By ~ Sang Quptong
INDIA gam in khantouh lam a manoh mahmah mai hi. Dated 30-7-2013, 7 Pm in India State 29 aphakna di'n,Andhra Pradesh State apa'n in,'Telangana State' ana piang kheta hi.Eite a di'n le suahtakna (AHS) kawlni(muhni) suakthei thou ahi cih hon musak hi. Gam khangtou sung a Gam khang hetlou a tengte i hih lam uh kuaman i haihkei uhi. Gam khangtou lou a i teng mahbang un, i Zogam ua Lampite ahi mahmah kei hi. I lampite uh loupa in phu pailet zou a, Aak in a thaisiat zoh laiteng i gam uh a khangtou kei ding hi. Sing-le-lou hing dipdip muh di chu a vang deuhdeuh a, himahleh, huih ninsaktu di'n, i lampi neu taktak te uah gari chikim a taidim dipdip vanglak hi.
I lampite uh a se mahmah mai a, Gari accident khawng bang leng lampi siat ziak ahi nuam mahmah ding hi (kham neihziak leh pilvanlouh ziak le hithei). Lampi hoihna a tai khak di kituh in, i kizui kawi ngeu-ngeu sek uhi. Nidang a puansia khawng kithuap a, tulai a kichangkang gawp, puansia thuap om nawnlou, lampi khawng kithuap thoh tamai dan ahi. Thuap thoh mailou in, a vek in puahpha thak le i phattuampih kei di ua hia ? Footh Path te lah chu a neu nak-kal a, i zatna uh theihsa..!!
I lampite uh a hoihna dia zaw, ei a gam mite'n hihtheih kinei di hi ve o..? Hichibang a lampi hoihlou i neih pe'n uh indirect a ei leh ei i kituisabuah na uh ahih ban ah, ei leh ei kitaw-lem i hilim uhi. Development thil Government apan hong pai te khawng na innsung uh leh na gilsung uh puahna di'n zang le uchin, Cement leh siik khawng na gilpi in adeih kei dia, na puak lum pah mai ding hi. Tua kia hileh pha dawm deuh di, na tate uh vual englou in na koih zomah ua, India khopi mun tuamtuam ah nunnuam in ngabang na lengsak zong un, na thil hih paap paw zoulou in mitsi duau-duau kawm in a hoi dongdong ding uhi. Akhente ngial, Ui leh aak puul mahbang in kholak peuh ah na puuk beembuum di ua. Huchi bang a i om chiang un Innsung (Zogam a omte) leh Zogam (State pua a omte) ah, a tung zawng (tutsa) hilou in, a phei zawng (lupsa) in i kipawlut maimah uhi. Zum le zum loutel i hi di uam a..!!
Mihingte a silou di i omkei uh chih, miteng theihsa ahi a, himahleh ei si di'n i na kikoih ngeikei hi. Bible in damkum di ana gen, kum 70 ahi a, himahleh hatna ziak a kum 80 bang damtheih ahihdan hoihtak in hon na hilh hi. Neulai a Sunday School khawng ah, 'Nu-le-Pa thumangte DAMSAWT' chi in i na kihilh ua, dik leng dik mahmah mai hi. Nu-le-pate'n khamtheih leh guihtheihte hih dia hon sawl zenzen lou uh ahih ziak in; Ei leh ei kinelum i hi leltak hi. Tulai a i damkum uh kum 30 ahi a, hatna ziak in kum 40 tan bang ahi thei chi le uang lua i suak nawn kei ding. Nu-le-pate'n tate lehvui chih khawng zaw khantouh vai ahi kei a, kiakniamna vai ahi zaw hi.
ITNA kichi dau deuhdeuh ahi dia o, chih vungvung hun tam mahmah hi. I Pi-pute uh hunlai in, itna ana hau mahmah mai uh chih mite gen in i thei uhi (naupang lam te'n). Tulai in ahihleh, ITNA ziak a na kisem nawnlou in, LAMET( kinep ) ziak lel in naa kisemta abang hi. Banghiam i nasepsakte apan i kinep kei leh chu, nasep le thasial huai bang maimah hi. Inn vengte itna le bei deuhdeuh abang hi. I fencing te uh a sang deuhdeuh mai a, kikawmtuah ahaksa deuhdeuh hi. Fencing hoih ziak a, ihmut limtak a ihmu hile bel hoih mahmah di hiven..! ITNA pauthei hileh, '' Muvanlai bang in Zogam tung ah Zintunna di zong in ka leng a, hon na zintun nuam omlouh ziak in Gamdang hon zintun nuam a phe souhsouh te kiang ka zuanta '', hon chih khum maimah leh kilawm ka sa hi.
Itna chih i gen lai vanglak un i Zogam ua Government Hospital omsun pen gen zual leng i chi nawn hi. Azawng-ahau damlou om chia i kiseek khawmna munpi uh ahi hi. Himahleh, Itna omlou in lametna ziak in azawng-ahau kal ah kideidanna liantak ana om nawn hi. A mipite leng i mawlluat ziak uh adiam a, damlou omchiang a, akiang tektek a tu in, Tuibuk leh Khaini gim nam fetfut in ki-om zomah a, damloute itna leh khualna neilou mah i bang uhi. 'Damlou pen a sih hunhun a kap masapen a pang di' chih lungsim nei a akiang nai a tu tektek mah i bang uhi. Damlou i chihte pau le paupeih khollou ua, huai lam phawklou in mi khenkhat in va hou pihpih maimah uhi. Damlou veh i hi hia ? Investigation vabawl ? Damlou i vehdan mi subuai lel i hi kha diam?
Numeite'n nau ( ta ) apaai chiang un kha 9 khawng lut hi. Huai mahbang in i government school pute un Zoudawn lam a siamsin momnoute itna tak toh en in kha 9 sung (January, June leh December tellou in), hoih deuh in i sepna mun ah naupangte paai (vei) in lai hilh le, Nupite'n kha 9 nung a a ta-paai uh hoihtak a neikhia a, kipaktak a, a om dan un, I school pute un leng naupangte apan gah kipahhuaitak a mu di ua; kipaktak in a om ding uhi. Semlou a loh i lak sung uh Zogam a khang ngeikei ding a, Zogam khan daltu i suak kha ding hi. Semlou a Government 'Buhpang' sawksawk na hihleh negu na hi a, Pathian a di'n sawm lak a khat le piak a ngai kei dia? Nang a di'n zaw 'Christian' kichi kammal in gen anei ngei kei ding hi. Sin in, Sem in, Zuun le.... I gam khangtou ding ahi chih khuak (brain) neiteng in theih di ahi.
* Aban ''ZOGAM MASALA - IV'' ah aw.........?
No comments:
Post a Comment