'REPORT' PIAK SIAM LUAT A HOIH DIAM ??

By ~ Sang Quptong

Central Government hoihna ziak in Scheme tuamtuam i gam uah hong om a, kipah huai mahmah hi. Himahleh, huaite bangtan in a phattuampih dite'n i phattuam pih ua le ? Manipur in REPORT a piak siamluat ziak a 'Electricity' lam a giau-tauna i gam ah hong tung ahi diam ? July,2013 khabul in, Pakistan in India kiang ah Meivak tasam ahihdan uh a theihsak kawm in ngetna leng neingal uhi.
I kiim i kiang a gamte'n meivak pentak hon ngen ngam ahih ua leh chu, gamdang theih a India meivak lam a hausa mahmah ahi cih a chiang hi. Tua kia hilou in, India a Finance Minister len lel Ishaq Dar in, Pakistan kiang a Meivak Thahatna 2000 MW pekhethei dia mansa ahihdan gen leuleu zel hi. Hiai a i muhnawn ahihleh Gamdang kia hilou in India solkal in leng India gamsung pumpi a meivak kingingching tak a om dan a koih ahi ngei ding chih theih nawn hi. Manipur Government in REPORT pesiam law zozen ahi diam ??

Gamdang leh India Solkal theih in Meivak kiningchingtak nei mahle hang, India Sim-Suah bial a om Manipur a Khopi nihna chih hial a om Lamka khopi ah meivak a taksapna liantak om in dangtak tak in ki-om a, kisi dekdek hi. Central in meivak tasam i hihlam theilou ahi diam? Theilou hi di'n i gingta, thei hi leh Pakistan Meivak huai zahzah a hop sang in ei hon hawm zaw di'n i gingta hi. A cihleh, bangziak a Manipur in meivak a taksaplam, Central in theilou mawk ahi dia? Aziak bulpi tuh CORRUPTION ahi peuhmah ding hi. Meivak puahphatna ding a hong paite ahidi bangtak a zat hikei mahleh, Central kiang a State in REPORT a bawl chiang in Siamtak in Phatuamtak a zat ahihdan a va phoulak khemkhem ding hi. Tua bang ahihman in, Central Government theih in State sung ah electric in kilchih tawnsuakta dan in a ngai ding a, Prepaid System bangleng kizang vekta dan in a thei maimah ding hi. State solkal in neuchik a sepsuahte thupi tak a REPORT a bawlchiang in Central a lung muang mahmah ding a, meivak a taksapna om di'n a koihkei himhim ding hi.

Central hi'n state in hon hihsak ding hitaleh, i taksap dangte uh leng tuabang mah hithou di'n a gintak huai mahmah hi. Nasepna khenkhat i etleh, sepsuahna dia, government in hon piak kimkhat leng beilou a sep hi di'n i gingta uhi. Ei leh ei kituisa buah i hi uh chih i theih thak uh hoih mahmah ding hi. Khenkhat taget lah, hichi bang a nasep di government in apiak chiang a, a nasepna a sum lut sang a, mahni tenna di bawlna a sum lut tam zaw mawk, ahoih zaw a bawl in, REPORT piak siam ziak a ana khosa thei hamham lai mi bangzah hiam ki-om ding hi. Negu mengmeng in la'n, Gilpuak kiu-keu in om ou, Leikha' ann di mah na hi a, lim hon sa zaw phet ding uh ahi !!

 A nasemte'n REPORT hoihtak a STATE Govt. kiang a pia in, STATE in leng CENTRAL kiang a hoihtak a REPORT hon piak chiang in chu, Central a lungmuang mahmah ding a, tua kia hilou, REPORT pe teng leng lungmuang tak in omthei ding uhi. REPORT piak na ah KININGCHING in om mahleh, KITASAM tak in i om veve ua, KITASAM tak a om himah lehang mi muh a Tasamlou i hihman in, tangbat (muhphak) i neikei uhi. Khut nasep sang a kamhat (REPORT) a pangzou leh a tungnung mahmah te i hi zenhouh uhi. REPORT piaksiam luat i Nam leh Gam a ding ua hoih ahi i chi lailai diam??? 

---Kakipak---