DEIHTELNA OMTHEI LEH MAW??

By ~ Sang Quptong

Thil khatpeuh i hih chiang in, a hoihna leh a hoihlouhna ana om teitei hi.Tutung a i gensawm pen, nekzonna lam hideuh ahihman in, etsakna khat genpah le hang: Luinak a suang laihkhiatna in nek muhna hon pemah leh, luinak susia in menchim ki-omsak suak hi. Suang lak, Singsat, Meihol hal chih te'n leng Tuinak kangsak in, Menchim omsak baih mahmah a, Kholum leh khovot bang khengzou mahmah in, tuidawn ding kitasam in hon koih dekdek hi.

'Zou huih khisiang' chi a la a i saksak te uh koilam tungta a?  Singtum laihkhiat in hiai teng hon tungsak a, Tipaimukh Road zul a Suangtum laihkhiat in, a leitang detdouna pen subei ahi.Haivai mah abat hun om. Himahleh, deihtelna kineilou ahih phot chiang a maw. Deihtelna zangsiam mah leng le, i gam nekzonna haksat ziak in deihtelna bawl theilou in ki-om hi. Lanva nak a suangtum laihkhiat haivai bang mahleh,sum muhna di dang omtuanlou hi.

 

Kumteng a kholum uang deuhdeuh i cih uh leng, i mual leh tangte uh i metsiang uh toh kizawitawn vek ahihdan hilh i ngai nawn ding un gintak huailou hi. Mual leh tangte metsiang lah ei singtang Lou neihdan ana hizel. Deihtelna omthei leh zaw maw?  Chih vungvung in om mun mahmah hi. I singtang Lou neihdan pen uh, Gammang kepbitna lam toh kimelma cihna suak a, Gammang i kepbitlouh chiang in, gamsate'n bukna di neilou ahihman un, i gam uah, sa vang deuhdeuh ahi mai hi. Louvat leh Meihol halte peihthu di hileh kuan a peih dia ?Deihtelna omlouh ziak a huaite mah kisemtou ngitnget ana himai hi. Nekzonna dang nuamdeuh tel di om hileh kuan huaite a hihnuam nawn dia eita? Suangtum laihkhiat leh suangsek chih khawng te nekzona laklak a haksa pen pawl hiding a ,tuate a nekzon di government in a deihkei leh, nekzonna dang pemai le uchin kua'n suang gik pipi a va dom nawn dia eita? Nekzonna kia hilou, Suangtum laikhe nawnkei mawk leng, Lampi, Building leh Development Project tuamtuam  te bang chi ding? 'Dinkhawl' di maw? Hiaipen thil hithei hituanlou hi. 2012 kum in suangtum laikhiate khawng DC nu makaih in a va man khempeuh na ua, Suangtum omlou hileh, tua 'foot-path' a bawl uh teklei zatngai mailou di? Inn bawlte'n bang zangta di? Ahihleh bang chi panlak ta di?

 

Louvat, Singphuk, Suangtum laihkhiat chihte omkei leh, mi tampi 'ann ngawl' a om ding ahihman in, hiailam a nekzongte gamtatdan i siam mahmah uh ngai a, solkal thuneite'n leng hiailam a nekzongte nekzonna di lampi dang a zuih ding ua 'deihtel theih ding' hamphatna a guan uh poimoh hi. Himahleh, solkal leh thuneite'n nekzonna ding dang hon ngaihtuahsaklou chi a lungsimsia neitak a, engtat ding hisamlou hi. I gam uh i zatdan uah tuasang in pilvang zaw thei leng deihhuai mahmah hi. I singtang lou neihdan uh khekthei nailou i hihna uah, ouhal hun chiang bang in, i vatlouhnate uh munlian pipi a katsiat louhna ding in panlak dan khat omthei leh phatuam mahmah ding hi. A ziak ahihleh, sing leh loute a pichin taktak nawn na dia, kum tam kuamtak lut ahihman in leh, i gam uh segawp leh, silh leh ten, gari leh vandangte bang a segawp chi a khengtheih di hilou ahihman in, pilvang tak a i gamtat uh kiphamoh mahmah hi.

 

Sing satna lam ah, hall hiam banghiam kikhopna di khawng bawlna dia, sing leh guate i satsat sang un, khantawn daih ding, 'auditorium' bawl leng, sing bangzah a ki save ban dia? Suang laihkhiatna lam ah leng, luinak sukha thei dingte laklouh deuh sawm thei leng bang a chi dia? Lampi i bawl chiang un hawktui in a taihkhiat zoh hial ding in bawlnawn kei thei leng,bawl thakthak ngailou ding a, suang bangzah hiam ki save ding hi. Ak khawng nasan in a thaikhiat zoh hial chaing a zaw,...!! Arkatara kidaihlou ahih kei ngal leh, maban a Suangtum kia a lampi bawlsawmte suangkulh a khum hita leh maw? LPG Refill leng hichi kial gige kei leh, meihol hal kichi hong vaang deuh diam?? I gam ua heutu leh makaite'n tal sawn zen a a ngaihtuah uh hun lawta hilou hiam? Mizoram State te hihdan a NLUP chidan deuh a nekzonna deih i teltheih hun uh ngaklah huai hina mai zen e.....! Thunei le i tam law ve ua le. Pan hon lave ua maw??? 

---Kakipak---