BANG DIA PIANG NA HIA??

By ~ Sang Quptong

Leitung a mihing khat a i piankhiat ngal leh,manpha,zatna di om a piang i hi chih i theih masak ding ahi. A zatna di omlou pi a piang mawkmawk tuh kuamah omlou ahi. Aak te khawng bangleng, zingkal chia mite phawng tu dia siam ana hi ua, Bawng leh Sakol kichite leng Pathian in mihingte adia phatuam leh manphatak a zat dia asiam ahi hi.
Mulukolh khawng bang leng omkei mawk leh ganhing, gamlak a si te netu di omlou dia,gam-uih vetvut ding dan ahi.

Hinkhua a mi lohchingte eibang a mihing mah ahi ua, amau siam a a omna ziak uh(a talent uh chini) atheih ziak ua mithupi hong suak mai uh ahi.C.Ronaldo,Messi, Pele chihte khawng, FootBall toh piang khawm hituanlou pi uh.Mary Kom bang leng,Boxing siamsa a piang hituanlou pi.Hauhsakna lam ah gen le,Bill Gates te khawng,Sum akhut a tawi kawm a,anu gilsung apan pawtkhia ahih tuanlouh pi .Eite bang a,'Vuaktang' a piang thou uh ahi. Amau bangziak a mithupi leh minthang suak uh ahi dia? Amau maw, tua dinmun a tunna ding ua haksa tampi thuakngap uh eive. E'n i thuakngap hia ?

Eimite bangziak a mithupi kitam hetlou ahi dia aw?Population i tawmluat ziak uh ahi na chi maithei, himahleh huaipen amasapen ana hilou khathei hi.Khat leh khat, tha i kipiaktuah siamlouh ziak uh ahi diam ? Mi hon thapiak (hanthawn) ziak a lohchin ding ahi i chihna ahi tuankei.Himahleh,mi'n hon gen siatsiat leh kibahloh nuam mahmah hi.Thilkhat i lunglut deuh khawng mi'n hon dot chia,'Hihzou kei ni teh' chidan khawng a kidawng pen in tha zoina hon tun ahi cih i theih ding uh ahi.

Mihingte i damsung ua, haksatna tuaklou (ding) i omkei. A hausate'n le haksatna amau toh kituak a tuak thou uh, akhente bang, duhduh nezou di hizenpi,duhduh netheilou, innlum a leng giak ngamlou,ut nana a omzou di himah le uh, adam theihna uh toh kituaklou chihbang om veve hi. Alehlam ah, azawngte'n le neu chikchik in haksatna tuakthou uhi. Mihing in haksatna atuah chiang a THOUZEL te ahi mi lohching i chihte. Nang na pukna mun ah na omden maimah hia ? Haksatna khat peuhpeuh zohna di'n : Kei kua ka hia ? Bang lam a ka 'talent' ? Haksatna zohna dia PATHIAN hingnei na hihlam na hi thei hia ? Pathian in i zohlouh ding haksatna hon guanlou ding ahi chih na gingta hia ? Na sung a banghiam hihtheihna kiselgu om ahi chih thei inla'n, BANG DIA PIANG KA HIA? Chih dotna ana kidong inlan, Napianna ziak na muh a,Pathian in hon zatpih nakleh MITHUPI khat na hong hi ngeingei ding a, NA PIANNA ZIAK hong kilang khe mai ding hi

---KAKIPAK---