WARNING !!

By ~ Sang Quptong

WARNING kichi Sappau i khelhsak zual ahi a, ei Paite-Zomite pau in ahihleh, a tomlam in,'Vauna' chihtheih hi. Gensau deuh di chile hang, 'Kiginna ding a hilhkhawlna' a chihtheih nawn a, khauhdeuh in genlai le, 'Tawpsan ding a Vauhilhna' leng chihtheih hi.

Hiai thupi pansan in, Zomite 'Warning' bangzah hiam kipe le i chi hi. I thugelh hong saukhak leh i theihsiam ua, a tom leh, 'Thugen tomte a hampha uh, sehnawn a om ding ahi ngal ua' chihdan a,'Thutom gelhte a hampha uh, a laigelh te mi'n sim thanuam di ahi ngal ua' chidan a la in, Suah-Tum-Mal-Sim kawmtuah vengvung lou in tomchik a zoh i sawm ding uhi.

Zomite i kipatna uh, Khul (Cave) ahi ana chi uhi. Dik leng dik di'n a gintak huai. Hunpaisa sutsawm i hi zenzen kei a, i kipatna uh kibang, 'tuun sung khat a piang, suangtu kibang i hi uh' i chih nopna ahi. Zogam in nang tektek hon poimoh lai in, Zomite'n le Zogam mah kipoimoh ahi hi. Kipoimoh tuah chiat chu khatvei tei, Government a i thilnget (AHS) mu di chihna himai ahi.

Israelte' Mosi in Aigupta gam apan apikhiat lai in, Mosi bangzahvei aphunsan ua? Huaibang in enleng tua i haksatna uapan hon pikhe lel-lel i makaite uh bangzahvei i gensia ua le? Mosi a di'n a beidot huai mahmah ding. Himahleh, aman Pathian kiang ah a haksatnate atun tawmtawm hi. Tun'n eite'n i haksatnate uh Kuakiang ah i tun tawmtawm ua? Pathian kiang ah maw? Ahihkeileh Government kiang ah? MGNREGS (Job Card) holder tengteng in Nam leh Gam a di'n, Pathian kiang ah Thumkhawmna nei maizen le zaw....!!

Israel te mah toh kitehkak lailai le, Mosi in Nam 12 apan mi 1 chiat telkhia a, Kanaan gam enkhe dia a sawlte'n bangchi'n Mosi kiah 'Report' apia ua le? Mi 12 lak a mi 10 te'n 'Agam mite lianthei lua; eikhawnte zohvual ding hilou; a kiang ua I din leh, Khaukhup chia lel kipha mah bang tiuteu....' chi uhi. Himahleh, Kaleb leh Joshua in, 'Pathian thahatna leh thilhihtheihna toh gam kila zou mahmah ding ahi' chih gingta a, apan tinten ziak un, gamchiam a lut loh uhi. Ahihleh, ei Zomite lak ah, Gam enkhia (Nam leh Gam makai) Joshua leh Kaleb bangbang mi bangzah i om ua? Midang 10 te bang a lungkia a, mipite' lungkesak i hihkhak d'uh lauhuai mahmah hi.

Israel te Pathian, eite Pathian toh kibang ahi a, Pathian in bangkim hihthei chih i thei ua, hon pikhe lel-lel ahi a, himahleh i deihpen uh hon musak nailou lel ahi. Amah i muanngamna uh hon enkhia ahi diam? Gam enkhia a kuan Pathian hatna muanglou mi 10 te bang a i om ualeh, Pathian hehna i tuang uah a kuang zak dia, Israel te mi dawilok 10 ziak a Gamdai a kum 40 sung a vakvaihsak bang a, i tung ua le hong tungthei ahi. Israel te Kum 40 sung Gamdai-gamkeu a a vakvaih sung ua, Aigupta apan a pawtkhiat ua Kum 20 chingsa teng a manthat vek bang un, Zomite leng Pathian i phawk kei ua leh Zaw...a upalam te'n Suahtakna kawlni suak mumanlou thei ahihman un, Gam enkhia mi 10 te bang a omlou di'n, 'WARNING' i kipia hi.

Lei lunmang te'n gibang hon khen (Mizoram,Manipur leh Burma ah), kuan tuibang gawm di? Amite lah kituaklou, tuahnang simthu lel-lel zong leng, 'Nomenclature' ziak leltak a buai ihi uhi. Eite gibang kikhen le, kuan hon gawm tuan dia eita? Mimbang i pianna Zogam nuam, lia-le-tang gual lungtuak in ngabang leng dialdial. Singgam ngailou in, i Pianna Zogam mah ngai ni in, Inn gua hahlou pi a, Gam gua hah nawnlou di'n, 'WARNING' I kipenawn hi.

I Zogam ua, dawr te i et vengveng leh SIHNA zuaklou omlou i bang uhi. Sihna i chih, Khamtheih Chi tuamtuam: Paras, Talab, Raja, Khaini, Kuva, Laizial, etc te ahi. Zu Zuak, Galvan zuak chihte leng SIHNA zuak ahi ua, alei te'n le SIHNA lei ahi uhi. Gam leh Nam khan daltu ahi ua, Gam leh Nam it taktak te a di'n a mitsip huai mahmah hi. Indirect a Tualthat ahihziak un, Pathian in bang a lohphet diam a? Hichibang a SIHNA zuak leh Lei te leng, 'WARNING' I Penawn hi.

Khovel changkang dungzui in, vanzat hoih taktak: TV, Computer, Mobile chihte i Zogam uah a pumdimta hi. Hiaite kuate bawl ahi ua le? Misiamte bawl ahi chih a dawnna dik ahi phot. Ahihleh, hiai misiam i chihte kua bawl ahinawn ua le? Pathian bawl ahi uh chih, dawnna dik, genbeh di om nawnlou a thudik ahi. A chihleh, hiai vanzat Pathian in hon piakte i bangchi zat ua le? Aban ah i ensuk ding uh.

 Hiai Vanzat, Pathian in a misiamte tungtawn a hon bawlkhiat ziak in, Khovel lianpi bang leng, neuchik i suah uhi. Facebook i chih te khong leng, ei mimawlte nasan in i theihphak ahi. Facebook apan a kithei a, kingai a, kiteng leng i om ding un a gintak huai hi.

Huchibang a, khovel changkannate Zalzou a i omchiang un, thil zumhuai leh Zahmoh taktak khawng gen in nuam i sa mahmah maithei. Hichibang a nuam i sak mahmah lai in, hiai ngaihtuah in, 'Na Gente tengteng leh na et banah, na thilhih tengteng, tua vanzat lamdangte bawlthei, mihingte bawlpa'n thei law mahmah ahi' chih thei in. Mobile a Message na gelh chiang a le, na gei a om a, na gelh teng muvek ahi chih haihvuallouh ahi.

Na ut-ut uh gen unla, na ut-ut uh en unla, na ut-ut uh kithon unla, nuam na sak dandan un om un, A hon phalsak hi. Himahleh, Pathian in na thilhih teng uah, thukhenna bawl ding ahih chih bel thei gige un (Ecl.11:9 simbeh in). Hiai 'WARNING' ngaihsak lou di maw?

Writer's Note : 'ZOMITE KIANG A WARNING KIPE DI CHILE A TAM MAHMAH DI, HIMAHLEH TU MAHMAH A ZATPAH DIA HOIH I SAK DIAK TENG HONG KITAKLANG AHI. HIAI WARNING TE NGAHSAK LOU LAILAI TEL DI MAW ! ''