ZOGAM IN NANG TEKTEK HON POIMOH HILOU HIAM?

By ~ Sang Quptong 

Gamdang leh India gam mun tuamtuam a sepna hoihpipi nei a om unau Talpak(Meitei) te'n a gam uah om nawnkei mahle uh a pianna gam uh Manipur khantouhna ding a panlaktheih dan a omkhak leh chi in 'Association' tuamtuam bawl uhi. Ei Zosuante'n leng Association tuamtuam i bawl ua, himahleh, ei association bawlte 'Jurisdiction' in i nasepna mun, ahihkei leh i va omna mun chauh a huamkha tangpi hi.
Gamdang a va omkhiate etkaina ding leh kipawlkhawmna dia association bel bawl luat di ahi. Pianna gam, I Zogam uh, nusia a gamdang a va omkhia, lam chi tuamtuam a professional taktak te'n, i Nam leh Gam uh, tuasang a akhan zawkna ding a pan laktheih dan omlou ahi diam ? chih kidong nuam dan i hi. I tup taktak leh bel omthei tham ding chih, miteng ngaihtuahna hi di'n i ngaihtuah ahi.

Mundang a nekzonna detdoutak nei a va om te' i Gam leh Nam in hon poimoh lua ahi chih theih ding ahi. Hiailam toh kisai ah, 2012 kum in, National Football player khenkhat: Khanthang Paite, HringsolalThomte, Kamthianminlun (Field Co-Ordinator, Bachelor in Sport Management, Kolkata) te hihdan hoihtak, etton tham mahmah khat I Zogam ah hong semkhia uhi. Amau 'Career' lohching mahmah pen hunsa mailou in, i Zogam a 'Grassroot' football puahphatna ding in 'Distric Level Football Development Programme' kichi hong sai uhi. Sports dang ah ei Zosuante gen luat di ki-omkei mahleh, Football lam ah bel hunkhop tak National Player a kimawlthei ki-omta hi. Hiai programme a Zatzoh ua a football zatte uh, 'Tagah kepna innte' a ahon hawmzak nawn uh khawng, khotang leh makaite'n i chiamteh ua, hanthawnna hoihtak i piak siam uh poimoh mahmah hi.

Eimite'n adiak in Football lam ah talent hoih taktak nei mah lehang, hon makaih di hoihtak i neihlouh ban uah, 'exposure' omlouh ziak in i talent hoih taktak te uh i thelthang sakmai sek uhi. Kimawlsiam tamtak, 'Drugs Addict' in i om thaang suk mai ua, poi mahmah. I gam a sports lam changkang taktak nailou ahihman in kimawl siam chihziak a 'National Player' hih ding chih kuaman kigenchiang theilou hi. Maban ah, I National Player neihsate uh tungtawn a State leh National level a kimawlthei tamsem, ei Zosuante lak a i hong om uh deihhuai mahmah hi.

Government a sepna lam ennawnta le, Gamdang a om Government nuai a sepna hoih taktak neite'n a hihtheih uh a tam mahmah nawn hi. Mautaam Kialpi i tuahlai un Japan a om unau Zosuanpihte'n Fund raise bawl in amuhsuahte uh hon thon uh ahi cih thu zak in a omngei hi. Gamdang a om laisiam tuamtuam te'n i gam a 'Seminar leh Career-Guidance' khwng(SSPP/Student organisation Tuamtuam te tungtawn in) hong nei thei zeuhzeuh le uh bang a chi dia ? I Zogam a i taksap penpen uh ahihleh 'Sum-le-Pai' ana hi gige ahihman in Siamsinna lam toh kisai in sum poimoh mahmah hi. Huai ziak in, siamsinna phungvuhna di mawngmawng in 'fund' chikhat bawl hileh bang a chi dia ? Hiai Fund pen, SSPP/Siamsinna lam toh kisai a kipei, organisation te'n a etkai di un koihthei zomah le bang a chi dia ? SSPP ngial in 'Zodawn Tour' anei sek ua, SSPP makai te'n leng innkuan etkai di neilou ahi tuankei ua, hiai a ding in sum a tasam mahmah du'h chih haih vuallouh thudik ahi. SSPP kia hilou,Nam chikim in Student Organisation anei vek ua, huaite'n phungvuhna hoihtak poimoh vek uhi. Hiailam a ngaihdan hoih taktak nei, makai muanhuai leh mipil tamtak i nei ua, tukhawm uh henlan hon sai le uh chih huai mahmah hi.

Tuni'n Sepna hoih taktak nei, Zosuante i et leh, Gam leh nam awlmoh a, amau hihtheihna chiang a panla tamtak i om uhi. Himahleh, i gam a nasepna ah khenkhat genphak leh theihphak dia hong dawk mawngmawng lou tamtak i om veve uhi. Tuabang mite kiang a i gen ut tuh, ''NANG LEH NA INNKUANTE NIANG LEH TAI A OM IN, NA CAREER DETDOU TAK IN OM MAH LEH, NA GAM LEH NA MITE'N HON PHATTUAMPIH KEI UA LEH, NA LOHCHINNA SANGPI BANGMAHLOU AHI'' Chinuam dan i hi.

Siamsinpawlpi te panlakna in Gamdang a sepna leh laizil a omte'n i gam a dia hihtheih sun chi'n project lianlou khat, innlam a a omsung ua sepsuah dia a guan uh, ''Home Coming Project' kichi hong sai ua, i phattuampih ngei uh ka gingta hi. Maban ah leng huai sang a project lianzaw toh kal hon suan zel uh i lamen mahmah hi.

Tuni'n ei Zosuante lak ah, Laizil ut, tuplianpi nei a lai zilzoulou kitam a, Competitive Exam a mundang a zinkhiatna di sum natawm neilou kitam hi. Lamka zang a siamsinnate hoih bang mahleh, Zodawn lam a siamsinnate dinmun ngaihtuah huai mahmah hi. Lou nasem mi khat innkuan apan IAS officer piangkhe ngei nawnlou di bang. Mi muanhuaite tal sawn zen a kingaih sut hunta, ZOGAM IN NANG TEKTEK HON POIMOH HILOU HIAM ??

--Ka Kipak--