Midangte bang in ka khangnou lai-in ke’n zong lawmte neih bang neihlouh ka laupen hi. Kum 13 mi ka hih lai, 1963 kum in, khedap penny loafers kici khat suakthak hi. Khangnote in kideih lua mahmah ahih manin, penny loafers bulhlou a vakkhiat sang in, kheguak in kivakkhia nuam zaw liang hi. Tua bang liang in bulhlouh kilau hi. Tua khedap pen khatvei thu-in fashion hong hi lakh a, tua ma lian in oxfords kichi khedap khat lei khin ka hih manin, tua oxford bulh kawm a lawmte kiang a om zong nuam ka sa kei liang hi.
Khedap lei ngetna
Ka pa pen mawtaw sia bawl a nekzong (car mechanic) hi a, ni khat pen ka pa kiang ah penny loafers hong leisak ding in ka ngen hi.
A mel-ah lamdang sa hi cih kimu thei a, “Willie, na khedap bulhlai pen kha khat zong hi nai lou a, a thak kisam na hiam?” chi in hong dong kik hi.
“Pa aw, tuhun chiang in mi khempeuh in penny loafers bulh uh hi lou maw!”
“Bawi aw, mi pate bang in sum nei pah lou hi ing”
Ka pa khasum pen tawm mahmah a, insaap leh innkuan nek ding thalawh khia thei chiamchiam bek hi.
“Pa aw, theisiam lou hi teh. Tu-a ka khedap ka bulh ciang in hai tuak lua hi veng!”
“Mi khedap en masa phot in”
Ka pa pen kun suk in hong dakkhia kik a, hong enin thukhat hong gen hi. “Bawi aw, hih bang in chi ni. Na khedap bulh lai pen tuni bulh kik inla, sanginn a na lawmte khedap khempeuh na et khit chiang in na khedap a hoih lou pen ahih leh, na nu buhtang lei na ding i koihsa pen lakik in, sum behlap in lei ni” chi hi.
Lawhching kisa mahmah in tua ni pen sang ka kah hi. Ka pa thugen ka theihsiamdan in tuni pen ‘ka oxford khedap tawh sang ka kah nunung pen ni ding’ ahi hi. ‘Khedap nidanglai lua’ bulh nawn lou ding ka hih manin ka lungdam mahmah hi. Ahih hang in hong kam vaikhak pen ka mangngilh kei a, a thugen bang in ka om hi. Ahih hang in ka muhte pen ama kiang ah genkik ding in hoih khin lou hi.
Sunkhua-in ka sangnaupang pihte khe ka en a, khedap chi tuamtuam tam mahmah hi, chih ka mukhia hi.
Khedap a san, a vom, puan khedap nin mahmah leh a lui mahmah a bulh zong om hi. Sun khawl hun ciang hoih taka ka et leh, khedap pawlkhat pen bang company bawl hiam chih zong kithei nawn lou zah a lui khawng, nasepna munah zong bulh uthuai nawn lou ding zah a hoih nawn lou khawng, mun tampi ah a vang omta khawng zong ka mu hi. Pawlkhat in, guahzuk hun chiang a bangchi bang mah a a khe uh kawt lou ngeilou ding chih kithei khawng bulh uh hi. Genlouh theihloh in penny loafers vom a bulh zong om mah uh hi. A khetul lamah sakol khe a kivuah bang pian sik kual kivuah a, a pai uh ciang in tua pen ging kauhkauh hi. Hall sung a apai laitak ua tua a ging in, a zate lungtang kisai manlangsak zou liang hi. Bulh a uthuaina zah mah in, tua kalsuan khiat chiang a ging kauhkauh zel pen neih a uthuaina hi mawk hi.
Sang tuak kik chiang in ka pa sepna workshop lamah ka pai pah hi. Nipi kal tawp hi a, khedap thak lei in, mai kal chiang khedap thak bulh in sanginn hall lianpi sung ah pai ging kauhkauh ding in ka kingaihsun hi. Khedap lei kei kik ning e chih lam ka ngaihsun nawn kei a, bulh siam kei kha le’ng chih lam bekbek ka ngaihsun hi. Tua manin, penny loafers ka bulh hun chiang a pai ding dan ka kisinkhol liang hi. Ka neih a ka pai siam naak leh ging kauhkauh ding hi.
Ka pa workshop lamah
Workshop ka tun chiang in na dai dide a, mawtaw thau(oil) gim bek zong nidang sang in namtui ka sa zaw hi. Bang hiam a kikhen ging kauhkauh bek kiza thei hi. Ka pa in mawtaw bawlna khan (room) sung a 1956 Chevy mawtaw bawl a, tua car neipa in khan dang khat ah ngak hi. Tuapa thei ngei ka hih manin, “Pu Alva, ka pa in bang tan sem ding hiam?” chi-in ka dong hi.
“Bang chi theih ding ka hiam , Will ? A gear box hoih lou bawl a, a hoih lou dang zong a muh leh bawl suak pah ding hi” chi in hong dawng hi.
Ka pa khedap
Car bawlna khan sung ah ka lut hi. Car nuai ah ka pa thallup a, a khuk chiang bek ka mu thei hi. Ka pa pen houpih pah ka sawm a, buai lua ahih manin ka houpih ngam kei hi. Car nung ah ding in ka mit ka khoihkhoih leltak hi.
Tuni in ka pa hong vaikhak bang in khedap ka en kawikawi a, hong sawlna mun ka et zawh ciang in tun ama khedap ka en hi.
Ka pa in khedap vom a lui mahmah bulh a, amah leh, amah bang a workshop leh na niam semte in a bulh bang uh, a bawlkhia company zong kithei nawn lou bulh hi. Thallup ahih manin a khedap nuai lam zong kimu thei a, a veilam pen a nuai lam vang ta a, a tung lam savun tawh kipelh thei ahih manin munnih ah sai-ip khau tawh khui hi. A khedap khaute luilua mahmah ta ahih manin a muuk pen palh khin hi. A lang nih in a khetul a sah pen om nawn lou a, tua a kilhnate in a khe a sutlouh na ding in kawisak khin hi. Tua pen ka pa khedap ahi hi.
Lei teitei utna
Tua bang thawm nei lou a ka pa khedap et na’n hun bangtan hiam ka zat zawh chiang in, ka pa in a car bawl zou in car nuai panin hong pusuak hi. “E ! Bawi, nang hong chiahta maw?” chi in nui kawm in hong ding khia hi.
Tapa:“He, tawp ta ung a...”
Pa : “Kong hilh bang in na om hiam?”
Tapa: “He, om mah ing”
Pa :“Tua leh bang a na ngaihsut dan?”
Ka mitkha ah ka lawmte khedap bulh sia mahmahte hong kidawk zangzang a, ‘Mi in zong a sia pipi bulh uh’ chi-a thudik ka gen leh, ‘Tua ahih leh na khedap ngeina bulh kik in !’ hong chi ding hi . ‘Penny loafers bulh khin uh’ ka chih leh lah zuau gen hi ding. Mite in bangbang a bulh uh zong in ka pa khedap muchian mahmah lai ka hih manin, hong leisak ding ka pa in khedap gina zong neilou a, ke’n khedap suak thak pen bulh ka maizum pian hi.
Ahih hang in, mitkha-ah penny loafers hong kidawk pen phiat theih hilou hi. Penny loafers khuh lou lian a blue jeans teen a, jeans mai lam a ip/sakhau sawk kawm a, jeans jacket silh a, tee silh liang a sam hiat a, sanginn hall sung a pai ging kaukauh lai leh, ka classmate-te in tua ka bulhna hang a hong etdan uh a kilamdan ding dan ka theichian mahmah hi. Ka damsung hun in tua bang a om ngei lou ding a ka kingaihsut chiang in nei lou thei lou hi'n ka kithei a, ka neihlouh nading a hang khat zong ka thei kei hi. Ka maizum ahih manin a mit zong ka en ngam kei a, nuai lam en leng lah a khedap ka muh ding lau lai. Chihmawh thoih in Chevy car lui en kawmin, “Penny Loafers neih teitei ut ing!” chi-in ka pa ka dawng hi.
Sum tawh khedap saiah
A khut lianpi a sathau(oil) bang neinaite puansia nin mahmah tawh hul-in, nui kawmin hong en a, “Na deih mahmah leh ai ve maw”chi kawmin a ip sung sawk hi. Penny Loafers...!
“Sai ka khak zawh chiang in tuni bel na nu tawh ka kithuah uh kul ding hi. Innkuan nek ding nidang sang a tawmzaw lei kisam mawk ahih manin” a chih aw ging pen kichian takin zong ka thei kei hi. A ip sungpan in Dollar 10 note lakhia a, “Na khedap deih pen va lei o leh” a chih aw ging simlouh ka beng in bangmah theithei nawn lou hi.
Khedap man pen $ 10 hi a, ahih hang in za-a thum pen siah (sales tax) piak kisam lai ahih manin a ip sung sawkin zong a, hong pia kik hi. Lungdam lua-in ka pa workshop panin a lenin ka leng khia a, khedap kizuakna sai ka tun lam zong ka thei man kei liang hi. Sai tawhlet a penny loafers a phokhiatna uh munah ka ding seisai hi.
Nisimin tua khedap sai limlang sung a khedap “SALE $ 9.95” a kici pen a kisuang lai hiam, chih ka en den a, tu’n zong tua pen kisuang lai hi. Tun bel a et a et hun bei a, lei-in, bulh in, pai ging kauhkauh ding hing.
Ahih hangin..
A sung ah lut-in, aw ling keuhkeuh in penny loafers ka lei nopna thu ka hilh hi. Tua bang hun laitakin hi ka kisakna lian mahmah hi. Ahih hang in, khedap ka deihna hang khat, khetul tung a a gingthei kikoih pen a tuam a lei kisam ahihna thu hong hilh uh hi. Khedap bek man pen $ 9.95 hi a, a sik kipei thei tawh ka lei ding leh ka sum in chin lou hi. Sik kihel lou in ging thei lou ding ahih manin ka buai hi.
Sik ging thei tawh leilouh pen a manphatna om lou in thei ka hih manin ka nu kiang ah sik kual man ngen in, hong piak hun chiang a kitonin lei mai ning, chi in ngaihsutna ka bawl hi. Ahih hang in pizing chiang ka lawmte muhna a bulh kisam lua mahmah hi ! Kilawm tak a bulh thei ding in bulh kisinkholh kisam lai. Leitung na dang khempeuhte zekai thei a, ahih hang in hih khedap in bangmah ngak thei nawn lou hi. Tu’n ka neih teitei kisam hi, chi in ka ngaihsun vat a, ‘Ka pa kiang ah va ngen kik ning e’ chi in ka kingaihsun hi.
Khanglo ta ing
Ka pa maw ? Mitkha-a a khedap bulh lai muh zong haksa ka sa mahmah a, phiat theih hi leh ka phiat nuam mahmah hi. Ahih hang in ama kiang ah pai leng va mukik ding hing. Et zong kul lou in siat theih bang pen a sia ka pa khedap pen ka theician mahmah hi. Tua khedap zuakna sai/dawr sung ah leitung a khedap tam manpen leh hoih penpente kigual diudeu a, ahih hang in khat zong muchian lou hing.. ka pa khedap chih simlouh.
Tua bang khedap kikek leh sia mahmah bulh in ka pa in kei leh ka innkuanpihte nek ding leh innsaap man thalawh a, zankim laitakin zong mun gamla pipi-ah mawtaw bawl ding in hong kisam thei hi. Phun sese lou in thou a, ka ihmut kalin tua khedap bulh in ka pa in kei ading in kum takpi na sem hi. Pu Alva leh midang te’n ka pa a zuat sese na uh hang zong ka thei hi. A siatna lai a hilh ban uh, ama’n a hoih lou zongkhia a, a khonkhong in a bawlsak man ahi hi.
Tua bang liang a gim a asep hang in ama ading khedap zong lei ngam lou a, a kisap mahmah lei nading a a phallouh pen kei ading in phal hi. Ka pa in keimah bang in a khedap deihpen bulh zel leh, ken bang khedap bulh ding ka hiam? Kum 13 mi hi ta ing a, ka khedap deihpen ka bulh theihna ding in ka pa in kum bangzah tak khedap gina bulh lou in a damsung hun zang ding hiam? Khanglouta ing.
Lei veve ding hing !
Ka dakkhia kik a, sai/dawr sung a etlawm tak a penny loafers kikoih ka en kikkik hi. Tua khedap hoih mahmah pen khatvei thu-in ka deihna beimang vat a, kalsuankhia-in, a mong om lou zah dong a khedap manpha leh tulai kigualte khempeuh ka paisan hi. “CLEARANCE 50% OFF” cih a kisuanna mun a ka pa khedap bulh theihzelte a kikoihna mai ah ka ding hi.
Ka lungsim sung ah ka sanginn hall sung ua pai ging kauhkauh mah hong kidawk kik hi. Ahih hang in tua a uthuai mahmah mitkha pen ka pa khedap lui in hong khuhcip kik zel hi. Leitung a khedap manpha leh etlawm hi a ka theihte ka ngaihsut khit chiang in zong, ka pa khedap pen hangsan pen veve hi !
Tua leh, siah tawh kigawmkhawm a $ 6.13 a kizuak nambat 10, ka pa deih ding pen la-in, hoih takin ka tuunsak a, a man pia-in, lamdang kisa pipi-in ka pa workshop lam ka zuan kik hi.
Workshop tuakchil a ka pa car lui mahmah kongkhak ka hong a, a tutna-ah khedap pen koih in, workshop sung ah ka lut a, ka sum zat valte ka ap/pe kik hi.
Sumte sim a, “Na khedap deih pen $ 9.95 man hi'n thei veng in, tam val si e” chi in hong dong a, “Sale uh a!” chih bek in ka dawng hi. Chiah hun ding ahih manin munphiah la-in workshop ka phiat siang pih a, nitak lam nai/dak 5 hita ahih manin kikhak-in, chiah ding in car sung ah ka lut uh hi.
Khedap thak
A hawl/hekpa tutna ding ah khedap ka lei thak om hi. Tua bang liang a ka deih, amah bang in a damsung a a bulh ngeilouh ding penny loafers hi ding a a up pen hon a, khoihsin ut hi ding hi - khedap kitunna pen a phei tung ah dawm takin domtou a, damtak in bawm hong in, a et leh a bulh laitak bang a lian khedap mu hi. A muh sawm bang mu lou ahih manin lamdang sa in hong en a ;
Pa : “Aw ! Penny loafers na lei ding sa a..?”
Tapa :“Ka... ka lungsim laih kik ing a..”
Hong en a, a nui ding ka sak leh a khitui luang ding in hong kithawi hi. Hong en ngam lou in mai lam en a, a khut lianpi in car stearing lenkip semsem hi. Tunglam enin dai dide a, theisiam lak tawh kibang in ka lam hong nga-in hih thu bek hong gen hi:
“Ka khedap mu hi teh maw?!” Hih thu Willie B. Raborn in a gelh ahi hi. Khangnote ngaihsutna a zou mahmah pen thu kihilh gawp lam zong hi khin lou a, mit a muhna in nakpi’n nasem hi.
( Copied from Daihna cabin )
No comments:
Post a Comment