By Pau Lian
Vual ngaih ei aw ipian lim in heikhop nuam e
Tuun zua angtang sian lungtuak in vangkhua lai ah
Heikhop nuam chin lungzuan kidon manlou
Singbang khang in zawltui libang a ching hi e.
Sawmkholh vual aw hunte'n lenmual khenglou hileh
Gamgui khaubang khih din sian in lung awi hileh
Tua i len lungzuan khenna tuangtung lou dia maw
Hizong sian in awilou, hunten nunlui a tangta hi e
Ngaih masak nangbang omlou khuamual kitawi lai ah
Senchil tongsan nangbang laikuai a om kei
Sen lungmawl lai nun nop pal i zou teng aw
Ngai na veng e kumchin a thak ni'n nunlui ngai veng
Sen lungtuak a nunnop libang a chin vang hiam?
Nihgel lunglawp kal a vaang in gibang hon khen hiam aw;
Lungkituak a simthu sangbang non nouh ni'n maw,
Sen a vualngaih na tong tuibang ka zawl chim lah hi e
Vang kingai chin lung nih kaltui i gawm tah e
Tang aw kul non luh e, lung ah gua bang a phungching e
Kholen muisum daibang a theng hi e
Na mel mu a phung khat a hei ken amm lua'ng e
Phamdong tuibang ton din ngaihkhua tuah hang
Phamlou pi'n zong navang ngai in lia lung ka mawl hi e
Menglou ding aw nunlui suangua bang menglou ding
Ngaih tellou in sunni nua'h ka lumlah ding hi e
Pian in dang e lia kei ka zuanni vaibang tung ven
Siamzil tuanglam zuan a ngaihlai vaikhak ni in,
Hambang vaiveng lia kei zuan zaw kitawi sawn e
It vang in maw tua ni'n guk in maimit muantui a kai hi e
Ngaih toh khente'n keizuan mel in athei na'm maw?
Liang kei ka heina peuh ah lungzuan khattang
Sian aw na lemgel sul sabang ka zui moh hial e
Zaitha nem e zuanna suangbang ka nawk lah ngawn e
Na lenna gamzang ah tangbang na diam hiam ngaih?
Khapham hilou kasial man a kei aw kazuan damtui bang kiching
Hizong tutkhawl, zaitha nem a ommun muangthei ka hi lou e
Ngaihmel muhding khokhal tuibang kangak den e
Asuk atou gamkhua kazap nin lambang non hilh
Simlei nunna leidou bang ka nan ni'n sawnban non kai
Lung kaliap ni'n zong nang ka zaitha nahi
Ngaih lung nem aw, na tong, tak a kazawl kal ngak laa'ng
Khen theilou din koplai khaubang ka kaankhawm e
Iitluat vang a kei lungzuan bang na zuanngam diam maw?
Lunggel ka chim theilou phungkhat a heikhop hunte
Ngak kumkhua sawt e akum kiveizong lung kaliap lou e
Keivang na ngai hiam aw, lia ken kon sialsial e
Iitna kon luan atak itna zailan alel zou diam aw
Zuang veng kei aw ka sial in mual kua thawn hen
Aging zamluang in zui hen, mualza khup hen
Ngaihlouh tuansam lambang non pelhna, nalua sang e
Dawi ai khiimziin koplai khaubang atah ni'n albang dah veng
Dahmai mual e kei awzuan damtui ah vabual ing e
Ngaih in siing pal akawi ni hi e
Lung hon sit a siing duang a na zal niin maw ngaih
Pian in dang sang na tong chiau tui a lehluan na
Ahing suun naubang kakah pian in dang sang
Dahna'n kei aw thangbang non veh paal lua sang e
Lelliang kei aw ka paal muantui toh a kaikhawm e
Naubang kanui lah e, maimit muantui ki-bansam e
Ngaih in bangthu lel ahiam a chiam a pel tah e
Kal ah gising apou na aw nanah neel kai in ei khup hi e
Laidiip ana e heina peuh ah nunlui ngaihna toh
Ngilh din na lawmlou senngaih na paam lua hi e
Tu'nlah vondeih natawi nunnop nakim nam maw?
Nunlui ka ngilh louh ding hi e, ngilh din lah lemlou
Kei aw lelliang kumkhuan navang ka sial zaw ding aw
Kulsin kazawl dong nangngaih simthu ka hanzai ding hi e
Vondeih tawi aw thaineem kawi in phunglung tang aw ngaih
Hizong nang ka ngilh ding simthu kasiang' hon lel ken aw
Iitna vangtah chin tongsia hon lel ken aw
Vangtah loubuang nang ngaih sial dia mimbang piang hing e
Vangsel chin aw i lel louh ding kei liang simthu hi
Lia ken ka lunglai ah nang ngaih ka banni omlou ding hi
Nang ngaihna ka pham zong in mualsing a pou ding hi e
Singdang siang zuan din lung ka lawplou hi e
Pham dong nang ngaih sial dia siansiam hi chi'ng e
Kal chiautui aw na lehluanna pian in dang e
Buanlei ka suah dong ka ngilhlouh ding ka senheisa aw
Tomkal itna nonpiak manpha ka gou manpha......
No comments:
Post a Comment