By ~ Sang Quptong
Manipur a common mahmah, aneu-alian in i theih mahmah uh tuh, Bandh, Strike, Blocade leh kiphinna tuamtuam te ahi. Aziak hoih pipi nei in kiphinna i sai ua, adiak in Manipur Phaizang ah hichibangte a tung mundiak lai hi.
Ei singtang gamte sang in Phaizang lam a te aleikou zaw ua, akhenchiang bang in State Govt. Khawngaihlou lawdeuh uh bang hial hi.
Phaizanglamte i etleh, banghiam lungkimlouhna a neih chiang un, tangtel siktan bangmai leh, lounuak sukkhak bangmai in kizial khawmpah vutvut ua, anuak khawmpah duamduam uhi. JAC ki form pah chetchet in, Govt. ah Memorandum leh aduh adeihte uh ngenpah chetchet uhi. Himahleh, i theihsa mahbang in govt.in a thilnget te uh a pepah tengtung tuankei. Himahleh, dawm hetlou leh govt.lam khual hetlou a aduh uleh adeih uh hon nget chiang un ngahpan lel uhi. Huchi bang a Manipur phaizang mite panlakna a khenchiang in uanglua leh leikou huailua bangmah leh, a huchih ziak tak ua, Singtanggamte sang a khang hatzaw ahidi ua o ! cih theih in om hi.
Manipur singtang gam ahihleh, kiphinna leng phaizang mite toh teh in a tawm lai mahmah hi (Phaizang bang maizen leh bang a chi diam o).Tua dungzui in govt. a i deihte ngen tawm zaw na-na-na chu i tualniam zawk kia uh hilou in, nelsiah leh thulaklouh in i om uhi. Democracy vaihawmna gam a teng i hih dungzui un, deih nget theihna leh lungkimlouh nate govt. tung/kiang a taklattheihna ding Right i nei kei ua hia? Ahihkei leh deih tenten louh ngal ngen peihlou, tua kia hilou a, i ngetsate nasan enkai peihlou i hi u hia le? Ngetlouh alah solkar in i poimohte uh thei mawklou ding ahihman un, i duh i deihte uh kuhkaltak in ngen peuhmah leng,hon piak hun uh omsam ding ahi. 'Kuhkal lohchinna' cih ahih banah, i government policy tuh, 'A ngen zouzou leh a hat zouzou tam tang (phaizang mite bang a)' chih hi ngeingei ding in a gintak huai hi.
Tua ahihman in, Manipur phaizang mite thil ngetdante leh a masawn ziak uh i theita a, amau bang a khan a public property kiningching deuh neih i utleh, leikou deuh leng i sawm ding mah hilou hiam? Leikou deuh in, dohzohna govt. tung ah nei tawm deuh leng, govt. In leng hon bildoh deuh ding in agintak huai hi. Huchi lou a,pil kisa leh 'Second thought' nei kisatak a i daih dide ziak a tunitan solkal in hon nelhsiah kia hilou a, phaizang mite ngapthoh a om leng i hi khamoh dia hia? 'Sialpi vuahthuak' bang a thuak kang kiuhkeuh di maw??
Manipur Phaizang bang a i om theihna ding in, Memorandum of Understanding (MoU) tan a lungkim a hun nawnkei hi. Sate solkal in a noh hathat,a ngen hathat tamtang policy zang ahi i chih dungzui in, i deihte i muhna ding in, LOUNUAK BANG IN I NUAK KHAWM DIAMDIAM HIA?
----Kakipak---
No comments:
Post a Comment