BY ~ Pau Lian
"Nem, zan a na kiang a kon gente mangngilh kei teh maw, a dawnna lah
hon pelou chin a bangchi na de o ? "chi a hon kan mai ka hi chi in
UMuan in nitaklam khat nidang a hon phone ngeina bang in hon phone
a, kei leng gen ding thei zoklou in ka kingaihtuah dedu hi.
Muanpu in bang chi e Nem ? Haksa lua hia ? Na lungtun louhna ka hih leh zaw
genmai in. Hon it a hon ngai ka hi chih hon theisak nuam ka hi hon chi
hi. Ken leng ..Umuan ahi theitan in zaw ngaihzawng ka nei nuam naikei,
ka piching naikei a,hon it a hon ngai taktak na hih leh hon ngak mai in,
laisim tuaktuak i hi toh i maban ding gee l phot leng maw chi hi. Maban
hong hoih phot leh kuan itna kichi a nial teitei ngam dia e ! ka chi hi.
UMuan in leng huai na chih leh leng ka na ngak thei, hilehle na lungtun
louhna bang a om alehle, ka hun paisa zaw ka bawllem thei nonkei ding,
ka mel ka puam na sit leh leng bawl theilou ka hih chiang in sittheih
mah na hi, maban a nang kon itna ziak a omdan hoih leh kilawm a om
ding chi a ka kichiamte na theihlai leh zaw gingta mai in, lungtang
neithou sam ka hi. Pasal khat in itna ziak a kibawlhoih a lunggulh leh
huai kainiamtu in zaw pang mahmah ken aw hon chi a, ka ngaihdan
ahihlouh luat man in a paulai ka tuh a...khawl dih Umuan, ken mel leh
puam ah kuamah ka deidan kei, na gen le a dikkei, itna ziak a kikhek
ngap nahih leng ka thei, ging leng ka gingta mah, hilehleng hon ngak
hamham dia kon nget in na kibawlhoih sawmna a kaihniam a hon
puklawh sak leh zaw na itna diklou hizaw ding ahi ka chi hi. Sawtlou
nung in Umuanpu in hon puksak hial din zaw ka gingkei, hilehleng hon
thadah sak ding in ka gingta a huaiziak a ka gen ahi. Ka thu na man na
din ken leng nangthu ka mang masa dia na kiman matan ka na ngak
ding hon chi a, ken leng hitham e,lai hoihtak in i simtuak dia,nu leh pa
lamet bang in sepna hoihte i muh sawm dia nuamsa tak a om ding i hi
ka chita hi.
Kha tampi pailiam mahleh UMuanpu in a ngeina bang in hon genzom zel
a,a khen chiang bang in ka kinaklawh dekdek uhi. Mi luhlul tak ahi ka chi
a, hichi tel a hon ngai a hon awlmawh peih tuakkha nailou ka hih man in
mak ka sa a,ka lawmte kiang bang ah ka genchiang in leng Umuanpu
tuh a gumthei mahmah ua, na su hehpihhuai ngei..na kituah di uleh
kituahlouh di uh kuan theilou pi, dawng suk ve, sepna neih chiang chauh
a kingaih di chih zaw thuval ka sa lua hon chih chiang bang un kei a
ding mah in leng zumhuaipi leh mi a dinmun ua en lua mah bang ka
kisak man in ka zum a, kingaihpih hial ding in lah huchi lam ka lunglut
louh ziak leh fellou a ka omkhak ding ka lauzel hi. A diktak in bel kei lam
kisitna ziak a ka piching zawk hun hon ngak mai in ka chih ahi a , ITNA
ZIAK A LAMPI NIH ka tel zawhlouh...Tel sawm sek mah leng ka
ngaihtuah teng in ka lungsim a buai a,tel ding theilou in ka om nilouh hi.
Niteng ,hunteng in kitatsatlou in ka kihou uh chi leng genkhial ding in ka
kikoih kei, Umuan hon awlmawh dan a lamdang a, a khenchiang bang in
ka kisuanglah a,a sun a zan a hong pawt te mite'n a muh chiang bang
un kingai dan in ana koih ua,ka pawt khop chiang bang uh leh si inn
lenkhop ding chiang bang a ka kitonlouh chiang un kikhen uh maw chi
peuh in hon dong thei mawk uhi. Pasal toupi khat hichi tel a hon vei a
khonung khawng a vataihsat khak ding leng a pap om zezen diam chih
theihkhop a ngaihtuahnate nei in hun awl ngak in kimin sim a ka omlai
in a genveu danmah in nikhat ka inn uah hong hoh a, a kam mahmah in
a itna thu a hon genta hi. Nem,ken le hichi tel a hon haipih dia a tung a
ka na kikoih hilou ahi. Hun hong kikhek toh kiton in kei mahmah leng
non khekzoh dante ka mu a,nang kua na hia chih kon musuak deuhdeuh
a huchi mah bang in ka itna leng a pung deuhdeuh. Hilehleng huai a pek
apan tuni dong kon itna thu genlou a nitak khat lel leng ka ihmut louh
pen tutan a dawnna omlouh zaw maksa ka hi, hon chi hi. Ken
leng,umuan,non itna zaw a thupi a ka theisiam kei dekdek zezen,
lawmta a kipolh kan a nuam omlou ahi ka chih ban ah kei nang apan
kuan a hon lamang tuan dia e..enve mite'n a kingai a hon koih thamta
ua, nang ziak a mi tamtak hong lengla lou zezen bang om a, bang dang
a a poimawh..itna neilou omlou ahi. Hilehleng hon ngaklai hamham inla
na lai mah sim zaw mai in ka chita hi.
Umuanpu leng a khase mahmah a, enve Nem, na pichin hun ding ka na
ngak a kon ngak khe zoukei dekdek. Khat veivei ka lungkia a, bangziak a
diam aw ? ka chi a kei leng ka buai. Na pichin luat ziak a pillua chin a ,
ken tuikang ngak a sawtpi hon ngak hi zaw ka hi . Na phung a zum leh
zah khuallou a hong kual den ing a, na tanau, na insak inkhangte ka
theihsuak vek hita mahleh eite gel kingai hilou, kilawmta maimai hilai
chih mi theih inle a zumhuai ta. Ken milak ah nang ka ngaihzawng ahi
kon na chi zel a, kon ngaihziak mah in genkhial hi in ka kikoih theikei.
Lawmta hihna zaw a beithei kei , hilehleng itna kichi laplouh theih ahi.
Hunbi neithei ahi hon chi hi. Ken leng bang chidan a itna in hunbi neithei
eita ka chih leh Umuan in ka gen na mankei lotel a hi maw..Tu'n lawmta
i hi, eigel kal lawmta maimai a vengthei ahi nawn kei. Na veng na pam
en leteh mi kingai mahmah napi le kiteng khalou tam a tam ahi. Tua ken
kon nget zaw huai lam tantan kawkpha nai leng ahi kei. Na itna kon
nget na AMEN ding chih hilel ahi , hon chi hi. Ka kingaihtuah a, itna
kichi le amak tel e maw, ' AW ' kon chih ziak a itna chihtheih pat ana
hitel a maw ? Non ngaihtung apan tuni tan en vengveng leteh kon
hawkei chih na thei, hiai lampi kama a kikhung zuih ding pen ka
theihlouh tuh kei teel sik in nang teel inla, lamipi hoihzaw ah hon pi
teitei in aw , ka chi a, Umuanpu in leng hitham e, lampi hoihlou a k ua
pai nuam omlou pi chi in nui thremthram kawm in hon kawi a huaini
apan tuh kingai ka hita uhi.
Kingaih hinkhua zat kei a din thil lamzang lua ahi kei hi. Kingaihpih ka
neih masak napen ahih na toh theihkholhsa neilou in ka ngaihdan a ka
pai butbut ton a tam a,a khen chiang bang in kinopmohna bang omkha
zel mah leh chillum toh valhkhawm zel in ka hihi thei uhi.Ngaihdamna
haumi hikei leh hichi tan hon tunpih diam aw chih ding khop in hon
enkol a, ka itna uh kumte kai kheng in kideihthoh tak in ka om uhi.
Kikhelah pipi in zan sawt taktak ka ka kihel ua. Sunchiang natawm in
leng inn te bang hon zutpih hial khop ding in hong kitulut hi. A khen
chiang in hiai bang itna ka tan zenzen hampha hina ing e ka chi a,
genseng louh kipahna ka uMuan kiang a baa ka hi ka chi a, kamsiamlou
ka hihman in genlou in kipaktak in ka omdap sek hi. Himahleh hiai
kipahnate'n zaw sawt a daih kei. Suahlam a ni a hong suak a tumlam a a
tum bang kipahna tomchik in a hong kilang a a mang pah zel hi. Ki itna
kichi hun sawtpi nuamtak in ana chiam in a kum a sim bang kituaktak in
khosa khawm mah le ung , ka ma a lungkhamna ka phut ding te'n huai
hunlui a kipahna teng a nawmvalh a, lungtang ah dahna a dimlet a,
khasia in lungngai mah leng hihtheih a om nawn kei. Hihkhia hina ing
e..itna siktui dawnkhial ka hi ve maw ka chita hi.
December 2009 kum ahi, a ni chiah bel thei nawnkei mah leng huaini a
thil ka kikupte uh ka mangngilh hetkei. Ka kingaih uh kum 3 a chinna
ding ni tamlou in samta chih ding in si inn ah lengkhawm tawp in
kholak ah ka vak ua, huchih lai in Umuanpu in Nem chi in ka khut hon
len kawm in, " i kikhenmai aw ? " hon chi guih hi. Ken leng lamdang sa
leh gingtalou ka hih man in , ka nui a, na ut leh nang leh nang kikhenve
ka chi hi. Umuan in leng nuam salou simpi in hon en a, ka taktak eive.
Hiai relationship ka chimtak lawta. Lehkha ka sim nuam hon chita hi.
Huai hun in dawng dingdan ka thei pah kei a, paulou phunlou in awl-awl
in ka pai ua , a tawp in ..bang ziak a tua na lungsim non khek thak
phing e ? A tung a ka gengen te tua nang hon genta neivoi maw ? Abul i
patsa hichi nimnem a tawp chih mawk mi theih din le zumhuai ka sa. Na
lungkim louhna a omleh gen leteh aw. Kei chu hichi maimai a hou om
theilou di ka hive , ka chi hi. Umuanpu in leng na hou om le ka chikei. I
maban ka khualna a ka hih sawm ahi. Lai kon sim dia. Sepna kon nei
phot dia . Hileh hiai hun awl sung a na ginom zawh nakleh hon
khahsuah lou di na hi. Huchia na ginom peihkei a nang a hoih zaw kei
sang a chin zaw na muh leh ana nei leteh na hampha zaw di hon
chimawk hi. Ken leng uMuan na thilgen ka theisiam kei. Hichi maimai
khong a kikhen chih zaw ka utkei. Non khen ut teitei leh zaw ken
bangmah ka gen theih omkei. Hilehleng, hunluite en inla huaite ziak
keleu in hiaibang thu non genpen genlouh hisak mai in. Kimin nailou
sasa a ka itna hon pia ing a , tua kon ngaihna in a tawpkhawk a kawk
tak a hiai thu na gen mawk zaw nang a kipan hilou ding ahi.Ngaihdang
nei na hi di maw ? chi in khase tak in ka kinunghei a, innlam zuan in ka
pai a, sausim ka painung in hon delhzui ding ka sak leh hon delhzuilou in
kei vuak in miallakpi ah ka paikha zaw mah hi.
Inn ka tun in lupna tung ah ka kidenna a, ka ngaituahna ah itna kichi
hiai khawng leltak ahi maw ! ka chi a ,ka uMuan in hon ze-etna a diam
aw ? chi a lungngai vungvung kawm in ka om hi. " Hehbaih lua khat ka
hi di. Ka omdan a dikkei. Kikhen taktak leng hilou a , kei a numei
penpen a heh a pang a pai chih mawk " chi peuh in ka kimawhsa a ;
himahleh ka uMuan in leng hon deih nawnlou a itna gurantee bei sak
hita a de o ? ka pai a hon nungdelh hetlou tel a, hon samkik ding ka sak
leh leng hon samkik hetlou chi in ka lungsim ah tuh dotna tampi a omta.
Hiai hun a ka kihehnep theihna omsun tuh ka uMuan in hon ze-etna
maimai hinteh ka chi a, ka lawmnu Chiching kiang ah thu omdan teng
phone tungtawn in ka hilhta hi. Chiching bel ngaihzawng neih nalam a
lawmta lak a a neitam pawl ahihman in ka thil gen thupi lua in hon
koihsak kei a, itna khong hichi mah eivoi, a dang a tam voi thupi loupi.
Huai nang uMuan khemkhem hon chih san a, kikhen siang uh maw hon
chi hi..Ken leng kikhensiang chih zaw ka ge nthei kei. Kina chih ding ahi
mai, ka chi a, Chiching in leng itna kichi hon theisuah dekpan na hi.
Zingkhua hong vak leh na vengmai ding uh hon chi hi. Ken leng himah
e maw , a hoihlam kipiak kan omlou pi chi in mangpha ka kikhak ua.
Huainung sawt simtak ka kingaihtuah nung in ka ihmu ta hi.
Zing ka thoh in ngeina bang in ka inbox ka check a, himah eh nidang a
bang nawnkei. Nidang a thouta maw ? Annhuanta maw ? Bang meh
huan dek e?..tuzan ka mang in kon mu. Kon ngailua ....chihte ana omkei
hi. Huai hun in ka lungsim ah ..eh ! kikhen taktak mah ka mawk di uah
aw , ka chi a, kei leng kiliansak thou ka hihman in houpih masa nuamlou
in ama hon houpih ding kangakta hi.
Sun a hong hihtan in leng a hon houpih kei. Nitaklam ann ka huan
kawm in message hong lut khak leh chi in ka phone ka enzel a, lah a
hong lut mahmah kei hi. Nitaklam ann nek zawh in Chichingte inn ah ka
vahoh a thu omdan kikum in ngaihdan chiat ka vagen nilouh uhi.
Chiching in bel pasal khawng na awlmawh luat leh kiliansak ding mah uh
ahi. A kisik matan ngaihsak het koh, hon chi ahihman in kei leng
kinuaksak zek ding ka chi a, sawtsim Chichingte inn a ka om zawh in ka
pai hi. Lampi a ka pai lai in ka message a hong lut a, Nem, heh lawlai
maw ? Na ngaihdanlou ka genkha a hon ngaidam in aw ? Na lungsim ka
etna ahi aw ? Non it taktak hiam chih ka et leh, tun zaw ka theita ? Kei
eive hon ittu. Ken kon ngaih ziak maimai a hon ngaithuk na hi. Tun ki-etkhiak na in tomchik sung kisuheh dan in i om a, bang na gen de o ? chi a ka na hungaih leh na dai dide a, om zoulou in kon contact maive. Hon contact masa tuh ka hi peuhman a , bang ngaihdan na nei diam ah ? hon chi hi. Ken leng thuk nuamsim mahleng Chiching hon thuhilhna mang in pautam selou in ka phone ka sakhua ah ka guang a, innlam ka manawh zomta hi.
Inn ka tun hi common room ah Umuanpu a na tu a, ana nui sesu hi. Kei
bel kinuaksak ka hihman in room sung ah ka lut a , ka pawkhe ut
nawnkei hi. Sawtpi tutu mah leh ka pawtkhiak louh tak in sms hon khak
zungzung a, hichi tel a heh dan na hi maw ? Numeite na heh uleh na
mizia ding uh kitheihsuak ahi, a chih uh a dik ve. Na ut leh heh mai aw.
Min thil omdan hon kihilhkhin a , chi in a paita hi. Ken leng ka vadelh
pawt a, a baan ah ka len a, eile kinuaksak i voi. Nang non lungsim et
theih leh ken le kon lungsim et theithou di , chi a , hichi mah ka hi ///ka
chih leh ana hichi den zaw mai aw, chi in a khut ka let hon sahkhiaksak
a, a paitum vungvung ta hi.
Innsung ka lut in ka nu'n bang buaina nei na hi ua. Numei na hi a, mi
hong pawt gegu a room lam kho omsan chih khawng thupina a na ngaih
himhim leh tuh mihai hidi na hi. Numei om dingdan a na om theih kei
leh ngaihzawng le neih louh di ahi hon chi hi. Ka nu gen leng a dik mah
ahi a, tua ka omdan uh a haihuai dan leng ka thei. Tutung chu kei mawh
hiven chi in ka Umuan ka phone leh a lanuam kei taget hi. Message
tampi tak ka khak a, dawnna mulmal leng ka mu kei. Na ut -ut toh kingai
uau, ken a dang ka nei di chih khawng in hon dawng a. Ken leng den
chiang in a hilou tantan kitung zaw kha in teh chi in ka pautam ut
nawnkei hi. Huai nitak a pan in tuh ka kal uh se deudeuh in amah leng a
hong pawt nuam nawnkei hi. A kallak in kihou mah le ung ngaihzawng
ka neita chi a hon dawng gige man in ka chimawh sim a ; ahi in lah
gingta lou ka hih man in ngaihzawng dang neih a nuam hia ? chi
khawng in ka dong zel a, chiamnuih thutak ngen in ka kihou uhi.
Nitak khat tuh lawmte khat in hon phone a, Nem, nou uMuan toh kikhen
uh maw ? hon chi hi. Ken leng kikhenlou e. Bangziak e ? Ka chih leh,
kikhen na di uam ka chi a hi. Amah mundang khong ah a pawt ka mu
a, hon chi hi. Tulai zaw kina sekmah ung e, hilele kikhen chih omthei
mawk dia hia ? ka chi leh na kinak ua a hong pawt non kei a midang inn
a a pawt leh patauh huai hilou maw ! Nang na ngai kholkei a hia ? chi in
hon dong a. Ken leng ka lawmnu kiang ah, patau lele i hihtheih omlou
ahih chiang a maw. Ken amah muang ing a a itna na pom ing a tua
aman hichia hon bawl leh ama thu ahi. Apap paw na ve,, ka chih leh ka
lawmnu'n leng a pap puak ding hileh a moh zawzaw in paw ding ahi.
Kua mawh ahia ? chih teltak in ngaihtuah leteh aw. Aman zaw nang
mawh chi eive , hon chi a .Ken bel kei mawh ahihlam thei khalou ka
hihman in ama mawh hi, ka chi teitei ta hi.
Heiha khovel, a buaihuai tel aka maw. Ngaikei lenglah minsiat theih
khop a hon ngai a, hon try uh. I ngaihtak a lah hiaitan chih omlou a
lungkimna neilou. Tua kilungnoplouh zek hun a moh khuksak hizel.
Numei a piankhak ka kisikmah ve , chi vungvung kawm in Umuanpu ka
phone a ; pick-up lou ding ka sak leh ana pick-up zenzen a, hong
paupah a, nungak ka hel hon subuai ken , hon chi gaih hi. Kei leng ka
hehtha hong suak a. Kua nungak e na hel ? Numei bangzah a lungkim
sawm neita nang ? Na kamsiam sangkhial kha taktak mah kei vele maw
? Nang kikhen ni na chih a, ka lungsim non et te lungsim etna taktak di
sa a ka na hou koih leh nungak dang na lunggulh man ei leltak vele
maw ? ka chih leh Umuanpu in ..Ka kingai tuan ua hia ? Tangval in
nungak a ut-ut heltheih mah eivele , hon chi hi. Ken leng nungak na ut-ut helken kon chikei. Hilehleng tua nungaknu na hel apan in kou inn na
lawi vengveng a, i kinakna ziak le kei mawh na hisak a, miteng kiang ah
nana puangzak voi, ka chi in, Umuanpu leng a hong heh mahmah a,
bang e numei uang kei di. Kua tengteng kiang a gen kei ta huaithu ? Ka
ut leh YPA te mike in puang leng le kei thu eivoi.nang neivoi a mawh.
Hon sulungkim zoulou numei chu bang di ka chimah dia. Kei ka heh leh
nang na heh zaw a, ngaihdam kon nget khit nung natawm in le room
sung ah non omsan a, na nu hel dia hong kuan ka maw hua ni a ?? Ken
numei ka thu hon mangte ahi ka ngaih. Ka thu naman louh ziak in kon
ngaingap nonkei hon chi hi. Ken leng nem tak in, eh uMuan, kei
mawhna eimah ve, hilehle bang a na lungkimna ding chih ka theikei.
Nang kei kiang a na gen sang in ka lawmnu kiang ah na gen a, huai en
ve, ken bangchia na deihdan zuithei mawk di la?? Na deihdan kei a zuitu
ding pen kiang a na genkei leh bang a a kannatna ? Bang a na
lungkimna tan ka tunzawh louhna ? hon gen aw ,, please,,,, hiai i kalthu
hichi nimnem a kise din a kilawmkei lua ka chi hi.
Umuanpu leng a hong kingaihtuah a, ka theizoukei, nang thuthu hi , hon
chita hi. Ken leng kei thuthu ahihleh zaw kikhen louhial ding i hi. Hichi
tanpha i tun nung a, na deihdan a om leh hon hilh leteh zuimai ding ka
hi ka chita hi. Hiai thumalut in tuh Umuanpu lungsim ah hon nopnehna
tungsak ahi ding a, huai nungsang bel a ut chiah heh in, a utchaing in
lungkim in a ut-ut in om ta a, amah lah kei a dia ka first love ahihman in
ka khen theikei a, kinak hun a hong tun in heh mahmah lengle ka
lungkim hun in amah ka ngaihna a bei tuankei a apung hulhul zaw hi. A
diktak a gen in zaw aman leng hon ngaithou ding in ka koih a a langlam
daih a ken amah ka itna pen uanglua ahihman a aman leng theisiam a a
ut dandan a hon pei ana hi zaw lim hi.
Ni in lah ngak neilou,hunte lah pailiam zungzung in ka kal uh sia chichi
mah leng paizom tou a, hiai kinak kinuak chihte ki iit kingaite kal a a
masala ahi ve, chih ngaihdan nei theita in kong om a, ngailou ka
kisaklai in amah ka ngaihna tuh a tawpkhawk tung ahita a, amah kiang
a bangkim pe ding in leng kimanta chih theih khop in ka itna hon nget
louh tantan leng ka phalta hi.
Kum 2010 kumtawp a hong beita a. Khristmas hun nuamtakte
zangkhawm zou in kumthak melte munawn thei chi a kipak tak kawm a
om in, khakhat khanih hong pailiam zelte zangtou in ka kingaihkum uh
kum 5 bang a phak hial leh kinak kiselte tawm deuhta . Kipil deuhta
hinteh chih a lungmuang tak a om ahihlai in ka hinkhua suse thei ding
keimah chihtak zawhlouh ziak a ka thuak hun tuh a hong tungta.
Pumpelh theih hikei mahleh selguk tei a mite hihdan a hihtheih sam ding
tuh ahi. Hiai itna lampi kika nih ka hinkhua a ka zuih veu tuh koipen zuih
ding ahia chi in ka buai mahmah mai hi.
Nikhat tuh ka om nuamlou chi in inn ah ka lumdap a, ka sungte nim in
luak leng ka lua hi. Kei leng ka period in hon phak hak toh
kimuangmawh pah in ka tai theihna omsun ka Umuan kiang ah ka
omdan ka hilh a, amah leng patau petmah in a nung sawtlou in inn ah
hong hoh pah a, ka kiang ah a gen masak tuh kuamah theisak naiken
aw , chih ahi pahmai hi. Theisiamlou ka hihman in bangziak a ken
theisak lou di e ? Ka gil hon lian dia ken huai bangchi sel di keita ? A
lampi dang omlou pi . Kigu mai ni . Huailou a lamp i di omlou pi , ka chih
leh aman leng huai kiguuk mawk le bang a kivaak a bang ne di i mai a ?
Ka innkuan khosakna ulah haksa lua a, nu leh pate theih dia tua i thu
lah lungkhamhuai law dia maw. Bang lawh di chih ka theikei. A hihtheih
leh zingchiah phail am ah doctor va ki-ensak ni. Kuamah na hilh kei dia.
Pawt maimai didan in nong kuan di aw, hon chi a lungbuai laitak ahih
toh a hoih zaw khualna ahih khakleh chi in ki-ensak ding in ka
kithukimta uhi.
Umuanpu apai khit in ka kingaihtuah nilouh a, octor kiang a pai di
sapsap bangziak a Phailam naih a sawm a de o ? Hiai Lamka a le doctor
siam hichi tel a tam a ! Sukkiak sawm houh a diam ? chi in uMuanpu tuh
ka phone ta hi. Ama ngaihdan in bel hiai nau ka gilsung a kisiam khinta
pen a bang a bang hileh sukkiak a, minsiat ding dal a, mibang a hinkhua
a ngeina bang a zat ahi hi. Himahleh hiai bang deihtelna diklou tel thoh
ding ka ma a hong kilui pen tuh ka nialta a, hon it a hon ngai taktak na
hih leh i kiteng dia .Huchilou ahih leh zaw minsiatna bukim ka khu dia.
Nau leng ka kol zaw ding, ka chi hi. Umuanpu a heh mahmah a, lah
lawh ding bangmah a thei tuankei. Nitak annek khit chiah kimu ni chi in
hon gen a ken leng awle ka chita hi.
Nitak a hong hih in dawr kong khat ah ka kimu ua, lunggim chiatchiat
kihou manglou in ka pai dundun uhi. Lampi a ka pailai un Umuanpu
in..Nem ka gen ngaikhe mai in. Enve i kum himhim le tawm lawlai. Mi
theih ding pen zaw ahi ding mah in ka koih. Kiguk a zineih chih vuak hi
leng a poina omkei. Naupai hita chin a, kuamah hon th eilou omlou di ua,
hon gennuam a phe kheukhou ding uh. Nu-leh-pate theih ding mahmah
leng kei zaw ka utkei law mahmah. Tapa duat hing a, min mihoih chi a
hon phatphat pa uh tua nungak gai chih maimah. Nang le na hithou.
Vengsung a numei sapsap dia a chitak leh kizen pawl a hon theih uh
zawlgai chih mawk ! Minsiat huailua hilou maw ? Hon chi hi. Ken leng
uMuan na genlouh in leng a zumhuai dan ka theithou. I tatsiat khak
zualnate ah kisiamtanlou in a guk in ka na kingaihtuah a, ka kisiik
petmah a, himahleh huai zaw hun paisa ahi. Samkik nuam lengle ka
samkik theikei. Itna dik in hon en inla, kiteng mai leng a veng mai ding.
Kei numei ka hi. Ka minsiatna liahkhuhtu a napan kei leh kua dang ka
beel dia e ?Nau sukkiak chih zaw ka utkei. Hon theikhe thouthou ding
ua, ka minsiatna abei tuankei ding , ka chih leh uMuanpu in..bang e ?
Hai na chia ,, kuan hon theikhe mahmah di sa e ? Suke ding ka chih leh
hon selkei leteh nang a dia hoihzaw geel hizaw ka hi, hon chi hi. Ken
leng huchi ahihleh non ngai hia ka chi a, a dai dide hi. Ken leng ..hichia
ka buaisiat a na daih dide nak ahi mak kon sak. Itna taktak hon pe di
hon sa ing a, tua non thulim bawllouh mawk thildik hilou ahi. Kei non
deihlouh tawp in leng na sisan suak hiai ka gil a ka paai pen bek
hehpihna na neih ding ahi. Lampi khat i sikkhelh hun in leng a lampi
dang pen sikkhial kei leng hilou maw ? ka chi hi.Thakhat in a hong heh
guih a, gentam nawn ken. Ka gensa teng chu a final ahi mai, hon chi a.
Ken leng heh mahmah kawm in kei utlouhna ah hiaibang na hihtheina
hiam en ni aw, chi in ka nunghei san hi.
U muanpu in tuh a khonung in hon nungdelh a, himahleh hiani in tuh
hon delhpha vual ding ahi kei. Inn ka tun in ka inn uah hong lut a,
lunggim chi meltak in common room ah tu uMuanpu ka en gu zel a a
tawp in kibuksan nuam nawnlou in ka vatukhia hi. Kihoulou hial a TV en
a ka tutlai un uMuanpu in ka pa a sam a, thil omdan a hilhta a, nau leng
paihsawm ka hih dante uleh ka utlouh dan thute leng a hilh a, ka nu leh
pa'n lamdang sa in heh lawtel mah le uh hihtheih om nonlou ahihman in
kigawm mai un. Hihkhial sapsap ding in leng hih khiallou nahi uh. Na
itna uh noptaalna ding in na zangkhata mah le uteh kinunghei a minsiat
khawksa lou a a diklam a kal non suan sawm man un kon pakta zaw uhi
chi hi. Ka pa toh a kihoulim ua, aman apa hilh ngamlou ahih dan leh nou
theihpih a Nenem toh kiteng a, a innsung ua pilut a, a khonung a
hiaibang thilteng tung ahih dan ama pate hilh ding in ngen a, ka pa'n
leng hon theisiam mai na ding uh lungkham kei un chikawm in leh, tan u
tapate khawng in siangthou tak in pasal/zi hon nei le uh chi a i na
ngahtuahte mihing ngaihtuahna maimai zaw ana hilim veh aw maw !!
Tun hiai nau na sa leh sisan ua na gawm un nou na ki-itna uh hon
gawm nawnsawn tu hi leh a ke , chi in ka pa'n hon thuhilh zawh in,
thumna hon neihsak a, Muanpu in leng a lawmpa kiang ah thu omdan
apate hilh ding in sawl a, kou leng chituam tak in nu leh pa theihpih in
ka kiguta uhi. Zawlgai/bookingsa chi in minsiatna leh nunglam a mite
gensiat tampi tak zamah leng, hiai hun buaihuai tak a decission hoihtak
ka na lakkhak in ka hunlui ah ka puakgik teng a mangsak zaw a, tuni tan
dong in hih khiallou mah ka hi chi in ka tanu deihtohtak ka nupa ua
kemtou in nuamsa tak in innkuan ka bawl zawta uhi. Huham tak a
nungak bang a hinkhua ka zatsang mah in minse tak a nupi ka hih in ka
hinkhua ah kipahna in mun a nei zaw a, nungak tampi abortion hihsa a
ka theih nalh taktak a kicheite leng ka engtuan kei hi. Itna ah zaw lampi
nih a om. A hoihlou leh thil diklou lampi i totkhak ni in leng a hoihzaw
lampi hon dawk pen i zuih leh kipahna hon tun zaw hi in ka thei a.Tu in
bel nupi kipak theitak ka hi zota hi.
Beita...Beita
No comments:
Post a Comment