'ZOGAM KAHNA AW NGAI KHELOU TEL DI MAW ? ?

By ~ Sang Quptong

Ka sung a ut leh dah a khosa ka mite (Zomite') aw...! Hehpihna nengchik bek neilou tel na hi uh hiam? Ka liamnama mulkimhuai lua eive, mitdel na hih kei ngal ualeh, ka liamnate hon theihsiampih sam le u chin zaw maw ? Akum-akum in ka guhtuite na tawpkang ua,..!

Gospel Centinary bang lawm thei a na hong omtak un, kipahna thak ka na nei a, ka thuak adan omdeuh ding ka na sak leh...Maizen..! Ka etlawmna tengteng mang hial di'n non koih tel ua, naa hina maizen e maw....!

Ka kiim a tengte'n ka gim namtui za a, ka pakte kituh souhsouh di uh ka na sak leh, ka mite mah in, ka kiim leh pam a te theih leh phawk manlouh di'n ka pakzute buannawi lak ah non sik tumsak tel uhi. Huaikia leng hun salou in, ka zungpi a hon kalhkhiat na sawm tel ua, naa hina maizen e...!

Ka sung ngeingei a, lungmuang tak a bual, 'NGASA' te thah leh matna di'n, GU(poison) leh BOMB te na zang ua, Zogam siktui siang kilkelte, GU non suahsak tamai uhi. Sing leh guate dawm hetlou a na vatmai gige ziak un, luituite a kang deuhdeuh a, 'Zou huih khisiang'na chihchih te uh, huihsia leh natna hoihlou ka sung a poluttu hong suak maimah ta hi. Gamkeu(desert) leh natna tamna gam hon suahsak sawm na hi ua hia ? Hon hehpih sam ve ua maw ?

Ka sung a zalentak a ana khosa, zingkal teng a, siamtu Pathian phatna dia, zaila awi zel,' VASA' te'n lah hon leng mangsan vek dekta ua. Kei tung a zahngaihna leh hehpihna na neih kei ua leh le, VASA, NGASA leh ganhing chi tuamtuam banah, SING leh GUA te tung bek ah, zahngaihna lungtang neisam ve ua maw ?

Ka sung a teng unau tawmchik,Vai khutdohte zah leng phaloute' na hihlam uh kithei unla'n, Tuunsung khat pan a piang na hihdan uh kithei a, nong pankhawm hun di uh kei na gam leitang un hon ngaklah lua hi'ng a, tualah, gawm ding simthu lellel napi a, pau leh ham a buai a, kituam huihui laite na hi zel ua, chik leh kei kipahna kawlni hong suak tel diam aw.....!

Maizen aw...! Unau pangkhawm di i hon sak leh, nam tuamtuam kikei tuahtuah, solkal mai nasan a kigum nuamlou in na om mawk ua, 'Akta mangkuan ki tutu' a chih uh bang in na om tel ua. Kei hon zuun dia na sehte u'n lah, a let semsem ua leh, tagah liangvaite tan ding teng nek saksak tamai, genthei lelliangte gilkial dangtak a akikouna un ka bil hon thawn kek lou phet ahi. Zomite' aw, ngai dih ve ua, kei puah na dia Solkal apan, Pathian Vualzawlna hong paite khawng zang in, Makai dia na muante un, inn hoih pipi alam ua, gari a ut-ut uh a lei ziahziah mai ua, atate uh India khopi tuamtuam ah, vual englou in lengsak uhi. Akhente 'Overdose' a leng in, kei kiang(Zogam) mah, apheizawng(lupsa­ chihna) in hong lengtung uhi.

Ka sung ah, Diktatna himhim a om non kei a, Mahni angmasialna leh Duhamna leh Siatna chiteng in vai a hawmta hi. Kum tamlou paisa a,''Zogam nuam'' chia, la a non oih khum ngiahngiah uh, Tu'n Tagah meithaite kahna aw zakna munpi di'n na hon bawl maimah ta uhi.

Ka sung a Khopi a na neih uh, Lamka khopi lah, dawite khopi,Khamtheih khopi,Nekgukna khopi a suak maimah ta ve maw..! Hiaite zaw ka sung a inndongta bangmai a hong inntekpan mahmah dia deihlou kei ve, mial khukpi a paihlut a om ka hita mai ve maw !

Ka sung a maingaltak a dawimangpa'n bu a bawl mawk pe'n theilou na hi ua hia ? Kholai ah lah, sehal leh ngiate a noptal mahmah mai ua. Damna neih sun uh, Khuga Dam lah, ui leh akte bang a kidelh a kiboh maimah na asuak tamai a..! Nata duat mahmah te uh lah, Bazar lai leh lampi dung khawng ah, aak pul dek mahbang in,bah leh chau kawm a hoi dengdeng a om khawngte'n kei hon suminse lua uh ei ve. Bangziak a ui puul leh aak puul bangmai a kholak khawng a na puuk bembuum sek uh ?

Nata numei duat mahmah te uh lah, taksa tamtheilam dawksak ut in pheipi dawk henhon zen in kholai ah apaita mai ua. Siatna kipatna bul hikha thei eive..!! Taksa maamnate hoihsem a kilat ut in atui-aha anek ziak un sisan bei in a daang kiuhkeuh ua, amau lah,'Complexion bawl, ngouna, melhoihna­' chi in alawm avualte uh leng loh gawp vekta uhi. Huaite ziak in a thupina uh suk mangsak in om ua, damdawi lah zongsang in tawpthei non tuanlou uhi. Huchih ziak tak in, Bazar kawm ah nek a zong uh, amau adia a tawpkhawk ahita. Anteh lomkhat sang in leng aman uh a tawm zawta uhi. Pammaih hina maizen uh eee..!

Nata neute' uh lah,inn ah gilkial-dangtak in om ua,nou lah Khamtheih, gambling leh kimawlna thanghuaite a tel in, innlum a na tate uh leng enkol manlou hial in na om uhi.Na tate uh a chingtu leh kemtu ding omlou ahihman in melma pa khut ah baihlam tak in lut zungzung maimah uhi. A maban ding uh lungziin huailua hilou hiam ?

Ka sung a teng Zomi, mipil leh laisiam taktak te hong pilvang unla'n, noute bek in, zahngaihna toh KA KAHNA AW HON NGAIH KHIATSAK HAM-HAM UN AW? Khamtheih hihte'n hon hihsawm non kei unla'n, ka sung ah, IAS officer tamtak nong piankhiat ua, Duattak a non kep di kal uh ngaklah huai hina maizen e..

Ka Zomi pih, Aneu-alian, Ateek­-akhangte aw, i Zogam un a Khitui nulhultu dia Nang leh Kei hon poimoh petmah ahi. Huai ziak in, I Thupi uh''ZOGAM KAHNA AW NGAI KHELOU TEL DI MAW ?'' Chih hon dong nuam dan ka hi. I pilna-siamnate uh gawm a khuak sa vitvit zen a Zogam kah khiatsak nonlouh sawm leng i chi hi.

''ZOGAM AW KAPKAP NAWN KEN"

-Kakipak-