LAMKA LEH SAZUAKNA

By ~ Sang Quptong

 Lamka khopi i chih,Churachandpur Distric sung a om ahi a, Manipur a di'n gen le, Manipur South District a Lamka khopi om ahi. Manipur a,Second Town chih hial a om, Lamka khopi ah Population sahlua hikei mah leh Sa ne (Non Veg.) 90% val bang om di'n gintak huai hi.Huchi ahihleh,Nikhat in Sa (Bawng,Vok,Vatawt, Aak, Kel, Belam leh Adangdang.) bangzah a kigoukhe mawngmawng dia aw ?? Nikhat a saman dia i senkhiat uh Lakh bangzah a pha dia aw ??

Dated 27-7-13 Zingkal dak 5:30 ginma in Damkam leh New Bazar a Sazuakna (Adiak in,Vok leh bawng sa zuakna) te ka va pha tuak a, a namsiat phet hilou in, a siangthou kei tel mai..! A zuakte bang kihisak mahmah lai tei uh. Ka pate'n Bawngthau lei dia hon sawl uh (sathu di) ahi a, 'Bawngthau a TAM mahmah hang in, a VAANG mahmah mai ! '.Bawng thau Kg.2 chauh ahi ka lei sawm,himahleh,''Zuak hun nailou dak 7 am lamchiah hong pai lechin'' chih kampau kha,ka mel le hon enlou a agen ahi. Ken leng,''Nou a hunchiam nei chetchet a zuak uh maw ?'' ka chih leh a dai vengveng hi.Lamka a Sazuakte Rule ka thei siamkei..!.I gen ut pen hiai ahi kei lai.

Lamka khopi i chih chiang in ei singtang mite tenna deuh ahi a, sagoute le eimi mah ahi uhi. Hithei hileh (Mipite khual deuh uh hen laan), Lawisa bang bawngsa ahi chi'n hon khem hial kei mai le uh (?). Lawisa duhte a di atuam, bawngsa duhte a di atuam in om leh bang a chi dia? Sazuakte a meet gige ding uh a chih ngam huai kei, huaiziak in, amau a di'n amang nikhua ua, a puul hiam tawm chik a lei a baihsam mahmah nawn ding hi.Zomite'n namdang toh teh in,Sa duhdiak i bang uhi. Damtheihna a ding a hoihpen hikei mah leh i hahnek mahmah mai uhi.Huaiziak tak in sagoute'n eimite nek di mah ahihziak in sasianglou zaw hon gou nawn dah mai le uh maw ? Adiak a Pathian Ni mi tam diak ahi a,Sazuakte leng chalak lou tuanlou, a hoih loulou mi tamlai a zuak in, mitawm chiang a ahoih ta-ta pholhkhia ahi uh chih, mi khenkhat gen in ka za. Hiaipen adik leh diklouh thei khang,himahleh Vokpuul sa zuak bel tamtak om ahi uh chih chiangtak in theihtheih hi.

Hiai tungtang ah kua'n panla ta di ? Veterinary Dapartment te'n la bang nasem a, koikuam a sawlbang hei uh hiam chih theih haksa mahmah mai. Hithei hileh, Sazuakna munte 'Surprise Visit' va bawl uh hen la'n, Sa kigou dekte mihingte nek di'n siang huntawk hia chih va enkhe detdet le uh hoih mailou di hia ? GANPUL SA nek ziak in sihna tanpha tuak om leh Vety. Department te suakta tuanlou di ahi uh chih a mangngilh louh ding uh ahi. Huchibang kawmkal ah,Ui leh Mihingte' sa i kituh hial chiang in zaw...!!

Kum bangzah hiam paisa apan in i District uah Consumer Club ana kiphutkhia ahi ta achih uh ka zakha ngei hi (eikhawng pianma le himaithei).Tulel a i theihphak ahihleh,CCC(Ccpur Consumers Club) ahi. LATSEA te bel amau nuai ah koihta le, i nawlkhin bawl ziak hilou in. Hiai a Club min i gente un Dawr van hun beisate kia buaipih uh hia le ? Sazuaknate la bang chik chiah? Duty Roaster bawl zen a Duty dia hoih hilou hiam , i Lamka khopi ua Sazuakna munte ah ? 

I Zogam khopi uh, Lamka pen 'Mit nauta' bang a i et ua, a cheimawitu a i pan ua, a susetu a i panlouh sawm teitei ding uh ahi. Ikiim-ikiang a mite'n,'Lamka khopi mahmah' a chihtheih na ding un pankhawm dialdial kisam mahmah hi. Vety.Department, CCC, LATSEA chih te'n ma loubang hon pat ua, Adiak a Sazuakna munte i bawlphat masak uh kisam hilou hiam ? Sazuakna munpe'n Khopi nawl deuh ah suankhe ni chi le i hi naikei, etkai di lam chauh ahi i gen phot uh.Tunung khang hong paitou zel di ah bel Sazuakna mun khopi laizang ah omden di'n ka gingta kei hi. 'Utopian Idea' nawn chihsan maimah di uam a ?

Tualou in,A kisaipih Department te theihpihna tellou a utna munmun a sazuakna mun bawl ( Unauthorized Meat Seller chi ni) leng tamtak om di'n i gingta hi. Gingta kei le-le, mit mahmah a muh a,azuakna munte uh le ban gen thei di tamtak ki-om ahihman in, unauthorized te bawl hikei thei leh chih huai mahmah hi. Authorized i Bawlte bel hoihtak a etkai hileh i Zogam(Lamka) hong pallun dia, Namchihte'n a pak lounuam in hon bawm luailuai ta ding uhi.

---Kakipak---