LAMKA LEH MUTPUAK

By ~ Sang Quptong

I Zogam khopi uh, Lamka i et vengveng chiang in,Sodom leh Gomora toh kikhe lawlou ding in i gingta hi.Nikum lam a New Bazar hong katlai a mi khenkhat in chiamnuih thutak a agen uh,
''Sodom leh Gomora kang'' a chih u leh awm ka sa mahmah hi.
Huai banah,Bangziak a 'LAMKA LEH MUTPUAK' hon chimawk ka hi di cih na ngaihtuah pah maithei uh. LAMKA khopi ah siatna muhtheih a khang hulhul mai, sum deihtakna lah uang deuhdeuh. MUTPUAK (ballon) bangmai a thakhat thu a hauhsak sawm i tam mahmah uhi.

I gamsung ah sum-le-pai etlahna uang mahmah a, thakhat thu a hauhsak ekh (mutpuak bangmai a) utna in michih lungtang luah zouta toh kibang in om hi. Bible in 'Sum leh pai deihtak zaw gilou chiteng bul ahi' ana chih dik petmah hi.Mihing lungtang ah sum deihtakna a letluat chiang in, i lungtang ah gilou chiteng hong inntek pan mahmah mai a, thilteng i ngam vekmai hi. I theihsa uh mahbang in, 2012 kum in C.Hangshing inn Bomb a deng in om hi, i theih thakthak chiang in, Sum Demand ziak ahih banah, a va dengte leng, Auto leh Rs.10,000 khawng loh dia sawl a om uh ahihdan i thei hi. Huchia zankhat thu a hauhsak sawm a, a si zahzah si lele poisalou a thutanna la ngam tamtak ki-om ding ahihman in, i lungtang uah, sum leh pai etlahna thupi petmah hi ta e !!  cih hon ngaihtuah sak hi.

Sum etlahna kichi munteng a om himahleh, ei Lamka context kia mitsuan in nei phot leng i chih ziak a gamdang gen sese lou i hi. Sum etlahna leh, thakhat thu a hauhsak sawmna in i lungtang uh hon zou gawp in,a langlang ah hon kai tuahtuah mai a, Sum sikha i suakta uhi. Nam leh Gam enkol tute,Govt. Official hi'n *cial lou hitaleh, saptuam maikai hi'n makailou hitaleh, azawng pen apan ahau pen tan in sum poimohna theilou i omkei uhi. Sum in thil leng ahihthei mahmah mai a, a thilhih theihdan leh,leitung a i damsung a thil poimoh pente lak a khat ahihdan leng i haihkei uhi. Himahleh, i poimoh sang ua tamzaw deih in, MUTPUAK bang a khan hulhul  i sawm uhi. Hiai leitung ah, Gou tamtak kholkhawm leng zong leikha peuh in hon neksiat sakthei ahi chih i theih uh ahoih mahmah. David Piaklian, MPS, SDPO/CCpur pianna pa (Late) Upa.Thuamzadam laphuah a dik ngial hi.H uaibel, ' Leikha leh tui-ek te' neksiat theihlouh van ah gou khol zaw ning' chih la ahi hi. Dik i  sak ngei uh ka gingta.

Sumbuk bawlte bang enta le hang, neu chikchik a ametnate uh khol ahi uh chih miteng theih ahi.Himahleh, thakhat thu a, MUTPUAK bang a hong khang hulhul hial chiang un zaw, ahoihlou lam (black) hinuam mahmah hi. Zanzek a bangmah hilou i cihte khawng, thakhat thu a muhtheih a hong khang hulhul chiang un mi tamtak kiguih sak hi.

Sum leh pai in 'dawi-ai' nei adiam chihtheih ton tam mahmah hi. Hauhsakna lunggulhna ziak in sihtanpha poisalou a risk la-ngam mi kitam mahmah hi. Khatvei ka pa kiang ah '' Chingpi kap in ka va kuan di, lohching leh kihausa mai di ahi '' ka chih leh, '' Sum addict law ken '' hon chihsan hi.Thil tamtak a genna hi di'n ka ngaihtuah. Etsakna ding in ei tualsung enta lehang, Sum leh pai etlahna ziak in Assam a Kaziranga National Park ah Chingpi kap dia hinna pephal / ngam akuan bangzah hiam ki-omta hi. I piakphal ngam mahbang un, i hinna uh leng tamtak i va khawngta ua, i luangte uh lah lakngam di hilou, hiailam a siluang omloupi a 'Vuina program' khawng i zatsek uh a ngai maimah hi.Thauzuak a kipei bang, Sumlem bawl a kipei bang, No.4 leh Heroin zuak a kipei pawl bang gintaklouh pi in kitam mahmah hi. Hauhsak utna ziak a hihngamlouh kichi himhim neilou i hihdan uh hon phawksak deuhdeuh hi.

Ei Zomite' i  ki-et vengveng leh, lompai noinoite i hi uhi. Mikhat in 'Business' chikhat hon panfuh henla'n, hong hausa hulhul leh, midangte'n leng hihsawm ringot, i tempaina hia chihleng theiloupi a kipaikhawm noinoi dan ahi. I tempaina i theih masak a, contractor di, sumbuk bawl di, khutsiam silbawl a nekzong di cihbang ei mimal a i kizonkhiat  a/ua, nuamtak a dikloutak a sum muh leh thakhat thu a hauhsak chih i chiinlouh ding un hoih mahmah hi.

Mite gen a ka zak leh theih dan in, Kum.15 vel paita in, Lamka khopi ah 'Chetak Lottery' kichi ana kithang mahmah mai a, amei, apa chih omlou in ana hih souhsouh ua, a lottery cut te lah zawnggawp, a pu lah zawnggawp, kuamah hausa omlou in, khosak buaizak in nupa tamtak in kikhen loh chihbang ana om ua, inn leh lou nasan ana taan loh om uh ahihdan leh lottery kithanlai a batnei, tutan huai bat a koltangden lai mi bangzah hiam omlai uh a chi uhi.

Ka Zomipihte aw, Lamka bang chituk in siatna in pumtuam gawp leh leng, ei mahni sepna chiat ah hoih sawm in, thakhat thu a hauhsak sawmkei peuhmah in, sum nekguk chihte tawpsan thei leng i dam kumkhua sawt mahmah ding hi. MUTPUAK bang a muhtheih hial a khang hulhul i chihte'n sawt daihlou ding uh ahi chih thei in, MUTPUAK (balloon) leng a khantheih di chiang om ahi a, huaiban a mutvah behlai i sawm chiang in kek maimah hi. Huai mahbang in, eite leng Mutpuak bang a  ki KHANG KEK thei ahi chih thei leng i chi mahmah hi.

Toupan i thu simte theisiamthei di'n hon panpih hen aw.

---Ka kipak---