NA HUN A BEI CHIANG IN....!!

By ~ Sang Quptong

Khovel siatna in i Zogam Khopi uh leng hon hawi tuanlou ahih mahbang in, lam chi tuamtuam ah thil deihhuailou tampi tak hong tung zel hi. Dt.30/6/13 (Pathianni) in leng, tuplouhpi in buaina chikhat i na tuak uhi. Hiaipen ka ngaihtuah chiang in Pathian lemgel ahi ka chi hi.

Bangziak in? ''Pathian in Numei khamangthang khat matna dia, midang khat hin na ana ngiat sese ahi'' ka chi hi. Huai hun ah Police te 'Blank fire' i chi hia, 'Blind fire' i chi zaw hiam tungtawn in Zomite' kiang a, apiaktheih sunsun uh leh a hihsak theih sunsun uh chi in, chiil lou hial in, 'THAUTANG' ana pe maimah uhi. Huai thautangte' taksa a dia phattuamna omlou ahihman in, dt.6/7/13 (Kiginni)in, i Minam uh khat i 'tan/chaan' loh hilhial tel uhi. A dangte' leng, kei tel in huchi bang piak a om thei gige i hihman un, 'i hun uh abei chiang a thil om ding' khovel thil in genkhawm leng chidan i hi.

Mihingte'n i damsung a i 'deihtelna' te pansan in i sihnung chiang in chiamteh i hi ding hi. Nekguk hat, migilou, huaiham, duhgawl, zahmoh, kiliansak, Pathian laulou, zaidamna neilou chih khawng a chiamteh a om ding i hi kha diam? Dai kilkal a mi na hih leh, na mi hoihna ahih kei leh, na hoihlouhna khovel leh Zomite'n a hon theihpih kholkei maithei, himahleh, mi tallang, politics hi'n saptuam a kizang mi na hih in tuh, mi etton na hihlam kithei a, mi'n ka sih nungchiang in ka tangthu bang chi'n a gen di ua? chih nang-le-nang kidong thak in.

I gam ah mithupi deuh khat a sih chiang in mipi'n a itdan a lamdang a, misi laklak ah leng si hampha uh sak in a om a, a sungkuante, tanaute, khitui nul noptuan leh a kilawm hial hi. Sihchiang a thupi tak a kibawl a, hankuang bul a kigup ek-ekh kia in beilou a, tuabang mite' min kigen mang ngei nawnlou hi. Sihnung a mi'n hon theih dan uh, a hoihlam leh hoihlou lam a om tuaktuak ding hi.Hitler bang a minthang omlai in, Mother Teresa, Mahatma Gandhi, Abraham Lincoln cihte bang a minthang leng ki-omsam hi. Nang tulaitak in kuate lak ah na omkha a le?? Bruce Lee bang a Pathian in 'talent' a piak nawt-hiam a sihnung a khovel theih a minthang a ki-omlai in, i 'Talent' leng nawt-hiam peihlou a, kuamah theih phaklouh a si maimah kitam mahmah hi. Hitler bang a sisan tampi suah leh, mi tampi thah a minthan hia i ut uh ? ahihkeileh,Gandhi bang a kuamah tung a hiamgamna suahlou a minthan??

Mihingte, i damsung in i ki hupisak a, si ngeingei ding i hihdan thei mahle hang, ei tung a sihna hong tung ding bang in i koih theikei mawk hi. Leitung hinkhua, loupa bang a vulding ahih dan i thei chiat ua, Khristian ginna lam kisinsakna lam hahbawl mahleng, hinkhua taktak ah, vantung mite bang a khosalou in, leitung mite mah bang in i khosa uhi. Pathian leh Mihing mitmuh khualbanlou in, gou leh hauhsakna diklou pipi in i kaikhawm (Corruption) uhi. "Ka sih nungchiang in mite'n bangchi'n hon thei ding ua ! " chih niteng in ngaihtuah gige lehang, 'Principle' nei deuh in i gamtang deuh maithei uhi. Hiai leitung ah dinmun leh thuneihna sangtak i luah in i neikha maithei, himahleh huaibang dinmun a omden ding kisa in, kiliansak tak leh poisakna bei in gamtang kei thei leng hoih mahmah ding hi. Kuapeuh in i tunna ding mun galdot thei zel leng, hinkhua zat kisiam deuh maithei hi. 

Na hun a bei chiang in.....Bang chi in?? Koimun ah??? Kua kiang ah??

----Kakipak---