BANG 'DAMDAWI' NETA DI?

By ~ Sang Quptong 

ZOMI te lailam ah i khangtou mahmah mai ua, IAS leh Officer muanhuai taktak i Zogam apan ana piang kheta hi. Gospel Tangthupha hong lut nung kum 103 (2013 tan in) bang i zangtou velvol ta ua, Mite theih in za-a-za Christian i hi uhi.

A minpu a Christian lel i hi duam a? I Gam leh Nam dinmun i theihsa ahihmah bang in, Laigelhsiam, Laphuaksiam, Lasasiam leh Thugensiam tuamtuam te'n i Gam leh Nam hoihna ding ngimna in, Thu leh La hoih taktak gelhkhia in, aphuaktheite'n phuak ua, a satheite'n sa in, tampi genkheta uhi. Huaite ei a ding a,'Damdawi' himahleh a nekdan theilou (Siamlou) i bang uhi.

I Damdawi zatte uh hoih mahmah hina pi, a nete'n i nek thulim kei leh a phatuam tuankei ding chih theihsa ahi. I damdawi zatte uh eite a dia hatlou deuh hia leh? Ahihkei leh hatlua a netheilou zozen i hi uh hialeh? A gim namsia salua i hi uh hia leh? Thu leh la hoih ngaikhe peih kitam nawnlou ahi chih muhtheih in om hi. 

Damdawi i chih a zatna di diktak a i zatleh hoih mahmah hinapi in a zatdan diklou a i zat leh gu (Poison) leh Khamtheih suak maimah hi. Zomite'n Damdawi hoih sang in a hoihlou leh thulimlou ta-ta kinenuam abang hi. Zu bang leng a dawnkhate'n agen chiang u'n, 'Lim hetlou ahi' a chi uhi. A limloupi mitsi zen leh Naklou zen a i dawn kuai-kuai sang un, ei taksa adia hoih di Vitamin tamdeuhte nezaw le Khantouhna om thei zaw diam? 

Za-ah-za Christian i hi uh chih i theihsa uh ahi a, Mihing a piang khephot Saptuam neilou om di'n a gintak huaikei nawn hi. Huchi ahihleh, Khotang makaite'n leng Saptuam a nei vek di ua, Christian vek i hi ua, Christian te hindan in hing vek maizen le, i Gam Nunnuam in hong paal maiding hi. I patna uh a diklouh ziak ahi diam? Khovel a mipilpe'n Kumpi Solomon in, 'Naupang a neulai a lampi dik a a paitheihna dia chiil di ahihdan hoihtak in ana gen hi. Mipilpen thugen i zui na uh hia le? 

Khotang hoihna ding a damdawi hoih mahmah tuh, 'naupangte lampi dik hilh di' ahi pen mai ding hi. Mihing a liansa a piang kiomlou ahihmah bang in, naupang hihlai a lampi dik a ana kichiil khaloute, alet chiang un mi buaihuai hinuam mahmah uhi. 'A bul i patdik leh a kimkhat zohsa' kichi thupil, Sapte apan i laksawn uh ahi. Huchi ahihleh Naupang a neulai in chiil hoih le chu, i Khotang a hoih mahmah dia? Alang-alang a duty a diang veng-vung angai kei ding hi. 

Zomite kia hilou, khovel gam tuamtuam in a buaipih uh, 'Khamtheih' ahi. Hiai a khamtheih i chihte leng, 'Damdawi' chikhat ahi. Ei neksiamlouh ziak in khamtheih a suak maimah a hiven..! Khedap belhna (Dendrite) khawng bang, 'Ui sasiam, Saphu kua zong' mahbang a i diik futfut. Nasung lam a kiplouhna om hia le? Tua mahbang in Damdawi tuam-tuam i gen, gelh leh sakkhiatte' a nek dan ana siam in, Khemtheih (Kingaih siatna hilou in) a ana zanglou in, Damna (Kibawl hoihna) ding in zang thei zaw le maw? 

I Zogam uh i et vel-vel leh pawlam hoih a kidem tamtak i om uh abang hi. Biakinn hoih a kidem i hi uh hia le? Biakinn hoih lam (bawl) kei ni ka chihna ahi kei. Himahleh, Pathian in a deihpen zaw, 'gingtu hoih' hi di'n i gingta hi. I sapum pen ama adia Biakbuk ahih maimah cia (?). Biakinn bang hoih zetzat in, asung a chitak-tak a kikhawm di vang deuhdeuh.0Ahih keileh, i vanthakte lahkhiatna dia va kikhop khawmna dia zang maimah i hi hia le (?).

Natna banghiam i nei a, a pawlam a kehkhia lah hilou, asunglam a nat mahmah hun om hi. Huai tuh, a tomlam in, 'Paw-dam' chi ni. A pawlam et a dam vilvel mahbang, asunglam aguktak a naa mahmah chidan a, a om chiang in athuak hak mahmah hi. Mihingte leng Melhoih mahmah napi a lungsim 'Belpuansia' bang a Sia ki-om hi. I tenna Inn khawng bang uh leng a pawlam ah hoih mahmah bang mahleh a sung a tengte ahoihkei ua leh bangmah a phatuam tuankei ding. I inn hoih mahmah bang leng ei lohsa a kilam mah hihiam chih ei-le-ei ana kikan ni. 

Mite theih a Christian chih hiphot, amin chu ngaih mahmah mai mawle? Himahleh, a sungthu taktak hon theih chiang ua, 'Christian ka hih chiang in Sum kala di', 'Jesu leh Jesu kidou', chidan khawng in hon thei mai uhi. I kivelthak ua, 'Damdawi' hoih pipi,Zomite' lak apan a piangkhiate (Local Damdawi) Nekdan i siam uh poimoh mahmah hi. Midang leh Namdangte hihdan leh gendan teng i zuikimzou naikei ding uh chih i theih ua, 'Korean Style', 'Hip-Hop Style' te'n Gam khantouhna hon tun kei ding. I 'Hair Style' te uh mahbang leng, Mangbathuai gawpta hilou maw? Underwear mantamlua teng le hilou, khekol tualteng pelhpulh in, dawksak tei-tei sawm..! Khekol kawng bang a, 'Chain' kaisak nelnal, 'Khamtheih sal ah ka tang a, chain in hon khihtang uh' chihna a diam .! 

I hihkhelh mahmah uh khat nawn ahihleh, 'Khap tam lamlam zuih di' chi a kihilhna ahi. 'Kou Saptuam (Biakinn chi ni) ah hong kikhawm ve, mi tam-atam ung ua, nuam nainai eive' chih kampau ka za mun mahmah. 'Group Champion' hih in Van gam hon tun di a diam? Noah leh a Innkuante'n Long abawllai un, midang tengteng (tamzaw tham uh chih theihsa) in chiamnuih bawl in, 'Tuichiim' tung di'n gingtalou uhi. Huailai in, Noah in Mitamna lam-lam ana zui henlan Long ana sui (bawl) kei leh, tulai pau in ana ki 'Chai-vawt' didan ahi. Zomite'n BANG DAMDAWI NETA DI i hi ua le?