Nidanglai pekpek in Aak leh Sangak lawm hoih mahmah ahi uhi. Himahleh Sangak in bel a lawm Aak nek di ngen in enlah a, pilkhel tak in chan/tan bawl den hi. Tua hang in Aak in a lawm Sangak pildan sim(guk) theih ahihman in kiveng khinkhian a, pilsiamtak in thuah hi.
Nikhat Sangak in Aak kiang ah, " Lawm, tuzan koi ah na giak dia ? " chi in dong a, Aak inle "Gilbem ah" chi hi dawng hi. Sangak in leng nitak a Gilbem a va-et leh Aak ana omlou hi. A zing nawn lam in Sangak in Aak kiang ah, " tuzan koi ah na giak dia ? " chi in dong nawn leuleu a, Aak in leng "Giilzawl ah" chi in Gilbem ah giakdaih hi. Sangak in leng zankal a Gilzawl a va-et leh ana omlou zel hi. A tawptawp in Sangak in a lawm Aak khemdan hon theikhia khongta hi. Huchi in, nikhat Sangak in Aak kiang ah, " tuzan koi ah na giak dia ? " chi in dong non a, Aak in Gilbem chimah leh, a nitak in Gilzawl va-en a , Aak huai ah ana giak petmah hi. Sangak in leng Aakpi tuah in gamlak ah asa ne hi.
A zingchiang in Aknou leh a Tui (egg) leng Akpi phula ding in hong kuankhia uhi. Lampi ah hong paipai uleh Gulngawngsan hon tuak ua, Gul in leng "Aknou chiakchiak koi a hoh ding ?" chi in na dong hi. Aknou in leng "nu phula ding, pa phula ding, Sangak daikai ding" chi'n dawng a, Gul in zong, Sangak tung ah kua lungdam om ding, ken leng hon zui ning , chi in zui pah hi.
Amau teng hong pai nawn leuleu ua Taanai(miksi chikhat) hawn hon tuak non uhi. Taanai te'n leng, " Aknou chiakchiak koi a hoh ding ? " chi'n ana dong ua, Aknou in leng, " nu phula ding, pa phula ding, Sangak daikai ding " chi'n dawng non a, Taanai te'n leng Sangak tung ah kua lungdam om dia , kou leng hon zui nu'ng , chi in zui uhi.
Huchi'n lampi ah, Khuai Ukeng, Bizang, Naanghiam leh Suktuahte nupa kichite a banban in hon tuak ua, amau leng Gul leh Taanaite dotdan mah in ana dong ua, Aknou leh a amah ana zuite'n leng, Ama a dan mah in dawng kik uh ahihman un, zui chiat uhi. Hiaiteng hong kizui in Sangak tenna lam hon zuan nainai uhi. Hong paipai uleh Sangak buk hong tung thei khong uhi.
Sangak buuk a vatun tak un Sangak ana omlou a, amau leng panmun hong kihawm chiat uhi.
Aknou in meiphual phiatdalhsa a koih ding.
Aktui Vutlak a phual ding.
Taanai hawn belpuansia kawm ah pang ding.
Gulngawngsan tuithei sung ah pang ding.
Naanghiam tuitheibul a baang ah pang ding.
Khuai hawn Puanpi kawm ah pang ding
leh
Suktuahte nupa in Innkong lam a hong taipawt leh Bizang a ana khoh ding chidan in panmun hong kihawm uhi. Huchi in , Ukeng hong kipan a, vanlam ah Tui hon phih leh khua hong niim in huihpi vuahpi hong zupah hi. Aknou in Sangak meiphualsa hon thaidalh a, a dangte leng a panmun chiat uah ana pang khinkhian uhi.
Vuah tampi zu ahihman in Sangak leng kawt nipnep sa in inn hong tung hi. Votsa lua a mei a awi dek leh aknou in ana thaidalh gai ahihman in a mei ana dur lou a, mei tawh/chih dia kisa a vutlak hon thaipat leh Aktui hong puakdarh in a maiteng ah kidenna hi. Aman leng salua,,,, salua,,,, chi a akiang a om belpuansia a lak leh Taanai hawn in ana deh/kei ua, Naa salua a khut Tuithei sung a adiah leh Gul in ana tu zel hi. Mangbang sim kawm a tuithei bul a baang/zuak a maiphei leh Naanghiam in a khut ana aat zawmah lai. Aman leng mei lah tawh ngam nonlou khuadam lah sa ahih chiang in ; puanpi kawm ah kilup mai ning chi a, puanpi hon hawk leh Khuai hawn in ana bawm luai-luai ngal uhi. Laulua,,, alohngaihna theilou a Innkong lam hong taikhat leh Suktuahte nupa in nuamtak in Bizang in ana khoh liam geih uhi...
Huai ni apan tuni tan dong Aak leh Sangak( Sihal) kihou theinailou uhi.
Moral : Lawmhoih leh ginom tung ah tatkhelh thil hoihlou ahi.
No comments:
Post a Comment