[July 7, 2013 at 10:10am]
Bandh, Strike leh Kiphinna tuamtuam te, aneu pen apan alianpen tan in i theih hoih mahmah uh ahi. Khualzin hong pai dite leh a zinkhe dite kidot masak pen tuh, 'Bandh om hia?' Chih hitel ahi. Bandh a omleh 'A khauh diam?' chih hinalai. A dawngte a di'n le chu a haksat hun tam mahmah di'n i ngaihtuah hi. Bangziak in?
Bandh omleh omlouh chu kidawngthei pahpah inchin, himahleh, akhauh di leh khauh louh di pen dawngtheih haksa mahmah mai hi. 'Khauhlou di' chile lah, mun khenkhat a khauh a ana khauh thepthup thei in, thuak lohthei uh.'Khauh di ahi' chile lah, program poimoh mahmah a neihte uh a 'cancel' hial uh ngaisek a, a hong khauhlouh gaih chiang in kisuanlah huai phing zel bang hi.
Bandh leh strike i chih in khovel a luahsuak mahmah hi. Tulel in 'anti-Islam' cih thu ah helna nasatak in khovel a nawk lellel, India ah en leng,UPA apan nuaktai, West Bengal Chief Minister, Mamata Banerjee makaih ~ Trinamool Congress in India sung pumpi ah Bandh ana bawl ngei uhi. Manipur leh Lamka kia a Bandh om hilou ahi i chih nopna ahi. Himahleh, Manipur bang zen a Bandh om mun na, om di'n a gintak huai kei. Government buchingtak cih a om theikei, amau leng mihing hisam ahih na uah. Nam khat asuk lungkim cia, adang khat ana khase zel. District khat a suklungkim cia a dangte'n khasiatna di ana thei mahmah zel ua, hiaite deih pichinsak vek ding kichi tuh government a di'n, tulai pau hileh 'Kahase' himai dan ahi.
Bandh a kichih chiang in, Government office leh mun poimohte sang in, genthei leh haksatak a nektawm zong a khosate sukha zaw ahih na ah, mipite' ngaihdan lak masak phot tuh bandh bawl dite a ding in a poimoh mahmah hi. Bandh lohching ding pe'n mipite a kinga lian mahmah ahihman in, zan khat, zannih thl thu hiam a bandh bawl mawk pen i lohsapna ding ahi thei hi. Kum 2012, akha ka thei ciah kei a, Phailian lam a lawmte toh ka vak ualeh, theihkholhna bangmah omloupi in, suntang laitak in, lampi lai ah 'gawtawn' hongkham zatzat ua, 'Bandh kipan ahita' chi in gari khawng a kiksak zungzung uhi (nuihzat huai sim).Ka gei lak uah, Rickshaw a tui supply, Bungmual lam a pai di om a, akiik vengveng a, mundang Bandh bawlte omlouhna kilkawm a totmai ngai di ahihdan ka theih chiang in ka pawna mahmah hi. Engine nei bek le hilou, tha mahmah a kaihthoh hi a ka chi a, tutan ka mitkha ah, a om lailai mawk hi. Hucia Bandh hong om guih chiang in mipite'n theisiamlou ahihna ah, a bandh sutzop theihlouh in a dinkhawl a, sutzop teitei hileh, buaina dang piang daih thei ding in a kilang hi.
Public Sukha ding Bandh himhim ahihleh Pre-Plan hi henlan, Mipite' kiang ah Bandh bawl a ngaihziak hoihtak in thei siamsak masa lehang,niteng nektawm zongte a di'n a navak huai zawdeuh diam? Suansam (nek d neilou) phial a om leng a tawm deuh diam? A ziak chu, Bandh di ziak a bangtan hiam ana kisakhol thei di ahihman un. Neksam (huansam/suansam) hial in i om di ua hia ? na chi maithei ; Lamka Khopi daipam leh kilkawm deuh ah vak lecn, 'hichi lawmlawm ana hi maw ! ' na chi vungvung ding hi. Zoudawn lam ahihleh, genselouh a theihsa ahi
.
Bandh i bawlchiang in, Mipite' gawtsawm a kihikei a, government gawtsawm a kihihna ah, mipite sukbuai sang in, government office te a function theihlouh di'n koih dan ngaihtuah le hoih mahmah ding hi. Mipite haksatna government in a thei nuamkei a, himahleh, a office te uh function lou a, a om chiang in, abil uh deng puak lek pan ahi cih theih ahoih mahmah hi. Huchilou a mipite' lak kia a khauh a, Government office te, security khauhtak nuai a hoihtak a a function theih thouthouh leh chu, amau poimohtak sukhalou a suak a, ut tantan Bandh leng poi asakei ua, amau leh amau kigawt hon chilel ding uhi. Hiai bang a Bandh bawl teng in Mipite haksatak a i na koihzel pen uh ahi, ''THEIH NGAL KAWLGIT SULUK'' ka cih.Himahleh, government office te function lou a koih theihna di'n pilvang tak a vaihawm a poimoh. Police Station a i thiltuah uh bangbang tuah nawntheih ahihna ah.
Churachandpur District kichi, District dangte sang in leng Colour atam zaw a, a huchih ziak in, Bandh bawl ahihchiang in leng a tuplouh lampang a sukha dek nak a (Bandh Volunteer vs Anti-Bandh Volunteer cih bang), hiaipen pumpelh theihna di'n Tribe tuamtuam leh organisation tuamtuam a makaite kithutuak diam a om a nasep hileh a cih huai mahmah hi. Government a pressure bawlna ding in Bandh chihlouh a dang i theituankei ua, himahleh, Bandh khat peuhpeuh i bawlchiang in Organisation tuamtuam kithutuak phot in, Government office te Bandh zaw leng bang a chidia?
Tuadan ngen a i paitouh leh Government nawk dia kisalai, ei leh ei kinawk tuah khak dekdek a om nilouh ding a bang hi. Huaiziak in,''Bandh paizia neuchik kheklamdang in, ' i theih ngal uh kawlgit suluk' kei le'ng bang a chidia?'' chih dotna, Heutute, Zomi Nungak-Tangval, Aneu-Alian, Nupi-Papi, Atek-Akhang te kiang ah I kizuak hi.
------KAKIPAK-----
No comments:
Post a Comment