Tuibawsa kiluak kik theilou

Mimbang na pianni pan tuni dawng na nuntakna

A beisa na nunglam hunte lungngai kik dih in,
Na khawlpih lawmgual leh na lawm ngaihnu, na ngaihpa
Nangtung ah bangzah itna hong nei chih na thei maw ?

Muhchil pan a hong it na chihte
Siatna hong tun na gal hithei hi
Na thusimlouh, na etneu, na simmawh pente zong
Na lungkham hunchiang in na lawm dikpen hi thei hi.

Hau in nuamsa na omlai, pi pu hong chinuam tam
Na suahpih laizom na ngawn phawkpha lou na omleh
Sih leh nat tuak leh teh sanggam laizom kheng omlou
Chihmawh gentheikhat na tuahni takteh tel ni teh.

Na neihsa ah kam beng beimang ken.
Khut-tung lumlet leh mitphiat kal bei thei
Meigawng, tagah, zawng daipam simmawh zahpih tuan ken,
Amau zong khangtou thei a nang zong niamthei hi teh.

Na khawlhpihte entel in hong it hong ngaitak maw
Mi kamsiam muksiam khempeuh in vamuang pah kei in
A pualam bek en ken, a sungtawng dawng tan tel in
Tuibuasa kiluak kik theinawnlou hi chih phawk in.

Hong it tam chi’n lungdam pah kei in
Na khantawn ding telkhial kha ni teh
Zawng taleh hong it a, se ta leh hang hong ngai te
Itna maan itna taktak toh ei hong it te hi.