By ~ Sang Quptong
''Nang ka mite sualna akipan in leng non humbit a;namchih lutang hiding in non kem hoih hi:ka thei ngeilouh nam in ka na a semta ding''(II Samuel 22:44). Hiai laisiangthou i simna apan bang na ngaihtuahna ah hong om ale? Hiai thu pansan a 'Sermon' sawm i hi kei,huai gen di'n Siamna leng ka nei kei hi.Pathian in Laisiangthou i sim bang a hon bawl hun di ngaklah huai hina maizen e maw?
I pianna gam in zillou hia ahihkei leh a sung a teng te'n zillou i hi hia chih theih zohlouh ding khop in i gam a seta hi.Lamka zang i et chiang in,'Land of President' chihtheih di khop in,pawlpi alian leh aneu adim in om hi.I gam siatna te kuamoh hiam chi in 'Study' bawl taktak lehang kuatung a tu dia? I kingoh tuah vengvung di u'n a gintak huai hi.
Tuni in eilak ah,HIV/AIDS hong maingal mahmah ziak in, chimtakhuai sim mah leh leng genzual lehang i chi hi.Hiai tungtang ah,saptuam leh NGO tuamtuam in, pan nasatak in, i gam ah la mah le uh leng kanna lawlou abang hi.Huai naksang in,HIV/AIDS natna hik pua ki behlap zawsop ade aw chihtheih in om hi.
Lamka zang dinmun i et chiang in selaw mahmah a, khangthakte khankhiatna ding in sit huai mahmah hi. I mitkha Lamka khopi tung a, Muvanlai bang in lengsak zual lehang, Asun-azan in zu inn leh kizuakna inn banah gambling kimawl a tuden mi tamtak muh ding om phengphung ding hi.Tuni in,hiaibang a i omlai in bang i ngaihtuah a? Nenevi kang sedek toh tehtheih in om a,Sodom leh Gomorra toh bang a a kilamdang na ?
Tuhun a pan i lak kei ua leh,khangsawn te'n hon mawhsa law lou ding uhiam chihtheih hun tam mahmah hi.Lamka khopi sung ah adiak in,nitak hun in veng tuamtuam ah buaina tamthei mahmah a, a honhawn a kidelh zungzung, singkhuah a kingim gelgol, lampi dung a numei-pasal....(ki sutzop chiat ni) ! Naupang chikchik, Ui sasiam Saphukua zong mahbang a,Dendrite hip leh gari a taituahte subuai a mi ban chou hunkhop leng ki-om hi. Nu leh pate'n i mohpuakna uh zoulou i hi di uam ?
Tulai in I Lamka zang uah, Drugs toh kisai lou leng buaipih ding a tam mahmah hi. Guta-lata te leng hangsan mahmah mai ua, guktheih louh neilou phial ta uhi. Deihlouh a neihlouh mahbang un,Vok ann bel, vom bimbem nasan gunuam mawk uh ahi.Hiaite pawl in,'Gang' toh kibang in nasem ua, guta leng mawk a delhngam huailou bangta hi. Ring Chain bangmai a kizopna hoih nei hi zozen di un gintak huai mahmah hi. Bang chidan in? A gu pawl, Zuak dia pawkhe pawl, A zuak pawl, chi a hoihtak a ki organized uh chi le hang uang gen lua i hi kei ding hi. Philantrophic Organisation tuamtuam te suk hat hileh,mipi'n hamphatna gen vuallouh i tang ding hi.
Khentuam neilou, phatuamngai pawlpi te'n khotang hoihna ding ngimna a,tawl leng khawk salou a na asepnate uh ziak in i kipahpih mahmah a,huai kawmkawm in,maban ah pan naksem in hon latou theilai le uh chih lunggulh huai mahmah hi. Huchi hileh, naupang thathak tamtak, lampi diklou a pial dia kisa lellel te a hutkhiat theih laidiam chi ut i hi. Nitak hun a Public meeting leh Concert nei thei nailou minam i hi ua, communal feeling hattak in hom tuam kimvel nakal ah, khangthak lungsimhoih taktak pulaite lampi dik a pi hun laitak hikha ding hi.Thunei, mipil leh laisiam taktak te'n a kikhelma in pan hon la ve ua maw ?
---Kakipak---
No comments:
Post a Comment