KI THUTUAK LENG NUAMDEUH DI HI A

By ~ Sang Quptong

Pankhwm hatna ahi chi a paunak a i gen sek mahbang un, pangkhwm dia kithutuahna in vualzohna din poimohna liantak anei hi. Etsakna genzual le: Neulai a lawmte toh i kimawl chiang in, unau pangkhwm sel (Unau khat pangkhwm phallouh) ana kichinuam mahmah sek hi.

Bang ziak a 'unau pankhwm phallouh' ana kichi sese sek ahi dia? A khonung a i ngaihtuah thak chiang in etsak THUPITAK khat nei hi a theih in om hi. Pankhawm hatna ahi i cih dungzui in, unau khat kituak tak a hong pankhawm chiang un, zoh vual ding ahi kei ua, tua ziak mah a naupanlai kimawlnate a unau pankhawm phallouh na kichisek leng ahi kha maithei ding in ngaihtuahna ah hong kilang mawkmawk hi. Hiai neulai hinkhua tomchik i gen na ziak bangdang ziak ahi kei a, tulel a i society leh singtang nam tuamtuam te hinkhua toh a hong kibat mahmah khak ziak ahi zaw hi. Hoihtak in ngaihtuah vengveng leng tulai hinkhua in bel unau pangkhwm sel cih a ngai nawnkei a, cihlouh a le pangkhawm theilou sa i bang hial uhi. Huai cih a ngaihlouh ziak tak a i dou peuhmah Central hi'n State solkal hitaleh douzou theilou leng i hi kha ding a, huai hizawlou a, solkal leh i dou peuhmah in i pankhawm ding hon dal a, hon khenzak sawm lai a ei, unaute' mahmah in leng pangkhwm sel ahihdan i gup zel pen kimwlna a i vualzoh theihlouhna uh khat ahi mahmah ding hi.

 

Central leh state solkal vaihwmna tung a lungkimlouhna bang,singtang mite nuaisiah a i omna ziak a lungkimlou bang, hamphatna i tan ding i tan louh ziak bang a lungkimlou in hun teng phial in singtang mi nam tuamtuam a kipan pawl tuamtuam panlakna in kiphinna, nuakna, bandh leh strike tuamtuam i pan thithe sek ua, himahleh hichibang thilte singtangmi a thuaktute'n houlung kumkhwm masa a, a tam zaw deihna bang a i sawmsuah leh i puaksuah ahi hia? Hikim khollou ding hi.Tua ziak mah in ahi, Organisation tam zaw leh mipi tam zawte deihna peel a, unau pangkhwm sel bangmai a pan i lak tuam khaksek. Hiaiziak mah a lohchinna taktak mu pahpah theilou leh i lohchinna dia lam haksa chiteng i palkai veu sek. 

A langkhat ah, Upate'n ''akta mangkan kitutu'' a chih uh bangthei sim lai hi. Singtang mi nam tuamtuam te leng tua bang i hi dia aw cih theih in om hi. Nam 1 in mahni hamphatna leh phattuamna ding lou peuhmah a pan la ngaplou i bang mawk uhi. Tua phet leng hilou in, i lungtun louh khenkhat ziak a i dou mun mahmah, solkal mai nangawn a kidal tuah, kikalh leh ki tu tuahtuah maita hileng kilawm hi. Nam leh organisation khat in a duh leh deih a nget leh a lungkim louhna ziak a kiphinna nei a, pan alak pen a unaute ngoih in hon kalh leh chu a lohching hak mahmah ding cih theihsa ahi a, kihuhtuah diamdiam a, unau kithutuak a phukhawm hileng bel a haksa lawmlawm bangmah omlou ding in a ngaihsut huai nawn mahmah hi. 

Tua bang ahihman in, mohsaktuam leh pahtawi tuam leng i neikei a, himahleh a poimoh bel, ngaihtuah vengveng a panlak a, khat panlakna peuhmah kihuhtuah dialdial in phuleng phusuah baih deuh ding i hihman in, i deih thusam gen i hi zaw hi.Tua kia leng en hilou in, i panlakna peuhmah in i unau dangte a dia poi a khoih ding leng ahi kei a, mipite'n a khonung gu leng i thuak ding ahi samkei. Huai ziak in huchibang/hichibang panlakna peuhmah pilvan huaitak hileh chih deihthusam leng ahi zaw hi.