LAMKA LEH KIMAWLMITE

By ~ Sang Quptong

Ei siangtangmite,adiak a naichik a mipi'n i muhtheih uh LAMKA,Churachandpur District (Zogam) a tengte 'Target' in nei deuh leng chidan i hi.Sports ( Football,Martial Arts,Boxing leh adangdang ) ngaisang i hih dungzui un,asiam leng i tam ua,himahleh, National leh International tan tung ban i tam hetkei uh.International tan tungban dia, Mary Kom kia koih i hi uh hia le? Amah lohchinna chauh hun sa di i hi ding uam? Amah retire leh kuan a sulnung zuita di ?

Kimawlsiam i tam tuk un,a lohching taktak leh kivakna taktak dia zang i tam hetkei uh, himahleh Football lam ah National tan a va kimawl bangzah hiamte ziak in i kipak veve hi.Talent neilou i hi kei ua, himahleh hon makaihtu di hoihtak omlouh banah,kuhkalna leh chihtakna toh pang i tawm mahmah ziak ua,i gam ua kimawlmite dinmun hichi mai ahi diam ? Churachandpur District Sports Association(CDSA) te panlak siamna ziak in, i  District ua,Sports dinmun kum dang sang in changkang zaw deuh bang mahleh, deih abang naikei hi.

Sports kichi a nekzong mi i tawm lai mahmah ziak un Nu-le-Pa tamtakte'n kimawlmite support pe ut khollou ua," Kisukliamna di lel, sum leh tha sensak  na laisimna bah maimai inte "   khong chi maimai uhi. I gam a kimawlmite phaktawp thupi khollou ahih ziak in, nu leh pate'n hon lunglutpih kholkei leh leng, lamdang lua hi khollou ding mah ahi. Himahleh, sports kichi a nek zong di na hihdan, na kitheih leh chu, na nu leh pate, na Talent na theihsiamsak a, huai mah a nek na zong pe'n a deihhuai pen ahi hi.

Nekzonna dangte bang in,Sports ah leng lohchin taktak na ding in KUHKALNA,TUPGUHNA, KIPIAKZOHNA chihte poimoh mahmah hi. Himahleh,a taktak ahih chiang in,'KA PEIHKEI' chih i thangsak mahmah zel uhi. Manipur Sports lam in minthang mah leh, Ei siangtang mite leh Talpak mite lohchinna a kikhe mahmah hi. Talpak te'n Talent hoih nei zaw uh ahi diam ? Ahihkeileh,'Kuhkalna' mahmah a le i phakzohlouh ziak uh ahi diam? Politics leh MGNREGS (Job Card) te bangmai a,Sports a lohchin leh hauhsak na sawm leh na hih khial mahmah di chih na mangngilh louh ding ahi.

Sports a lohchinna dia, ei Singtangmite poimoh nawn mahmah ahihleh Tep leh muam ahi nawn hi. Mahni kithunun zoulou in bang chi'n Football khawng i thunun zou dia eita ? Deidanna leh Muhniamna tuamtuam te lohchinna i ngahma a tuakkha teitei dia mansa a om a, kisakkhol di ahi. Ei Tribal mite'n vangsiathuai tak in, Kuhkalna i neitawm mahmah ua, Tep leh Muam, Nek leh Dawn te ah eisang a 'ann sang zaw', Talpak te' i pha zou dek kei uhi.

I kimawlmite uh zakdahlouh di'n genta maimai leng. A taangpi (general) a i omdan uh; Tournament omchiang a, 'Phurphut Policy' zang in tomchik sung nasatak a va kimawl.Trophy lak leh, damsung daih ding chih le hi tuanloupi a, mi toh kisuak buai leh si-ngam di khop a pang ngam !! Vualzoh lelah, ZU a lawm in, I Vuallelh chiang ua lah, ZU mah a kisiatvat. Tournament hong bei chiang a,Sports chih himhim  'Kahase' himai.Tua teng chauh hileh phadawm deuh di, Talent suanhuai mahmah neite' Zu leh khamtheih chi tuamtuam a kibual ut sese uh mahbang. Sports kichi mite'n Nekzonna di kia a zanglou a, Khamtheih doudalna dia a zatlai ua, eilawi in Entertainment dan in i bawl ua, nuam i sa hun lel uhi. Huaiziak tak leng ahi diam, Mihausate (pil toh thuah) leh Nu-le-Pate'n leng 'Investment' bawl taak a sak louh uh. 

Tournament khempeuh a hong ding ahih kei leh a khaak di'n i  VIP te uh (Sportsmen le hilou) i chial sek ua, 'Sports poimohdan a gensiam mahmah vek ua, himahleh i gam ua sports lam a khantouhna ding leh nekzonna a zat taktak ahihtheihna dia thugen leh Government phu-ngam  omlou uh abang hi. Sports a i tuitum louhziak uh; i kuhkal zohlouh ziak uh ahih kawmkawm a, State sung a Sports lam thuneite'n hon kithuahpih hoihlouh ziak uh ahi diam ? Huchi ahihleh, " Kua Zogam Mosi leh Gandhi dia pang ta di ? "

Churachandpur District Sports Association [ CDSA ]  te'n i District a Sports lam, Football kia hilou, adangte leng phungvuh leh dopsangna ding in pan hon la  semsem uh hen la'n, Sports a tamsem in nek i zontheihna ding un, I POLITICIAN te un leng naksem in hon kithuahpih le uh i chi hi. I Lak uah 'Kihonsual' chihte a thang mahmah a, huai ziak in, I lak uah Boxing lam a siamna nei (Mary Kom dandan) leh Taekwondo chihte a siamna hoihtak nei, PHOLHSUAH nailouh kitam mahmah ahi cih hon musak hi. Kimawlmite'n Kuhkalna suahthak nawn in, i makai dia gam leh nam it ngen i telkhiatte un pan hon lathak le uh ,I Zogam uah (Lamka leh Zoudawn tel in) Kimawlmi, talent hoih pipi neite hong kipholhsuah zungzung dia, Kimawlmite ziak in Namdangte Zahtak khat i hong hi ding ua,ZOGAM lawibang thang ta ding hi. 

---Kakipak---