LAMKA LEH GOVERNMENT HOSPITAL:

By ~ Sang Quptong

Lamka ah Government Hospital piching khat chauh om ahi chih mimawl pen in leng i theih vek uh ahi. Government Hospital te 'Target' a nei deuh a,Private Hospital te gen sawmlou phot zozen i hi hi. Solkal Damdawi inn (Government Hospital) pe'n a zawngpen in leng i naih zohna pen uh ahih ziak a gensawm i hi.

Damdawi inn i chihchiang in,'Damna deih a, Damlou gim mahmah te kipuaklutna mun ahi' chi'n gen sau zek leng i khial kholkei ding. Huchi ahihleh,a khente ngial, lametna tawp chi a damdawi inn delh i om uh gintakhuai mahmah hi.

Dam vilvel a, Damdawi inn a va ki 'Admit' ut i omkei ding uh chh pe'n ngaihtuahna neithei chiangte adia thudik pumlum ahi. I mawlluat ziak uh hia chih theih butlouh in, i damlou veh dante uh mitsip huai pi-pi tam mahmah hi.Solkal Damdawi inn pe'n 'Public' a ahi a,himahleh i kiang a damlou gim taktak,'Thawmging' zatheilou om ahi chih thei gegu napi a, kimawl thouthou, chiak ging vengvung chihte khawng i chiindan tangpi uh ahi. Pil huntawk kisa lailai i hi di uam a...!!

Accident (tuahsiatna) i tuah chiang a, a kinthei bang pen a i naih sek uh 'Casualty' ahi.Ei lungkham mangbat ziak a Doctor leh Nurse te khawng gamtat zekai salua a iplah theih mah ahi. Akhente ngial in,Doctor leh Nurse te khawng va vaubawl pah gelgal (Doctor leh Nurse te ka gup ziak hilou in). Hichibang hun chiang a, Doctor leh Nurse te kithuahpihna omsun tuh, 'Pautam louh' di himai dan ahi.

Lamka te i hai theih dan uh chi le hang lah, ahai hih ut ki-om tuanlou zel di'n a gintak huai. Himahleh, i omdan un i haina uh hon 'phoulaak' thouthou eive. Damdawi inn a vanzat poimoh taktak te bang gumang, Dustbin natawm gumang thei zel minam i hi uhi. Damdawi inn baang ah na chil se ken chih kitaak hinapi a chil phetlou, Kuva tui khawng va siatkhum teitei (?). Visiting Hours,hoihtak a guansa himahleh, Visiting Hours leh *hours lou leng khen theilou tel a hai i hi uhi. Hun(time) etdan theilou i hi uh hia ? I khut ngawng ua mantam pipi i buhte uh bang a zat di eita? Lamka damdawi inn a damlou vehte i huham theihluat ziak ua tuabang rule bohsiat veu a om hi di ahi.

Damlou vehte kingaihtuah thakni. Doctor leh nurse te adia dongkholh taktak a om in Glucose khaina di mun awnglou zen a damlou bul tektek a vatu nuamte i hi uhi. Tuabang ahihman in, Lamka ah 'PATIENT-VISITOR RELATIONSHIP' chih thupi pansan in Awareness Campaign nei le va chih hial di lah uang lawdeuh di bang....!!

Mipite' i gengen hang in, Doctor leh Nurse te leng a suakta tuankei ding uh. Damlou a gimziak hiam, ahihkei leh Lungkham mangbat ziak khawng in leng Damlou ompihte'n hong sam thei uhi. Huai kawmkal ah, Doctor leh Nurse te'n damloute' Drip a beita (bei dekta) hia chih nasan khuallou a room sung a ihmu hithit i hi uh hia leh? Huchi bang hun in a vasam di te' a di'n leng mi ihmu hithit lai va phawng di chu kisuanlahhuai mahmah ding hi. Hichi bang a Doctor leh Nurse te i om ua leh chu Room sung a tutphahte lakkhiat sak hoih mahmah ding hi. (Adiak a Night Duty te a ihmut theihlouhna ding un).

Mipilam ah tawmlut kik nawn leng. Damlou pe'n natna va kan khelkhel, va muhsawm teitei, paupeihlou chih thei zenpi a thu va dongdong ! Damlou veh i hi hia ? Ahihkeileh, Investigation va bawl i hi zaw hia ? Huai phet hileh phadawm deuh di, Tuibuuk leh kuva gim khawng peuh nam heek-huuk kawm hi zomah..!

Damlou vehdia i kuan ma in a damlou pen condition bangtan hiam theih kuul mahmah a, huaite i theih kei leh dai maimai kawm a damlou i veh ding uh ahi. Theihnop i neih ua leh a ompih (damlou ompih) te kiang ah dong zaw le chidam huai mahmah ding hi. I kampaute ziak a damloute gim deuhdeuh thei uh ahi chih thei in damlou vehna ah kampau pilvan poimoh mahmah hi. Damdoi inn kia hilou innmun a kikemte, gimdeuh omchiang bang a, uum kheukhou ! A sih hunhun a kap masapen a pang di chi a kituh mah bang ! I damlope'n in huihsiang poimoh mahmah kha leng ahi maithei, huchibang a i uum lutlut chiang un mi khenkhat gen dan leh i damlou pe'n uh 'Kichai vawt' thei ahi. IKiim-ikiang ua DAMDOI INN (a nai pe'n in RIMS,Imphal) te paidan enton leng hamphatna gensenglouh i tung ah hong tung diam ? chih dotna ka Zomi pihtete kiang ah kon ban zuak hi.

--Kakipak--