ITNA KUTIS

By Muana Guite

"Kutis i kimawl chiah i kutchu a siat chiang in a board apat mah ahi i kutchu di i tel khaik zel” _ MIGUM.

Phalbi sawm nih vei khong thuak kha chiang in KUTIS (Marble) kimawl khalou a vang mahmah din i ging ahi. A kimawl khalou te'n le a kimawl dan bek chu i thei di un a gingtak huai mahmah hi.

Tangval khe pan tung chu KUTIS kimawl na a Board i koih dan in, Nungak melhoih i sakte limlak chu i koih khawm tei sam hi. Huai a boardte lak a pan in i zatsiam deuh chih di a diam ah hoih i sak deuh pen kha i KUTCHU din i koih khia hi. Tua dan mah in Nungak melhoih i sak teng lak a i deih deuh ana om tuam se a,huai pen hi i ngaih bawl deuh pen hi.

Huchi in a KUTIS chu i hong kimawl petmah ta a, A kiBoard te kha i KUTCHU in i hon kap khe ziahziah a. I KUTCHU a hong siat chiang in i heh mahmah a; lah gen di dang om tuanlou ahih chiang in, a board te apat hoih i sak pen khat i KUTCHU din i hon koih khia hi.

KUTIS i kimawl chiang in a boardte koihna di i giit kual a, i KUTCHU a i kapkhiat  chiah ei a hong  hizel hi. Himahleh en i kap khelh a lawmte'n a kap khiak ua leh lah  amau a ahi zel hi. I ngaihzawngte bang i kep siamlouh chiang in i lawmte'n hon kap khiak sak ua, amau a hong suak hi.

I hong kimawl a i hon phir khia bang chu anuam tel mai. Huai dan in i luck laitak in chu Ngaihzawng bang le i phir khe thei a,i ki hi sak mahmah hi. Duh-amna a dim chih mahtak phir khiat den i hon sawm leh,  i hong  KUTIS hiau a , i kapkhiat teng le i board kik hon a ngai hi. Nungak le khat chauh deih khop lou a nih leh thum i kop leh maban chu DUH-AM CHAANNA ahi mai. Kuamah hon ittu ding i mu kei daih hi.

Ngaihzawng i neihlai in chu nungak dang i buai pih kei a, midang poimoh din le i kiging kei bok hi. Himahleh ginlouhpi in  kitheihsiam louh ziak hiam in i  hong kikhen a. I lawm Numeite lak ah hoih i sak deuh pen i hon Pibawl nawn hi. Huchi'n ah  i lawmte lak apan teltuam i hon neih chiang in amah hi i  KUTCHU a hong suak nawn hi.

KUTIS  kimawlna  ah  KUTCHU a poimoh a ; himahleh  a panna di ' a Board '  na neih kei leh  a KUTCHU zatna di omlou ahi. Huai ziak in,  ka Tangval pihte aw a Board di nei phot din na Lawm Numeite nawlkhin ken, a KUTCHU di buailouh na ding in.......hahaha.

HOUTHOU (15-01-2013 )