By ~ Sang Quptong
Khovel a damlouhna leh sihna e i tuah ding mah ahi a, mihingte' damsung kum ding leng Bible in ana bikhiah mahbang in Kum.70 ahi a, hatna ziak in Kum 80 leng ahithei ana chi hi. Himahleh, Kum 70 sang a tamzaw leitung hinkhua ana zang i tam nawn hetkei.Tuailai hinkhua a leitung hinkhua ana zangbei tamtak i omta hi. Ka u te khat in 'A suak luite tou eivoi' a cih sek ka ngaihtuah thak leh, gen nei tak ana hihlam ka phawksuah hi. A suaklui (Mi upa lamte/Pi-le-Pu te' a genna ahi) te, tuailai lamte'n i vui di uh hileh kilawmtak, amau ei hon lehvui tamai uhi. Hiai pen bangziak ahi dia? I kidon dan leh kikepdan a diklouh ziak ahi diam aw chih ngaihtuahna ah hong kilang thei mawk hi.
Bible a thukhun lui lam enzual lehang. Huai lai a mite kum aza asim bang ana dam ua, leitung ah kum tamtak semgim leh puakgik pua in ana khosa zou mawk uhi. Tuate a kipan Kum asang asim paikan a i pi-pute uh hinkhua i etnawn leh; Bible a te toh a tehtheih kei zel hi. Hiai in, ahunbi kikhek dungzui leh mihing changkang dungzui a hinkhua tom deuhdeuh ahihdan hon langsak hi. I changkan deuhdeuh a, i pil deuhdeuh leh, i damsung kum uh leng sawt deuhdeuh leh kilawm hi a; ana huchi hetlou mawk . Hiai a kipan i muhtheih nawn ahihleh, I pilna leh changkannate uh ei adia a selam a zang i hihdan uh chiangtak in hon hilh nawn hi. A ziak ahihleh, i damsung kum dia bikhiah kum 70 lel leng tungzou lou in mi tamtak i mangthang ta uhi.
Nidanglai mite'n bel, a damlouh chiang un gamlak a sing leh lou a kipan thil tuamtuam damdawi ding in ana zang ua, ana dampih zel uhi.Tulai in bel, chemical tuamtuam zang a bawlte i zang ua, a zatna di bangtak a i zat leh bel i dampih tham uhi. Himahleh, alangkhat ah, a dam leh natna neiloute nangawn in i sihpih pen uh ahi nawnzel hi.
Khamtheih dia i zatpen mohpaihsa dan in koihta leng. Damlouhna i tuah chiang in, damdoi hat taktak, Doctor leh Chemical lam a siamna neite pansan masa lou in i na kipe sek ua, khatvei-nihvei a adamlouh chiang in, atam zawsem in i na kipia uhi. Hiai pen a hunsawt in lauhhuai mahmah thei hi. A ziak ahihleh, damlouhna i tuah nawn chiang in, ama a damdawi hat taktak zang i hihman in, i 'dose' hong sang a, mihing taksa in zounawn mahmah lou hi.Tuakia hilou in, i nekpeuh ei hon zou ding vang mahmah ta a, atawp in i sihloh zel uhi. Tua dan a i na kidon ziak ua i dam kumkhua ding ua Pathian in hon na bikhiah saksa pen tungzou nawn mahmah lou a si pahpah hiding in ka kigingta hi.
A biiktak in ei singtang mite' leh i doctor zatte uh huham deuh i hi d uam ! cih theihna chiang a omlai hi.Tua kia hilou in, doctor khenkhat in theihna kichian neilou ahi dia o ? cih theih ton bang om hi. A ziak ahihleh, ei local a doctor te'n a phut mot ( phumong) chiang un, State dang bang i naih uhi. Huai hun chiang in 'Na damdoi zatte uh a hatthei lua, a lauhuai' chih khawng i zak tangpi uh ahi. Hiai in, i lak ua Doctor khenkhatte'n qualify lou deuh leh ngaihtuahna sau neilou deuh ahi di uam aw! cih hon ngaihtuah sak veu hi. Tua ziak mah a tamtakte kidon vuaksuak a, leitung a hinkhua tomchik kia zang i hi kha ding hi.
Mipi lam a kimohsak huai nawn mahmah khat tuh, Doctor zat gina tak neilou a, mahni theihna a i kingak nung a leng alang alang i kawmtuah zualzual pen ahi nawn hi. Doctor khat in i natna a muhsuahna ding in regular tak a bangtan hiam i ki-etkol sak masak ngai hi. En huai leng ngak manlou a, 'phatuam kei, ka kingeihpih kei' chi a adang ah i kituah pah mawk sek uhi. Hiai in a enkoltu adia leng haksatna atut kia hilou in, damna leng muh haksa mahmah ding in i gingta hi. Huaiziak in, Pilvantheih tawp suah in i Damtheihna enkol tani chidan i hi.
Sapte thupil in 'Health is Wealth' ana chi hial hilou hiam??
No comments:
Post a Comment