik le ka nei kei hi. A dawr a lut luat ziak in munkhat ah tu in customer a buaipih lai ka na en maimai hi. A gamtat a zangkhai in a fel mahmah mai a, paukam lah tasamlou zawmah. Huaiziak le ahi maithei, customer le ahau mahmah mai hi.
Dakkar khat phial mahmah ka tut nung in, nungak khat hong lut a, van lei di sa a ka et-et hang in huai nungak a neitu bangmai in a tangnel hi. Dawr neitu hi di'n ka na gingta mok a, Emily ka kiang ah hong paiphei a, amah khektu hong tungta chi'n, a innlam ua kipawl di'n ka kizuikheta uhi. Nidang a Emily zong a ka na vakvak na sa mah a hia, nidang a Emily inn neuchik, huai le mi inn nuai kawtawng a teng hizawmah lai. Himahleh tua ka omna uh, Emily tenna inn bel huai lai a atenna toh, lei leh van kikhiat tuk a kikhia ahi. A building le lianlua hikei mah leh a changkang a, hiai bang a inn thupi Emily in aluahzou mok pen lamdang ka sa hi; a dawr ngakna a kivak a, a kichawm zoh ka gingta theikei hi. Common room ah keimah in ka tu a, Emily room ah a van kikhek kawm in bangbang hiam gen in hon houpih zauzau hi.
Sawtsim keikia a ka tut nung in room dang apat in Emily nu, damlou chih theih ngawihngawih a gong, a hong potkhia a, kei hon muh phet in ahon chibai pah hi. Emily toh inn luahkhom uh ahi chih ka thei ngal a, huailam thu bangmah ka dong tuan kei, Emily nu'n damlou a khakhat vengveng lupna a lum ahih dan khong hon gen a, sawt dam dia a kigintak louh thu khong hon gen tak in, ken leng, "tua dan di hi mok lou ahi, natna khong miteng tung ah tung theivek ahi a, tu'n nang tung ah hong tung kha ahi mai; himahleh kigaihsiat nang bangmah omlou ahi. "ka dam pah di", chih lungsim nei a na thuak ngai ahi, a se lam kipiak di hi zenzen lou, ahoih lam zel kipiak di ahi,,,,,,", chi'n ka neem tei sam hi. Emily in singpi hon domphei a, singpi ka thum ua ka dawnkhit un, Emily nu'n, "kei zaw sawt tu' zoulou ka hi, ka na lum nawn ma idi,,,,,,", chi'n hon lupsan a. Kou leng Emily toh ka kihoulim zui ngal uhi.
Emily in a tanchin hichi'n hon gen sunzom pah hi. "Ka pa hon sihsan lai chu nang le nathei ngei dia, ka pa sihnung in Eric pu' te nupa' leng karkhat a chamlai uhi. Huai karkhat a cham sung uh bel kinakna leh kidouna phual a om bangmai in ka buai uhi. A ziak bel ka pa om nawnlou ahihman in; kou ka nu' toh numei maimai chi'n Eric pu'n zahtakna nengkhachik leng hon nei kei a, adeih pen Eric Lamka lam a pikiik a sawm tinten hi. Ka tapa ahi a, iit in ngai mah leng kei numeisia in lawh didan bangmah ka thei nawn kei, huai lai a panpihtu ka poimoh dan hon thei hi lechi'n zaw, na hon hehpih thou di'n kon gingta. Ka nu lah awhaam azak zek chiang a om theilou, lingpah zelte ahihziak in, ka kiselbuai chiang un, mundang ah hon paikhiaksan a ngai zel a; himahleh ka nu' bel dem nang bangmah ka thei tuan kei. Inn veng louveng samkhom di chi leng lah namdang ngen, eimi daan a indongta' chih khong ngai poimoh lawmlawm lou uh ahihman in ka tawpkiik zel hi. Ka beidong in zingkal khat hon phone ka sawm leh a paithei hetkei zaw mah a; Ka beidotna ahon behlap mahmah mai hi. Nang hon phone thei leng na hon panpihna ngen di chi- a hon sap sawm ka hi. Eric piching thou mahleh bang chi hiam in khem khe mok leh ka tap chaan nawn zel di; kei a dia damman omlou di,,,,,,karkhat phial mahmah ka buai nung un zingkhat kong kisel kha nawn uhi. Eric ngaihdan hong hi nawnlou ahihman in, room apat hong potkhia a,,,,,"kei le piching khat ka hita; ka om dandi ah bangmah buai na'ng a-om kei, ka deihtelna dan a om di ka hi,,,,,"chi'n apu hon hang san hi.
Eric in deihkhop mai di ka sak leh, "ka neu apat hon enkol a, hon kemtu na hih ziak un, ka hon zahtak a; huai ziak a bangmah genlou maimai ka hi. A himhim thu in kum hiaitan ka nu tellou in na hon koihta ua, tu'n Pathian lemgel ziak in ka nu leh ka sanggamnu ka mukheta. Huchih lai in ka sanggamnu' bel ka chaanta a; ka nu bel chaan thei ka hi nawn kei, ka nu'n leng hon chaan lou di ahi. Ka neulai a zuau thu na hon hilh na te uh, ka nu a sethei bang penpen a na gennate u leh, ka nu tung a na thil hihte uh mangngilh haksa ka sa mahmah hi. Himahleh kei hon enkoltu na hih ziak un bangmah ka gen ngei kei; huai na thil hihkhelhte uh ziak a ngaihdam nget nak sang a, hiai dan a na gamtat ut lai mongmong, hehpihna nei hetlou tel maw,,,,,, ! ? ", chi'n ka tapa Eric hong hang a, kisum zoulou in a mittui bang hong pawt hial hi.
Eric in huaithu a genlai in, kapkawm in gen nawnlou di'n ka na khou hi. Himahleh alungsim naa sa petmah zaw ahi dia, ka khou zou mongmong kei hi. Huai dan a Eric in hon gen tak in a pute nupa le a hong neem mahmah ta ua, bangmah thudang le genlou in munkhat ah atu maimah uhi. Eric kisiamtan theilou ahi ngei dia, "Pu, hehpih tak in hon ngaidam un aw, ka nu ka hehpih luat ziak a hiai bang a na tung ua paukam zangkha ka hi. Hehpih tak in ka nu kiang ah hon omsak unla; i dam dia, kimuh hun khong hong om zel di ahi,,,,,", chi'n apu ngaihdam a va ngen hi. Eric lungsim hoihdan ka thei a, a kingaihniam dan ka muh in ka mittui ka dang zou kei. Munkhat ah tu in ka na kap hi. Eric hong paiphei a, ka mittui hon nulsak kawm in, "Nu, nang hon taisan a koimah a pailou di ka hi, hehpih tak in na kahlai mel hon musak ken la, kipaktak a na nuih mel mah munuam ka hi. Na kahmel ka muh cha zaw ka nau Siamte,,,,,,,,,,,,,,," gen sunzawm thei lou in Eric hong kapkhe tei hi.
---------------------------
BUNG 3 NA
Huchia, a tanchin a genlai in. Kongkhak hong kikiu a, Emily in a va hong pah ngal hi. Tangval melhoih sim mahmah, mi hausa ta' ahi chih haih vuallouh, hong lut a, sitting room ah Emily tawh kia a' tu ka hihman un, hong heh a, kei sang a naupang zaw tham chih ka thei. Himahleh kei upa zaw le zahtakna nengkhachik le neilou in hon hangkhum lailai hi. Emily ngaihzawng ahi chih ka theisiam mai. Emily hel a pawt ka hih louh dan gen mah leng a gingta ut tuan mongmong kei hi. Paukam naa taktak hon zatkhum a, huchi mah bang in Emily le musittak in, nuthlawi maimai, chi khong in hong hangkhum lailai hi. Mineu zaidamna in a daih zou nawn kei. Ka tutna apat ka ding khia a,,,," Nang kua kisa e, kua e na hih, Emily toh hon muangmoh thei di'n bang chitan na tungta ua, ka gamtatdan leh ka kicheina athring ziak in maw non simmawh, nu leh pa nekgu-k sum a kilalian maimai; tuni tan a cheng khat le lawhsuah lou in hiaibang paukam maw nawn zat khum ngam,,,,,,,?? Emily toh kingaizawng ka hi zenzen kei uh, lawmta maimai ka hi uh. A hihziak in ka kitheihpatna uh bel na pianma' tham ahita maithei,,,,", chi'n ka hangkhum zialzial hi.
Emily in hon khouh ziak in ka dai a,,,,,, "Nunpui', ka gen hoih tak in ana ngai khia oh, nang toh kingaizawng di'n ken khatvei mah ka hon gen kei. Hiai inn ka hong luahtung un leng na lungsim put di bangkim, na gamtatdan apat in ka thei siam vek. Himahleh sun leh zan le genlou a na hon vil det ziak in, ko'n hehpih a, hon niallou maimai ka hi. Ahi tak in gen leng ka ta vual lek na hi. Ka tung a tuabang lungsim na put di leh, tuni apat in khatvei mah i kimu nawn kei di;" chih toh, inkong lam ah a sawnpawt hi.Innkong lam ah bang a' agen uh chih ka theikei; sawtsim tak, inkong ah a kihou uhi. A kihou sung un thil tampi ka na ngaihtuah a, kei bangmah lawhtak neilou a buaibuai mawk pen thildik pen hi'n ka thei kei hi.Emily kiang ah ngaihdam ngen ahi ngei dia, sawtlou nung in Emily le honglut nawn hi.
Bangmah le genlou a ka tut leh, amah hong paukhia a; " hiaipa'n hiai inn a ka kisuan tung ua-pat in hon buaipih den a, ken le ka ninglua a kingai dan a om mai ka hi uh. Chitei zensam leng; tulai khangthakte zumna amuhlouh dan lawmlawm uh. Ka ta vual lek in kineih sawm in, kei kiang kia hilou; ka nu lak khong ah ana ngen sek hi. Ka nu'n lah hon awi mahmah lou, amah lah uang deuhdeuh khat in hong om hi,,,,,"
Hichi'n a hon gen sunzawm nawn hi. "Ken leng Eric hon khouhna ka zak tak in, kap nawnlouh ka sawm a, khase mah leng ka ki-uum haamhaam hi. Ka tung uah Eric pute nupa lungkim mahmah lou uh ahihman in, huai zan mahmah in mundang ah hon kisuansan ua, koilam a om uh ahia chih le, bangmah ka thei zuui nawnkei. Kei ahihleh nna ka sempeih lawmlawm kei a, Eric leng atha zawi ahi chih zaw ka thei. Semlou in om leh, ngawl di chih thei in, niteng in, a kuankhe tei hamham sek hi. Ka nu lah ka pa' ngai a ahun leh nite zang in, a inn khong ua ka va pawt chang in, munkhat ah tu in ana ngui thei mahmah sek hi. Ka nu muhtheih khop in a taksa hatna a keniam hialhiai hi. Nu hichi tel di hilou ahi, hehpihtak in kihihhalh inla; ka pa' na ngaih tuahtuah hang a bangmah a phattuamna omlou ahi,,,,, chi'n ka siam bang tawk in ka ne'm teisam sek hi.
Eric in leng kei hon awlmoh ziak in, a zirna sutzop sawm non hetlou bilbel hi. Eric leh ka nu ahihleh, a kimaingal lawmlawm kei uhi . A ziak bel Eric pen ka ta ahi chih theithou mahleh, a tangval nung a amuh pat ahih ziak le ahi maithei. Eric in a zirna a tawpsan mok di ngaingam mahmah lou ka hih ziak in, ka theihtawp in ka genpih zel hi. Eric in, "Nu kei om kei leng bang ne-a, bang dawn di, damlouh hitaan ni a, kuan hon kem a, hon enkol di e,,,,,?" Eric thugente leng dik ka sa' himahleh,,,,,, Eric, kei na hon khual a, na hon hehpih taktak ahih leh, ka thupuukna na zuih ngai ahi, damlouh hitaan, chih khong zaw, ka na thuak thei law di; hon ngaihtuah ken la; na zirna sunzawm di'n na lungsim kibawl fel mai aw,,,, chi'n ka dawng hi.
Eric in le ka gente theisiam ta chu ahi ngei dia, bangmah in ahon dawng nawn kei hi. Hunte hong pai zel a, Eric niteng a asum lawh khiakte lah ka nuta ua ne gai zel ka hihman un, Eric zinna'ng chi'n ka nu kiang ah sum ka va ngen hi. Ka gintak hetlouh hinapi in, ka nu'n leng ana pe vanglak a, ka nu sum hon piak ziak in Eric in a zirna hon sunzawm thei non ta ahihman in; ka nu tung ah leng ka kipak petmah hi. Eric lah om nonlou, linkawm pipi in a zirna sunzawm di'n a hon zinsan hi. Huainung teng lungleng tak in hun ka zang a, nikhat lel leng kei a di'n a sawt thei mahmah mai hi. Kei kia a om-om tel chim kisa in, ka nu kiang khong ah ka va pawt zel hi. Himahleh ka nu kiang ah leng kipahna muh naksang in, lunglenna leh khasiatna ngenta ka tuak hi. Ka nu lah mi nehnou mahmah ana hih zawkmah toh, ka pa a gen louh chiah, Siamte agen a; akhen chiang bang in ka kah ni uh atam mahmah mai hi.
Ka nu panpina nget di lah nuam ka sa kei a, Sem lou in om lenglah ngawl di ka hihman in, ka hihtheih dandan in, puansop, anhawi, chihkhong in ka kilawh zel hi. Ankhong kon hawi a, mipuan niin taktak khong ka sawp chiang in; ka neulai a ka paneu zi hon hihsak dan tengteng ka lungsim ah hong langthak dundun mai hi. Himahleh huai hunlai a genthei leh simmoh tak a ana koihna ziak a, tua kei kisin ngailou a siam ka hi chih ka kitheih man in, lehlam tak ah kipahhuai ka sa veve hi. Himahleh ahunlai a ahaksatdan leh ka gentheih dan tengteng ngaihtuah in, ka paneu zi bel ngaihdam haksa ka sa petmah hi.
Ka nu kiang ka phaklouhna ni 4 lam hita ahihman in, kilawh zou, sunnung lam in, ka nu in lam ah ka va pawt phei hi. Nidang a ka nu varanda a tudeuh gige ahihman in, ken leng varenda a' muh kilamen tak in ka en hi. Himahleh ka nu mel ka muh louh tak in, mundang ah pawtkhia hi'n ka ngai a. "Omlou ahihleh, ka kiik mai di,,," chi'n kiik sawm ma hleng, ka lungsim khat hon kam gemgum tu om ahihman in, kiik hial lou in ka pai zel a, inn kongkhak ah kikalhlouh man in, kei leng ka lut paisuak hi. Room sung ah khuhging kheuhkheuh ka za' a, kintak in ka naih phei h. Ka thilmuh in ahon phawng telmai, lamdang ka sa, mulkim huai ka sak luat ziak in, ka mitkha ah a thamden a, ka kikoukhe hial hi.
Huchia, room a ka lut leh ka nu khua le phok gina' lou in, vuaktang petmah in ana lum ka mu hi. Ka naih phei zel a, thil omdan ka theichiang ta, ka nu'n pawngsual tuak ahi chih haihvual louh in, a van tengteng a kiang ah, kibotke'k sa vek in a-om a; amah leng akam, anak lak khong ah sisan aluang hial hi. Buaipih didan thei tuanlou ka hihman in ka siam dandan in, ka ne'm a, himahleh ka nu'n huaithu a za hia zalou chih ka thei kei,,,,,,,, Hamhaih tak a ka omlai in, police ah Report pah hoih ahi, chih ka theikhia a, police ka phone ngal hi; police te le'ng, sawtlou nung in ahong tung ngal ua, thil hihngai tuamtuam ahih khit un, damdawi inn lam ah a hoin puaktouh sak uhi. Damdawi inn ah ni 2 ka om nung un, pangngai tak in ka pawtkhethei nawn uhi. Ka nu amah kia' omsak kia hilou, kei leng numeisia hi ing a, mahni kia a khosak lauhhuai ka sakna hong lian mahmah ta a, ka nu tuah bangbang ken le tuakthei ka hihman in chi'n, keikia a teng ngam nawnlou in, ka nu kiang ngen ah ka va khosa hi. Ka nu'n leng a hon lungmuanpih mahmah hi'n ka thei. Ka nu bel ka gensa mah bang in, enkoltu di neilou a, a inn ua ka lut top lai a le hehpihtak leh duattak a hon na kem a, hon enkoltu ahihman in; a tung ah ka hih theih bangbang a siam ka suah sawm tinten hi. Ka nu leng hoihlam hon manawh zel in, ken leng naa poimawh tuamtuam ka sem thei nawn ta hi. Himahleh ka nu kiang ah ka om nung, ka nu'n milak a kilawh a hon phal ngeikei a, kuankhiak sawmsek mah leng, a hon hehsan maimah sek hi. Ka sep di teng semkhin in, ka niteng hihdan pangngai un, varanda ah lampi a motor tai leh mi kiveite en kawm in, ka kihoulim maimai uhi.
Ka ki houlim lai un ka phone hon ging a, Lamka a Eric pu ana hi. ' Na damzel uhia, na hoih zel umaw ,,,,,? ' Chi a hon kan di ka sak lai in, ka gintak louhdan tak in; "natung ah ka thangpaihna beithei mahmah lou ahi, phuba ka la lai di,,,,,, " chi'n bangbang hiam gen in hon koihsan hi. Ka nu'n kamka zen in a hon en a, a ziakbel ka omdan apat ka nu'n ana theisiam ahihman in. Ken leng thil omdan ka genkhe ngal a, ka nu'n bel lungkham huai mahmah kei, a hon chiamnuih na maimai in ngai ni,,,, chi'n hon gen hi. Sawtlou nung in Eric phone hong pai non a, a pu'n kei lak ah agen mah bang in, Eric kiang ah leng ana gen a, Eric in hon lunghimoh lua ahihman in, hong pai di ngen gengen mai hi. Himahleh ken bel "lauhuai lou ahi; bangchi mah a hon hihbuai thei nawnlou uh ahi. A hon hihbuai ua leh, dan bang in ka gamtang dia, athil hih diklou gah amuta di,,,,, lungkham nang bangmah omlou, nang ki-enkol hoih in aw,,", chi'n ka koih hi.
Bangmah genlou a ka om lai un, Ka nu hong paukhia a. "Lawmlawm tel maw, Eric khah huai na accident lai ua na paai pen hilou maw,,,,, bangkim na tanchin James in ahon hilhvek aka,,,,,, lamzang mahmah kei un teh. Kei tuahsia tuah le ka deih khopkhop maizen toh,,,," chi''n ka nu hong kapkhe maimah hi. Bangmah genlou a ka nu ka etlai in, ka nu'n amah pongsualtu hichi'n hon gen sunzawm nawn hi. "Varanda' a ka tut maimai lai in, pasal khat gas sia bawl dan a kigen in ahong lut a, ka gas chiang ngellou ahihman in, ken leng ka check sak hi. A check kawm in hon houpih zel a, ken leng hon houpihnete ka dawng zel hi. Na pa'n a hon sihsan a, ka lunglen dan khong ka gen leh, thakhat in hon bohphei a, kei damlou, tha le neilou, pitek in, huai tangval thahat zawh ngaihna a-omkei, ka kikou dek chian ka muuk hon humsak zel a, zou mahmah lou ka hihman in, a deihkhop amuh khit in kintak in hon taipawt san hi. Panpihtu samdia thohkhiak ka sawm leh ahon sualna ka taksa tengteng naa gaivek ahihman in, ka tha ahat nawnlouh toh; ka thou zok theikei a, ken le manman nawn tuanlou dia ka kigintak ziak in, lupna ah ka lumden hi. Huchih lai in nang na honglut geih a, huchilou hilele ka sih hial ka kigingta,,,,," chi'n hon gen hi.
Eric in a hon ngaihtuah ziak in hong paitouh di sawmsawm mah leh rem ka sak louh luat man in, ahong pai hial kei a, a vangkim in hon phone den hi. Himahleh Eric pu'n hon phone nawnkhak ka lauh ziak in, ken leng pilvang mah hoih chi'n, Eric kiang ah ka simcard haltum ka sawm dan ka gen leh Eric in leng rem a hon sakpih a, ken leng ka simcard ka haltum a; mobile nasan leng ka kem ngam nawn kei hi. Ngaihtuah dik kisa in, ka simcard ka haltum pen hihfuh kisa mah leng; nang contact nang neilou ka hihman in, ka lung abuai guu mahmah mai hi. Nang le hon phone ut mah lechin, nang le hon phone theilou di, phet lou a, ka innluahna uh nangawn kisuan ka hihman un, hihkhial bang ka kisa petmah hi. "Pathian lemgel ahi maimah diam maw, kei le, na inn ua pat ka pai, inn ka tung a, ka kisil leh ka phone tuilak ah ka hihke kha a, nang phone theih nang le ka nei nawn bik kei a, ka buai tei mahmah mai hi,,,," chia ka gen leh lamdang sakmel tak in a hon en hi.
Ka pa sihnung ka nu'n halh siang sitset a' om chihte nei ngeilou ahihman in, ken leng ngeina a seh gop ka hi diam ah, ka nu'n om nuamlou chia a lup chiang in leng ka ngaihsak lawmmlawm kei hi. Aman le bangmah gen ngei tuanlou ahihman in. Nikhat ka nu' ann ne dia le hong thou khelou ahihman in, a singpi di leh sang di tawi in a room ah ka va pia hi. James toh ka kineih tuung ua ahon sapdan in, "Milyte,,,,,, hiai lam ah hong pai zual dih" a hon chi hi. Huai ka nu hon sap na aw ka zak tak in, ka om heihuai zou hial hi. A ziak bel, nu' taktak bang a ka-et masak pen in a hon noutawina' ka mangngilh thei kei a; Ka zak louhna kum hiaizah ana paita, kum hiaizah nung a huaibang paukam kilawm ka zak ziak ahi....... Ka nu hon sapna lam ah ka paiphei a, ka nu'n a thugen hoih tak a ngaikhe di'n hon ngen hi. Ka nu'n; "Milyte,,,,,,napa damlai a innkuan ka kipah sek dante khawng ka ngaihtuah a, kei kipak tak a ka om lai in nang dinmun di bel bangmah ka hon ngaihtuahpih kha ngeikei hi. Tu'n ka theita, huailai a na lungkham mangbat didante khong,,,,, hehpihtak in hon ngaidam in aw! nang a di'n nu' hih ka ching zou kei a, na lak ah lungsim hoih leng ka na pu ngei kei. Tua ka thugen di pen leng, na pa toh ka gen khawm lai un, ka na nial a, himahleh na pa'n ka thu la lou in; ama thu in ana paisuakpih a, tu'n bel napa thilhih dan ah ka hehna sang in, ka kipahna a tam zaw ta,,,,," chi'n file a lupna kiang a dohkan tung a' akoih la di'n hon sawl hi.
------------
BUNGA 4 NA
Siamte goutan dia ka pa'n hon na seh nalai ana hi a. A omzia bangmah ka theisiam kei a, ka nu kiang ah ka kan leh, "Hiai napa'n Siamte gou dia a nutsiat liauliau ahi; himahleh Siamte in lah hon omlouh santa, na pa'n lah hon omlouh san zel ahih chiah, kei leh huai ukil pa kian ka thei ua, phuangzak lou in, ken ka deihsak penpen pedek leng le, ukilpa bel sum tamlou chik in ka khemkhe thei ngei di. Ahihhang in huaidan thil ahih hoihlou ahi chih ka thei a. Siamte nu na hihna ah, nang tan di liauliau in ka koih ahi ",,,,,,,,nu nang a' chu kei a' himai eivoi huai khawng hih tuantuan ngailoupi... Chi'n ka dawng hi. Ka nu'n aw ngaihlou chik, lah ka bil a ngaihtak si in,,,,,,, "Mily,,,, ka hih di diktak mah ahi ka hih; hiai nang kem inla, hiai teng mai ban ah, ka sumdawnna tengteng nang khut ah om vek hoihsa ka hi. Ka suul a piang hikei mah lechin, ka tanu taktak bang a kon et na hi, nang le nu' taktak dan a hon ngai gige na hi chih ka thei a, ka kipak petmah hi,,,," chi'n a biang ah khitui hongluang a, ka singpi piak le dawn theilou hial in hong khasia hi. "Nu' na singpi di dawn inla; tawldam phot lechin hoihsa ka hi, denchiang in na hong bah law dia, ahoih kei di,,,, "chi'n singpi nou ka pia a, ka pawtsan hi.
Ka nu' thugen in a hon zou mahmah mai a, "ka tanu' taktak bang a kon et na hi,,,,,,," a hon chih pen mahmah zaknuam ka sa hi,,,,,, ka bil hem ah a ging den zouhial hi. Ka nu' haksa sakawm tak in a hong thoukhia a, varanda ah ka nih un, nileng in ka tu uhi. Nitaklam nek di bawl hunta ahihman in, kei leng neekbawl di'n ka kisa a; ka nu a gamtat di phallou ka hihman in, TV khawng en in a-om maimai hi. Ka hihdan pangngai un, nitak ann nekham sawtlou tv en in ka tu ua, lum di'n kong kisa uhi. Ka nute inn bel lian mahmah ahihman in ka room uh le a kigamla sim mahmah mai a, huaizan ka nu'n banghiam lungsim noplouhna khat nei ahi ngei dia, a kiang a giak di'n hon zawn mawk hi. Ken le ka nu' hon zotna nial sese lou in, ka pa damlai a alupna uah, ka valum tei hi. Ka nu'n hon khamuan pih mahmah hi-a ka theih man in, kei leng aguuk in ka kipak mahmah mai hi.
Lupna tung a bangbang hiam gen a ka kihoulim lai un; ka nu' thugen in hon khim sim ahi ngei dia, ka nu ka na ihmutsan hi. Thawmging ka zaak in a hon khanglousak a, ka et leh, ka nu omlou ahi,,, chih ka thei hi. Kintak in ka thoukhia a, chouka lam ka naihphei pah hi. Chouka ah mi 2/ 3 kihou ging ka za a, sana ka et leh zan dak 12 ana pelta hi. Tu zan nungnung a kua hong hoh ahi maizen a, chi'n ka kingaihtuah lau man hial hi. Chouka ka tungphei a, ka nu' mangbat mel tak a om ka muh in; kou nuta tung a thil hoihlou tung omdek ahi chih ka gingta ngal hi. Innkong apat pasal pau ging ka za a, a gen pen tak uh ka theihlouh ziak in ka nu' kiang ah thil omdan ka dong pah hi. Ka nu'n "Mily, bang a agen uh ken le ka theisiam kei, nou pau mah a bang a? agen uh ka theihlouh man in inn kongkhak le ka hong ngam kei, migilou khawng ahih ka lau,,,,," chi'n aw ling peppep kawm in hon gen hi. Kongbul ah ka va paiphei a, aw thuum simtak khat in, innkong hong sak di'n hon ngen hi. Kuate na hi ua ? Koilam mi na hi ua ? chi-a ka kan chiang in lah a hon hilh utsi kei ua, ka lungbuai mahmah mai hi.
Ka nu'n bangteng hileh innkong hawng phot mai ni; kuahiam khat in i panpihna lamen hi'n teh, a chih ziak in, ken leng ngaih phalou kawm in, ka hong a, maituam mi nih in, pistol a hon ngiim kawm in, tanglou di'n hon gen ngal uhi. Thil omdan bangmah theisiam lou ka hih man in; ken leng ngaihtuahna pilvang tak in thu ka dong zel a, ka nu bel lau in a liing a, kilkhat ah ana tom thiinthe'n hi. A hong kigen ua, Lamka a Eric pu'n a hon sawl ahih dan a hon gen a, ahihleh kou nuta hon that dia hong kuan u maw ? Kou nuta na hon thah ziak ua bang phattuamna om di e? Chi'n ka dong hi,,,,, "amau, nou nuta that dia hong kuan ka hikei ua, nang, Emily na hih leh, nang that dia hong kuan ka hi uh. Nang ka hon thah ua leh sum tampi lawh di ka hi uh. Na innluahna kisuan ziak in, sawtpi ka hon zongbuai ua, ka beidot nung un,(Eric pu) ka phone ua leh, hiai mun a hon kokmuh hi. Kou leng haksa tak in ka hon zongsuah uh". a hon chi hi. Ken leng ka dawng pah a, "Emily, na mi zawn uh ka hi, na-ut ua leh na hon that thei di uh, ahihziak in, na hon thah maa un thu tamlou kon gen zual di,,,(ka nu'n huai ka gen lai a lauhthawng mel tak a a hon etlai, ka mitkha ah tunitan in a mangtheikei) chi'n, Eric pu toh ka kisuklungkim louhdan tengteng uh leh, nidang a a hon bawldan tengteng uh ka gensuk vek hi. Huchia ka lungsim a om te ka gen zawh in, zangkhaituan hi'n ka kithei hial a; keimah kia kingaihtuah hileng, sih lauhna le ka nei nawn kei. A hihhang in ka nu leh ka tapa Eric ka ngaihtuah chiang in, ngaihdam ngen a, a hon thahlouh nang ua thum khawng ka lungsim ah hong lang dundun hi. Himahleh huaidan a ka kingaihtuah lai in ; mikhat pe'n in, a lawmpa, pistol a hon ngiim pa kiang ah, hihlou di'n a hon gen hi. Ka nu' bel houpih theihlouh in ana om hial hi.
Amau le, ka thugente ziak a hon hehpih uh ahi ngei dia; "ka hon that kei dia ua, bangchi mah in ka hon khoih sam kei di uh. Ka sumduhluat man un gam hiaitan hong pai a, hiaiteng hih kihuam a hong kuan ka hina' ua, na tanchin in a hon zou mahmah mai a, ka suahsuah uh ka suak mai di ua, ahih hang in, kou hon hawi mahle ung, na tung a athangpaih luat ziak in, midang hong kuansak nawn thouthou dia gingta ka hi. Huaiziak in, hiai mun ah na om ua leh suakta nawnlou di na hi uh; a kin theilam in, hiaimun na' pawtsan di ua, (Eric pu) a hon zongkhiak theihlouh na'ng mundang ah na om uh ngai ahi,,,,," chi'n hon pawtsan uhi.
Ka nu kiang ah kintak in ka paiphei a, ka nu bel alauh ziak in ana lingden lai hi. Thil omdan kintak in hon dong a, ken leng ka hilh vek hi. Ka nu'n, huchi ahihleh zingchiang in, i kisuankhe ngal maidi, a hon chi a, ken bel hiai inn, ka pa damlai a atenna, hichi mawk a pawtkhiaksan ka phal thei kei hi. Ka pa' kei tung a ahoihnate ka ngaihtuah a, hiai inn pawtsan mawk le ung, va'n a' pat in hon na mu zenzen leh alung a kim diam,,,,,,? chia ka kingaihtuah lai in ka nu hong pau khia a, "tusun a ka thilgen, Siamte gou tan dia napa'n aseh, huai ah (vengdang) midang in aluah lellel ua, amau pawtkhe di'n i sawl dia, en i valuut mai di, na pa tungtang nagen pen dik thou mahleh, misi leh mihing kibang theilou i hi. Ken zaw sih mengmeng a, napa' kiang a om maimai ka utna asawt lawta, ahih hang in Mily, nang hiai bang a sithei nailou na hi. Huaiziak in, ka thu puukna bang in zingchiang in i kisuan ngeingei di ahi,,," chi'n a hon gen hi. Ka nu lungsim hoihdan leh kei a hon ngaihtuah dan ka thei thakthak a; ka pa ngai a, lungleng tak a om, ka pa' sihnung teng bangmah le sem peihlou khop a zawngkhal hial in, kei a hon ngaihtuah man a' hiaibang lungsim a neih theih mawk lamdang ka sa a. Ken leng ka nu kiang ah, nang thuthu chi'n ka dawng hi.
Sana ka etleh zinglam dak 3 ana gingta a, kou nuta leng sisa thoukiik bang a kingai hial ka hihman un, ihmut suah lam leng ka theikei hial uhi. Ka nu'n "lup phot hoih ahi,,,,," achih man in, ihmut suaklou pi lum di'n kong kisa non ua; ihmu dia ka kisak chiang in, ka nu thakhat a' hong kikoukhe guihguih ahihman in, ka halh khazel hi. Ak hong khuang hialta ahihman in, chia thawhkhiak ka sawm leh, ka nu'n a hon phal kei a; kei leng ihmut suaklou ahihman in, lupna tung ah ka hak kelkul maimah hi. Ka thiltuahte ngaihtuah in, "Eric in hon thei leh bang lungsim anei dia aw, a hon ngaihtuah luat ziak a, innlam hong pai a sawm lai a ka phallouh khawng a hon mawhsa law dia aw,,," chia ka kingaihtuah lai in, ana ihmu kha chu ka hingei dia; ka nu'n singpi nou tawi in a hon phawng hi. Sana ka-et leh dak 8 bang ana ging velvol ta ahihman in, dawr lam a nasemte kiang ah, dawr hong lou-a, inn lam a panpih di'n phone apat in ka hilh hi. Neekbawl kawmkawm in kou nuta' leng vengdang a kisuankhe ding in ka kisa kawmkawm ua; ka vengte un leng hon guuk theihsim uh ahihman in, mi phatuam ngaizual leh, ka ki closed pih deuhte khong uh a hong dianglut ua, thil omdan khawng a hon dongdong mai uhi. Ahihhang in thil omdan diktak ka gen tuan kei ua; ka nu'n "veng dang a ka inn uh, midang khut a a-omna sawt lawta mahmah in chi'n, huailam ah tukum sung khawng va ki-om leh chisim ka hi uh,,,," chih teng khawng in a dawng lel hi. Vengsung miteng in a hon mawhsa mahmah mai uh. A ziak bel, zanlam zek a ka pa' si-a, hiai inn mahmah apat a kivuiliam a, ni tam le bei nailou a hiai inn pawtsan ka sawm pen uh, thil kilawm le hilou,,,,chi'n a hon gengen mai uhi. Ka thiltuah uh thei hile uh; kuaman a hon mawhsak bik uh a gintakhuai hetkei hi. Himahleh kou ka thil tuah uh kuamah lak a genkhelou ka hihman un, a hon mohsakna uh leng a awmlou tuan hetkei hi. Demthei leng ka hi samkei uh. Neek ka bawl khit in ann ne di'n kong kisa ua; dawrlam a ka nu nasemte le'ng ahong tung ngal uhi. Ka nu'n van packing didan teng agen dandan in ana buaipih ua, ken bel van tengteng tawilouh a, hun awl ka'lka'l a valak zel maileng pawi ka sakei, himahleh ka nu'n hiai inn a vakilat pen galmuanglou ahi; chi'n a hon phal bilbel kei a, ann nekham ka ki-load ua, ka inn thak luahna di ua, Ka pa'n Siamte gou tandia a sehte lak a khat, huailam zuan in ka kipawphei uhi.
Khatvei mahle ka muh nailou ahih ziak in, muhkal bang ka ngaklah petmah mai a, ka pa, mitaima leh lungsim pichingtak nei in, a tunu neihsun, Siamte gou tandia aseh hial chu a siat luat lawmlawm ka gingta theikei hi. Huchi-a ki ngaihtuah kawm a ka tailai un, Eric ka lungsim ah a hong lang a, "apute hon bawlna ziak a hiaibang a buai vengvung a, ka om lam uh hon thei hileh bang lungsim anei dia aw,,,, apute amawhsa dia aw, ahih kei leh kei anu khawng a hon mawhsa maimah dia aw,,,," chi-a ka kingaituah lai in, ka motor uh a hong khawl a, hiai, tua i omna inn kong ah ka na khawl uhi. Hiai inn omdan chu nang le namit a hong muta na hih chiah gentam le ngai ka sa nawn kei, kei meithai, tagah, sungkhat laina le neilou, tenna ding inn chu a thupi ka sa petmah a, phulou hi'n ka kithei hial hi. A hihziak in Pathian in ka damsung genthei tak a ka zatdi rem a hon sakpih lou ahi ngei dia, tu'n chu keimah khe-a ding in, ka kitoudelh theita. Zanlam a i kimuhna dawr leng kei khut ah ka nu'n a hon pekhe vekta a, huaikia le hilou in, veng dang ah gam (inn mun) lian mahmah mun nih a ahon nutsiat a, sum dawnna tengteng kei khut a om vekta ahihman in; keikia a etkol buaihuia di ahihman in, Eric ka samtou a, tukar a inn hong tung ka gingta.
Ka nu lah hat nawnlou ahih chiah, Eric hong paitou he'nla; aman sumdawnna' lam hong enkol henla, huchi'n ken innlam ah ka nu ka enkol dia, khosak zaw nidang bang hial in haksat ka gingta non kei,,,,,," chi'n Emily kipah mel tak in hong nui khe seusau hi. Singpi ka dawn ut leh ut louh a hon dong a, ken leng kimaingalta thou ka hihchiang un, ka dawn-ut chi'n ka dawng suk mai hi. Singpi a hon bawl a, room-a anu lum, singpi pe di'n alut masa hi. Himah eh singpinou ahon tawikiik a, ka tutna lam ah hong paiphei hi. "Bangchi dan a, na nu'n singpi dawn nuamlou a maw,,,,?" Chia ka dot leh, hiailam ah eitoh kipolh kawm a dawn ut chi a, hiailam ah hon tusuah dek hi'n teh. Nileng leng a lum ahih chiah, chim kisa theilua a; tuni chu nang hong pawt di na hihtoh chi'n innlam ah ka om zenzen a, nidang bang hileh ni lengleng a dawr ngaksan ka hihchiah, chim kisa thei lua, lawm polh di a-om sunsun chia zaw khelah thei law sam e,,,,,, chi'n, singpi nou ahon pia a, Emily nu leng kou tutna lam ahong tuphei hi.
Emily nu'n ka mel ahon muh phet in, kintak in ahon naihphei a, ahon chibai pah ngal hi. Nang na hi maw, innvengte tangvalpa hi'n teh, chi ing a', thoh le hong thou nuamlou hi'ng a', ka lum ning lua kong thohkhiak leh nang kon mu mawk a, nang na hih lam thei leng denlam pek a hong thoukhe di hi'ng a', chi'n Emily enkawm in hong nui viiviai hi. Emily le nuihza kisum chih haihvual louh in; "ka nu'n chu innvengte tangval pa toh hon dem deuh gige a, lah ahon deihsak louhlam lah kithei mahmah, (thutak sim tak in) nu, nang deihlouh dan in ka om hon gingta het ken aw !! ken pasal neih ka sawm zenzen kei, tapa tangval kinei hialta a, pasal neih ngainawn sese lou pi, hichi'n i thum un i tengkhawm di ua, nang le sawtpi na hon dampih dia, sungkuan kipak leh nuamsa tak a nang ziak a ki-omta di eivoi, Eric le na phone apat, tuzingkal a ka phone hi a, tukar khong in hong tungtou thei in teh. Ka neu apat a ka na ngaihtuah gige; damtak a pichin touh a, pasal hoihtak neih a, innkuan kipak tak dinkhiat pen, ka neu apat a ka na sawm gige ana hisam eive nu, ahih ziak in ka vangtah a, ka ut dan leh ka deihdan in ka omthei bik kei a, himahleh ka huchi om gige pen Pathian inle rem hon sak pihlou hi'n teh. Tu'n huailai a ka ngaihtuahna hong taangtung taktak di abang ta hi,,,"chi'n hon gen siamsiam hi.
Emily paukam zak nuam ka sangei mai, nidang a feldan ngei a felden lai ahi chih ka thei a; anu azahtak dan leh aduat siamdante ka mitngei in ka mu a; "Emily genthei gige lou a a-om le amah hoihna ziak leh a felna ziak ahi," ka chi lou ngam kei hi. Singpi dawn kawm in ka kihoulim zel ua, a innkuan maban hun uh a limchitdan khawng ka genpih a, paukam siam kholkei mah leng, ahon kipahpih mahmah uh hi-a ka theih man in, nuam ka sa tuan mahmah hi. Eric ahong tung tou dia; amah tangval laisiam, fel zawmah ahih toh, aman thil bangkim, na sumdawnna lam uh ahon enkol tou dia; a lunglutna lam ahih le zaw, khovel a mi enghuai penpente laka' telpha zou hial di na i uh,,,," chia ka gen leh, huai hial zaw Emily nu'n uang ana sadeuh ahi diam ah, kamsiam inle huntawk nei eive,,, chiteng in hon dawng bong top hi. Emily nu sawt tu ngaplou ahihman in, singpi dawnkhit in ana lum nawn a, Emily in gen ut nei hileh kilawm in ahon en den hi, ahih hang in bangmah a genkhiak louh ziak in ken leng ka dong tuan kei a; bangmah genlou a ka tut lai un, Room apat Emily chi'n anu'n hon sam a, kintak a Emily a va paiphei leh, Eric in anu phone ut ana hi a, Eric toh sawtkuam tak ahong kihou nung un, lungkim mellou tak in Emily ahong potkhia hi. Ka kiang ah hong tu a; Eric in a lawmte (namdang, vai nungak) hon tonpih a-ut thu ahon gen a, ka phal kei leh Eric le heh in ahong heh petmah hi; chi'n, kei lak ah thil hih didan khawng hon dong zawzen hi. Ken bel ka kigolh na'ng ahih ka gintak louh man in ka dawng gina kholkei hi; Emily le nitaklam neekbawl dia kisak hunta ahihman in, kei leng ka innlam uh zuan di'n ka kikhen nawn uhi.
---------------------
BUNG 5 NA
Inn ka tung a. Nidang banglou tak in ka sungte leng ka tung ah a mawk in aheh maimai nawn kei ua, ken leng nuam ka sa deuhta hi. Ka unaunu tawh a pasal (ka makpa pa) ka inn uah ana om ua, sawtsimtak ka kihoulim uh hi. Ka makpa pa paukam zat in ka lungsim ahon khoih mahmah mai hi. Ka nu a sap chiang in leng, "NU", chi'n asam zawzen zel-a, zanlam zek a ka sanggam nu toh kiteng pan in, ka nu NU chia a hon sapsap chiang in kei ka ngaihdan a hong hinawn kei geet hi, ahihziak in bangmah ka genkhe ut samkei a, ka lungsim ah hichi'n ngaihtuahna a hong piang hi. "Na nupi (zi) nu, nang NU chia nasap di hilou pi, NU chia nasap leh, ka pa le PA chi-a sam di neive maw leh, mah ni pizawn, puzawn te lak a mark score sawm mahmah di nei ve maw,,,," Ka paikhiak dek in, "makpa feltak nahih sinkha maw !!!" chi'n, Sawt le kihoulim lou in ka room ah ka lutsan hi
Ka thugelhte sunzawm di'n ka computer ka on a, ka thu theih leh zakte buai tak a ka gelhlai in, ka nu'n a hon sam hi. Ken leng thil poimawh om hi dia ka gintak ziak in, kintak in ka nu hon sapna lam ka zuanpah a, ka va paiphei leh, ka sanggamnu toh apasal mai ah a hon tai mawk hi. Ken bel heh a ka gen le hilou, ka lungsim a hong lang ahihziak a ka gen khiakmawk ahi a; ahihziak in, ka sanggamnu'n ka nu kiang ah ana hek man ahihman in, ka nu'n leng a kilawmsak naang a hon tai ahi chih bel ka thei. Himahleh midang maa ah hon tai sese ka lung a kim hetkei hi. A hon taikhit in ka nu'n ka sanggam nute innlam a pawt dek ahihziak in, inn hoihtak a ana ngaak di'n a hon thukhak hi. Kei le'ng room ah ka lutkiik a, ka thil hih ka sunzom nawn hi.
Hun leh nite hong bei zel a, a kum asim bang tanchin kithuzak lou in Emily tawh ka om ta uh hi. Hun remchang ka zong sek a, himahleh mahni hihtheih lamlam sem a ka buaiziak in hun ka nei thei mahmah kei hi. Nikhat ka pa'n a office apat in a hon phone-a, "nasep di (hihdi) poimawh ka nei a, hong tung pah theilou di ka hih ziak in, nitaklam chia na hong pi' ngai di ka hi,,,,,," chi'n a hon gen hi. Ken leng hun remchang ka sak ziak in, ka nu kiang ah thil omdan hilh in, ka pa car chahbi ka la a, kholak vak malam di'n ka kikhalhkhia hi. Ka inn ua pat gamlalou chik ka taipan chih in, kou innlam manawh a hong pai ka galmuh a, a hon naih zel a, ka kiang a hong tung un, ken leng Emily ahi chih ka thei ngal hi. Ka car ka khawlsak a, ka sap leh lamdang sakmel tak in a hon en hi. A hon muh phet in kei lam manawh in kintak in a hong taiphei a; ka kichibai ua, ka motor ding sakna diklou ahihman in, ka tuangsak a, manawh nang lam le thei tuanlou in ka taikhiak pih mawk hi.
Emily a hong pau a, " Nas, koilam phak sawm, koi a hoh dia hong potkhia na hia, na hon tai pihpih mawk a?" chi'n ahon dong hi. Ken le'ng nitaklam chiang a ka pa office apat thua idi ka hihdan ka gen a. Aman leng, "Hun tamlai thou hive'n, kou innlam ah hong pawt le chin, gen di haulua ka hi, ka beidong lua a, panpihtu di kuamah ka neihlouh man in, kum khat vengveng kimu nawnlou himah lehang, na hon panpih theih khak leh chia, na inn uh hong zonkhiak sawm a hong kuan ka hi. Lampi ah i kimukha zenzen a, huchi hikeileh zaw, muh le hong mu zoulou maithei hi'ng a,,,,,," chi'n hong nui siuseu hi. Lampi' a kihoulim kawm a sawtlou ka tai nung un, Emily te in ka tung ua, innsung ah ka kizuilut ngal uhi. Nidang a a inn uh ka phak lai batlouhna khat nei hileh kilawm in, ka om heihuai mawk hi. Bangziak ahi hiam chih bel ken le bangmah ka thei tuan kei.
Sawtle tu manlou; bangmah le gen manlou a ka tut lai in, ka pa'n a hon phone a, ka omna ka gen leh, kintak a a office lam a va pai di'n ahon gen hi. Ken leng bangmah dang le genlou in, Emily kiang ah hun remchang masa penpen a kimu di'n, a inn uh ka pawtsan hi. Lampi a ka tailai in le'ng thildang ka lungsim ah ka ngaihtuah thei kei. Emily in "Ka beidong lua a; na hon panpih theih khak leh chi a, na inn uh hong zongsuah dia hong kuan ka hi,,,,," achih ka ngaihtuah a, bangziak a kei panpih ngai di khop a beidong ahi dia aw,,,,? Ka kimuh nanung pen lai un lah; a kipah mel mahmah mai a, huai chiah, nidang a akhosak dan toh, huai lai a a khosak dan, lei leh van bang a kikhia ahia, inn thupi' tak a teng a; sum dawnna lianpi nei-a, enkol zawmah ahih toh, bangteng hileh sum-le-pai a buai ahih chu ka gingta theikei hi.
Motor a ka tuangkhawm lai un dong pah leng hoih di hi-a, ka na dot pahlouh khawng ka kisik khonung phing a; lah bangmah a ka'nna le a-om nawn tuan kei hi. Huchih lai in ka lungsim ah thilkhat a hong lang a; "Eric in namdang nungak a ngaih houh lungkham pih ahi dia aw !! Ahih kei leh, a nu toh kimuh siamlouhna nei uh ahi' hia leh ? Bangteng hileh, ka theih hun hong om thouthou di hive'n kei hichi tel a ka na buai naang le om kei,,,," chi'n ka kingaihtuah halh a, thil dang ngaihtuah sawm in, laa peuh ka ngaikhe thepthup hi. Bang ngaihtuah kha ka hi diam ah, ka laa ngaihkhiak in ka lungsim ahon zou mahmah mai a, ka lawmte tawh, zu ka dawnsek lai ua, zukham kawm a ka na laampih sek uh, laampih mai le deihkhop lou a, ka na kahpih hial uh, ka ngaikhe meuh chu, a hunlai ngaihtuah in, ka lung khawng ahong lengthak vungvung maimah hi. Lehlam ka ngaihtuah chiang in, ka nuihkhawng a zaa a, keikia in motor sung ah ka na-ngawng nuih khe phutphut mai hi.
Ka pa te office ka tung a, ka pa'n inkong ah ana ngak hi. Bangmah genlou in motor sung ah ahong lut a. Ka laa play le off tuanlou in, Ken le'ng bangmah genlou in, ka innlam uh manawh in ka taipih zel hi. Sausim ka tai nung un, mundang phak utna nei ahihlam ahon gen phingphing a, kei le'ng hehngawh simtak in ka taikiik a; Ka laa play pen ka pa'n off di'n ahon sawl hi. Ken bel ka off maa in, "bangziak a off dia hon sawl mawk na hia,,,?" chi'n ka dong hi. Ka pa hon dawnna in a hon thangpai sak ngei mai; "hiai bang a laa thulimlou pipi khawng ngaihngaih di hilou ahi, a himhim thu in, kholai khawng a la ngaih taktak play di hilou, mi'n mibanglou a hon ngai di uh eingal ve,,,,,," chi'n ahon dawng hi.
Kei bel ka ngaihdan hilou ahihman in ka pa ka nial a; "bang e laa thulimlou ahih na, zawlla ahih ziak a laa thulimlou chih maw,,,,,, zawlla hi'n Pathian la hita leh, a phuaktute'n deihtak a aphuak uh, banghiam omzia neitak leh, kawk nei tak a a phuak uh eingal ve, thulimlou va chih sese,,,," ka chih leh, ka pa'n le'ng bangmah a hon gennawn sam kei hi.
Motor khawlsak di'n ahon chi-a, kintak a kumkhia in; inn hoihsim mahmah khat ah a va lut hi. Sawtkuam tak ka ngaknung in, file khat tawi in ka pa a hong pawtkhia a, innlam manawh in ka taikiik nawn uhi. Ka pa file tawi sung a om theinuam ka hihman in, ken leng ka pa kiang ah ka kanpah ngal hi. Ka pa'n hichi'n ahon dawng hi. "Hiaipa lak ah sum loan tam hun tawktak ka la a, huai ka loan lakna lai ahi,,,,,, "bangdia loan la e, ken lah bangmah ka theikha hetkei a,?" Chi a ka kan nawn leh, "inn a om gina manlou na hih chiah bangmah le ka hon hilh sese kei a; na theih hun hong om thou dia, natheih chiang in le na heh ka gintak louh ziak a hon hilh sese lou a, kei thu a ana hih ka hi. Zanlam in mikhat in gam za huntawk mahmah a hong zuak a, huai kia le hilou in, a dawr u leh, a dawr inn khawng toh hong zuak khawm in chi'n, ken le etlah huai ka sak ziak a, loan lak a lei ana sawm ka hi, ,,,, !" chi'n a hon dawng hi.
"Kum hiaitan Govt nasem a, niteng a buai gige hive'n, ditsuahna lampi hong kihawng le hita'n teh,,,," chi'n ngaihpha tak in ka om hi. Inn ka tung ua; garage ah ka khalh lut a, kei leng innsung lam ah ka lutngal hi. Ka pa'n ann ka nek lai un, a lunglut huaidan khawng leh, a gam leh a mun et a, kima'n asak dan khawng ahon gen a, ka nu'n leng lunglutpih mahmah chu ahi ngei dia, ann nek lam le mangngilh khop in ahon gen uhi. Ken bel hiai lampang bangmah theisiam phalou ka hihman in, ka na kuppih khawl kei a; ann ne mengmeng in, room ah ka lutsan hi.
Zing ann ka nek lai un ka pa'n office a khakngai ahi chih a hon gen ziak in kei le, ann nekham ka kisa pah ngal hi. Office ka tung un, ka pa'n "Ana kiik inla, nitaklam dak 3 lak vel khawng in na hong thuai nawn mai di, tulai zaw vuah a zuk ut tawh, midang motor a hong pai nuamlou ahi,,,,," achih ziak in kei leng innlam ah ka kiik nawn phot hi. Lampi ah ka nu ka phone a; "Phak utna dang ka neihziak in, innlam ka hong pha kei dia, nitaklam ka pa vapi dia kuan nawn ngal sawm ka hi, ana lung himawh dahmai aw,,,," ka chih leh, ka nu'n, pilvang tak a motor khalh di'n hon thukhak a, thildang bangmah a gen nawn tuanlouh ziak in; kei leng kipak gu' kawm tak in Emily te inn lam manawh in ka taingal hi.
Emily inn ah a-om dia aw ! Dawr lam ah a-om dia aw,,,,,? Chi'n lampi ah ka kingaihtuah a, phone na'ng a Number lah neilou ka hih chiah; bangteng hileh, a inn lam uh manawh a taiphot hoihpen in ka thei hi. Emily te inn lam manawh in ka tai a. A inn uh ka tung a; kongkhak ka kiu a, Emily aw ngei mai in, "Hong lut uau," chih kawm in, inn kongkhak ahon hawng hi. Kei leng ka lut ngal a; Emily pawt dia kisa a ana buai laitak ka va tuak kha hi "Pawtsawm na maw ? ", (ka kisuanlah ziak in) ka pa' office kai di vakha hong ba'ng malam maimai ka hi,,," khong bang ka chi khemkhem hi. Emily in; tuni Siamte sih champha ahihziak a Siamte haan vaphak sawm ahihdan ahon gen a. Ka kiang ah ahong paiphei a, bangmah genlou in a hong kapkhe mawk hi. Pasal ka hi a, a hehnep didan le ka siamkei, bangmah genlou in ka tu maimah hi. Emily hong paukhia a, " Nas kei kia in ka tanu Siamte haan vaphak ka sawm a, a guuk tak in ka na kihta mahmah mai hi. Tuni hun khawng in, ka tanu haan phakpih di kua hiam khat bek nei leng chi'n zingkar apat in ka na kingaihtuah a, nang bek in na hon phakpih kei dia maw;,,,,,," chi'n mittui paak niilnial kawm in ahon en hi. Hih di poimawh dang naneih ahihleh, haanmual lamah sawt omlou in, i kiik pah mai di, kei le ka dawr lam va phak poi ka sa kei, ahihziak in, kihoulim di na chih leh ka dawr lam ah le ka kuan dah mai di,,,,,,," chi'n a hon gen hi.
"Emily nanu lum hia, ahoih zel na maw,,,," chi a ka dot leh, Emily mittui hul dekpan, mittui mah in a hon luan nawn hi. Bangmah genlou a, sawtkuam tak a tut nung in. " Nas , ka nu'n hon omlouh san ta eive,,,," chih teng kia'n a hon dawng nawn hi. Ken leng Emily buailai ahihman in, bangmah ka gen sunzawm tuan kei a; munkhat ah ka na tu maimai hi. Emily pawt dia kisa zou ahong pawtkhia a, Siamte haanlam manawh in ka kipawkheta uhi. Hanmual ka tung ua, hiai bang a haksa thuak di kisa le'ng, Emily ka va zui het kei di, ahihhang in, amah ka hehpih ziak a va zui ka hi a, a paukamte leh akah laa in, kei pasal chi a, ana kiphasak sek le'ng a hon kapsak zou hial hi. "Ka tanu neihsun, Bawi, na nu hehpih tak in hon ngaidam in aw, kei ziak a hiai bang teng natung a hong tung lah ahi ngal a,,,,,"Emily thilgen teng ka thei se'ng kei, ngaihtuahna mumal tak le neitheilou khop hial in a hon koih hi. "Bawi,,,,, Na u leng hehpih tak in ngaidam in aw, na-om na apat in, thil bangkim nana theivek di maw,,,," Emily, innlam ah paikiikta ni,,,, chi'n abaan ah ka va kai a, himahleh, paizou didan ahihlouh ziak in a kiang ah ka en maimah hi. "Bawi,,,,,, tuni hun a ka tung a thil deih huailou taktak hong tungte, nang damlai hilechin zaw hong tung hetlou di hi a. Kei ziak vek ahi,,,,,,,,,,,,,,,, Emily innlam ah paiphot ni, hiai a i om om hoihlou ahi, chi'n a khut ah ka len a, ka liangkou ah alu ngakawm in, lampi ah ka motor koih uh ka manawh pih hi.
Inn ka tungkiik ua, singpi khawng dawn in, Emily zong kihahsiang in, ka kiang ah a hong tu nawn a, a tanchin hichi'n hon sunzawm nawn hi. "Eric ka tapa neihsun chi a ka duat mahmah in ahon su lungkham mahmah mai hi,. A ziak bel a lai va zirna lam ah vai nungak va ngaizawng kha chu ahi ngei dia; nidang teng a kei hon ngaihtuah ziak a a zirna le topsan poi asaklouhdan teng gen sek mahleh, huai numei ziak in, ka thu himhim a mang nuam nawn kei hi. Innlam ah hong pai hen la; ka sum dawnna hong etkolpih leh chi-a ka deih mahmah ha'ng in, suanlam tuamtuam bawl in, a zirna a lakloh thu khawng in hon dawng zel hi. I kimuh nawn tung a Eric hong paitou di, chi a ka genpe'n na theilai di maw,,, " chi'n kei lam hon en a, ken leng ka lu ka na su ngauh hi.
"A hong paitou a, himahleh a hon ngetna; a nungaknu hon thuai dipen rem ka saklouh ziak in alung akim kei mahmah mai hi. Kar khat le cham manlou in, zirna lakloh chi'n ahon paikiik san a. Kei thu mangkei mahleh a Pi thubek a man deuh khak leh chi'n ka nu kiang ah leng hoihtak a genpih di'n ka ngen hial hi. Himahleh ka nu thu leng bangmah in a ngai tuan kei a. A vangkim in hon houpih zel mahleh, niidang abang thei nawn kei a, ka ngaihtuah chiang in, Lamka lam a apute'n ahi loulou a, ana khem uh ahi dia aw,,,, chih khawng ka ngaituah hi. Ka ngaihtuahna a kisual den a, a pute'n ana khem hitawk le-uh le ka tapa in hiai bang lungsim a neih ka gingta thei kei, lah ka tung a alungsim putdan lah ahi ngal a, ka buai mahmah mai hi.
Ka khawsakna un changka'n lam manawh panpanta chi a ka na kipah guukguuk maizen toh, ka tapa omdan in ahon lungkhamsak mahmah zel a. A khen chiang bang in, kihihlup hial khawng ka uut sek hi. Himahleh lungsim taktak a ka lupkawm khawng a ka kingaihtuah chiang in, mahni kithah khawng, mi dawilokte hih di'n ka ngai a. Ka tanu Siamte in le hangsan tak in haksatna ana thuak paisuak peih hi leh, tuni hun in bel a kisik ka gingta nawn kei hi. Huai thu in a hon hanthawn mahmah mai a, ka piankhiak apat a gentheihna thuak di maimai a piang ka hi. Hiaitan haksa, gentheihna kan thuak ta a, ka hinkhua ah, haksa, mangbatna bangteng hong tung mahleh, hangsan tak in ka thuak dia, chik ni chiang hiam in kipahna ni a hong suak ngei di, kei adia kipahna, nopna omlou di himahleh, ka sihdong in ka thuak di ahi,,,, chi'n ka lungsim ah ka ngaihtuah hi.
---------------------------
BUNG 6 NA
Buai kawm pipi in ka sumdawnna uh ka enkol tou zel a, ka nu lah teek hatnawnlou ahihtoh, kei lah amah buaipih man a khosa mahmah lou ka hihchiah chi'n, ka nu enkdoltu di, lohnei a ompih di ka la hi. Huchi a ompih ka hon neih nung un chu kei a di'n le a zangkhai huai mahmah ta a ; innlam lung himawhnate le'ng neukhah in a dan hong omta hi. Ka nu le'ng alungsim kipak ahi chih amel apat in muhtheih hial in ahong lang a, ka lungsim gu-k in, ka ompihnu u-toh ka nu kituak mahmah uh eive, chi'n kei leng ka kipak mahmah mai hi.
Ann nek lai khawng leh ka tutkhawm chiang khawng ua ka nu toh ka ompihnu hong kichiamnuih khawng chiang bang un, nuam ka na sa thei mahmah mai hi. Amah lah mi pau ut mahmah, seplit le neilou ahi zawmah a. Himahleh, ka naupanlai a ka gentheih dante ka ngaihtuah kiik chiang in, sikhaa dan a etkol pen ka kisiamtan theikei a, tanu bang a en in, ken leng duat chih theihtop in ka duatsam hi. Hun hong pai zel a, ka innsung vante uh khawng a mang hong om panpan hi. Himahleh ken bel ka ompihnu uh ginlelhna himhim ka neikei a, ka nu'n a van hoih simsim leh sum tanpha mang ahihdan hon gen zel mahleh, kamkhat inle amah muanmawhna paukam ka zang ngei kei. Lawm leh vual ngaina hun lel na hi ua, na lawmpolh ah pilvang inla, innsung khawng ah na lawmte tangnel tak in ompih mawkmawk nawn louh di ahi,,, chi'n paukam neEm tak in ka thuhilh zel hi.
Vangtah huai tak in ka nu dmalouhna in ahon buak a, alu naa sa in, tut leng tu theilou in hong om hi. Kou leng innlam a ki etkol pen thil dikpen hilou chi'n damdawi inn lam ah ka kipawlut ngal ua, doctor te'n ka nu mit in khua mu gina thei nawnlou di ahihdan ahon gen uhi. Ka lungkham petmah a, himahleh hihtheih ka neih louh ziak in, ka hihtheih omsun, ka nu duat tak a etkol leh amah hehnepna paukam zat ahi mai hi. A natna dang kisoisel nang a nei nawn kei a, kei leng dawr lam ah ka hun tamzaw ka zangthei nawn hi.
Nikhat customer om mahmah lou, ka dawr ngakpihte toh kihoulim a ka tut maimai lai un, a vengsung lam thiltung khawng ahon gen uhi. Ken leng a thugente uh hoihtak in ka na ngaikhia a, huchih lai a mikhat hon thugen in ka lungsim ahon la mahmah mai hi. Zanlam deuh a thiltung ahi a,,,,,, "Putek khat in naupang kum sagih (7) mi pawngsual a, a pawngsualtu le mipi'n khoihlum man phial uh,,,,,," chi'n a pawngsual tupa, putek min ahon gen leh, ka naupanlai a ka omna ka paneu min mahmah hi'n ka thei a. Thuchiang dot sawm in, mundang ah ka samkhe pah hi. Amah gendan toh kei theihdan kibang chiah kei mahleh ka paneu min mahmah ahih ziak in, nitaklam a amah toh vapawt a, thuchiang theih ka sawmta hi.
Ka tutmun ah ka kingaihtuah den a, nu leh pa kiang a khanglian lou himahleng, nu leh pa diktak nei ka hih chiah, bangteng hileh amau le ka zonkhiak ngai ahi, chi'n ka kingaihtuah a, himahleh ka lungsim abuai mahmah mai hi. A ziak bel, ka nu'n pasal dang neita a,huai apasal ka pa diktak hilou, ka nu va mukhe mawk leng le ka pa diktak bang chi'n ka muthei dia, huchi mah bang in, ka pa va mu hitawk leng le, ka pa zi ka nu diktak hilou zel,,,,,, ka lungsim abuai petmah mai hi. Himahleh ka hih di masa pen chu, ka dawr ngak tunu gen, ka paneu hi-a ka theihte inn vaphak masak ahi. Nitaklam ahong hi-a, kou leng dawrkhak in, ka paneute innlam zuan in ka kizuikhia uhi. Ka ompih nu' kiang ah, paihak maithei ka hihziak in, ann ne dia ana ngaklou di'n ka hilh ngal hi.
Ka mitkha in amuh dan toh, tua nu hon paipihdan a kilamdang ngei mai, lampi ah ka lametna tengteng a beizou hial hi. Ka paneute inn ana hi kei leh bamgchi'n ka zongkhe thei dia, ana hi mawk lelah ka paneu pawngsualtu hizel di,,,,,ka kisaikaak den hi. A genna in ka tung ua, inn hoihlou chik khat ah hon lutpih a, pitek khat ana om hi, huai pitek ahih leh kua dang hilou in, ka naupanlai a, hihduhdah chiteng a hon hihduhdah tu, skul kai-ut ngawih-ngawih a ka omlai a le hon kaisak nuamlou, skul ahon kaisak khak leh chi a, ka sep di teng ka sep khit chiang a skul kiang, gamnuai a ka lawmte skul kai ka va et zel khawng thei a, a inn ua pat a hon hawlkhetu, hehpihna neilou, naupang kum 7 mi lel, piching nasep teng hon semsaktu ka muh in, thangpaihna'n ka dim hi.
Himahleh huai piteek tung ah ka thangpaihna ka latsak pen thil dik hi'n ka theikei a, ka hehluat ziak in gen di pen le theilou in, ka ding deedu hi. Aman bel nengkhachik inle ahon theikei a, bangmah genlou a pawtkhiakdi hii ka saklouh man in, sawtlou ka tu ua, midangte omna khawng ka dong hi. Hun remchang dang a va phatak nawn di'n ka pawtkhiaksan uhi. Ka dawr ngakpihnu'n lamdang sa tak in ahon en a, gen-ut nei hileh kilawm, lah genkhe ngamlou dan in ahon enden hi. Lampi a ka pailai un, ka dawr ngakpihnu kiang ah, a tanchin uh ka dong zel a, aman le atheih dandante ahon hilh zel hi. Ka thei ut na ziak ahon dot chiang in, ken bel nidang chiang a bangkim ka hilh di thu'n ka dawng zel hi.
Ka dawr ngakpihnu'n, tu'n chu a teekta a, a hatlai deuh khawng in chu anasa thei khopmai, a pasal lah lauhna himhim neilou, inveng louvengte mitmei venna khat le neilou in a gamtang sek a, a pasal toh a kihihbuai chiang un le apasal inn apat hawlkhiak khawng sawm zawmah hial sek hi. Huai khawng ziak le ahi maithei, a khosakna uh a lamzang kei mahmah mai ua, kum nih paita in a tenna inn uh a kangtum vek a, van khat le tuah manlou in, a tate uh nih leng hiai meikang ah a kanglum uhi. Amau nupa kia a khosa in, vengsung ah aphallouh uh, khamtheih chi tuamtuam zuak in a-om ua, vuaitampi vengsung apat hawlkhiak ding in ana warning ta uhi. Himahleh a vangphatna uh paitlung zel chu ahi dia, tunitan hiai veng ah ateng lai uh. Himahleh zanhal in apasal in numei naupang kum7 mi di khawng a pawngsual lai matkhiak ahia, amaban uh zaw limchi lawmlawm khol kei leh kilawm,,, chi'n hon gen hi.
Ka lungsim ah, ka naupan lai a hon hih duhdah nate,ken phuba ka laak ngailou a Pathian in kei taang a ana laksak eive, himahleh kei le amah bang a thilsual bawl a khosa, ka hun leh nite zang den hi'ng a, Pathian kei tung ah hoih hina maizen e aw,,,, chi'n ka kingaihtuah vongvong hi. "Umily,,,,,Neek lim aw,,,," chi'n ahon paukhia a, a inn pialna lampi uh ka na tung uhi. Awle,,,,, nang le neek lim, chi'n ka kikhen ua, mahni innlam chiat manawh di'n taxi ka la a, khomui philhphelh nuai ah motor tai zungzungte kar ah innlam ka manawh tei hi.
Inn ka tung a ka nu leng ana harh deuh ahihman in sitting room ah, tv en in anih un ana tu uhi. Ka gimsim ziak in, ann nekham lupna ka kidenna pah a. Lupna tung ah ka kingaihtuah a, ka paneu zi in ka paneu bail nang bangmah le neilou di hia, kuamah lah panpihtu amuh uh ka lawmnu gen apat, aneih uh ka gingta kei hi. Himahleh a thawn apanpih ka sawmkei, alak uah thil phut ka neih ahon hih lawhchin sak kei ua leh, ka panpih kei di, chi'n ka lungsim ka bawl felta. Zingchiang in a inn uh ka va pha dia, ka nu toh ka pa omna (tenna) ka dong dia, ahon hilh theih leh panpih a ngaih dandan in ka panpih dia, ahon hilh theilou ahihleh, chengkhat lel inle ka panpih kei di.
Nu leh pa kiang a khosalou himahleng, amaute'n genthei tak in ana koih kei uh hen la, atanu bang un ana en le uh, hiai bang a ka hinkhua a haksa gentheihna ka tuah tengteng ka tuak kei dia, midangte bang in, pasal hoihtak nei in, sungkuan kituaktak ah ka khosa ngei di'n ka kigingta, himahleh amaute ziak a hiaitan tung ka hihman in, athawn mai a ngaihdam hiam, panpih hiam hithei mawklou di ahi,,, chi'n kei leh kei ka kisiamtan zel hi. Ka kingaihtuah chiang in ka thangpaihna a sousang deuhdeuh hi'n ka thei a, himahleh a dinmun uh ka ngaihtuah chiang in, hehpihna bel ka nei veve hi. Ka nu leh pa ka zonkhiakna a ahon panpih theih kei ua leh panpihlou di,, chi'n ah thupukna ka na bawl khawng ka ngaihtuah kiik a, dik khinlou hi'n ka thei zel hi. Himahleh ka thupukna bel bangtan hiam paisuakpih ka sawm tinten hi.
Zingkhua hong vak a, sunlam chia ka thil hih di ngaituah kawm in, zing singpi ka dawn hi. Ka ngaihtuahna ah thildang himhim a-om thei kei. Ka nu leh pa zonkhiak a, ka muh hun a uttawk a hangkhum zialzial ka-ut hi. Ka thangpaihna hong kibehlap deudeuh ahihman in, ka annkam bang alim kei a, nidang a ka neek kimkhat le ka nekei hi. Ka nu hiam, ka pa hiam va mu hileng, a tanu uh ka hihlam ana theilai di ua aw,,,,, ? Hehpihna nei hetlou a asisan ua piangkhia kei naungek ka hihlai apat a hon kem peihloute'n, tu'n hon mu le uh le ahon kipahpih uh ka gingta lawmlawm kei hi. Himahleh ahon kipahpihna uh lamen a zongkhiak sawm ka hikei a, ka tung a a gamtatdan uh dik ka sakei a, amau ginat louh ziak a ka hinkhua a haksa ka na tuah tengteng thei le uh chih ka deihman a zongkhiak sawm ka hizaw hi. Ahi tak in, ka pianna nu leh pa sang in ka pasal James nu leh pa ka ngaina' zaw a, khovel a nutak, patak ka tuah masak pen hi'n ka thei a, pawm le'ng ka pawm hi.
Zing ann nekham thazawi kawm pi'n ka kisa a, ka kisak zawh in, dawr lam zuan di'n ka pawtkhia hi. Dawr ka tung in, ka dawr ngakpihte le'ng ana tungkim vekta ua, dawr kong ah ana ngak uhi. Ken leng dawr chahbi ka pia a, dawr ahon hawnkhit un dawr sung ah ka lut ua; hih di poimawh tuamtuam ahon hihkhit un, kei leng ka paneute innlam zuan in ka diangkhia hi. Ka potkhiakma in, ka dawr ngakpihte kiang ah; ka kiik hun di gen theilou ka hihman in, ana lunghimawh lou-a, nitaaklam tan-a ka kiik man kei lele, dawr chahbi ana kem mai di'n ka mimuanpe'n kiang ah ka thukhak hi.
Piteek lungkham ahi chih haih vuallouh in, ka paneu zi ana om-a, ken leng zahtakna nei tuan sese lou ka hihman in, tu di'n hon sawlkei mahleh, tutna ka naih a, ka tusuk hi. Bangmah genlou-a ka tut nung in, "kua na hi hiam, koi a hong kipan, bang deih nei-a hong pawt na hia,,,,,? Chi'n ahon dong hi. Ken leng, kum hiaizah paita in, numei naupang khat, tagah ompih nanei uh maw ? chia ka dot leh, sawt simtak ahong kingaihtuah nung in. "Haaaa,,,,, neimah ung e ! Amah numei naupang kizen mahmah leh fel mahmah ahi, himahleh nungak dia hong kisa, atha khawng ka nek theihdek pat un, Lamka lam a apute'n ahong thuaikhia ua, huainung khatvei mah le ka kimukha nawn kei uh,,,," chi'n hon dawng hi. "Nang huai theikha na maw ? " chi'n lamdang sakmel tak in ahon dongkiik a, "Ka theikha a, anu leh pate, naungek chik ahihlai in, akikhen ua, huai anu leh pate omna na thei hia ? " chi'n ka dong nawn hi. Lamdang sakna ahong lian deuhdeuh a, ahih hang in ka dotnate bel ahon dawng zel sam hi. Kikhen mah uh e, nupa ginalou tak ahi ua, atanu uh, a sisan ua piangkhia ngawih-ngawih le iit zoulou in, akikhen nung uh sawtlou in, koppih dang tuaktuak anei ua, ken phatuam ngaitak in ka na enkol hi,,,,," chi'n ahon dawng nawn hi.
"Ahihleh a kikhen nung un, koppih dang anei uh na chi-a, huai nung, nou kiang ahong phakha ngei uhia ? ", chi'n ka dong nawna. A pasal, ka pasal sanggampa'n zaw hong pha zeuhzeuh mah e, ahihziak in, a zilui pen zaw kholak khawng ah ka kimuhkhak louh ngal uh, inn ahong phaaklam ka thei ngeikei", chia ahon dawngtak in, lametna lianpi ka nei ngal hi. Ka maitang ah ahon en a, hon theikhe guih di hileh kilawm in, ahon enden hi. Himahleh piteek khat kiang maimai a ki-iim zawh pen ka kihtak louh man in, zumna himhim ka neikei hi.
"Huchi ahihleh, huaite nupa muh utna ka nei a, na hon panpih thei diam ? Chi a ka dotleh, panpih theih louh nang bangmah a-omkei, ahihziak in, ka tung ua thiltung ziak in ka buai mahmah mai a, ka pasal lah tua police khut-a om lellel ahih chiah, kei kia'n zaw bangchimah in ka hon panpih theih ka kigingta kei. Ka pasal hong potkhiak chiang in, amah toh na kihou di ua, aman hon panpih thei mahmah in teh. A hihziak in ahong potkhiak hun di bangmah ka theikei. Tumaa lamkhawng in chu zu khawng ka na zuak sek ua, ka zu zuak uh amat chiang un, amah hong mansek mah le uh ni 3/4 nung khawng chiang in ahawn pawtkhesak zel uhi. A hihziak in tutung zaw ken le ka thei siam kei, naupang khat vasual achi ua, ken lah bangmah theih pihlou ka hihman in, bangchia malak di ahia chih leng ka thei bun kei. Innveng louvengte'n lah hon panpih utlouh di uh theihsa,,,," chi'n amel khawng hong liap zou hial hi.
"Huchi ahihleh ken police station lam ah ka na buaipih dia, ahong pawtkhe thei ahihleh, na nih ua na hon panpih uh ngai di ahi,,,", chi-a ka gen leh, amah leng lametna lianpi nei ahi ngei dia, amel khawng alatdan hong tuam zou hial hi."Hitham heh aw, na va lakkhiak theih leh, kou leng kon panpih theih dandan in ka hon panpih di ua, nang leng theihtawp hon suah inla, ka pasal lakkhiakdan hon ngaihtuah sak mahmah in aw,,, chi'n a nget in hon nget thoh hial hi. A paukam, kiphahniam tak ka zak in ka hehtha ahong suaksak mahmah a, ka neulai a ahon kepdan leh ahon bawldante genkhiak a, hang a hangkhum zialzial khawng ka-ut maimah hi. Himahleh huaidan in om mawk leng, ka thiltup teng fail vek di ahihziak in, ka kisuum hamham hi. Hun remchang masa pen a police station lam hawh di ka hi, ana lungkham ken la, na pasal ka hon lakhiak sak di,,,," chi'n, ka pawtsan hi.
-------------------------
BUNG 7 NA
Dawrlam manawh phot hoih ka sakziak in, koimah ah piallou in, dawrlam ka zuan ngal hi. Dawr ah sun singpi dawn in ka tu khomuang a, ka dawr ngakpihte bel, amau thawven dandan a thawvengte ahihman un, kei mitmei le hon veng sese lou in, amau chiakchiak in ana chiak uhi, ka phone hong ging a, ka pick-up ngal hi. Ka ompih nu un, ka nu, a natna in phathak ahihdan ahon gen a, ahih theih leh, a kintheilam a innlam hong zuan di'n ahon gen hi. Kei leng ka singpi dawnlai taisan in, ka dawr ngakpihte khat, hon panpihtu di chi'n, ka thuai ngal hi. Taxi la in, ka innlam uh ka zuan ngal ua. Inn ka tung un, ka nu houpih theihlouh, khua le phawklou in ana om hi. Buaipih didan dang thei tuanlou ka hihman in, damdawi innlam ka manawhpih ngal ua. Damdawi inn ah ka luutpih ngal uhi. Doctor duty nu'n, ana check ngal a, sawtlou nung in admit ngai ahihdan hong hilh a, kou leng buaipih ngai tuamtuam ka buipih ngal uhi.
A khen chiang in, ka nu hong harh deuh zel mahleh masawn theilou ahihman in, ka lungkham mahmah mai a, ka ngaihtuahna a paisau thei petmah hi. "Ka maban a hihdi tampi neilai ing a, ka lawhchin hun chiang a, ka nu hilh di ing a, ka nu'n le naktak a hon kipahpih ngei di. Tu'n hon omlouhsan mawk leh bang ka chita maizen dia, ka maban lah sahlai mahmah ngal a,,,,,?" Ka lungsim abuai petmah mai a, A diktak in, ka nu damsuah sang in, a damsuahlouh gintaakna ka neilian zaw hi. A ziak bel, ni thum lambang paita mah leh, houpih le houpih theihlouh, bangmah lah nelou a om ahihman in. Sawtlou chik khong amit ahong hak a, banghiam gen-ut nei hileh kilawm in, akam khong hon kaa zeel hi. Himahleh a aw suak di om mahmah lou ahihman in, bangmah zak di'n a genkhe thei tuankei a. Beidong tak a ka om lai un, ka gintak bang ngeingei in, ka nu'n ahon mualliam san a, lungsim naa leh lungleng in ka hun leh nite ka hon zat a ngai nawnta hi.
Ka thawmhau mahmah mai a, inn ah om leng lah, ka ompih nu toh kia; ka ompih nu'n lah, ka nu ngai ahi ngei dia, ka nu damlai a a-omdan toh ka nu sih nung a a-omdan a kikheng mahmah mai hi. Bangteng hileh, sihna ziak hive'n ka tapa Eric in le hon ngai poimawh deuh khak leh chi'n, sawtsim nung in, phone in ka nu sihthu ka vahilh hi. Himahleh, Eric in huchi lawmlawm in ahon ngai poimawh kei hial hi. Ka lungsim ah banglou teng ahong lang a; tulai khovel paidante khawng, mi tamtak te'n, numeite mawhsa in, namdang tangval, sum leh pai deih ziak a, akop khong uh, leh huaite, nak taktak a ademnate khong uh ka na theisam a, kei ngei inle ka na mawhsa mahmah sek hi. Himahleh, kei, ka tapa ngeingei in namdang a kop ziak a, anu le hon ngaihsak utlou; huaikia hilou a, api sihthu atheih ale, hon ngaihsak louh khawng ka theih thakthak chiang in, kuamah mawhsa thei ka hihlouhdan ka kithei a. A guuk tak in ka zak ata thei mahmah mai hi.
Eric in bangmah hon hilh kei mahleh, ni 3 nung in ahong pai di thu ahon hilh khonung hi. Ka ngaihdan hikei mahleh, hong pai henla, hon panpihta maileh chih khong ka ngaihtuah ziak in, lungkimlou dan in leng ka om nuam kei hi. A nungak haichilh pen hon thuaikhak ka lau mahmah mai a, himahleh huaithu le bangmah ka gen ngam tuankei hi. Ka ompih nu kiang ah, Eric room hihsiang ngai ahi,,,," chih gendia a room a ka valuut leh, ka ompihnu a van tengtoh pawtkhia ahihdan ka mu-a, lamdang ka sa mahmah mai hi. Kintak in, a inn uh ka phone a, a sungte'n leng,,, "inn a hong pailou ahi,,,"chi'n ahon dawng zawmah lai uhi.
Bangteng hileh kei nawhkhiak le hilou; amah ut mawng a apawtkhiak ahihchiah chi'n ken leng ngaihsak ka sawm nawn tuankei hi. Ka theih bangbang in, Eric room ka hahsiang a, thil tuamtuam ngaihtuah in ann nangawn ka negina thei kei a, ih-leng ka ihmu gi-na hetkei hi. Ziangkhua hong vak a, Eric, inn ahong tung ni di himahleh, nitaklam pek di ahih ziak in, kei leng ka maban, ka nu leh pa zongkhiak nna sunzawm di'n pawtkhiak ka sawm nawn hi. Police station lam hohpah di chi a, ka na thupuuksa himahleh, ka nu sihna ziak in ka ut-hun in ka hoh theikei a. Bangteng hileh, a innlam uh pha masa di'n thupukna ka bawlthak hi. Ann nekham ka kisa a, dawr lam tot masak hoih ka sakziak in dawrlam ka manawh phot hi. Ka lungsim a kisaikaak den a, Eric ana ngak vanglak hoih di hia, ahih kei leh keimah a ana zongkhiak di, chi'n ka ngaihtuah na a kisual den hi,,, chi'n Emily in ahon gen hi. Sana ka et leh ka pa office kai tawphun dek ahihman in ken leng paikhiak a, hun remchang dang a kimu nawn di'n ka gen hi. Kei ziak a ahun manpha tampi bangmah lou a azatbei mawk khong ka ngaihtuah chiang in, kei adia a kipiak zawhna leh a kihawng dan thupi ka sa mahmah mai a, ka siam bangbang in kipahthu genmah leng, kei sang a, amah paukam siam zaw ahihman in, gen di bangmah theilou in hon koih hithet hi. Ka nuihkhawng aza hial a, Emily in le, "a kinthei lam in kimu nawn le maw,,," chi'n ahon gen a, ka pa te office lam zuan di'n Emily te inn ka pawtsan nawn hi.
Ka pate office ka tung a, ka pa, ana mansiang nailou deuh ahihman in, innkong ah ka pa ngak kawm in Cigarete teep in ka tu maimai hi. Sawtlou ka tut nung in ka pa hong pawtkhia a, innlam manawh in ka kipawliam nawn uhi. Lampi a ka tailai un ka pa toh bangbang hiam gen in ka kihoulim ua, zanlam a gam leh inn (dawr) alei tungtang khawng ahon gen hi. Zingchiang lam, hun remchang a-om leh, va-et hoih asak thu ahon gen a, ken leng ka pa'n huchi khop a a awlmawh pen lamdang ka sa hial hi. A ziak bel, ka pa, mingaihsam mahmah khat ahi a, thil thupi simsim khawng le ngaizam maimai theite ahi. Himahleh huai a thil lei bel, vei chih petmah a vei ahihman in, a gengen mai hi. Huaiziak mah in ken leng neuselua hilou di'n ka gingta mawk a, ka pa, huai agam leina en dia a hawh chiang in, amah toh ka hawh ngei di, chi'n amah toh hawh ka na sawmtei ringawt a.
Inn ka tung ua, ka kihahsiang zawh in, nidang a ka hihdan mah in, ka room ah ka luut hi. Computer ka on ngal a, Emily tanchin tuni lam a ka theihbelhte gelh in, ka awlmawh mahmah mai hi. Sawtlouchik tu ka kisak lai in, ka nu'n ann ne di'n ahon sam a, sana ka etleh dak 5 lam ana gingta ahihman in. Ken le'ng "ann nekkham chiang a sutzop di,,,,," chi'n, ka room ka potkhiaksan hi. Ka ann neklai un ka pa'n thudang bangmah gen tuanlou in, a gou (gou chi'n gelhgzel ta mai di aw) lei te mah haichilh ahi ngei dia, a gengen mai hi. Ka nu'n leng alunglutpih mahmah ka chih taak kha. Anih un agen ua, zingching lam a va etkai di, ka pa'n ahon gen tak in, ka nu'n leng, muh a ut thu ahon gen a, sungkuan a hawh di'n thupuukna ahon bawl uhi.
Tapa mal neihsun ka hi a, ka nu leh ka pa'n, hiai gou a lei pen uh, kua dang adi hilou in, kei atapa neihsun uh aa di ahi chih ka theichiang a, nidang a, athugente khawng uh kikuppih utlou a, ka na lunglutpih louh khawng haihuai ka sathak mahmah mai hi. Himahleh ka nu leh pa le tek selua ahi nai kei ua, sawtpi hon dampih lai di un ka gingta hi. Huai khawng ziak le ahi maithei. Keimah ah mohpuakna hong omleh, tu dinmun a di'n ka chin hetkei di' chia kingaihtuah a, banghiam vangsiat thil thu ziak in, ka nu leh pa'n hon omlouhsan thei uh ahi, chih ka theikhia a, ka lungsim kibawl theih dandan a kibawl di'n ka kisak ngai ahi chih ka theikhia hi.
Tangval piching khat kihita, bangmah sep leh bawlpe'n lah ki neilou; phet lou a, sep di ahon gente ule, seppeih gam neilou ka hih man in, haihuai ka sa mahmah mai a, ka gensa mah bang in, ka nu leh pa'n, zankhat mitsi'n hon tuak mawk uhenla; kei kia a khosa a, innsung enkoltu dinmun in ding mawk leng, bangchi'n ka om dia, huaikia ahi kei, zi leh taa kinei henla, sungkhat pa dinmun ah kiding leh, ka zi leh tate bangchi'n ka chawm dia, ka nu leh pa sepsuahsa a, zi leh ta chawm di hileng, pau selou in, ka nu leh pa sepsa in le ahon chawm zou mahmah di'n ka ging. Himahleh khut leh khe kim, lungsim ngaihtuahna mite a bang kinei sam a, nu leh pa sepsa a, zi leh ta chawm di chihpen, pichinlouh huai ka sathak mahmah mai hi.
Bangteng hileh, ka nu leh pa'n, tua athil hih uh, ka theih tawp suah a ka panpih hoih hi'n ka thei a, amau nuaksak zawng a paukam zat ka sawm nawn kei hi. Room sung a ka luut nung in leng Emily thilgente sang mah in, huai ka ngaihtuahna ah ahong om zaw mawk hi. Ka thugelh laile sunzawm theilou in, lupnatung ka kidenna a, kingaihtuah a ka lup lai in, ana ihmukha ka hingei dia, ka harh in ziinglam dak 2 ana ging man hi. Ihmut sawm in lumthak mah leng, ka harh deuhdeuh mawk a, thildang ngaihtuah theilou in, ka pa gou lei mah in ka lungsim ah mun aluah mawk hi.
Zingthoh hong hun a, kei leng ka thoukhia hi. Ka nu leh ka pa, ka thoh khalh a, singpi bawl in, ka nute room ah, singpi nou nih tawi in ka valuut hi. Ka nu zingthou toh, kongkhak bul ah ka kiphukha phial ua, ka nu'n lamdang sakmel tak in ahon en hi. Ken le'ng ka ihmut baih ziak a thoubaih ka hi, chi'n ka gen a. Ahitak in, nidang a ka omdan diklou leh piching lou taktak a ka omnate ka tawpsan ngai ahi chih chiangtak in ka thei a, huai di'n tua pat bul ka patngai ahi, chih leng ka thei hi. Sawtlou nung in, ka pa le'ng ahong thoukhia a; nidang teng a kei sang a thou masa gige ahih ziak in lamdang asa hial hi. "Tua bang zel a na-om le chu zineih lam bang le ngaihtuahta leng poilou di eive,,," chi'n a singpi dawn kawm in ahon chiamnuih a, a singpi dawn khong thalh zawzen hi. Ka nu hong paukhia a, "zi hoih leh feltak na neih di ahi, ei innsung a om di khong, pilvang tak a nateel ngai ahi,,,,,,,," chi'n bangbang hiam ahon gen zauzau hi. Kei leng ka nu'n thu tamsimtak genta ahihman in, kaningtha ahong suak a, "Ka nu na hi a, kum hiai zah innkhat ah i na tengkhawmta uh. Himahleh na tanu, moufel leh mouhoih hi dia na thuhilh lam vuaikhat mah ka za kha naikei, huiziak in, mou fel leh hoih neih kilamen ken la, ka muhmuh ka hon nei dia, afel lehlah nang vangphat, a gitlouh lelah na vangsia,,,," chi'n ka nu ka dawng hi.
Huchi bang paukam ka nu ka zatkhum ziak in, ka nu heh chih petmah in ahong heh a, zingkal kal in ngaih taktak in ka hong kina ua, ka hangkhe loiloi uhi. Ka pa'n le (ka thugen diksa in) ning deuhta ahi ngei dia, ka nu atai lohhial hi. Ka nu'n ka pa taina a zaak chiang in, haang sunzawm lou in, ahong daithei vanglak a, kei le'ng kihahsiang zou, ka room ah ka lut nawn ngal hi. Sawtlou nung in ka nu'n ahon sam a, ka vapai leh, ka gintak louh tak in, "gas abei a" chi'n, gas buuk kheng di'n ahon sawl hi. Ken le'ng kudam a gas-buuk ka vala a, keikia a ka dopphei leh ka kawng ka hihna kha zawmah lai hi, ding leng dingtang theilou in ka om a. Ka nu'n neek abawlkhit in, ann ne di'n ahon sam a, kei leng peihlou pipi in ka vathoukhe hamham hi. Ann ka neek lai un, ka pa'n, "Sunlam chiang a, gam leina phak i sawm uh, tuni'n kikhelsak mawk le'ng, hun remchang dang hong-om zok nawnlou di ahihman in, tuni chu na nu toh ka va-en phot di ua, hun remchang dang ah, nang zaw ka hon hohpih thak mai di,,,,,," chi'n ahon gen hi. Ken bel vahoh a bangmah phattuamna omlou di ahihman in, kamkhat inle ka pa thugen ka dawng tuan kei. Ann nekham, ka nu leh pa kisa in, keikia ahon nusia uhi. Ken leng hun remchang ahi, chi'n ka thugelh sunzawm di'n ka hong kisa nawn hi.
Emily hinkhua in ka lungsim ahon zou mahmah mai a, bangchi'n tua ka kimuhlouh hunsung uh a zang mah dia aw,,,, Eric bang le inn hong tungta ngei di hia, anu leh pa a zongsuah ta dia aw,,,,, chi'n ka ngaihtuah den hi. Himahleh, keimah ah tutak dinmun in bangmah hihtheih ka nei kei; ka damdia, hun ka neih masak penpen chiang in, ka vapawt nawn ngeingei ngai dia, Emily vamuh ka sawm di ahi,,, chi'n ka kingaihtuah hi. Bangteng hileh, anu leh pa a zonkhiak nang panpih theihna lampi ka nei ahih zenzen leh, ka theihtawp in ka panpih dia. A nu leh pa tung a, athangpaihna tengteng, a uttawk in haangkhiak khum zialzial henla, a lungsim gimnate le a dan omdeuh di,, chi'n ka ngaihtuah hi.
-------------------------------
BUNG 8 NA
Huchia ngaihtuahna buaitak a ka kingaihtuah lai in, ka nute ahong luut ua, kei leng haksa kawmpi'n ka va paiphei hi. Ka nu leh pa' mel ah kipahna leh lungliapna lang kop hi'n ka thei a, ka nu bang nidang a pawt chiang a, inn a hong luut phet chiang a, hong nuiluut selsal gige hia. Himahleh huai ni bangthu va za a, bangthil va mu uh ahi diam ah, amel uh nguai in ahong nguai mawk hi. Ken leng bangmah genlou in, ka peih dandan in ka nute singpi di va bawl ka sawm hi. Ka nu'n singpi dawn peihlou chih ahon gen tak in, ka pa'n le, "ken le ka dawn peih dah mai di, ka hong paidek un, singpi ka hon dawn malam ua, ka duhtha le asuak kei, achih ziak in kei leng ka tawpkiik thak hi.
Ka nu leh pa hohna tanchi'n donglou a omtel hilou ka sakman in, ka pa kiang ah a lungtun huai asak leh saklou ka dong khemkhem hi. Ka pa'n bel lungtun huai mah e,,,, chih teng in ahon dawng lel hi. Ka nu ahong paukhia a, lungtu'n huaitawk lele a neitu hehpih huai salua ka hi. Hiaidan a hih teitei bang le ken zaw hoih salou ka hi,,,, ahon chi hi. Thil omdan ka theihlouh man in, ken bel bangmah ka gen kei, huchia dai dedu a ka-om leh, ka pa a hong pau nawn a, bangkim hihfel vek di, haksa kawm pipi a sum tampi kipuuk a, tua tawpsan belbul hitheilou ahi. Zingchiang in Revenue office ah ka va hoh dia, thil hihfel ngaiteng ka va hihfel vek di. Huai a Director pa ka meltheih hoih mahmah ahi a, bangmah buainang a-om ka gingta kei. Ahih ziak in sum bel tamlou piak ngai di'n ka gingta." Chi'n hon gen hi. Ka pa'n room ah ahon lutsan nung in, ka nu toh ka kihou ua, ka nu thilgen lamdang ka sa mahmah hi.
Ka nu'n, Bawi,,, na pa'n gam leh inn a leimawk na a, thil diklou khat om ahi. Tuni a a neitu ka va muh na uah, a neitu'n a gam lai (LSC) pen mi'n guksakdan a ana genmawk ahi. Ken le'ng lamdang ka sa mahmah a, gintak huai di hia, gintak huailouh di chih le ka theisiam kei. Himahleh alai ka et chiang un, ama' min a tuangkha kei zel hi. Ei hon khem sawm khawng ahi maimah dia aw,,,, chih khawng ka ngaihtuah mawkmawk a. Na pa'n lah buaipih nak lua ahih chiah, hiai khawng ziak in tawpkiik a utnawn lah gintakhuai sikei a. Bangteng hileh, na pa'n a saisai in a hon sai dia, ei sepsuahsa bangmah omlou ahih chiah, va gengen le nuamlou ahi, chi'n ka nu'n zong hon gen hi.
Ahi mah ve maw nu', ei sepsuah bangmah omlou ahih chiah, thil va gengen bang le nuamlou, huai chiah, tulai zaw kikhemna tamlota mahmah in chi'n, kua hiam khat in ka pa' ana khem khong hi dia gingta maimah ka hi. Ka chih leh, ka nu'n, "tua na pa gam leina pa' zaw huchi dan a ei hon kheem di chi hikei, tuma pek a ka na kimeltheihsa uh ahi a, himahleh aman le alei dan diktak ahon gen kholkei; a leina le zanlam zek hihtuak ahi a gen dan, chi'n hon dawng hi. Ka pa'n, ka nu toh ka kihouna uh hon za ahi ngei dia, room apat ahong pawtkhia a, bangmah gen buai di om nawnlou ahi, LSC a fel a, kuahiam khat in hon hihbuai sawm mah leh zing chiang in office ah ka va hihfel dia, banngmah lauh nang om nawnlou di ahi,, chi'n ahon gen hi.
Kei le sawt tu theilou ka hihman in, lum di'n ka room ah ka lutsan nawn hi. Ka nu' thugente ngaihtuah kawm in ka hun ka zang a, thu kuanlam leh pailam le khen theilou khop in ka lung abuai hi. Emily zong ka ngaihtuah man kei. Ka lungsim in bangmah ngaihtuah mumal theilou ahihman in, ka lumsuk a, ana ihmu kha ka hingei dia; ka nu'n nitaklam ann ne di'n ahon phawng hi. Ihmut khamlou pi'n ka thoukhi a, annkuang ah, huaithu mah gen in ka kihoulim uhi. Ka phone hong ging a, ka sanggam nu'n zing chiang a ka nu a inn lam ua pawt dia adeih thu ahon gen hi. Ken leng ka nu toh ka kihousak hi. Ann nekham, nidang a ka hihdan pangngai un, sungkuan kihoulimna sawtlou ka neih nung un, lum di'n ka kisa uhi. Kei bel room ah ka luut ngal a, ka nute leng luppah sawm hinapi; huaizan lengla aneih ziak un alumpah thei kei uhi.
Zingkaal ka thoh in, ka nu leh pa' ana thoukhinta ua, bathroom lam manawh a ka pailai in, ka nu'n, "zingkal khat kia ei maw na hon thohkhalh, na lup baihbaih maizen toh,,,,,," ana chipah hi. Bangmah genlou in kihahsiang di'n bathroom ka luutsuak a. Ka pa ahihleh bangmah genlou in, news paper sim in atu meeumaau hi. Ann neek hun ahihman in; nidang a ka hih ngeilouh, ann thuk di'n ka kisa a, lehlam ka ngaihtuah chiang in, tangval toupi, ann thuk chih khawng zumhuai ka sa zensam hi. Kuaman hong mukei na'n teh,,, chi'n ann ka thuk hi. Ann nekham ka pa' gam lai hihfel a, Revenue office a hoh di'n akisa a; ka nu ahih leh ka sanggamnu te innlam pha di'n a kisa' hi.
Kei bel pawtkhe thei hilou ka hihman in, ka nu leh pa' pawtkhe di en in, ka tu maimai hi. Ka pa'n ka nu, ka naute innlam a khak masak di'n, a car ah a tuangsak a, huchi'n anih un hon pawtsanta uhi. Bangmah semngaplou ka hihman in, tv khawng en in ka tu maimai a, sun dak 12 lam hong ging in; ka inn kongkhak uh hong kikiiu a, ken leng; "hong lut ua,"chi'n, kuate hi hiam chih le ngaihsak tuanlou in ka thoukhe sese kei hi. Numei aw in, ka pa min lam in, "Pu Mawia (minlem) te inn ahi maw,,,,," chi'n hong dong a, ken leng, "Himah e, nou kua te, bangthu hita ahia,???? ka pa tu'n a pawt lellel a,,,,,,,,,, chi'n, pau zauzau kawm in ka thoukhia hi. Innkong khak lam ka-et phei leh ka kiguih zou hial hi. Kong bul ah; Emily mangbat mel leh gimmel mahmah, kho-ul kai niipniap kawm a ding ka mu a, aman le ahon muhmawk peen, lamdang sa ahi ngei dia, bangmah le gen sunzawm theilou in, kongkhak bul ah ading dedu maimah hi. Innsung lam a luut dia ka nget nung in, bangmah genlou in a hong lut a, atutnang ka kokmuh a, tawldam di'n ka hilh hi.
Emily in,,,,, "natna nei na maw, na om nopmel kei na mahmah e,,,,? Chi'n, ahong pau khia a. Ken leng ka kawng ka suknatdan ka gen a. "Nafel luat ziak eive maw,,,,," chi teng in ahon dawng hi. "Emily,,,,,,,, bangchidan e, tu sun lailai a na hong pawt mawk, ka inn uh bangchia thei e, zanlam na hong hoh dek a lah, ka inn uh tung manlou a hon kiikpih ing a, bangthu poimoh om ahia ? Gimlah na gimmel mahmah ngal a,,,,,," chi'n ka dong zungzung hi. Emily, awl a hong paukhia in, "Aaaaa,,,,Nas, gen di ka haulua, tuni bel nang mu dia hiai inn a hong lut ka hi zenzen kei, hiai inn neitu houpih utna khat ka nei a, huai ziak a hong lut khamawk ka hi. Na inn uh ka thei kei, himahleh hiai inn neitupa min ka thei a, mi ka hon dong zel a, hichia hong tungthei ka hi. Hiai inn neitupa nang pa hi'n teh maw?" chi'n ahon kan zui ngal a. "Himah e, ka pa ahi, bangthu bangla om ahia leh,,,,???". Eh,,,, kidot chi ahi hia hilou chih zaw ka theikei a, na nu leh pa zongkhe dia na gen pen, bang chita e ? Emy, kei lah ka kawng anat ziak a koimah a pottheilou ing a, hilou hileh, tuni lam khawng a hong phak di ka sawm sim hi a. Chi'n a ka dawng hi.
A lungsim a gim ahi chih amel ah haihvual ahikei, "Emily, hon panpih theihna ka nei hia, namel ah lah na lungkham mel mahmah ngal a, lah abaan bangmah na gen sunzawm si kei a,,,," chi-a ka dot leh. "Nas, na ut phot in chu na hon panpih thei mahmah di'n ka gingta, ka nu leh pa zawngkhiak sawm in, buaitak in ka pang hi. Himahleh, ka thiltup ka mualsuah ma'n, buaina ka tuak a, sunzawm theilou in ka om hi. Tua ka hon hohna ziak bel thildang ahi, huai ziak in hiai thu gen leng na hon panpih nak sang in na hon huat ka kigingta. Genkhiak le ngamhuai ka sa kei hial hi. Lah genlou thei ka hihlouh ziak in, bangmah imm lou in ka hon gen dia, nang le hoih tak in ana ngaihkhiak sak inla; hiai thu ziak a na hon huat lele hon haw mai inla, kimelmak na i kaal ah, ahong piang ahih lehle, damsung a kimelma' i hi ta mai di. Tua chiang a lawm hoih a i na kithuahnate le hunkhop ahita thou,,,,deih teelthei ka hinawn kei,,,,," chi'n ahon gen muatmuat hi.
"Emily huaithu khawng gengen lou in, na hong pawtna ziak hon-gen maive, kimelmaak chih khawng bang na hon gen tel ngal a; kou innkuan in na tung a hihkhelh nei ka hi uh maw !! " Nou hihkhelh bangmah omlou ahi; ahih ziak in hiaithu ziak in i ki huah theih ka kigingta nawn kei. Zanlam a ka thilgente na thei lai di'n kon ging, ka tapa Eric leeng inn a hong tungta a; kipak tak a om di ka kisak lai in, ka kigintak louhlam tak in thil a hong tung mawk hi,,,"Eric ziak maw leh" chi'n a thu genlai ka bottah sak a. Ih hi zenzen lou; ka nu damlou ziak a, ka nu kem a enkoltu di, chi-a ka ompih nu uh na thei di maw, aman ka gintaak louh tak in ahon khem a, kei lah inn a om gina' manlou; ahun tam zaw ka nu toh kithuah ahi ua, ka nu mit hong siat tak in, aman remchang a zang in, ka nu ana khem hi. Ka nu'n le thil bangkim huainu kiang a hilhvek ahih ka gingta. Ka tanu Siamte gou tan dia ka pa'n a damlai a ana gelsa, huailai ana lakhia a, ka nu khem in,, huai gam lehkha teng ah ka nu suai ana kaisak hi.
"Huainung lah ka nu'n sawt hon dampih nawnlou zaw mah ahih chiah; amah le ka nu sih nung sawtlou in, ka theihlouh kar in ana taimang hiau hi. Ken bel ka nu a ngai a, ka nu lah om nawnlou ahih chiah, a ompeih nawnlou a, taikhia hi'n teh, chi'n ka ngai pawimoh lawmlawm kei hi. Himahleh, Dawr ah hih di poiimoh tuamtuam hih a ka buai vengvung lai in; papi khat ahong lut a, ken bel customer maimai di ka sak ziak in, ka na ngaihsak lawmlawm kei hi. Himahleh customer ahikei chih ka dawr ngakpih nu'n ahon gen a, kei mu dia hong hoh ahihdan ahon hilh hi. Napa huai laitoh munkhat ah ding ka mu a, kei ahon muh phet in, bangbang hiam gen in; a kinthei lam a ka dawr pawtsan di'n hon gen hi. Lamdang ka sa a; thil omdan bangmah ka theihlouh ziak in, a chiamnuih maimai in ka ngai hial hi. Himahleh napa' mel ah chiamnuih a genlouhdan chiangtak in ka mu a, ka dawr kia hilou; veng dang a ka gam neihsa tengteng leng ahon gen a. Alai toh ahon ensak vek hi.
"Alai peek ah ka nu suai diktak kikai ka mu a; thil hithei himawk lou ahi, chi'n ka theihsiam louh ziak in, na pa'n thil omdan taangpi ahon hilh hi. Na pa'n thil omdan tengteng ahon gentak in ken leng ka ompihnu uh thil hih ahi chih ka theisiam ngal a. Hiai dawr mai hilou, huai gam tengteng neitu ka hi a, ka thu lou in bangmah na hih thei mawk kei di, chi'n ka dawng hi. Himahleh alai ah ka min atuang kei a, ka suai leng a kikai kei. Ka nu ka muang luat ziak in, ka nu damsung chu, ama khut ah om leh ka chih ziak a, bangmah ana buaipih lou ka hihman in, gen di leh pansan di bangmah ka neikei hi. Ahihtheih liai leh, huai gamte zaw nei unla; himahleh ka dawr, ka kingakna, ka neihsun leh, neuchik ka hih apat a ka lunglutna mahmah ahih ziak in, huai beek zaw hon laksak kei le uchi'n, chih hon ngen nuam ka hi." chi'n khase tak in hon gen hi.
Ka phone ka lakhia a, ka pa phone ka sawm ngal hi. Thumvei mahmah ka fone nung in leng ka pa'n a phone pick-up theilou ahih chiah, kei le ka theih tawp a kihalh sak in; Emily ka panpih theihna' omsun, chi'n ka kawngnaa le ngaihtuah nawn selou in; ka pa'n athil buaipih a zohfel ma' nang/dal man sawm in, Revenew office lam zuan in, Emily toh taxi la in,kong kuankheta uhi. A nung ah Emily toh ka tuang uh; chih bel chiang tak in ka thei. Himahleh Emily hikei hen la, midang kuahiam khat hileh chih khawng peuh ka ngaihtuah mawkmawk hi. Ahon het khak zawng in a chi bang aling keuhkeuh mai a. Bangteng hileh; ka pa' ngaihdan ahi hia, hilou chih ka ngaihtuah kei, ka pa' thilhih kikhelsak teitei sawm in, dawite speed a taidi'n driver pa' ka hon nawh hi. Trafic jam kar ah a taihat theih tuan kei, taihaat ut mahleng, hattai theihlouhna atamzaw hi.
Ka houpihnate leng gina' tak in ahon dawng theikei a. Emily, lungkham nang bangmah omlou ahi. Kei ka-om sung, nang panpih dia kimansa gige ka hi. Ka pa'n ka thugen mang nuam kei mahleh, nanglam a pang zel di ka hi,,,,, chi-a huistle ging tuartuar lak ah; kingaihtuah kawm in ka taaizel ua. Ka tup gam uh ka tung ua; motor tuangman ka pia hi. Emily toh ka pa mu di'n office lam ka zuan ngal ua. Office a lut dia kisa a; step ka zuihtouh lai un, ka pa ahih di teng hihzou, step ah hong paisuk toh ka kituak ua; ka pa'n kou gel ahon muh tak in, lamdang sak chi tak in ahon en hi.
"Bang ngaituah a hiai san a hong hoh na hi ua oi ? Nang kawngna sa a, bangmah sem peihlou; bang dia hiai tantan hong pawt na hia oi, hiai nu' toh bangchia hong kimankha zenzen e,,,,,,,,?????? Dotna ngen, dotna ngen, ka dawngseng kei a, dawng masak di pen le ka theikei. Emily hong paukhia a, "Pu, thil omdan bangkim chu na theihsa ahih kha, zan a dawr a na hong hoh lai ua ka thugente mah buaipih dia hong hoh ka hi uh. Ka tanchin bangkim le na theihsa ahi. Kum hiaitan tagah genthei tak a ka na om nung in; ka pasal nu leh pa hoihna ziak in, dingsuah di dinmun in ka hong omta hi. Himahleh hiai bangthil ka tung a hong tungzel ahihman in, kei a di'n damman le om nawnlou in ka ngai hial hi. Nou sungkuan tung ah bangkim a kinga ka hi, chih hon theihsak unla; ka gam uh zaw na deih ua leh na hong piakkik teitei uh ka hon phut ngam kei. Himahleh, ka kingakna omsun, ka dawr bek zaw hon pekiik mahmah mai le-uchi'n chi ka hi" chi'n, office gei ah Emily hong kap hithit maimah hi. Ka kiang ua midang omte'n zong hon en nuam mahmah mai ua; ka pa'n le nuam salou ahi ngei dia. "Bangteng hileh ka inn lam uah i pai kiik phot di ua, thil omdan hoihtak in i genkhawm phot di uh aw Emily. Hiaidan a thil felthei mawklou di ahi. Ken le sum tampi ana sengta ka hihman in; haksa tak a ka na sepna athawn a mang mai di phal samlou ka hi. Bangteng hileh, i pangkhawm dia, hiai, thil diklou tak a hihtu matkhiak sawm in pan i la dia, a thil hihkhel tungtawn a gawtna amuh ngei theih nang in, eigel i pangkhom ngai ahi". Inn lam ah i paikiik phot di uh aw. Emily lungkham ken, chi'n ka pa' car ah ka thum un ka lut ua, ka innlam uh zuan in ka taikheta uhi.
Note:- Hiai tangthu, hiaitan a topsak kisawmta ahi, chih kon genmasa zual hi.Gen sasa himahleh genthak non zel di aw. Part 1 ana simkhalou bang i omkhak zenzen leh. Sial lut nung a sialdai kaih sang in, alutma in daikai le hang.
Hiai thugelh hi, a gelhtu phalna tellou a koimah a laksawn phal ahikei.
No comments:
Post a Comment