Tulai politician tamtakte'n 'Politics' meaning leh a gennop tak theilou di un a gintak huai kei hi. Ana theilou kha zenzen a om leh bel, Dictionary toh pang in a meaning leh a gennop tak zilkhe thak leng, politics chidamlou i cihpen thoihdam thei pan leng kilawm hi.Theizenpi a zui nuamlou i hihleh bel, Dictionary a kik in phatuamna a nei kei dia, khang hong pai sawn di te apan thoihdam cihlouh ngai lamet dang om nawnlou suak hi.
I society leh Politics uh lungvei law mahmah eive maw? Mizawng leh gentheite khotuahna himhim om nawnlou, election neihma khawng a mipi mai a i gen zatzat te khawng, 'khabe seep siam' ziak lel ahi chih a chiang mahmah hi. Huaiphet leng hilou lai, a zawng leh daikilkal a mite panpihna ding government a hong paite bang ana heikawisak nuam laite i hi uhi. Politics i gen khak peuhpeuh chiang a lah 'corruption' toh mekmat pah, Manipur Politics paidan ngeina ahi chi in ngaizam suk pahpah te i hi zel uhi. Politics taktak bel, sum leh pai muhna leh nekgukna lam ahi kei a, a piakkhiatna lam leh a sepkhiatna lam ana hi maimah hi. Eilawi in hauhsak pah hulhul di ana samawk......(?)
Christiante a ding biik in en leng, Jesu nungzui i kichi ua, leitung a hong pailai a a omdan bangtan in i zuikha ua? Jesu'n lei leh van ah thuneihna liantak nei himahleh, leitung a gentheite panpih a kipumpiak tak in a hinkhua ana zang a, mipite adia thilhoih a sepsuah peuhmah ah kipahman leh thilpiak tuamtuam te ana kinem hetkei a, a thawn liuliau in a sepsak hi. Mahatma Gandhi hinkhua i etkik leh leng Politics diktak mah a kilang zel hi. Eilawi bel, banghiam thilkhat i sepzek chang a, mite theihlouh khak di lau mahbang, media chikim (printed and electronic) a pressmen te sam pahpah, Jesu'n bel, mi ahihdamte khawng midangkiang a a gen di uh a phallouh hun bang leng om hi'n ka thei, Ka genkhelh leh Pathian min a non ngaihdam uh kon ngen ngal....
Tuabang ahihman in, Politics diktak a kibualna ding in Qualification thupitak, i ktatna,awlmohna, dohzohna, hehpihna, kipumpiakna, sum leh pai etlah louhna cih leh a dangdang tamtak a poimoh ding hi.Tulel a i politician temtakte (a vek ua hilou, a tam zaw) tuabang qualification neiloupi leh politics meaning nangawn theilou (?) or Zuipeihlou (?) a politics hinkhua a i kibual ziak a i society lungvei suak ahi maimah diam? Maban a hihdam/Thoihdam i ut leh bel, Politics a hong kibual tou dingte sinsakna hoihtak piak a, politics kichi sum leh pai kinep ziak lel a sep ding hilou ahihdan hoihtak a i kisinsak touh uh poimoh pen ding hi. I society leh politics chidamna ding in hiai toh kisai in, Awareness programme khawng saithei leng bang a chidia? Huchibang in pan naktak in la leng, Politics lungvei pen a kithoihdam zou taktak na diam? chih dotna kon ban zuak hi.
---Kakipak---
No comments:
Post a Comment