KEI LEENG MIBANG A HAU HILENG...

By Ency Tonsing

Singtang khonuam hun geih ah nu-le-pate'n lou Nnasem in unau mi li hon na enkol ua, mite banga hau vevu hikei mahle ung,  kou khua a ding in mahni khomkhom a anuamsa pawl ka hi ding uhi. Khokiimte kial a buh-le-bal neilou a a om kum un  leng kou Innkuan in Pathian vualzawlna buh-le-bal  nei  in,
  amaute ka hawmsawn thei zelzel uhi. Singtang khua a ding a  neek  ding buhpang a a om nak leh a sumtang in haukei mah leeng  khenkhat te a ding a panpihtu kihithei ahihman in a nuam a,  huaibang ding in ka nu-le-pa khutma Pathian in vualzawl in kialkum in  leeng puuktaw lou kia hilou in khokiim khokiang, khosungmite puktawtna kahi thei ua nuamsa khat tuh ka hi uhi.

KA SCHOOL KAI PATNA LEH HUAI HUNLAI THUTE:

Kum thumvel ka hong hih  in ka nu-le-pate'n school hong  kaisak ua, a ni masapen in utlou in kap zezen mahleng amun ka hong tun  hial leh, lawmte khong kamu a nuam ka sa pah hi. Chidam nak  leh School kailouh chihbng ka utkei bilbel  hi. Kei  khom in  nuam sak in ka sak thoh a hipen mai .  Ka theih ngeilouh Laimal tuamtuamte  theih thak nuam kasa a niteng in Schoolpu in a hon hilhthak ding ngaklah in ka om hi. Ka kailouh kal in thumal thak ka lawmte a na hilh ding a ken theilou ding chih ka ngaihtuah chiang in School kailouh ding ka ut hetkei hi.  Lai lam ah leng siamlua hikei mahleng kei khom in siamthei thou kahi ding a fail chihte om ngeilou in ka pawl ua a siamthei pen ka  hihlouh tawp in a siamlam kahi deuh gige hi.  Akhen chiang bang in homework/classwork hihloute ban ah a byheart dia kipete  byheart loute zep di'n ka teacher pa un hon sawl a, "nakpi a na zep keileh nang nakpi a hon zep ding ka hi",  hon  chi zel a himahleh ka  lawmte ka hehpih luatziak a nakzep ngamlou in ken ka thuaklawh hun atam hi.  Hileleng lawmte ka hehpih ziak in poi ka satuankei. Lawmte ka ngai petmah !  Naupangcik ka hih apat laisim nuam kasa a, class-2 ka sim tanin eipau hoihtaka simthei leh gelhthei pah in, hun  awl ka neih chiang in eipau a kigelh tangthu  bute ka simzel a, akhencia'n labu en in laa bng kasa ekek  a.  Akhen chia'n ka lawmnu toh  kou naupangte'n , " Nuching ",   chi a ka  va  sap  uleh  Tangthu  hon  na  hilh zel  nu  kiang  ah  ka  va  hoh ua,  tangthu khong  kihilhsak  in  leh   tangthubu hon simsak di'n kava ngen zel  uhi.  Ana manlouh chìang in kou gel kava kisim khel zel uhi. Naupang thil tenga ka lunglut laitak ahihman in achang in ka  nu annsuk, tuitawite ka panpih zel hi.

KHOSAK HAKSATNA LEH SKUL KAITAWP NA:

Huchi a hunte nuamtak a zang a khovel hinkhua hichiden ding kasak lai in, namkal buaina hong om a. Kou unau kaneu lai utoh kou adia nopzaw leh thoven zawkna'ng ci in ka nulepate'n Lamka ah hon peempih ua, naupangchik hilai mahleng ka lawmte, khosung mite leh ka pianna mun ngai in ka lungleng thei petmah hi.  Khosakna lah haksa petmah ka nulepate'n niteng in nisa nuai ah nektawm zong uh a . Mi inn luah in ka hong khosa panta ua.  Nidang a ka khosakdan utoh hong kikhe mahmah ta hi.  Skul ka hong kai a tampi genlouh inle PENCIL leltak leng mi zatbang zang zoulou in chengkhat mante ( I gelh chiang a leng  chiang ngelloute) khong kizang hamham.... Sum neihdeuh chia chu chengthum mante zangzel sam.  Pencil hoihlouh ziak in kumtawp final exam dek chiang bang a chu note te simtheih mumal louh khawng hisek hi.

Uniform, khedap leh adangdang problemte chu theihsa hita.. Lamka a ka  kai masak kum in school kikhek ziak leh subject tawite hong ki khiak mahmah ziak in laisim nalam ah kong chau petmah hi.  Half-yearly exam kon fail a, skul ka kai apat ka fail masakna ahihziak in ka zuma, ka pawna petmah hi.  Ka pa'n ka hahpan ding a deihziak a na Fail uleh hon kaisak nawnlou ding hon chih sa ahihziak in kalung a nuam hetkei.  Skul kailouh ding ka ngaihtuah chiang in hithei ka sa kei hi. Tua ka haksatna uh pumpelh na ding a alampi omsun a ka theih Laisiam a sepna hoihtak neih hi a  ka theihziak in lai hoihtak a sim ka tup pen a hi gige  hi. Ka nu leh Pa, ka sang gamte noptak  a khosak sak ka tup gige ana hihman in kai  nonlouh ding hithei salou in ka result ka pa muh ding kalau mahmah hi.  Result suahni in Kapa'n "haksa tak a hon ki kaisak a, hichi maimai maw??  Kaizou nonlou di na hi" honchi tapetmah a ka puaknat alian semsem a, hon chihsa a hihman in,  ka kai utluat dan gen ngamlou in ka daimai hi.  Ka kai utdan gen ngamkei mahleng ka kai ut petmah a, kailouh ding kichih himhim ka ngaitheikei hi. Huchi'n zing ann nekzoh ka pa hongen  thei zenpi in kai utlai ka hihman in ka kisa a ka kuandek leh kapa'n,  "kai nonlou ding na hi, kon chi hilou maw?"  honchi petmah a....!!!  Mittui nul kawm in akiang ah ka tu a, sana ka en zel a Skul lutna ding minit 15 lel in a sam ta a kailou taktak ding a ka kikhoih chiang in ka diip a kaw petmah hi !  Atawp in ka dingtou a "PA, KONG HAHPAN THAKNA DING KA KAI UTLUA.." chih  teng liingkawm agen in ka taipawt hi. Hon sapkik khak ding uh ka lau petmah a vangphat huaitak in hon samkiik kei vanglak uhi. Huci'n ka vakai a  kumtawp tan kaisuak in result kipahhuaitak muh theih in hong om hi.

Disticntion in ka pass a hucih'n haksatna tamtak kal ah kum 3 kakai suakthei hamham a,  Insung khosakna pen nop lamsang in haksatlam manawh in, kei leh kanaute school kai na'ng, insung poimawh tuamtuam leh  inluahman piak gige ngai pen nulepate'n niteng kilawh tawm a hon etkol hamham uh ahihman in hong haksa mahmah a, Atwpin Lamka apat gamla lou khota khat ah ka peem non uhi. Khosakna nopzaw deuh mahleh kei skul kai  napen hong  buaita.  Khua ah skul om mah leh kai theinonlou chet (class-5 tan kia a om ziak ) in ka om kha a. Khosak haksat luat toh chi in ka pate'n kai nondah mai in honchi ua ;  Ken leng ka haksat dan uh theita ka hihman in School kai ka khawl santa..!

Himahleh hunte paipai lehle ka kai utna bei tuanlou, classmate te kamuh chia'n ka engthei petmah a, zum huai ka sa lehlam in ka houpih ngamkei hi.  Ut pipi a innsung khosak haksatna ziak a kaizoulou ka hihdan miteng in theikei mahleh kei kitheilua ka hihziak in zumna in ka dim a lawmte uniform toh kamuh chiang bang in kikhasiat in a guuk in ka mit tui ka nul hun a tam mahmah hi.   Ka lungsim in, " KEI  LEENG MIBANG A HAU HISAM LENG ZAW "... chi in ka hun hoihlai ka subei mai mah hi

NOTE : Hiai tangthu tungtawn a Tuhun a student hilel te'n, i nulepaten mikhat i suah ding lametna liantak toh gim leh tawl poisalou a, ei adia thuak a hon  kaisak hamham uh ahihdan mangngilh lou a naktak a panla thak chiat di'n kon ngen hi...